MATAYO 7
7
Kuwatagusa Wayagwe
(Luk. 6:37-38, 41-42)
1“Sambimuwataguse wayagwe, na Mulungu hawatagusa mweye, 2kwavija kamba vimuwatagusa wayagwe, vivo na Mulungu vondayawataguse mweye, na mhima iija yondamuwapimile wayagwe, iyo mhima yondampimilwe mweye. 3Habali ukilola kikupi msiso da ndugu yako, na huchona kibanzi kili msiso jako mwenyego? 4Kodaha vilihi kumulongela ndugu yako, ‘Beta nikulave kikupi mdisiso jako,’ kuno gweye kuna kibanzi mdisiso jako? 5Gweye kidelenya! Songa tanhu kulava kibanzi msiso jako mwenyego, giladi udahe kulola goya, abaho, leka ulave kikupi msiso da ndugu yako.
6“Sambimuwagwelele umbwa vinhu ving'alile, kamba muhatenda avo, wowahindukila na kuwadega, na sambimuwasile mitumbi lulu zenu, kamba muhatenda avo, wozibojaga.
Pula, Zahila, Toa Hodi
(Luk. 11:9-13)
7“Puleni, mogweleligwa. Zahileni, movumbula. Toeni hodi, movugulilwa. 8Kwavija yoyose yopula kogweleligwa, na yoyose yozahila kovumbula, na yoyose yotoa hodi kovugulilwa. 9Ama yalihi mmwanza wenu, kamba mwanage yahampula mkate, komgwelela dibwe? 10Ama yahampula somba, komgwelela nyoka? 11Ihawa mweye mtenda mbuli zihile, movitanga kuwagwelela wanenu vinhu vinogile, avo, Tata wenu wa kuulanga kabanza ng'hani kuwagwelela vinhu vinogile waja wose wompula!
12“Avo, chochose chumulonda mtendeligwe na wanhu, na mweye muwatendele vivo, kwavija gano gago mafundo ga Malagizo ga Musa na wahokozi.
Lwivi Lusisili
(Luk. 13:24)
13“Ingileni mkubitila lwivi lusisili, kwavija lwivi lugazi na zila gazi dilongoza kuubananzi, na wondawengile kubitila zila hijo wowa bwando. 14Ila lwivi lusisili na inzila yakibabani ilongoza kuugima, na wanhu wondawayone wowa wadodo.
M'biki na Mujo Wake
(Luk. 6:43-44)
15“Iteganyeni na wahokozi wa uvwizi, womwizileni kunze walingile kamba ng'hondolo, ila mgati mbwizi wodumbiza. 16Mowatambula kubitila sang'hano zao. Vino wanhu wobawa zabibu muna imizomola, ama tini muna imingemba? 17Avo, m'biki unogile wolela mujo unogile, ila m'biki wihile wolela mujo wihile. 18M'biki unogile haudaha kulela mujo wihile, na m'biki wihile haudaha kulela mujo unogile. 19Na m'biki wowose uleka kulela mujo unogile wokanhigwa na kwasigwa muna umoto. 20Avo, mowatambula kubitila sang'hano zao.
Siwatangile Mweye
(Luk. 13:25-27)
21“Sio kila munhu yonikema, ‘Mndewa, Mndewa’ yondayengile muna Uundewa wa Kuulanga, ila heyo yogatenda gaja goyolonda Tataangu wa kuulanga. 22Mdizua da nhaguso wanhu bwando wonilongela, ‘Mndewa, Mndewa! Hatuhokole mditwaga jako, na mditwaga jako tuwinga vinyamkela, na kutenda mizonza bwando?’ 23Abaho, nowalongela, ‘Siwatangile mweye. Segeleni hamwangu, mweye watenda gehile!’
Wazenga Ng'anda Wabili
(Luk. 6:47-49)
24“Avo munhu yoyose yohulika mbuli zangu na kuzisang'hana kolinga na munhu yali na nzewele yozenga ng'anda yake uchana ya dibwe. 25Mvula itoa, nyanda zitula, na beho dibuma na kuitoa ng'anda hiyo, ila haitulike, kwavija msingi wake uzengigwa mdidibwe.
26“Ila munhu yoyose yohulika mbuli zangu na kuleka kuzisang'hana kolinga na munhu m'bozi yozenga ng'anda yake mmisenga. 27Mvula itoa, nyanda zitula, na beho dibuma na kuitoa ng'anda hiyo, nayo itulika, na nhulika yake ikala ihile ng'hani!”
Udaho wa Yesu
28Yesu viyamambukize kulonga gano, didale da wanhu dikanganya mafundo gake, 29kwavija hafundize kamba wafundiza zao wa Malagizo ga Musa, ila kafundiza kamba munhu yali na udaho.
Currently Selected:
MATAYO 7: Kizalamo
Highlight
Share
Copy
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
