مَاتِيُ 13
13
مِسَالُ دٛوْ دٜمٛووٛ
1ݧَلْندٜ ندٜنْ يٜىٰسُ وُرْتِي وُرٛ نغٛنْ، يَحِ جٛوطِي حَادٜ مبٜىٰلَ غَلِيلِ؞ 2يِمْٻٜ طُطْٻٜ کَوْرِتِ تٛ مَاکٛ نَاکِ اٛ نَتِّ کٛمِوَلْ اٛ جٛوطِي ندٜرْ مَاغَلْ دٛوْ ندِيَمْ؞ کَوْرُتُٻٜ فُو ندَرِي حَادٜ مبٜىٰلَ نغَنْ؞ 3سٜيْ اٛ حُوتِرِ مِسَالُ اٛ اٜکِّتِٻٜ اٜکِّتِنٛلْ فٜىٰرٜ‑فٜىٰرٜ طُطْنغٛلْ، اٛ وِعِ،
«غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ 4اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، شٛلِّ نغَرِ شُڤِّدِندِ؞ 5وٛنْدِ بٛو يَنِ ندٜرْ کَاپٜ، طٛنْ ندِ حٜٻَايِ لٜيْدِ طُنْدِ؞ ندِ فُطِ جَوْطُمْ نغَمْ لٜيْدِ ندِنْ لُغَّا؞ 6اَمَّا ندٜ نَانغٜ وُرْتٛيِي فِيِندِ، سٜيْ ندِ يٛورِ نغَمْ ندِ وَلَا طَطِ؞ 7وٛنْدِ اَوْدِ بٛو يَنِ ندٜرْ غِعٜ، سٜيْ غِعٜ طٜنْ مَوْنِ ٻِطِّندِ حَا ندِ وَاوَايِ وَطُکِ شَمّٜىٰجٜ؞ 8اَمَّا وٛنْدِ اَوْدِ يَنِ دٛوْ لٜيْدِ مبٛنْدِ ندِ فُطِ ندِ مَوْنِ ندِ وَطِ شَمّٜىٰجٜ؞ وٛنْدِ وَطِ غَبّٜ 100، وٛنْدِ وَطِ غَبّٜ 60، وٛنْدِ وَطِ 30؞»
9ندٜ يٜىٰسُ حٜىٰݧِ حٛکُّکِ مِسَالُ طُعُمْ، سٜيْ وِعِ، «غٛودُطٛ نٛڤِّ نَنُکِ فُو نَنَ؞»
کٛ وَطِ يٜىٰسُ حُوتِرِ مِسَالُ
10سٜيْ تٛکُّٻٜمٛ نغَرِ پَمِمٛ، مبِعِ، «نغَمْ طُمٜ مٜتِرَنْتَاٻٜ اٜ مِسَالُ نِحِ؟»
11اٛ نٛوتِي اٛ وِعِٻٜ، «اٛنٛنْ اٛنْ کٛکَّامَ فَامُ سِرُّ لَامُ اَللَّه، اَمَّا کَمْٻٜ ٻٜ کٛکَّاکَ؞ 12نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ، حَا طُمْ طُوطَنَمٛ؞ اَمَّا مٛ وَلَا فَامُ دٛوْ لَامُ اَللَّه، کٛو کٛ اٛ وٛودِ مَا طُمْ جَٻَيْطُمْ؞ 13کٛ وَطِ مٜتِرَنَيْمِ يِمْٻٜ اٜ مِسَالُ وٛنِ، نغَمْ کٛو ٻٜ ندَارِي ٻٜ نغِعَتَا، کٛو ٻٜ کٜتِّنْدَکٜ ٻٜ نَنَتَا، طٛنْمَا ٻٜ ڤَامَتَا؞ 14دٛوْ مَٻّٜ طُمْ حٜبِّنِ کٛ اَللَّه وِعِ دَغَ حٛنْدُکٛ اِشَايَ،
‹اٛنْ نغَطَيْ کَ نَنُکِ، اَمَّا اٛنْ ڤَامَتَا کٛو سٜطَّ؞
اٛنْ نغَطَيْ کَ رَارُکِ، اَمَّا اٛنْ نغِعَتَا کٛو سٜطَّ؞
15نغَمْ ٻٜرْطٜ يِمْٻٜ ٻٜنْ طٛنْ طٜ شٜمْبِطّٜ،
ندٜنْ ٻٜ شُکِّي نٛڤِّ مَٻّٜ،
ٻٜ مَٻِّي غِتٜ مَٻّٜ،
نغَمْ تٛع ٻٜ نغِعَ اٜ غِتٜ مَٻّٜ،
تٛع ٻٜ نَنَ اٜ نٛڤِّ مَٻّٜ،
ٻٜ ڤَامَ ندٜرْ ٻٜرْطٜ مَٻّٜ حَا
ٻٜ نغَرْتَ تٛ اَمْ،
مِ يَمْطِتِنَ ٻٜرْطٜ مَٻّٜ؞›
16«اَمَّا اٛنٛنْ، غِتٜ مٛوطٛنْ طٜ بَرْکِطِنَاطٜ نغَمْ اٜ طٜ نغِعَ، اٜ نٛڤِّ مٛوطٛنْ نغَمْ اٜ طِ نَنَ؞ 17اٜ مِ وِعَعٛنْ غٛونغَ، اَنَّبٛعٜنْ اٜ اَادِلِعٜنْ طُطْٻٜ نغِطِي نغِعَ کٛ نغِيطٛنْ، اَمَّا ٻٜ نغِعَايِ؞ ٻٜ بٛو نغِطِي نَنُکِ کٛ نَنٛتٛنْ، اَمَّا ٻٜ نَنَايِ؞
مَعَنَ مِسَالُ دٛوْ دٜمٛووٛ
18«تٛو، رَا مَعَنَ مِسَالُ دٜمٛووٛ اٛنْ طٛنْ؞ 19فُو نَنُطٛ حَبَرُ لَامُ اَللَّه اٛ حٜٻْتَايِطُمْ، سٜيْ شٜيْطَنْ وَرَ حٛشَّ کٛ طُمْ اَاوِ ندٜرْ ٻٜرْندٜ مَاکٛ؞ طُمْ طٛنْ وٛنِ مِسَالُ اَوْدِ نجَنُندِ دٛوْ طَتَلْ؞ 20جَنُندِ دٛوْ کَاپٜ وٛنِ مِسَالُ نَنُطٛ وٛلْدٜ اَللَّه طٛنْ اٜ طٛنْ اٛ جَٻَندٜ اٜ بٜلْطُمْ ٻٜرْندٜ؞ 21اَمَّا ندٜ وٛلْدٜ ندٜنْ وَلَا طَطِ ندٜرْ ٻٜرْندٜ مَاکٛ، اٛ مُݧَيْ شَرٜلْ سٜطَّ تَنْ؞ تٛ شَطٜىٰلٜ کٛو تٛرَّ وَرِي نغَمْ وٛلْدٜ ندٜنْ، طٛنْ اٜ طٛنْ اٛ يٛوفَندٜ؞ 22جَنُندِ ندٜرْ غِعٜ وٛنِ مِسَالُ نَنْٻٜ وٛلْدٜ اَللَّه، اَمَّا وَنُّکِ اٜ فِي دُونِيَارُ، اٜ يِدّٜ جَوْدِ، ٻِطِّ وٛلْدٜ ندٜنْ کَطِندٜ وَلُّکِٻٜ ٻٜ نغَطَ کٛ اَللَّه يِطِ؞ 23اَمَّا اَوْدِ شَاکَاندِ دٛوْ لٜيْدِ مبٛنْدِ وٛنِ مِسَالُ نَنْطٛ وٛلْدٜ اَللَّه، اٛ فَامِندٜ بٛطُّمْ، اٛ وَطِ کٛ اَللَّه وِعِ، اٛ حُوتِنِرِندٜ حَا اٛ حٜٻِ ٻٜيْدَارِ؞ غٛطّٛ حٜٻِ ندٜ 100، غٛطّٛ بٛو حٜٻِ ندٜ 60، غٛطّٛ حٜٻِ ندٜ 30؞»
غٜىٰنٜ ندٜرْ نغٜسَ اَلْکَمَارِ
24سٜيْ يٜىٰسُ حٛکِّٻٜ غٛطُّمْ مِسَالُ وِعِ، «لَامُ اَللَّه اٜ نَنْدِ اٜ غٛطّٛ نٜطّٛ اَاوُطٛ اَلْکَمَارِ مبٛنْدِ ندٜرْ نغٜسَ مُوطُمْ؞ 25اَمَّا جٜمَّ، کٛو مٛيٜ اٜ طَانِي، سٜيْ غٛطّٛ غَݧٛ مَاکٛ يَحِ سَاکِ اَوْدِ غٛطّٜ غٜىٰنٜ ندٜرْ اَلْکَمَارِ ندِنْ دِلِّ؞ 26ندٜ اَلْکَمَارِ ندِنْ فُطِ، مَوْنِ وَطِ شَمّٜىٰجٜ، سٜيْ غٜىٰنٜ طٜنْ مَا اُمّٛيِي؞ 27سٜيْ مَشُّٻٜ جٛومُ نغٜسَ کَنْ نغَرِ مبِعِمٛ، ‹جٛومُ وُرٛ، نَاع اَوْدِ مبٛنْدِ اَاوُطَا تٛ نغٜسَ مَاطَ؟ تٛو، نٛ وَطِ غٜىٰنٜ ڤُطٛيِ ندٜرْ مَيْرِ؟› 28اٛ وِعِٻٜ، ‹طُمْ غٛطّٛ غَݧٛ اَمْ وَطِ نٛنْ؞› سٜيْ مَشُّٻٜ ٻٜنْ مبِعِمٛ، ‹اَ يِطِ مِنْ نجَحَ مِنْ اِتَّطٜ؟› 29اَمَّا اٛ وِعِٻٜ، ‹نَاع نٛنْ؞ نغَمْ تٛ اٛنْ اِتَّطٜ، اٛنْ اِتَّيْ فُو اٜ اَلْکَمَارِ ندِنْ؞ 30اَلٜىٰطٜ طٜ مَوْنِدَ اٜ مَيْرِ نَا شَرٜلْ تَپُکِندِ وَطِ؞ تٛ شَرٜلْ تَپُکِندِ وَطِ، مِ وِعَيْ تَپٛوٻٜ ٻٜنْ اَرْتَ تَپُکِ غٜىٰنٜ طٜنْ ٻٜ کَٻَّطٜ کَٻّٜ‑کَٻّٜ، طُمْ وُلَطٜ؞ اَمَّا اَلْکَمَارِ ندِنْ، ٻٜ نغَطَندِ ندٜرْ رٜسِرْدٜ غَوْرِ اَمْ؞› »
مِسَالُ دٛوْ غَبّٜلْ مَسْتَتْ
31يٜىٰسُ فُطِّتِ حٛکِّٻٜ غٛطُّمْ مِسَالُ وِعِ، «لَامُ اَللَّه اٜ نَنْدِ اٜ غَبّٜلْ مَسْتَتْ نغٜلْ غٛطّٛ حٛشِّ اَاوِ ندٜرْ نغٜسَ مُوطُمْ؞ 32کَنْغٜلْ وٛنِ غَبّٜلْ ٻُرْنغٜلْ فَمْطُکِ ندٜرْ نغَبّٛيْ فُو، اَمَّا تٛ نغٜلْ مَوْنِ، سٜيْ نغٜلْ ٻُرَ کٛو نغٜلٜ لٜغّٜلْ مَوْنُکِ، حَا شٛلِّ نغَرَ نغَطَ شَٻّٜ دٛوْ لِشٜ مَاغٜلْ؞»
مِسَالُ دٛوْ پُوفِنِرْطُمْ
33يٜىٰسُ فُطِّتِ حٛکِّٻٜ غٛطُّمْ مِسَالُ وِعِ، «لَامُ اَللَّه اٜ نَنْدِ اٜ پُوفِنِرْطُمْ طُمْ غٛطّٛ دٜبّٛ حٛشِّ لَنْشِندِرِ اٜ شٛنْدِ اَلْکَمَارِ ڤٛوندِرْکٛيْ تَتٛيْ، حَا ندِ فُو ندِ پُوفِ؞»
کٛ وَطِ يٜىٰسُ حُوتِرِ مِسَالُ
34يٜىٰسُ مٜتِرَنِ حَوْرُتُٻٜ ٻٜنْ فُو فِي طُعُمْ اٜ مِسَالُ؞ فُو کٛ اٛ وِعَتَٻٜ اٜ مٛ حُوتِرَ مِسَالُ؞ 35اٛ وَطِي نٛنْ نغَمْ اٛ حٜبِّنَ کٛ اَللَّه وِعِ دَغَ حٛنْدُکٛ اَنَّبِيجٛ وِيکِ،
«مِ مٜتِرَنَيْ يِمْٻٜ اٜ مِسَالُ؞
کٛ سُوطِي دَغَ تَغُکِ دُونِيَارُ، مِ وُرْتِنَيْطُمْ اٜ نجَيْرِ؞»
مَعَنَ مِسَالُ غٜىٰنٜ ندٜرْ اَلْکَمَارِ
36سٜيْ يٜىٰسُ اَلِ يِمْٻٜ ٻٜنْ نَتِّ وُرٛ؞ تٛکُّٻٜمٛ نغَرِ تٛ مَاکٛ مبِعِمٛ، «وِعُمِنْ مَعَنَ مِسَالُ غٜىٰنٜ ندٜرْ نغٜسَ اَلْکَمَارِ؞»
37اٛ وِعِٻٜ، «اَاوُطٛ اَوْدِ مبٛنْدِ ندِنْ وٛنِ ٻِي نٜطّٛ؞ 38نغٜسَ کَنْ وٛنِ دُونِيَارُ؞ ندٜنْ اَوْدِ مبٛنْدِ ندِنْ وٛنِ ٻِٻّٜ لَامُ اَللَّه؞ غٜىٰنٜ طٜنْ نغٛنِ ٻِٻّٜ شٜيْطَنْ؞ 39اٛنْ طٛنْ غَݧٛ اَاوُطٛ غٜىٰنٜ طٜنْ، کَنْکٛ وٛنِ شٜيْطَنْ؞ شَرٜلْ تَپُکِندِ وٛنِ رٜعُکِ دُونِيَارُ، ندٜنْ تَپٛوٻٜنْدِ نغٛنِ مَلَاعِکَعٜنْ؞ 40نٛنْ نٛ طُمْ حَوْرِتِرْتَ غٜىٰنٜ طُمْ وُلَطٜ، نٛنْ طُمْ وَطَتَ اٜ رٜعُکِ دُونِيَارُ؞ 41ٻِي نٜطّٛ لِلٛيَيْ مَلَاعِکَعٜنْ مُوطُمْ، ٻٜ مبُرْتِنَ کٛو طُمٜ ڤٛوطٛوجُمْ يِمْٻٜ نغَطَ حَکّٜ اٜ فُو غَطٛوٻٜ کٛ حَلِّ ندٜرْ لَامُ اَللَّه؞ 42سٜيْ مَلَاعِکَعٜنْ ٻٜنْ کُبٛوٻٜ ندٜرْ حِيتٜ کَلُّنغٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞ 43ندٜنْ اَادِلِعٜنْ طٜلْکِتٛتٛ بٛ نَانغٜ ندٜرْ لَامُ ݧَاکٛ مَٻّٜ مٛ دٛوْ؞ فُو غٛودُطٛ نٛڤِّ نَنُکِ نَنَ؞
جَوْدِ شُوطِيندِ
44«لَامُ اَللَّه اٜ نَنْدِ اٜ جَوْدِ شُوطِيندِ اٜ نغٜسَ ندِ غٛطّٛ حٜٻْتِ، اٛ فُطِّتِ اٛ سُوطِندِ؞ ندٜرْ وٜلْوٜلٛ اٛ يَحِ، اٛ سٛورِ فُو کٛ اٛ وٛودِ اٛ سٛودِ نغٜسَ کَنْ؞
مِسَالُ دٛوْ لُعُ‑لُعُ
45«طٛنْمَا لَامُ اَللَّه اٜ نَنْدِ اٜ نٜطّٛ شٛودٛووٛ اٜ سٛورِتٛو طَٻِّتٛووٛ لُعُ‑لُعُ غٛودُطُمْ شٜىٰدٜ؞ 46ندٜ اٛ يِعِ غٛعٛ غٛودُطُمْ شٜىٰدٜ طُطّٜ، سٜيْ اٛ يَحِ اٛ سٛورِ فُو کٛ اٛ وٛودِ، اٛ سٛودِ لُعُ‑لُعُ طُمْ؞
مِسَالُ دٛوْ نَنْغِرْطُمْ لِپِّ
47«طٛنْمَا لَامُ اَللَّه اٜ نَنْدِ اٜ نَنْغِرْطُمْ لِپِّ طُمْ وٛٻّٜ کُبِي ندٜرْ مبٜىٰلَ، طُمْ نَنْغٛيِ کٛو اِرِ طِيٜ لِپِّ؞ 48ندٜ طُمْ حٜىٰوِ، ٻٜ ڤٛوطٛيِطُمْ دَاندٜ مبٜىٰلَ نغَنْ، ٻٜ نجٛوطِي، ٻٜ شُڤْتِ لِپِّ بٛطِّ، ٻٜ نغَطِطِ ندٜرْ فَاندُ، اَمَّا ٻٜ شَنْکِتِ طِ مبٛوطَا طِنْ؞ 49نٛنْ طُمْ وَطَتَ اٜ رٜعُکِ دُونِيَارُ؞ مَلَاعِکَعٜنْ نغَرَيْ کَکِّتَ کَلُّٻٜ دَغَ ندٜرْ اَادِلِعٜنْ، 50ٻٜ کُبٛو کَلُّٻٜ ٻٜنْ ندٜرْ حِيتٜ کَلُّنغٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞
جَوْدِ کٜيْرِ اٜ کِيندِ
51«اٛنْ ڤَامِي فُو طُعُمْ؟» ٻٜ نٛوتِي ٻٜ مبِعِ، «اٜىٰ؞»
52سٜيْ اٛ وِعِٻٜ، «تٛو، فُو مٛودِبّٛ اَتَّوْرَ اٜکِّتِيطٛ دٛوْ لَامُ اَللَّه اٜ مٛ نَنْدِ اٜ جٛومُ وُرٛ بُرْتِنْطٛ جَوْدِ کٜيْرِ اٜ کِيندِ ندٜرْ ندٜسَ مُوطُمْ؞»
طُمْ وَݧِي يٜىٰسُ ندٜرْ غَرِيرِ نَجَرَتْ
53ندٜ يٜىٰسُ حٜىٰݧِ وِيکِٻٜ فُو مِسَالُ طُعُمْ، سٜيْ اٛ اُمِّي اٛ اَلِ وِغٜىٰرٜ ندٜنْ؞ 54اٛ يَحِ غَرِيرِ تٛ اٛ مَوْنِ، اٛ فُطِّ اٜکِّتِنْکِ يِمْٻٜ ندٜرْ سُودُ دٛعَارٜ مَٻّٜ حَا ٻٜ کَيْطِنِ، ٻٜ مبِعِ، «تٛيٜ نٜطّٛ اٛعٛ حٜٻِ فَامُ طُعُمْ اٜ بَوْطٜ وَطُکِ کُوطٜ کَيْطِنِيطٜ طٜعٜ؟ 55نَاع کَنْکٛ وٛنِ ٻِطّٛ اٛنْ طٛنْ شٜحٛووٛ؟ نَاع مَدُوجٛ مَاکٛ اٜ وِعٜىٰ مَرْيَامَ؟ نَاع يَاکُبُ اٜ يُسُفُ اٜ سِيمَنْ اٜ يَحُودَ نغٛنِ مِݧِرَاٻٜ مَاکٛ؟ 56ندٜنْ نَاع اٜنْ نغٛنْدِ اٜ مِݧِرَاٻٜ مَاکٛ رٜوْٻٜ؟ تٛو، تٛيٜ نٜطّٛ اٛعٛ حٜٻِ فُو فِي طُعُمْ؟» 57سٜيْ ٻٜ نغَݧِ حٛولَاکِ يٜىٰسُ؞
اَمَّا يٜىٰسُ وِعِٻٜ، «کٛو تٛيٜ يِمْٻٜ اٜ کٛکَّ اَنَّبِيجٛ مَنْغُ، اَمَّا يِمْٻٜ غَرِيرِ مَاکٛ، اٜ يِمْٻٜ وُرٛ مَاکٛ ٻٜ کٛکَّتَامٛ مَنْغُ؞» 58يٜىٰسُ وَطَايِ غٛطُّمْ کَيْطِنِيطُمْ تٛنْ نغَمْ ٻٜ کٛولَاکِمٛ؞
Currently Selected:
مَاتِيُ 13: fuv
Highlight
Share
Copy
Want to have your highlights saved across all your devices? Sign up or sign in
© 2011, Bible League, All rights reserved.
