Matta 9
9
Nyawtol gorko bonnguujo gom nder Kafarnahum
1Iisa naati laana, fedditi peta ngaan, warti siire mum.#9.1 Ɗo « Siire mum » kam woni Kafarnahum (daaru Matta 4.13). 2Himɓe gom ngaddani mo bonnguujo gom no fukkinaa dow kooƴirngal maayɓe. Wakkati o hi'unoo no goonɗinol maɓɓe foti, o wi'i bonnguujo oon :
—Higo, fukkin ɓerne maa. Hakkeeji maa njaafaama.
3Wakkati jannginooɓe *Tawreeta gom nanunoo ɗum sey ɓe mbi'odiri hakkune maɓɓe :
—Gorko oo no bonna innde Alla.
4Amma Iisa faami miilooji maɓɓe, nden wi'i ɓe :
—Ɗume waɗi ko oɗon miiloo miilooji bonɗi nder ɓerɗe mooɗon ? 5Hakkune wi'ude « Hakkeeji makko njaafaama » naa « O ummoo, o yaha », ɗume ɓuri hoyde ? 6Amma miɗo hiɗi paamon ko *Ɓii-Neɗɗo no jogii baawɗe yaafaade hakkeeji himɓe nder duuniyaaru nduu.
Sey o wi'i bonnguujo oon :
—Umma, hooƴu kooƴirngal maayɓe ngal ngaddiraɗaa, hootu !
7Gorko oon ummii, hooti. 8Wakkati jama'aare ndeen hi'unoo ɗum, ɓe kuli, ɓe tinni iɓe njetta Alla ngam iri baawɗe ɗe o hokki ɓii-aadama.
Iisa noddi Matta tokka ɗum
9Wakkati Iisa waɗannoo jahaangal mum, o hi'i gorko gom bi'eteeɗo Matta no jooɗii nder suudu janngal. Sey o wi'i mo :
—Tokkam.
Sey Matta ummii, tokki mo.
10Gaɗa mum, nyannde gom Iisa no nyaama nder suudu Matta. Jaɓooɓe janngal gom he ɓooyɓe nder gaɗol hakke gom, kamɓe ɗuɓɓe ngari njooɗii no nyaamda he makko, kanko he *aahiiɓe ɓeen. 11Wakkati *Fariisa'en ngi'unoo ɗum, mbi'i *aahiiɓe makko :
—Ɗume waɗi ko moodibbo mooɗon no nyaamda he *jaɓooɓe janngal, he waɗooɓe hakke ɓee ?
12Amma wakkati Iisa nanunoo ɗum, wi'i ɓe :
—Nyawɗo haajaa cawroowo hanaa jamɗuɗo.
13Njehee, njanngee ko Dewtere Alla wi'i :
Yurmeene ngiɗumi,
hanaa *sadaka. # 9.13 Hose'a 6.6
Miin, mi waraay noddude miilooɓe kam'en no dartiiɓe, amma mi waraana ngam annduɓe kam'en no waɗooɓe hakke.
Filla suumayeere
14Gaɗa mum aahiiɓe Yahaaya gaɗoowo *batisma ngari to Iisa, ƴami mo mbi'i :
—Ko waɗi minen he *Fariisa'en miɗen cuumoo, amma *aahiiɓe maaɗa kay cuumataako ?
15Nden Iisa jaabii ɓe, wi'i :
—Warɓe ɓanngal no mbaawi ɓalinaade wakkati ɓaŋuɗo oon no wondi he maɓɓe naa ? Amma nyalaaɗe ngaran ɗe ɓaŋuɗo oon suutetee hakkune maɓɓe. Nder balɗe ɗeen, ɓe cuumoto.
16Neɗɗo fuu nyootataa lefol kesol he koltal kiinngal ngam lefol ngool serkan koltal kiinngal ngaal, cerkol ngool ɓeydoo. 17Kaden duu cabiijam kesam loowataake nder sumalleeji kiɗɗi. Nde ɗum waɗi, sumalleeji ɗiin pusan, cabiijam ɗaam rufa, sumalleeji ɗiin mbona. Ndenne, cabiijam kesam nder sumalleeji kesi loowetee, faa ɗum fuu ɗum reenoo.
Nyawtol yeyraajo gom he ummintinol suka debbo gom
18Wakkati Iisa haaldannoo he *Fariisa'en, sey hooreejo *waajordu gom nii yottii, hofi yeeso makko, wi'i mo :
—Jooni ɓiyam debbo maayi, amma war, yowu junngo maaɗa dow makko, heɓa o ummitoo.
19Iisa, he *aahiiɓe muuɗum, ummii tokki mo. 20-21Dow laawol maɓɓe, sey yeyraajo gom nii gaɗuɗo duuɓi sappo he ɗiɗi ƴiiƴam daranaaki mo. Omo miila nder ɓerne makko, ko nde nii o meemi jabbaare Iisa tan, o nyawtan. O ƴuwri Iisa har gaɗa, o meemi hunnduko jabbaare makko. 22Iisa yeeƴitii, hi'i mo, wi'i :
—Banndam debbo, fukkin hakkillo maaɗa, goonɗinol maa dannii ma.
Wakkati mum da, debbo oon daɗi.
23Wakkati Iisa yottinoo wuro hooreejo *waajordu oon, o hi'i fuufooɓe seeseeji ciryake ngam mooɓoyde maayɗo oon, himɓe gom duu no har ɗo no mboya. 24O wi'i ɓe :
—Mburtee, suka oo maayaay. O ɗaanii tan.
Sey himɓe ɓeen njali jaleeɗe yawaare. 25Wakkati ɓe njaltintoo mo yaasin ndeen, o naati nder suudu nduun, o nanngi junngo suka oon, sey suka oon ummii. 26Habaru oon sankitii nder leydi ndiin fuu.
Bumtinol wumɓe ɗiɗo
27Wakkati Iisa dillannoo toon, wumɓe ɗiɗo gom tokki mo, no kuuɓa no mbi'a :
—Taan Daawda, yurma min !
28Wakkati o naatunoo to o wernoo, wumɓe ɓeen ngari to makko. O ƴami ɓe, o wi'i :
—On ngoonɗini ko miɗo waawi wallude on naa ?
Ɓe njaabii mo, ɓe mbi'i :
—Ayyo Moodibbo, min ngoonɗini.
29Nden o meemi gite maɓɓe, o wi'i :
—Ɗum laatanoo on, no ngoonɗinirɗon nii.
30Ɓe mbumti wakkati mum, nden o fooɗi noppi maɓɓe, o wi'i ɓe :
—Tinnee, to kaalanee ɗum neɗɗo fuu.
31Amma ɓe mburtii tan ɓe cankitowii habaru Iisa nder leydi ndiin fuu.
Nyawtol gorko beebaaɗo
32Wakkati wumtinaaɓe ɓeen ndillannoo, Iisa waddanaa gorko gom mo ginnaaru beebi. 33O riiwi ginnaaru nduun, sey beebaaɗo oon fuɗɗi no haala. Ɗum haayɗini jama'aare ndeen fuu faa iɓe mbi'a :
—Hano ɗum hi'aaka nder *Isra'el abada !
34Amma *Fariisa'en ɓeen mbi'i ko hooreejo ginnaaji oon, kam hokki mo baawɗe riiwude ɗi.
Yurmeene ɓe nanaay waaju Iisa
35Illa ɗon Iisa fuɗɗi no fiiloo nder ci'e he gure fuu, omo waajoo nder cuuɗi *baajorɗi, omo filloo filla *Habaru lobbo, filla Laamu Alla. Omo nyawta nyawuuji he laruuji ir iri fuu. 36Wakkati o hi'unoo jama'aare wonnde gaɗa makko, o nani yurmeene maɓɓe, ngam ɓe tampi, ɓe cuulake sanne hano baali ɗi ngalaa duroowo. 37Sey o wi'i *aahiiɓe makko ɓeen :
—Kettol no ɗuuɗi, hettooɓe ɗuuɗaa. 38Ndenne, eelee Jom kettol lilda hettooɓe ngam kettol mum.
Currently Selected:
Matta 9: FUH
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators Inc.; © SIM Niger, 2018
