MWANDUSO 36

Lukolo lwa Esau

1Luno lulo lukolo lwa Esau, ayo vivija yakemigwe Edomu. 2Esau kawasola watwanzi zake kulawa muisi ya Kanaani, Ada mndele wa Eloni Muhiti, na Oholibama, ayo yakalile mndele wa Ana na mzukulu wa Zibeoni Muhivi, 3na Basemati mwanage Sumaili na lumbu ja Nebayoti. 4Ada kamulelela Esau mwana yokemigwa Elifazi, Basemati kamulelela Esau mwana yokemigwa Leueli, 5na Oholibama kawalela Yeushi, Yalamu, na Kola. Wano wose iwo wana iyawalelile Esau kipigiti viyakalile Kanaani.

6Abaho Esau kawasola watwanzi zake, wanage wakitwanzi na wakimbigalo, na wanhu wose wakalile mng'anda yake, hamoja na wang'onyo zake wose na vinhu vose viyakalile navo haja Kanaani. Kasegela, kachola kuisi ikalile kutali na mdodo wake Yakobo. 7Katenda avo kwavija isi iwakalile wokala heyo na mdodo wake Yakobo ikala ndodo, avo havidahike kukala hamoja, kwavija wakala na wang'onyo bwando. 8Avo Esau ayo yakalile na twaga diyagwe dikemigwa Edomu kachola kukala muisi ya vigongovigongo ya Seili.

9Luno lulo lukolo lwa Esau, muhenga wa Waedomu muisi ya vigongovigongo ya Seili. 10Matwaga ga wana wa Esau gakala Elifazi, mwana wa mtwanzi wa Esau yokemigwa Ada, na Leueli, mwana wa mtwanzi wa Esau yokemigwa Basemati. 11Wana wa Elifazi wakala Temani, Omali, Zefo, Gatamu, na Kenazi. 12Mwana wa Esau yokemigwa Elifazi kakala na mtwanzi wa kunze twaga jake dikemigwa Timna, iyalelile nayo mwana yokemigwa Amaleki. Wana wano sita wambigalo wakala wazukulu wa mtwanzi wa Esau yokemigwa Ada.

13Wana wa Leueli wakala Nahati, Zela, Shama, na Miza. Wano wakala wazukulu wa Basemati, mtwanzi wa Esau.

14Oholibama, ayo yakalile mndele wa Ana na mzukulu wa Zibeoni, kamulelela Esau wana wadatu wakemigwe Yeushi, Yalamu, na Kola.

15Wano wao wakulu wa mitala ilawile mulukolo lwa Esau. Elifazi kakala chaudele wa Esau na heyo kakala na wana wakemigwe Temani, Omali, Zefo, Kenazi, 16Kola, Gatamu, na Amaleki. Wano wao wakulu kulawa mulukolo lwa Elifazi muisi ya Edomu, wakala wazukulu wa mtwanzi wa Esau yokemigwa Ada.

17Leueli, mwanage Esau, kawalela Nahati, Zela, Shama, na Miza. Wano wao wakulu wa lukolo lwa Leueli muisi ya Edomu, wakala wazukulu wa mtwanzi wa Esau yokemigwa Basemati.

18Wana wa mtwanzi wa Esau yokemigwa Oholibama wakala Yeushi, Yalamu, na Kola. Wano wao wakulu wa lukolo lwa mtwanzi wa Esau yokemigwa Oholibama mwanage Ana. 19Wano wao wana wa Esau, vivija yakemigwe Edomu, na kila munhu kakala mkulu muisi yake.

Lukolo lwa Seili

(1Vipig. 1:38-42)

20Wano wao wana wa Seili Mholi. Wakalile wokala muisi ija, matwaga gao gakala Lotani, Shobali, Zibeoni, Ana, 21Dishoni, Ezeli, na Dishani. Wana wano wa Seili wakalile wokala Edomu wakala wakulu wa Waholi.

22Wana wa Lotani wakala Holi na Hemani. Timna kakala lumbu jake Lotani. 23Wana wa Shobali wakala Alvani, Manahati, Ebali, Shefo, na Onamu.

24Wana wa Sibeoni wakala Aya na Ana. Ana iyo yavumbule nzokwe za mazi ga moto kuluwala, kipigiti viyakalile yochunga mhunda za Zibeoni tataake. 25Wana wa Ana wakala Dishoni na Oholibama lumbu jake. 26Wana wa Dishoni wakala Hemdani, Eshibani, Itilani, na Kelani.

27Wana wa Ezeli wakala Bilhani, Zaavani, na Akani.

28Wana wa Dishani wakala Uzi na Alani.

29Wakulu wa Waholi wakala Lotani, Shobali, Zibeoni, Ana, 30Dishoni, Ezeli, na Dishani. Wano wakala wakulu wa Waholi muisi ya Seili.

Wandewa wa Isi ya Edomu

(1Vipig. 1:43-54)

31Wano wao wandewa wakalile watawale isi ya Edomu kipigiti hanatawala mndewa yoyose muisi ya Islaeli. 32Bela mwanage Beoli kawa mndewa wa isi ya Edomu, wambo jake dikala dikemigwa Dinihaba. 33Bela viyadanganhike, Yobabu mwanage Zela wa wambo da Bozla kawa mndewa, kusola nafasi yake. 34Yobabu viyadanganhike, Hushamu wa isi ya Watemani kawa mndewa, kusola nafasi yake. 35Hushamu viyadanganhike, Hadadi mwana wa Bedadi kawa mndewa, kusola nafasi yake, na kutawala songela mdiwambo da Avita. Heyo kakala yawahumile Wamidiani muisi ya Moabu. 36Hadadi viyadanganhike, Samla kulawa mdiwambo da Masleka kawa mndewa, kusola nafasi yake. 37Samla viyadanganhike, Shauli kulawa mdiwambo da Lehoboti behi na ulwanda#36:37 Nyandiko ziyagwe zolonga lwanda luno lukala Lwanda lwa Yuflati. kawa mndewa, kusola nafasi yake. 38Shauli viyadanganhike, Baali-Hanani mwanage Akiboli kawa mndewa, kusola nafasi yake. 39Baali-Hanani mwanage Akiboli viyadanganhike, Hadadi kawa mndewa, kusola nafasi yake, na kutawala songela mdiwambo da Pau. Mtwanzi wake kakemigwa Mehetabeli, mndele wa Matiledi na mzukulu wa kitwanzi wa Me-Zahabu.

40Gano gago matwaga ga wakulu wa lukolo lwa Esau, hanhu hawakalile wokala hakemigwe matwaga ga madale gao, Timna, Alva, Yeteti, 41Oholibama, Ela, Pinoni, 42Kenazi, Temani, Mibizali, 43Magidieli, na Ilamu. Wano wakala wakulu wa isi zao kulawa mulukolo lwa Esau, muhenga wa Waedomu. Hanhu hawakalile wokala hakemigwa matwaga ga mitala yao.

Currently Selected:

MWANDUSO 36: Kizalamo

Highlight

Copy