مَاتِيُ 12
12
پَمٛلْ دٛوْ ݧَلْندٜ سِوْتَارٜ
1اٜ شَرٜلْ نغٜلْ طُمْ ݧَلْندٜ سِوْتَارٜ؞ يٜىٰسُ اٜ يَحَ ندٜرْ نغٜسَ اَلْکَمَارِ، سٜيْ تٛکُّٻٜمٛ نَنِ وٜىٰلٛ ٻٜ ڤُطِّ ٻٛرُکِ شَمّٜىٰجٜ مَيْرِ اٜ ٻٜ ݧَامَ؞ 2اَمَّا ندٜ وٛٻّٜ فَارِسَنْکٛعٜنْ نغِعِ نٛنْ، مبِعِ يٜىٰسُ، «رَا تٛکُّٻٜمَ اٜ نغَطَ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؞»
3سٜيْ يٜىٰسُ وِعِٻٜ، «اٛنْ مٜىٰطَايِ جَنْغُکِ کٛ دَوْدَ وَطِ ندٜ نَنِ وٜىٰلٛ، کَنْکٛ اٜ غٛنْدُٻٜ اٜ مَاکٛ؟ 4اٛ نَتِّ لُکُرُ سٜنِيطُمْ، اٛ ݧَامِ بُرٛودِ شٜنِيطُمْ، اٛ حٛکّٛرِ جَادٛوٻٜ اٜ مَاکٛ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ؞ 5کٛو اٛنْ مٜىٰطَايِ جَنْغُکِ ندٜرْ اَتَّوْرَ نٛ اَرْدِيٻٜ دِينَ نغٜوِرْتَ دٛوکَ ݧَلْندٜ سِوْتَارٜ ندٜرْ وُرٛ شٜنِينغٛ، اَمَّا طُمْ وَرْتَايِ حَکّٜ؟ 6اٜ مِ وِعَعٛنْ، رَا ٻُرْطٛ وُرٛ شٜنِينغٛ طٛعٛ؞ 7اَمَّا دَا اٛنْ اَنْدُنٛو مَعَنَ اَايَارٜ ندٜعٜ بِعُندٜ، ‹اٜ مِ يِطِ کٛلّٛنْ يُرْمٜىٰندٜ، نَاع سَکُّکِ شَکِّرِ،› دَا اٛنْ کِيتَاکِ ٻٜ نغَطَايِ حَکّٜ؞ 8نغَمْ ٻِي نٜطّٛ وٛنِ جٛومُ ݧَلْندٜ سِوْتَارٜ؞»
يٜىٰسُ يَمْطِتِنِي مٛ جُنْغٛ جَرَانغٛ
9سٜيْ يٜىٰسُ اَلِ طٛنْ دِلِّ، نَتِّ سُودُ دٛعَارٜ مَٻّٜ؞ 10اٜ وٛودِ غٛطّٛ مٛ جُنْغٛ جَرَانغٛ ندٜرْ مَيْرُ؞ سٜيْ فَارِسَنْکٛعٜنْ پَمِ يٜىٰسُ، مبِعِ، «اَتَّوْرَ جَٻِي طُمْ يَمْطِتِنَ ݧَلْندٜ سِوْتَارٜ؟» ٻٜ مبِعُ نٛنْ نغَمْ ٻٜ کٜٻَ کٛ ٻٜ نغُلِّرٛيْتٛومٛ؞
11سٜيْ يٜىٰسُ وِعِٻٜ، «مٛيٜ ندٜرْ مٛوطٛنْ تٛ اٜ وٛودِ مبَالَ غٛعٛ تٛ نغَ يَنِي ندٜرْ نغَيْکَ ݧَلْندٜ سِوْتَارٜ، اٛ جٛغَتَاکٛنغَ اٛ اِتّٛيَنغَ؟ 12تٛو! نٜطّٛ ٻُرِي مبَالَ دَرَجَ نَاع سٜطَّ! نغَمْ نٛنْ، اَتَّوْرَ حَطَايِ طُمْ وَطَ کٛ وٛوطِ ݧَلْندٜ سِوْتَارٜ؞» 13سٜيْ اٛ وِعِ نٜطّٛ اٛنْ، «فٛرْتُ جُنْغٛ مَاطَ؞»
سٜيْ اٛ فٛرْتِنغٛ، سٜيْ نغٛ يَمْطِتِ، نغٛ وَرْتِ بٛ وٛعٛتٛ نغٛنْ؞ 14اَمَّا فَارِسَنْکٛعٜنْ ٻٜنْ مبُرْتِي مٜدِّ دٛوْ نٛ ٻٜ مبَرْدَتَ يٜىٰسُ؞
مَشُّطٛ مٛ اَللَّه سُٻِ
15ندٜ يٜىٰسُ فَامِ کٛ ٻٜ شِرْيٛتٛو، سٜيْ اٛ اُمِّي اٛ اَلِ وِغٜىٰرٜ ندٜنْ؞ سٜيْ يِمْٻٜ طُطْٻٜ تٛکِّمٛ، اٛ يَمْطِتِنِٻٜ ٻٜ فُو، 16اٛ وَغِّنِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞ 17طُعُمْ فُو وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ، وِيکِ،
18«اٛعٛ وٛنِ مَشُّطٛ مٛ شُٻُمِ،
مٛ نغِطُمِ، اٜ مِ نَنَ بٜلْطُمْ مَاکٛ نَاع سٜطَّ؞
مِ حٛکَّيْمٛ رُوحُ اَمْ،
اٛ حٛکَّيْ لٜݧِ حَبَرُ کِسْندَمْ اَمْ؞
19اٛ يٜدَّتَا اٛ مٜتَتَا سٜمْبٜىٰ،
وَلَا نَنَيْطٛ حٛولٛ حٛنٛنْدٜ مَاکٛ دٛوْ طَتٜ؞
20اٛ حٜىٰݧِتَتَا يٜوُکِ پٛمْبَلْ ٻَدِينغَلْ يٜوُکِ؞
اٛ ݧِفَتَا فِتِلَارُ ٻَدِيندُ وَاتُکِ،
نَا اٛ وَطِي اَادِلَاکُ حٜٻِ جَالٛرْغَلْ دٛوْ حَلّٜىٰندٜ؞
21لٜݧِ فُو نغَطَيْ کَمُّندٜ دٛوْ مَاکٛ؞»
يٜىٰسُ اٜ بَعَلْجَبُلْ
22سٜيْ طُمْ وَدَّنِمٛ غٛطّٛ ڤَحٛ بُمْطٛ غٛودُطٛ غِنّٛلْ؞ يٜىٰسُ بٛو يَمْطِتِنِمٛ، اٛ وَرْتِ اٜ مٛ مٜتَ، اٜ مٛ يِعَ؞ 23کَوْرُتُٻٜ فُو کَيْطِنِ، مبِعِ، «اٜ يِيکِ مٛوطٛنْ کٛو اٛعٛ وٛنِ ٻِطّٛ دَوْدَ؟»
24اَمَّا ندٜ فَارِسَنْکٛعٜنْ نَنِ نٛنْ، ٻٜ مبِعِ، «اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ؞»
25اَمَّا يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، اٛ وِعِٻٜ، «لَامُ فُو شٜنْدِيطُمْ اٜ وَݧْوَݧْتِرَ، طُمْ لَلَّيْ؞ نٛنْ مَا تٛ غَرِيرِ کٛو وُرٛ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو؞ 26تٛ شٜيْطَنْ اٜ وُرْتِنَ غِنِّ شٜيْطَنْ ندٜرْ لَامُ شٜيْطَنْ، شٜيْطَنْ سٜنْدَکٜ اٜ وَݧْوَݧْتِرَ وٛنْ طٛنْ؞ تٛ لَامُ مَاکٛ سٜنْدَکٜ، نٛيٜ لَامُ طُمْ دَرٛرْتٛو؟ 27تٛ اٜ مِ وُرْتِنِرَ غِنِّ ندٜرْ بَوْطٜ بَعَلْجَبُلْ، اٜ بَوْطٜ مٛيٜ تٛکُّٻٜعٛنْ مبُرْتِنِرْتَطِ؟ نغَمْ نٛنْ تٛکُّٻٜعٛنْ کٛلَّيْ اٛنْ نغَلَا غٛونغَ؞ 28اَمَّا، تٛ اٜ مِ وُرْتِنَ غِنِّ ندٜرْ بَوْطٜ رُوحُ اَللَّه، تٛو، حٛلِّي لَامُ اَللَّه وَرَنِيعٛنْ؞
29«نٛ وَطَتَ طُمْ وَاوَ نَتُّکِ وُرٛ نٜطّٛ شٜمْبِطّٛ طُمْ تٜىٰتَنَمٛ کٛ اٛ وٛودِ، نَاع سٜيْ تٛ طُمْ اَرْتِي حَٻُّکِمٛ؟ ندٜنْ طُمْ وَاوَ حٛشُّکِ کٛ اٛ وٛودِ ندٜرْ وُرٛ نغٛنْ؞
30«مٛ وٛنْدَا اٜ اَمْ فُو، اٛ غَݧٛ اَمْ؞ مٛ وَلَّايِيَمْ مٛٻْتُکِ فُو، اٛ شَنْکِتٛووٛ؞ 31نغَمْ نٛنْ، اٜ مِ وِعَعٛنْ، طُمْ وَاوَيْ يَافَنَاکِ يِمْٻٜ حَکّٜ اٜ کٛو اِرِ طِيٜ حَالَاجِ طِ مبٛوطَا طِ ٻٜ مٜتِ، اَمَّا بِعُطٛ کٛ وٛوطَا دٛوْ رُوحُ اَللَّه اٛ يَافَنْتَاکٜ؞ 32فُو بِعُطٛ کٛ وٛوطَا دٛوْ ٻِي نٜطّٛ، طُمْ وَاوَيْ يَافَنَاکِمٛ؞ اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ حَا اَبَدَا؞
لٜکِّ اٜ ٻِکّٛيْ مَاکِ
33«لٜکِّ بٛطْکِ اٜ رِمَ ٻِکّٛيْ مبٛطْکٛيْ، نٛنْ مَا لٜکِّ کِ وٛوطَا اٜ رِمَ ٻِکّٛيْ کٛيْ مبٛوطَا؞ کٛو کِيٜ لٜکِّ اٜ اَنْدِرٜىٰ ٻِکّٛيْ مَاکِ؞ 34اٛنٛنْ بٛولٜ کَلُّطٜ! نٛ وَطَتَ اٛنٛنْ کَلُّٻٜ مٜتٛنْ کٛ وٛوطِ؟ نغَمْ حٛنْدُکٛ نٜطّٛ اٜ مٜتَ کٛ وٛنِ ندٜرْ ٻٜرْندٜ مُوطُمْ؞ 35نٜطّٛ مٛ نغِکُّ بٛطُّمْ اٜ وُرْتِنَ فِي بٛطُّمْ دَغَ ندٜرْ ٻٜرْندٜ مُوطُمْ؞ نٛنْ مَا نٜطّٛ کَلُّطٛ اٜ وُرْتِنَ حَلّٜىٰندٜ دَغَ ندٜرْ ٻٜرْندٜ مُوطُمْ؞
36«اٜ مِ وِعَعٛنْ، ندٜرْ ݧَلْندٜ جَانغٛ کٛو مٛيٜ دٛولٜ وِعَ اَللَّه نغَمْ طُمٜ وِعِ کٛو طٜيٜ بٛلِيطٜ مٜىٰرٜىٰجٜ؞ 37دٛوْ بٛلِيطٜ طٜ مبِعُطَا طُمْ وَطِرَنْتَمَ کِيتَ، کٛو طٜ نَنْغُمَا، کٛو طٜ مبُرْتِنْمَا؞»
يِطُکِ حٛلّٜىٰکِ کَيْطِنِيطُمْ
38سٜيْ وٛٻّٜ ندٜرْ مٛودِٻّٜ اَتَّوْرَ اٜ فَارِسَنْکٛعٜنْ مبِعِمٛ، «مٛودِبّٛ، اٜ مِنْ نغِطِ يِيکِ غٛطُّمْ کَيْطِنِيطُمْ دَغَ تٛ مَاطَ تَبِّتِنَيْطُمْ اَللَّه لِلٛيْمَا؞»
39سٜيْ يٜىٰسُ نٛوتِي، وِعِٻٜ، «يِمْٻٜ جَامَنُ طُعُمْ کَلُّٻٜ ٻٜ کُلَتَا اَللَّه، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛ اَنَّبِ اِنُوسَ؞ 40نغَمْ نٛنْ، نٛ اِنُوسَ وَطِرِ بَلْطٜ تَتِ جٜمَّ اٜ ݧَلَوْمَ ندٜرْ وٛنْغَ لِنْغَ مَنْغَ، نٛنْ مَا ٻِي نٜطّٛ وَطِرْتَ بَلْطٜ تَتِ جٜمَّ اٜ ݧَلَوْمَ ندٜرْ يٜنَاندٜ؞ 41اٜ ݧَلْندٜ جَانغٛ يِمْٻٜ غَرِيرِ نِينٜبَ ٻٜ اُمّٛدٛتٛ اٜ يِمْٻٜ جَامَنُ طُعُمْ؞ ٻٜ کٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَمْٻٜ، ندٜ ٻٜ نَنِ وَعَجُ اَنَّبِ اِنُوسَ، ٻٜ تُوبِي؞ رَا بٛو ٻُرْطٛ اِنُوسَ طٛعٛ؞ 42ݧَلْندٜ جَانغٛ لَامِيطٛ لٜيْدِ فٛمْبِنَ دٜبّٛ اٛ اُمّٛدٛتٛ اٜ يِمْٻٜ جَامَنُ طُعُمْ؞ اٛ حٛلَّ کٛ ٻٜ نغَطِ طُمْ وٛوطَا، نغَمْ کَنْکٛ اٛ وَرٛيِي دَغَ ٻَدَاکِ نَنُکِ فَامُ اَنَّبِ سُلٜيْمَانُ؞ رَا بٛو ٻُرْطٛ سُلٜيْمَانُ طٛعٛ؞
وَرْتُکِ غِنّٛلْ
43«تٛ غِنّٛلْ وُرْتَکٜ ندٜرْ ٻَنْدُ نٜطّٛ، نغٛلْ يَحَيْ تٛ بِغٜىٰجٜ جٛرْطٜ اٜ نغٛلْ طَٻِّتَ تٛ نغٛلْ سِوْتٛتٛو؞ اَمَّا تٛ نغٛلْ حٜٻَايِ، 44سٜيْ نغٛلْ وِعَ، ‹مِ سٛعّٛتٛ وُرٛ نغٛ مبُرْتٛيِيمِ؞› تٛ نغٛلْ وَرْتِي، نغٛلْ تَوِي وُرٛ نغٛنْ وَلَا غٛطُّمْ ندٜرْ، نغٛ وُووَامَ نغٛ مٛعِّنَامَ؞ 45سٜيْ نغٛلْ يَحَ نغٛلْ وَدّٛيَ غِنِّ جٛوٜىٰطِطِ ٻُرْطِنغٛلْ حَلُّکِ، طِ نَتَّ طِ نجٛوطٛو طٛنْ؞ ندٜنْ رٜعِرْدٜ نٜطّٛ اٛنْ ٻُرَيْ فُطّٛودٜ مَاکٛ حَلُّکِ؞ نٛنْ طُمْ وَرْتَنْتَ يِمْٻٜ جَامَنُ طُعُمْ کَلُّطُمْ؞»
مَدُوجٛ يٜىٰسُ اٜ مِݧِرَاٻٜ مَاکٛ
46يٜىٰسُ اٜ مٜدَّ اٜ يِمْٻٜ طُطْٻٜ حَوْرُتُٻٜ، سٜيْ رَا مَدُوجٛ مَاکٛ اٜ مِݧِرَاٻٜ مَاکٛ نغَرِ ندَرِي يَاسِ، اٜ ٻٜ نغِطِ مٜدُّکِ اٜ مَاکٛ؞ 47سٜيْ غٛطّٛ وِعِمٛ، «مَدُوجٛ مَاطَ اٜ مِݧِرَاٻٜ مَاطَ اٜ تٛنْ ندَرِي يَاسِ، اٜ ٻٜ نغِطِ مٜدُّکِ اٜ مَاطَ؞» 48اَمَّا اٛ وِعِ بِيطٛمٛکَ اٛنْ، «مٛيٜ وٛنِ مَدُوجٛ اَمْ، ندٜنْ ٻٜيٜ نغٛنِ مِݧِرَاٻٜ اَمْ؟» 49سٜيْ اٛ سَڤِّي تٛکُّٻٜمٛ، اٛ وِعِ، «رَا مَدُوجٛ اَمْ اٜ مِݧِرَاٻٜ اَمْ طٛعٛ! 50نغَمْ کٛو مٛيٜ وَطِ کٛ ݧَاکٛ اَمْ مٛ دٛوْ يِطِ، کَنْکٛ وٛنِ مِݧِرَاوٛ اَمْ اٜ مَدُوجٛ اَمْ؞»
Currently Selected:
مَاتِيُ 12: fuv
Highlight
Share
Copy
Want to have your highlights saved across all your devices? Sign up or sign in
© 2011, Bible League, All rights reserved.
