Luc 24

Yésʉs, nyɨ́ pah ɨ́ soo

(Matthieu 28.1-10; Marc 16.1-8; Yʉánɛs 20.19-23)

1Ɨ́ dwiné mɛ́n kúnó ɨ́ móhó sóno, bʉbá baá nzě nkɛ́ɛ, tóŋɔɔ̌ nko sóo. Bé á be ó e múló mé élɔma ndu e lɔbína, bisá bé á to komlo bí. 2Jɔʼ bé á pyâl yɨ́, bé ntɔ̂ʼ kœb ó, ekóʼ, lé á si bíŋla lé omér, lé mû lɨ́ empah é num sóo! 3Bé ntɔ̂ʼ nî ɨ́ soo tʉ́ŋlʉ̌. Sâ gwár, bé á bé akœ̌b múú mé Tî Yésʉs tɨ̂. 4Mpʉ bé á be, bé mû miléme ɨ́ mo ɨ́ nzamá yɨ́, bé kǎ twɨra ó, bʉr obá, bé mû ó tɨ̂ʼ e mikán ɨ́ pan pan ɨ́ menyʉ́l mɔ́ɔ́. 5Nó ó mpʉ bé á bee bʉr ónɨ̌ yɨ́, bʉ́á nzě mɛ̂r bé ɨ́ miléme, bé ntɔ̂ʼ bɨʼ mémpǒm sí. Bʉr baá ntɔ̂ʼ lɛ́ɛ e bé ó: «Bɨ̌n bé lɨ́ enzě sáa mʉ̂r dí etiʼe nyá páʼ odwe ɨ́ yé? 6Nyé akǎ be wâ. Nyɨ́ pah ɨ́ soo. Símsáá gá mpʉ nyé á lwib e bɨ̌n ɨ́ jɔʼ nyé á be, nye dína ɨ́ sí Galilê yɨ́. Nye á lɛ́ɛ ó: 7“Yé jala ó, bé bɛ́maa Mwân mé Mʉr, tímle nyé ɨ́ mebó mé ósyɛ̂l o mísyóm. Bé óbomlo nyé ɨ́ kolôs kʉ́. Nye ódwe, debe ɨ́ soo. Nye ójâ ɨ́ soo melú mébá. Lɨ́ elú élɛ̂l, nyé opah.”»

8Jɔʼ bé á jóʼo nó yɨ́, bé ntɔ̂ʼ kǎ símsa mékǎn mé Yésʉs á boo lɨlɛ́ɛ bé má. 9Bé ntɔ̂ʼ tô kʉ̌l, búlɔɔ, tó lɛ́ɔɔ bʉ̂r o mílʉ́mlʉ́ kám e ngwár, bé e bʉ́ʉ́ bʉ̂r bɨ́bɛ̂h, sá yɨ́yɛ̂h á syɛ́ɛ yɨ́. 10Bʉbá baá, bé á be ó: Maria, silě Magdalâ, le Yʉána, le Maria, nyɔ̌ŋ mé Jacques ti e bʉ́ʉ́ bʉ́bá, bé e boo nɔ́ɔ́, bé á be bá. Bé á si baʼa lɛ́ɛ bʉr o mílʉ́mlʉ́ mé Yésʉs lɔ́ɔ ngwár waá. 11Sâ gwár, bʉr o mílʉ́mlʉ́ mé Yésʉs, bé á gʉ́a ó, yé ó baántéʼenteʼe o mílɔ́ɔ. Bé á bé akǎm lɔ́ɔ waá. 12Damá jóʼo nó, Pétrus á si mɔa sí ɨ́ bʉ̂b, tô kám, ntɔ̂ʼ pyâl ɨ́ soo, kúrwo sí, déŋle tʉ́ŋlʉ̌, beě njɨ mimyɔʼ bé á dyɛl ɨ́ múu mí. (Mimyɔʼ myaá, myé á be ó misɛ́á e ndɔ́má kán ɨ́ pumopumo.) Nye ntɔ̂ʼ búla, le ekʉ́ kâm sá nyê bee yɨ́.

Bʉr obá, bé lɨ́ etô ɨ́ nzɨ̌ Emáʉs

13Ɨ́ móhó ngwár waá, bʉ́ʉ́ bʉ̂r obá ɨ́ sɔ́má yɔ́ɔ́ nzě duho ɨ́ Yerʉ́zalɛm, lɨ́ etóŋɔɔ kwár á be e díe ó, Emáʉs nyɨ́. Páʼ Yerʉ́zalɛm le Emáʉs, yé ó kúnókúno le okíloméra kám e ngwár. 14Nzɨ́ e nzɨ̌, bé á be ó lɨ́ elwib bísá bíbyɛ̂h byé á be, alúno syɛ́ɛ̌ Yerʉ́zalɛm bí. 15Mpʉ bé á lɨlɛ́ɛla le edíila métíá nó yɨ́, Yésʉs mʉr tɨ̂ʼ ntɔ̂ʼ dû bê, tó kœb bê. Bé e boo nɔ́ɔ́ ntɔ̂ʼ syɛŋǎ sɔ́má gwár. 16Jɔʼ bé á be lɨ́ etô yɨ́, bé á be lɨ́ ebee nyé; sâ gwár, adweʼe yɨ́ɛ nye. 17Nó ó Yésʉs á nze dî e bé ó: «Bɨ̌n pʉgʉ́ lab yé ɨ́ nzɨ̌ nyɨ̂ʼ mûh?»

Bé ntɔ̂ʼ tyɛ̂b, mempǒm milwaará le ebúʼ. 18Nyʉ́ʉ́ mʉ̂r tɨ̂ʼ á be e díe ó, Kleopâs nyá, nzě lɛ́ɛ e né ó: «Yê nyá? Nzê go ó njɨ njwóo wâʼ ɨ́ Yerʉ́zalɛm, lɨ́ esú ó, go jéʼaa sá dí esyɛ́ɛ ɨ́ melú mâʼ yɨ́ ɛ̌!»

19Yésʉs ntɔ̂ʼ dî e bé ó: «Yê ba syɛ́ɛ́ gʉ̂?»

Bé ntɔ̂ʼ yala e né ó: «Bɨ̌h lwib ó, sá dí edumo e Yésʉs, mʉr Nazarɛ̂t yɨ́. Nye á be ó ngwíha milɔ̌b mé Nzyɛ̌m. Nye á be ó, le ánɨ̂nɨ̂n nkul ɨ́ melab mé le ɨ́ bisyɛ́ɛla nyé á sɨsâ bí. Damá jóʼǒ Nzyɛ̌m, nkʉ̂ ntémé bʉr, bé á si bee nó, bɨ́bɛ̂h. 20-21Bɨ̌h bɨɛ á jwɨʼ ó, nye ó b'á duho kwá mé Nzyɛ̌m, ó nye ónzě táǎ góo, le edwǐh sí gá yɨ́ná Ɨ́zraɛ̂l ɨ́ mpila ébébe. Tó kœb ó, ojwɨ́ɨ o mpáh Nzyɛ̌m gá wɨ́ná, le ojwɨ́ɨ́ ó sí gá yɨ́ná, bé á si bɛ́ma nye, le esâ ó, bé dwêʼ nye mebě me jálá le eswie má. Nó ó bé á bomlo nye ɨ́ kolôs kʉ́ yɨ́. Ntémé, gúú lɔ̌b swîh, wé ó wɨ̂: gbaa yé á syɛ́ɛ nó, elú élɛ̂l ó dí kʉ́ lɨ̂. 22Píe tɨ̂, bʉ́ʉ́ bʉ́bá ó sɔ́má yɨ̂h sí lɛ́ɛ bɨ́h sá ékâm: mpʉ bê kúnó, tó dwɛ́ʼɔɔ̌ múú wé ɨ́ soo yɨ́, 23bê bé abee wê. Sâ gwár, bê ka nze lɛ́ɛ́ bɨ́h ó, beéngeles, bê sí pyâl bê, ntɔ̂ʼ lɛ́ɛ ó, Yésʉs, nyɨ́ pah. 24Bʉ́ʉ́ bʉ̂r ó sɔ́má yɨ̂h jóʼó nó bá, bé ntémé, bê sí tô ɨ́ soo, tó dwɛ́ʼɔɔ, tó kœbɔɔ̌ jwɨʼ gwár mpʉ bʉ́bâ lɛ́ɛ́ yɨ́. Sâ gwár, bê bé apǎ beě kuó mé Yésʉs mʉr tɨ̂.»

25Nó ó Yésʉs á nze lɛ́ɛ e bé ó: «Bɨ̌n bigʉʼlʉgʉ́, bɨ̌n bé ɨ́ buo mésónó, alɨ̌ bûʼlǎ lɔ́ɔ́ ógwíha o mílɔ̌b bé, bé á cɛma wɨ́. 26Bé á si lwib, dumo e Mʉ̌r Nzyɛ̌m á lœm múló mé jwɨ́ɨ nyá. Bé á cɛma ó, yé jala ó, nye síaa e mitúú nó, mpʉ̌ Nzyɛ̌m á kpɛl yɨ́, ó nye tôʼ di ɨ́ diá kûm nɨ́nɨ́ɨ́ yé.» 27Nye nzě nyɛl épâʼlǎ sá yɨ́yɛ̂h yé á be cɛmá ɨ́ Mekaná mé Nzyɛ̌m, dumo e né yɨ́, táare lɨ́ mekaná mé Moyɨ̂z, kumo e maá ógwíha o mílɔ̌b bé, bé á cɛma má.

28Jɔʼ bé á be, bé mû bǎʼ e kwár bé á tô nyɨ́ yɨ́, Yésʉs ntɔ̂ʼ sâ mpʉ̌ sá lɛ́ɛ́, nye ótô nzɨ́ dóló. 29Mpʉ bé á bee nó yɨ́, bé ntɔ̂ʼ lɛ́ɛ e né ó: «Mɨná díʼee gá wâ. Dʉ́o mû ó lɨ́ enzě jâ; pum lɨ́ edwíne.»

Bé e nɔ́ɔ́ nzě nî mbɛ̌r tʉ́ŋlʉ̌. 30Jɔʼ bé á be ɨ́ téble lɨ́ edǐ de yɨ́, nó ó Yésʉs á nze nʉa blêr, ntɔ̂ʼ dwě Nzyɛ̌m nzyǒo. Nye ntɔ̂ʼ pɛ̂ʼ yê, dwe bé yǎ. 31Jɔʼ yaá ó míh mɔ́ɔ́, mé á ka bee ɨ́ sɔ́ɔ́ɔ́, bé ntɔ̂ʼ dweʼe nyê. Le bé á dweʼe nye, le ntɔ̂ʼ nyé á dîm bé ɨ́ mîh. 32Bé ntɔ̂ʼ lɛ́ɛla páʼ nyɔ́ɔ́ ó: «Jɔʼ mɨ́ná le onɔ́ɔ bé gá nzɨ́ e nzɨ̌ yɨ́, milémé míná bê sí kʉ́ buú soho lɨ́ ejóʼǒ mbi nyê lwilwǐb e mɨná, le mbǐ lɛ́ʼlá nyê dwé mɨ́ná, duho ɨ́ Mekaná mé Nzyɛ̌m wɨ́.»

33Tyé e tyé yaá, bé ntɔ̂ʼ mɔa, báʼǎ swíʼɔɔ, tóŋɔɔ̌ Yerʉ́zalɛm, kœbɔɔ̌ sɔ́má bʉ̂r kám e ngwár, bé e bɨ́ɔɔ́ bɔ́ɔ́ tɨ̂ʼ gúmo gwár. 34Bé dína pyâl nɛ́ɛ: bé kœb ó, bʉ́ʉ́ ómpʉ́n lɨ́ elɛ́ɛla páʼ nyɔ́ɔ́ ó: «Yê tyeetye ó, Dâ, nyɨ́ pah! Simon bê sí kʉ́ bee nyê!» 35Bɨ́ɛ ntémé ntɔ̂ʼ lɛ́ɛ bɨ́haá ómpʉ́n, sâ laa nzɨ́ e nzɨ̌ yɨ́, le elɛ́ɛ̌ mpʉ bê ka dweʼě Yésʉs ɨ́ pɛ́ʼá nyê pɛ́ʼ bé blêr yɨ́.

Yésʉs lɨ́ elɛ̂ʼle ómpʉ́n bé ó, nye sí kʉ́ pah ɨ́ soo

36Bʉr obá baá dína lɨ́ elɛ́ɛ bé nó, kǎ saʼ nɛ́ɛ: Yésʉs mʉr tɨ̂ʼ lɨ́ etyɛ̂b tîtyěl páʼ nyɔ́ɔ́. Nye ó: «Mepyɛbla, mé díʼee bɨ̌n ɨ́ miléme!»

37Bé ntɔ̂ʼ jóʼo ékɛ̂n, ebě, bé á jwɨʼ ó, bɨ́ beě ndîm. 38Nye ntɔ̂ʼ dî e bé ó: «Yé dí etɨ̂l bɨ́n mekʉ̌ sí? Bɨ̌n bé lɨ́ esóŋlo ɨ́ miléme ɨ́ yé? 39Jwɛ́ʼɛ́ɛ́ gá mebô ndu e mekʉ̌ mâm. Gʉ́ŋáá gá ó, yé ó me. Bóbáá gá me. Bɨ̌n gʉ́ŋaa tyeetye ó, yé ó me. Ndîm, wé abe e bipúno e bidwehé, bisá bɨ́n dí ebee mé e byé bî.»

40Jɔʼ nyé á sil elɛ́ɛ bé nó yɨ́, nye nzě lɛ̂ʼle bé mebô e mekʉ̌ mé. 41Bisʉhʉʉ, byé á be bé ɨ́ miléme ó, lwɨ́ŋlá. Bé ntémé lɨ́ ebuú kâm nyê. Nó, bé á be, alɨ̌ bûʼla nyê. Nye ntɔ̂ʼ báʼǎ dî e bé ó: «Nzê bɨ̌n bé abe e sá éde wâʼ ɛ̌?»

42Bé ntɔ̂ʼ dwe nyé péh mbubá sû. 43Nye ntɔ̂ʼ nʉa, de, bɨ́bɛ̂h lɨ́ ebee. 44Nye nzě lɛ́ɛ e bé ó: «Bisyɛ́ɛla bî, byé ó byaá mé á boo lɛ́ɛ bɨ̌n ó, byé ósyɛ́ɛ bí. Mɨná dína lɨ́ etye gá sɔ́má, me á boo lɛ́ɛ bɨ̌n ó, sá yɨ́yɛ̂h dí cɛmá ɨ́ Mekaná mé Nzyɛ̌m, lɨ́ mekaná métié mé Moyɨ̂z, le maá mé ógwíha o mílɔ̌b, le lɨ́ oSâm mé David, dumo e me yɨ́, yé ódira nó.»

45Nye ntɔ̂ʼ dib bé nzɨ̌ egʉ́ǎ sá Mekaná mé Nzyɛ̌m dí elɛ́ɛ yɨ́, 46Nye ó: «Mekaná mé Nzyɛ̌m, mé lɨ́ elɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ɨ́ jala le esia e mitúú, dwe, nzě pah ɨ́ soo lɨ́ elú élɛ̂l. 47Yé á boo be cɛmá ntémé ó, bʉr, bé ótô ɨ́ lʉ́mlʉ́ wé, le etúnǒ Mbɨambɨa Lɔ́ɔ. Bé ótô le elɛ́ɛ bʉ̂r ó, bé túmaa mikoo e misyóm myɔ́ɔ́, le edwira míléme, Nzyɛ̌m pɛ́ʼɛɛ bé bibaa bí ébébe byɔ́ɔ́. Lɔ́ɔ waá, wé ónyɛɛ́ túnɔɔ ó, ɨ́ Yerʉ́zalɛm, tó túnɔɔ ntémé kwá bikúl bíbyɛ̂h. 48Bɨ̌n ó dí oboʼlo ó lɔ̌b waá. 49Nó ó, me ótáare éntɨh bɨ́n sá Sɔ́ŋ wǎm á kɛʼ bɨ̌n yɨ́. Diʼee gá wâʼ ɨ́ nkana yɨ̂, lɨ́ ebóno dʉ́ó nyé ngá sul bɨ́n nkul ngá duho ɨ́ jʉ́o kʉ́ nyɨ́ yɨ́.»

Yésʉs lɨ́ ebére kʉ́

50Yésʉs nzě duhǒ nkana, nye ntɔ̂ʼ tô le ompʉ́n bé bǎʼ e Bétanî. Nye ntɔ̂ʼ bɨ̂n mébô, sʉ bé metyɛʼ me mpóm. 51Nye dína lɨ́ esʉ bé metyɛʼ me mpóm nɛ́ɛ: nye ntɔ̂ʼ duhǒ gúmó bé á tyɛ̂b yɨ́, nzě bɨ́nɔɔ ɨ́ jʉ́o kʉ́. 52Ompʉ́n bé bɨ́ɛ lîʼ náǎ, lɨ́ edweŋɔɔ nyé kûm. Píe tɨ̂, bê nzě swîʼ, tóŋɔɔ̌ Yerʉ́zalɛm; bisʉhʉʉ, byé mû bé ɨ́ miléme lwɨ́ŋlá. 53Nó bé á be melú mɨ́mɛ̂h ó, tʉ́ŋlʉ̌ mpáh Nzyɛ̌m, lɨ́ edweŋɔɔ nyé kûm.

Currently Selected:

Luc 24: ozm

Highlight

Copy