MWANDUSO 25

Lukolo Luyagwe lwa Ablaham

(1Vipig. 1:32-33)

1Ablaham kasola mtwanzi iyagwe, twaga jake dikala dikemigwa Ketula. 2Ketula kamulelela wana Ablaham, wakalile wokemigwa Zimulani, Yokshan, Medani, Midiani, Ishibaki, na Shua. 3Yokshan kawalela Sheba na Dedani, na lukolo lwa Dedani lukala Waashulu, Waletushi, na Waleumi. 4Na wanage Midiani wakala Efa, Efeli, Hanoki, Abida, na Elida. Wana wose wano wakala lukolo lwa Ketula.

5Ablaham kalonga kamba yahadanganhika, Isaka iyo yondayahale vinhu vose viyalinavo. 6Ila kipigiti Ablaham viyakalile hanadanganhika, kawagwelela nhunza wana iyawalelile na watwanzi zake wa kunze na kuwasegeza wachole kuulawilo wa zua kutali na mwanage Isaka.

7Ablaham kakala muulumwengu milao mia na malongo saba na tano. 8Ablaham kadanganhika kipigiti viyakalile m'vyele ng'hani, kakala na ulazi wa milao bwando. Kadanganhika na kuilumba hamoja na wahenga zake. 9Isaka na Sumaili, wanage Ablaham, wamzika tataao muimhango ya Makipela, ili mwambu wa ulawilo wa zua wa Mamle mumgunda wa Efloni mwanage Zohali Muhiti, 10mgunda awo Ablaham uyaugulile kulawa ha Muhiti, baho hawazikigwe Ablaham na Sala mtwanzi wake. 11Ablaham viyadanganhike, Mulungu kammoteza Isaka mwanage, ayo yacholile kukala behi na sima da Beeli-Lahai-Loi.

Lukolo lwa Sumaili

12Luno lulo lukolo lwa Sumaili, mwanage Ablaham, ayo Hajili, nyakadala wa Sala kulawa Misili, iyamulelele Ablaham. 13Gano gago matwaga ga wana wa Sumaili, gandikigwe songela waichanduso kuvumbuka mbaka waikimambukizo. Nebayoti kakala waichanduso kuvumbuka ha Sumaili, abaho kavumbuka Kedali, Abidieli, na Mibusamu, 14Mishima, Duma, Masa, 15Hadadi, Tema, Yetuli, Nafishi, na Kedema. 16Wano wao wana longo dimwe na wabili wa Sumaili, viwambo vao na ng'hambi zao vitangigwa na matwaga gao. 17Sumaili kakala muulumwengu milao mia na malongo madatu na saba. Kadanganhika na kuilumba hamoja na wahenga zake 18Lukolo lwa Sumaili lukala lukalile hagatigati ya isi za Havila na Shuli, behibehi na mbaka ya Misili nzila ya kuchola Ashulu. Wakala wainegile na wana wayagwe wa Ablaham.

Kuvumbuka kwa Esau na Yakobo

19Luno lulo lukolo lwa Isaka mwanage Ablaham. 20Isaka viyakalile na milao malongo mane, kamsola Lebeka mwanage Betueli, Mwalamu kulawa isi ya Padani-Alamu,#25:20 Padani-Alamu ya ako Kaskazi na Uswelo wa zua wa isi ya Mesopotamia. lumbu jake Labani. 21Isaka kamtambikila MNDEWA sama ya mtwanzi wake, kwavija Lebeka kakala bule sambo. Na MNDEWA kazibokela nhambiko zake, na mtwanzi wake kapata inda. 22Kakala na ubasa muinda yake na kipigiti hawanavumbuka wakala wogomba muinda yake, avo kalonga, “Habali vinhu kamba vino vindawilile nie?” Avo kachola kumuuza MNDEWA.

23MNDEWA kamulongela,

“Ndewa mbili za muinda yako,

na wanhu wabili kulawa muinda yako woihasanya.

Imwe kowa na mhiko kum'banza iyagwe,

na ija imkulu komsang'hanikila ija imdodo.”

24Kipigiti cha Lebeka kulela vikivikile, kalela wana ubasa wa kimbigalo. 25Waichanduso kuvumbuka kakala mdung'hu, na lukuli lwake lose lukala na mvili, na wamgwelela twaga dikemigwa Esau.#25:25 MkieblaniaEsau nhegulo yake yali na mvili lukuli lose. 26Hakimambukizo, mdodo wake kavumbuka kuno mkono wake ugogile kisiginho cha Esau, avo wamgwelela twaga dikemigwa Yakobo.#25:26Mkieblania Yakobo nhegulo yake kugoga kisiginho na vivija m'vwizi. Isaka kakala na milao malongo sita kipigiti Lebeka viyawalelile.

Esau Koguza Kija Choyolondigwa Kwing'higwa Sama ya Kuvumbuka wa Ichanduso

27Waja iwana wakula, Esau kawa msakaji galu wa wang'onyo, munhu yanogelwe kukala kumuhulo, ila Yakobo kakala munhu yaholile yanogelwe kukala hakae. 28Isaka kamnogela Esau kwavija kakala yoja nyama zayakomile, ila Lebeka kanogelwa na Yakobo.

29Zua dimwe Yakobo viyakalile yoteleka dengu, Esau kengila kulawa kusaka kuno yali na nzala ng'hani. 30Esau kamulongela Yakobo, “Hima, nigwelele mandia higo madung'hu ndie, nie nofa nzala.” Kino kicho kilamso cha Esau kukemigwa Edomu, nhegulo yake ndung'hu.#25:30 Mkieblania Edomu dilinga na ulonzi wa Kieblania uli na nhegulo ya ndung'hu.

31Yakobo kamulongela, “Tanhu uniguzile nie vija viulondigwa kwing'higwa gweye sama ya kuvumbuka wa ichanduso.”

32Esau kalonga, “Lola, nie na mmabehi kudanganhika, vija vinilondigwa kwing'higwa sama ya kuvumbuka wa ichanduso novitendela choni?”

33Yakobo kamulongela, “Tanhu niduilile kamba konigwelela vija viulondigwa kwing'higwa sama ya kuvumbuka wa ichanduso.”

Esau kaiduila na kumgwelela Yakobo vija voyolondigwa kwing'higwa sama ya kuvumbuka wa ichanduso. 34Yakobo kamgwelela Esau mkate na dengu, kaja na kung'wa, abaho kenuka kasegela. Vino vivo Esau viyazabuze vija viyalondigwe kwing'higwa sama ya kuvumbuka wa ichanduso.

Currently Selected:

MWANDUSO 25: Kizalamo

Highlight

Copy