Sekaria 12
12
Ohununulwa hwa Yerusalemu hwiichayo
1Yino niyo emboosi yidiira hu Yisiraeli eyitula eyiri Omwaami, Omwaami wabaamba ekulu, owaloonga esyaalo, haandi owaberesa omuundu obulamu. Mani aboola ati, 2“Ese njia ohuhola Yerusalemu yibe koti esikoombe sy'efiini; ebyaalo biindi bisyebodohaanie bicha ohwechaaka mani bidamaana koti abaandu bameerere. Mani nibachia ohuboola mbwe bawaamba Yerusalemu esyo, ebiko bihunuufu bya Yuda bidoong'ere byosi biba byahawaambwe. 3Mani esiha esyo nisyahoole, ese njia ohuhola Yerusalemu sibe koti ekina esito mani buli syaalo sichia ohuteemaangaho ohulikiinga esyeene sichia ohunyaalihaanga sa esyeene. Ebyaalo biindi byoosi ebyomu syaalo muno bicha ohwambaania alala amaye kabyo mbwe hu binyale ohusiseeta. 4Esiha syeene esyo, ese njia ohuteengya efaraasi chaabwe choosi mani hole abeerusi bachio boosi balaluhe. Ese njia ohubaliiraanga abaandu ba Yuda, nae njia ohuwofusa efaraasi ch'abasuku baabwe. 5Ao niwo yi nono cha Yuda choosi chichia ohuboolanira echeene chiti, ‘Omwaami Nasaae ow'Obunyala bwoosi niye oberesaanga abaandu bae amaani abamenya mu Yerusalemu.’ ”
6“Esiha esyo ese njia ohuhola enono chia Yuda chibe koti omuliro kweereba mu sichaha haandi koti okuli mu mukuunda kw'emere yaangaale, mani basihirise ebyaalo byoosi ebisyebodohaanie. Nae abaandu ba Yerusalemu bachia ohudoong'a sa nibali mu muleembe mu siko sihunuufu esyo.”
7“Ese Omwaami njia ohutaangira ohuberesa amaye ka Yuda obuyiingiri, hu bulaanu oluyaali lu beechuhulu ba Daudi, alala neende abaandu baandi bali mu Yerusalemu bachia ohunyoola lunyale ohuba oluhoongo luhiraho olw'esituundu sidoong'ereo sya Yuda. 8Esiha syeene esyo, Omwaami achia ohulwaanira abo abamenya mu Yerusalemu, mani kata oyo ohiramo obukata achia ohuba neende amaani akaaka neende aka Daudi kali. Abeechuhulu ba Daudi bachia ohubeemiriraanga koti malaika w'Omwaami, haandi koti Nasaae mweene. 9Esiha syeene esyo, ese njia ohusihirisa buli syaalo sichia ohutemaangaho ohuseeta Yerusalemu.”
10 #
Yow 19:37; Hubwi 1:7. #Mat 24:20; Hubwi 1:7. “Ese njia ohwiichusa abeechuhulu ba Daudi alala neende abaandu baandi ba Yerusalemu neende mwooyo w'esisa, haandi mwooyo w'ohulaamaanga. Bachia ohwewuunjaanga oyo yi bafumita yaafwa, mani bamulire koti abo abalira omwaana mudeerwa. Bachia ohulira ebilulu, koti abo abalira omwaana mudeerwa wa ng'ina, koti abo abafwiriirwe omwaana waamberi musyaani. 11Esiha syeene esyo ohulira mu Yerusalemu huchia ohuba ohubitiirifu koti ohwa nasaae Hadadi Rimooni mu sipaapi sya Megido. 12Esyaalo syoosi sichia ohulira, buli daala lyosi lyoong'ene; edaala ly'enyuumba ya Daudi lyosi lyoong'ene; haandi abahasi baabwe bosi boong'ene; edaala lya Natani lyosi lyoong'ene, haandi kata abahasi baabwe bosi boong'ene; 13edaala ly'enono ya Leefi yosi yoong'ene, haandi abahasi baabwe bosi boong'ene; edaala ly'Abasimei lyosi lyoong'ene, haandi abahasi baabwe bosi boong'ene; 14haandi amadaala koosi akadoong'ao buli litula lyoong'ene, haandi abahasi baabwe boong'ene.”
Currently Selected:
Sekaria 12: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
