Matthieu 10

Yésʉs lɨ́ etwâr bʉ̂r o mílʉ́mlʉ́ kám le obá

(Marc 3.13-19; 6.7-13; Luc 6.12-16; 9.1-6)

1Nó ó Yésʉs á nze jébe ompʉ́n kám le obá bé, ntɔ̂ʼ dwe bé nkul jwɨ́ɨ eso méleme le etiʼ mímbél mímyɛ̂h myé á be e mekpaa nkʉ̂ bidyɛ̂m mí. 2Bʉr o mílʉ́mlʉ́ mé Yésʉs kám le obá baá, bé ó bâ: waá esôʼ Simon á jɨjébɔɔ ó, “Pétrus” nyá, le André, mɨ́ɔɔ́ wé; Jacques le mɨ́ɔɔ́ wé, Yʉánɛs, bɨ́bɛ̂h bwán mé Zebedê; 3Philippe bé e Barthélemy, Thomas bé e Matthieu (mʉr á be lɨ́ enʉǎ mɔnɨ́ tœ́a nyá), Jacques, mwân mé Alfê, Tadê, 4Simon, mʉr á jɨjébɔɔ ó, “Kɔmlʉ kwár” nyá, le Yʉ́das Iskariôt, mʉr á bɛ́ma Yésʉs nyá.

5Bʉr kám le obá ónɨ̌ ó Yésʉs á lómo, nyé osí pǎ dwe bé metwɨ́ɨ́ mâ. Nye ó: «Atô gá kwá bʉr o dí abe óYúden bá. Anî gá ɨ́ nkana bʉ̂r ó Samarî.

6«Tóʼ gá kwá kúl bʉ̂r o b'Ɨ́zraɛ̂l, ɨ́ binteme mû sí dîm bí. 7Nzɨ́ e nzɨ̌, lɛ́yɨ́ɨ́ gá ó: “Dâ mû ó kúno etyêl Mpóʼo nyé ɨ́ sɔ́má yɨ́n!” 8Tiʼɨɨ gá mimbêl. Pɛhɛɛ gá odwe. Tiʼɨɨ gá ntémé minzɨ̂nzǎm. Soʼ gá meleme. Bɨ̌n bɨ́ bi, abwâm. Dwéʼ gá ntémé, abɛ́ma. 9Mʉr anʉa gá gʉ̂l yé, damá jóʼǒ nkóho mɔnɨ́, nkʉ̂ ntémé bwá mínzaŋ ɨ́ mimpɨ́ʼ myé. 10Mʉr anʉa gá myah wé, nkʉ̂ bidur bibá, nkʉ̂ osípah, nkʉ̂ súmu, ebě, lóbila jala ó, dwidweŋɔɔ méde mé, dweŋɔɔ̌ dwêʼ.

11«Ɨ́ binkana le mekwár bɨ́n ónî bí, tááráá édî gá, nkʉ̂ yé e mʉr dí ejala le ebaʼle bɨ́n tɨ̂ʼ nyá. Bɨ̌n a dí ɨ́ mbɛ̌r wé, tó pyâl ɨ́ jɔʼ bɨ́n ólaa tɨ̂ʼ yɨ́. 12Bɨ́n ónî mbɛ̌r waá nó, lɛ́yɨ́ɨ́ gá ó: “Nzyɛ̌m gbâʼ bɨ̌n mepyɛbla ɨ́ miléme, bʉr ó mbɛ̌r wɨ̂.” 13Bʉ̂r ó mbɛ̌r waá báʼlé bɨ́n mbi dí ejala wɨ́ nɛ́ɛ: mepyɛbla mɨ́n, mé líʼɨɨ ɨ́ sɔ́má yɔ́ɔ́ ɨ́ jɔʼ bɨ́n ólaa, tô yɨ́. Sâ gwár, bʉ̂r baá óbe, anʉa bɨ́n mpʉ dí ejala yɨ́ nó, bɨ̌n e pɛ́ʼ mépyɛbla mɨ́n, tô e mê. 14Bé óbe, anʉa bɨ́n mbɨ̂mbɨá ɨ́ gúú mbɛ̌r, nkʉ̂ yʉ́ʉ́ nkana, nye akǎm lwǐb yɨ́n nó, pʉʼaa gá ɨ́ bigúmo byaá. Bɨ̌n a kúró pím ngá nara bɨ́n ɨ́ mebo nyɨ́. 15Mě lɛ́ɛ́ bɨ́n lɨ́ otyeetye ó, ɨ́ dʉ́ó Nzyɛ̌m ngá tíʼe bʉ̂r milɔ̌b yɨ́, ntɨ́ʼá le mekpaa bʉ̂r o bínkana le mekwár maá ngá bi bí, byé óbe ó, laa byaá mé Sodôm e Gómɔr.»

Metwɨ́ɨ́ me dí edumo e tíblá má

(Marc 13.9-13; Luc 21.12-17)

16«Paá bee gâ: mɨ́ lómo bɨ́n mpʉ bínteme páʼ onkœœ! Nó, gwá di gá le ocwóó. Cɨ́áá gá mpʉ ónyʉ́a. Bɨ̌n a tálá míléme mpʉ mépɨbaa. 17Bɨ̌n a báʼ bʉ̂r, ebě, bé ópur bɨ́n ɨ́ mempáh mílɔ̌b le eŋmɛ́hɔɔ bɨ́n mingáhá ɨ́ mempáh mínjɨʼla mɔ́ɔ́. 18Bɨ̌n bé ósáŋɔɔ nó ó ɨ́ lɔ̌b wâm. Bé ótô e bɨ̌n kwá mingóvina le etyêl bɨ́n ɨ́ míh mé ójwɨ́ɨ. Bɨ̌n bé ósáŋɔɔ nó ó, bɨ̌n nkʉ̂ gwâ lɛ́ɛ ótyeetye bɨ́n dí egʉ́a wɨ́ ɨ́ míh mɔ́ɔ́ le míh mé bʉ̂r o dí abe óYúden bá. 19Bé ótô e bɨ̌n ɨ́ mpáh milɔ̌b nó, asyɛl gá bá ɨ́ nkar wɨ́n le lwǐb bɨ́n ngá lwib tɨ̂ʼ yɨ́. Nzyɛ̌m ólɛ̂ʼle bɨ́n yǎ ɨ́ tyé gwár yaá. 20Ebě, ntʉ bɨ́n ngá lwib. Sísǐm mé Nzyɛ̌m Sɔ́ŋ wɨ́n ó ngá lwib ɨ́ bɨ̌n.

21«Mɨ́ɔɔ́ óbɛ́ma mɨ́ɔɔ́ ó, bé jʉ́ʼoo nye. Sɔ́ŋ óbɛ́ma mwân. Bwân, bé ógbɔba le obyɛ́l bɔ́ɔ́, jʉ̂ bê. 22Bʉr bɨ́bɛ̂h, bé óbene bɨ́n ɨ́ lɔ̌b wâm. Nó waá ngá dûhwo, tó pyâl lɨ́ esíé nyá, nyɨ́haá ó ngá tiʼe. 23Bé óntɨ̂ʼ bɨ́n ɨ́ yɨ̂ʼ nkana nó: kpɛ́yɨ́ɨ́ gâ, tô ɨ́ yʉ́ʉ́. Mě lɛ́ɛ́ bɨ́n lɨ́ otyeetye ó, Mwân mé Mʉr, nye óbáʼǎ pyâl, bɨ̌n dína apǎ kumo bínkana bí Ɨ́zraɛ̂l bíbyɛ̂h.

24«Mpʉ́n áláá mʉ̂r lɛ́ʼlé nyé nyá; syɛ̂l mesâ alaa njwɨ́ɨ wé. 25Mpʉ́n sâʼ mpʉ mʉ̂r á lɛ̂ʼle nye nyá á sâ yɨ́; syɛ̂l mesâ sâʼ mpʉ njwɨ́ɨ wé. Nó ó dí ejala yɨ́. Lʉ́ mbɛ̌r bʉ̂r sí jwɨrɔɔ díe ó, “Béelzébul” nó, yé lɛ́ʼlé ó, bʉr ó mbɛ̌r bʉ̂r waá bɨ́ɛ, bé ókǎ jwɨrɔɔ míe me dí ɨ́ buú bébe má!»

Mʉr jálá le ekpɛ́ɔɔ nyá

(Luc 12.2-7)

26«Akpɛ́ɛ gá bê. Sá yɨ́yɛ̂h dí lɨ́ esǒ yɨ́, yé ógwíha. Sá yɨ́yɛ̂h dí solá yɨ́, yé ógʉ́ŋɔɔ. 27Sá mé lɛ́ɛ́ bɨ́n lɨ́ edúrʉ́ʉ́ yɨ́, báʼá lɛ́ɛ gá yé ɨ́ móhó ɨ́ kpɛŋlɛm. Sá bɨ́n jóʼó lɨ́ esǒ yɨ́, tyɛ́bɨ́ɨ́ gá kʉ́ mié, bɨ̌n e túnó yê. 28Ayɨ́ kpɛ́ɛ gá bʉr o dí e nkul ejʉ̂ bɨ́n nkǒ páʼ bípúno, dí abe e nkul ejʉ̂ bɨ́n nkǒ páʼ sísǐm bá. Kpɛ́yɨ́ɨ́ gá njɨ Nzyɛ̌m, mʉr dí e nkul esâ ó, nyʉ̂l le sísǐm, byé tô dwe ɨ́ bɨ́ siʼe nyá. 29Bé bɛ́má báátɔlɔɔ obá ó, pára gwár. Damá jóʼo nó, kâr átɔlɔɔ ngwár dí e nkul ekur sí, abe ɨ́ gwɨ́má mé Sɔ́ŋ wɨ́n. 30Ntémé, Nzyɛ̌m, nyɨ́ gʉ́ǎ bím mpúo nyɨnyɛ̂h dí bɨ̌n ɨ́ milʉ̂ nyɨ́ tâŋ. 31Ayɨ́ jóʼo gá bé bʉ́á: bɨ̌n bé le odimé, laa báátɔlɔɔ ɨ́ buo buo!»

Ekam nkʉ̂ ekɛ́lǎ Yésʉs

(Luc 12.8-9)

32«Nó mʉ̂r sí tɨ̂ʼ bɨr yé, gbân mé témé bʉr nó, me ntémé ógbân nyé ɨ́ míh mé Sɔ́ŋ wǎm dí ɨ́ jʉ́o kʉ́ nyá. 33Sâ gwár, mʉ̂r ókɛ́la ɨ́ míh mé bʉ̂r ó, nyé agʉ́a mé nó, me ókɛ́la nyé ntémé ɨ́ míh mé Sɔ́ŋ wǎm dí ɨ́ jʉ́o kʉ́ nyá.»

Yésʉs á nze ó, nzě tumo dɔ̂m

(Luc 12.51-53; 14.26-27)

34«Abûʼla gá ó, me á nze ó, lɨ́ enzě gbâ mépyɛbla páʼ bʉr ó sí yɨ̂. Me á bé anzě gbâ mépyɛbla. Me á nze ó, lɨ́ enzě tímlě pɛl! 35Ebě, me á nze bɛ̂ʼ ó, sohó, bé e sɔ́ŋ; eséhe, bé e nyɔ̌ŋ; ndyɛl, bé e mpɔ́mlʉ́. 36Mʉr óbɔma le ontɨ̂m le obɨn bé ó ɨ́ mbɛ̌r bʉ̂r wé tʉ́ŋlʉ̌.»

37«Waá dí ekpɛl sɔ́ŋ, nkʉ̂ nyɔ̌ŋ, laǎ bím nyé kpɛ́l mé yɨ́ nyá, nye ɨ́ dwɛ̂hwa, ajala e me. Waá kpɛ́l loʼo yé, nkʉ̂ sile wé, laǎ bím nyé kpɛ́l mé yɨ́ nyá, nye ɨ́ dwɛ̂hwa. Nyé ajala e me. 38Waá dí ankɛ́ɛ̌ kolôs yé, dû mé nyá, nye ɨ́ dwɛ̂hwa. Nyé ajala e me. 39Waá ngá kamle e twiʼ yé nyá, ódímle yê. Waá ngá dwě twiʼ yé ɨ́ lɔ̌b wâm nyá, óbáʼǎ bi yê.»

Myɛ́na

(Marc 9.41)

40«Mʉr nʉ́á bɨ́n mbɨ̂mbɨá nyá, nyě nʉá ó me. Waá nʉ́á mé nyá, nʉa ó, mʉr á ntɨh me nyá. 41Mʉr nʉ́á ngwíha milɔ̌b mé Nzyɛ̌m mbɨ̂mbɨá ɨ́ lɔ̌b dǐ ngwíha milɔ̌b mé Nzyɛ̌m wé nyá, óbǐ mbi myɛ́na dí edweŋɔɔ ógwíha o mílɔ̌b má. Mʉr nʉ́á mʉ̂r dí tîtyěl ɨ́ míh mé Nzyɛ̌m ɨ́ lɔ̌b ótîtyěl wé nyá, óbǐ mbi myɛ́na dí edweŋɔɔ ótîtyěl o bʉ̂r má. 42Mě lɛ́ɛ́ bɨ́n lɨ́ otyeetye ó, ɨ́ sɔ́má ómpʉ́n bâm bɨ́bɛ̂h, mʉ̂r ódwe waá dí ɨ́ buú twâʼwo tɨ̂ʼ nyá, damá bě bélé médíbé métálá gwár e gwár, ebe mʉ̂r waá dí mpʉ́n wǎm nó, nye óbǐ mpǎŋ myɛ́na.»

Currently Selected:

Matthieu 10: ozm

Highlight

Copy