Ntandiliko 35

Yakobo àhamila ku Beseli

1Liduva limo Nnungu nkunnyaulila Yakobo kuchidoni, “Panganika mwanda uhwene ukaikale ku Beseli na ukangudengele chitala. Nangu njo Nnungu nnakuhumidile puchintukuta nkululo Esau.” 2Bahi Yakobo nkuvahaulila alangavake na vanu vammalele vanavenavo kuchidoni, “Yahilangila kulehu disanamu dya milungu dimuvenadyo, lihahulange na muwalange dinguwo dinji kulanguja kuva mùnilihahula muyo mwanga Nnungu, 3koka tuhwene ku Beseli uchinga nikan'dengele Nnungu chitala, Nnungu ayula anayang'wile maombi langu muuhiku wa kubanika kwangu na kuva pamo na nangu kila pachinu panichihwena.” 4Bahi anevo vanu nkumwing'anga Yakobo disanamu dyammalele dya milungu divanavenadyo pamo na diheleni divanawete mmakutu lavo. Yakobo nkudihuhulila pahi nnandi wa mwaloni unavele pepi na ku Shekemu.

5Yakobo na vana vake pavanavele mmwanda, Nnungu nkuvayopeha namene venedi va dimanga dyammalele dichivadinguka, na wala nanga pavanalingile kuvapapatilila. 6Bahi Yakobo pamo na vanu vammalele vanalongene navo nkuhwika ku Luzu, yani ku Beseli, nchilambo cha ku Kanaani. 7Yakobo nkudenga chitala pachinu anepo, nkupachema “El-Beseli,”#35:7 El-Beseli, mana lake “Nnungu wa ku Beseli” au “Nnungu wa ing'ande ya Nnungu.” Kwa kuva, Beseli ìvele na mana ya “Ing'ande ya Nnungu.” kwa kuva, pachinu anepo njo panalilangujije Nnungu kwanga Yakobo uhiku wachintukuta Esau, nkuluwe. 8Bahi Debola, anavele yaya wanga Labeka, nkuhila, nkunansika pannandi wa mwaloni unavele mpata wa kusini wa imanga ya Beseli. Bahi Yakobo nkupachema pachinu anepo Aloni-Bakusi, mana lake “Mwaloni wa Maomboleso.”

9Yakobo pauyite kuhaloka ku Padani-Alamu, Nnungu nkunhumila kavila na kum'baliki. 10Nnungu nkunnyaulila kuchidoni, “Wako lina lyako Yakobo, henga ukambechemwa kavila lina anelyo, vino lina lyako lìmbekuva Isilaeli.”#35:10 Mana ya lina Isilaeli, lola Ntandiliko 32:28. Bahi anepo njo Nnungu panchemile Yakobo#35:10 Mana ya lina Yakobo, lola Ntandiliko 25:26. lina, Isilaeli. 11Nnungu nkunnyaulila Yakobo kuchidoni, “Nangu ni Nnungu Nguvêle Na Dimongo Dyammalele.#35:11 Apano pàlembwije “El-Shadai.” Mana la El-Shadai lola chitabu cha Ntandiliko 17:1. Veleka, na vanu va nnukolo lwako vayenjejeke. Vanu va nnukolo lwako vàmbekuva chilambo chikulungwa, na vàmbekuva vilambo vyohe na vanji vàmbekuva vafalume. 12Chilambo chinnamwing'ile Iblahimu na Isaka, nìmbekwing'a na wako na vanu va nnukolo lwako.” 13Bahi Nnungu pamalidile kulonjela na Yakobo, nkunneka. 14Na pachinu anepo Nnungu pachitangola na Yakobo, Yakobo nkuliimija liyanga uchinga lììve ukumbuso, nkulijuha kuva lyanga Nnungu kwa kulimiminila mahuta na sadaka ya chikimbilo. 15Bahi Yakobo nkupachema anepo pachinu panalonjedile na Nnungu, Beseli.

Kuvelekwa kwanga Benjamini na kuhwa kwanga Laheli

16Bahi Yakobo pamo na alangavake vammalele nkuuka pa Beseli, nkulodya ku Efulata. Henga pavanavele nndila, kulehu kadiki na ku Efulata, Laheli nkulindamuka uchungu wa kuveleka, na ánibanika namene pachiveleka. 17Laheli bada ya kuveleka kwa ibaniki ing'ulu, nkunga nkunnyaulila kuchidoni, “Unayope, kwa kuva ùmpete mwana yunji wachilume.” 18Laheli panavele pepi na kuhwa, nkunchema aneyo mwana lina, Ben-Oni, mana lake “mwana wa ibaniki yangu.” Henga atatake nkunchema lina, Benjamini, mana lake “mwana wa kunkono kwangu.” 19Bahi Laheli nkuhila, nkunansika nnyenje indila ilôja ya ku Efulata, yani Beselehemu. 20Yakobo nkuliimija liyanga lya ukumbuso muha nsati wa Laheli, na liyanga anelyo lìnipwawa mpaka nelo.#35:20 Musa pálembìlè kuva “mpaka nelo,” ávele na mana kuva mpaka uhiku aula wachilemba chitabu achino. 21Bahi Isilaeli, yani Yakobo nkuuka anepo chalumo na alangavake nkuhwena unadenga n'gongwe wake mpata wavili wa nnala wa valinzi aneko ku Edeli.

22Isilaeli pachiikala nchilambo anecho, Lubeni mwanawe, nkulala na Biliha, ntumwa anavele n'jawe atatake, Isilaeli nkupilikana habali aneyo.

Vana vanga Yakobo

(1 Mahiku 2:1-2)

Yakobo ávele na vana kumi na mbili vachilume. 23Vana vachilume vammelekedile Leya ni avano, Lubeni mwana ntandi wanga Yakobo na Simeoni na Lawi na Yuda na Isakali na Zabuloni. 24Na vana vachilume vammelekedile Laheli ni avano, Yusufu na Benjamini. 25Na vana vachilume vammelekedile Biliha, ntumwa wanga Laheli ni avano, Dani na Nafutali. 26Na vana vachilume vammelekedile Zilipa, ntumwa wanga Leya ni avano, Gadi na Asheli. Anevo njo vana vachilume vanga Yakobo, vanavelekwejije aneko ku Padani-Alamu.

Kuhwa kwanga Isaka

27Bahi Yakobo nkuuka anepo, nkunahwika kukaya kwa Isaka atatake aneko ku Mamle, pepi na Kiliasi-Alba, yani Hebloni, pachinu pavachiikala Iblahimu na Isaka muchi amidi. 28-29Isaka áhidile akongopèlè namene, avèlè na vyaka vyohe namene, vyaka myamoja samanini. Na bada ya kuhwa nkuhwena unaikala pamo na anyakala vake, vanahidile kala. Bahi vana vake, yani Esau na Yakobo, nkunsika.

Currently Selected:

Ntandiliko 35: Chimakonde

Highlight

Copy