MWANDUSO 28

1Avo Isaka kamkema Yakobo, kammoteza, na kumulagiza, yolonga, “Sambiusole mtwanzi yoyose Mkanaani. 2Hima genda Padani-Alamu, mng'anda ya Betueli tata wa mamaako, ukasole mtwanzi kulawa kwa wana wa Labani mjombaako. 3Mulungu Mwene Mhiko yakumoteze giladi yakugwelele wana bwando. Lukolo lwako longezeke giladi uwe tata wa wanhu bwando. 4Mulungu yakugwelele gweye na lukolo lwako motelo ziyagweleligwe Ablaham, giladi upate kuitawala isi yuukala sambi kamba muhenza, isi Mulungu iyamgwelele Ablaham.” 5Abaho, Isaka kamtuma Yakobo yachole Padani-Alamu ha Labani mwanage Betueli Mwalamu, lumbu ja Lebeka, ayo yakalile mamaao Yakobo na Esau.

Esau Kosola Mtwanzi Iyagwe

6Esau kavitanga kamba Isaka kammoteza Yakobo na kamtuma yachole Padani-Alamu yakasole mtwanzi kuja. Na viyakalile yommoteza kamulagiza yolonga, “Sambiusole mtwanzi kulawa muisi ya Kanaani.” 7Na vivija kavitanga kamba, Yakobo kawatogolela tataake na mamaake na kachola Padani-Alamu. 8Avo Esau kavitanga kamba tataake Isaka hanogelwe na watwanzi wa Kanaani. 9Esau kachola ha Sumaili mwanage Ablaham, na kamsola Mahalati mwanage Sumaili, ayo yakalile lumbu ja Nebayoti, na kongeza hamoja na iwatwanzi iyakalile nao.

Nzozi ya Yakobo ako Beteli

10Yakobo kasegela Beeli-Sheba kachola Halani. 11Viivikile ichungulo kavika hanhu hanogile ha kwika ng'hambi na kuhumula, kwavija zua dikala diswile na kilo kingila. Kasola dibwe dimwe dikalile haja na kudika hasi ya ditwi jake na kawasa. 12Kalota nzozi, kona ngwandala imile kulawa muisi mbaka kuulanga, na wasenga wa Mulungu wa kuulanga wokwela na kuhumuluka mngwandala ija. 13MNDEWA kema hamgwazo wake, na kulonga, “Nie iyo MNDEWA, Mulungu wa muhenga wako Ablaham, na Mulungu wa Isaka. Isi ino yuuiwasile, nokugwelela gweye na lukolo lwako. 14Lukolo lwako lowa kamba timbwisi da isi, na mokwenela kulawa ng'ambu ya ulawilo wa zua na uswelo wa zua, kaskazi na kusi. Wanhu wose muisi womotezwa kubitila gweye na lukolo lwako. 15Nie na hamoja na gweye na nokwimiliza kokose kondauchole, na nokubweza kabili muisi ino. Sikuleka mbaka vondanikitende kilagano kiniilagane na gweye.”

16Abaho, Yakobo kalamuka kulawa muutulo na kulonga, “Kweli MNDEWA ka hanhu hano, na nie nikala sivimanyile!” 17Yakobo kadumba na kulonga, “Hanhu hano hodumbiza ng'hani, hano baho hana ing'anda ya Mulungu, na luno lulo lwivi lwa kuulanga.”

18Imitondo ng'hani zua da ikabili Yakobo viyalamuke, kasola dibwe dikalile hasi ya ditwi jake, kadisimika kamba nguzo ya lukumbuso na uchana yake kadigidila mavuta ga mzaituni na kudibagula sama ya Mulungu. 19Hanhu haja kahakema Beteli.#28:19 Mkieblania Beteli nhegulo yake ng'anda ya Mulungu. ila twaga da wambo dija haichanduso dikala dikemigwa Luzi. 20Abaho Yakobo katenda kiduilo, yolonga, “Kamba Mulungu uhawa hamoja na nie na kunimiliza nie mmwanza wangu, na kamba uhanigwelela mandia na vivalo, 21na kamba nahabwela ukae ha tataangu nili na upile, avo kowa MNDEWA Mulungu wangu. 22Na dibwe dino dinisimike kamba nguzo, dowa ng'anda ya Mulungu, na vinhu vose vondaunigwelele nie nokulavila gweye zaka.”

Currently Selected:

MWANDUSO 28: Kizalamo

Highlight

Copy