Sekaria 10
10
Omwaami asuubisa ohununulwa
1Wekweede Omwaami ahubeeho efula mu toocho ly'omwaaka. Ni Omwaami niye oletaanga amaleesi k'efula kata neende olunyirira, ebihola emikuunda ni kifwaana bunyaasi eyiri buli muundu. 2#Mat 9:36; Mrk 6:34.Abaandu baandi beteeba hu biloongaloongwe neende abalakusi, nae amakaluso ka banyoola n'obubacha buhaya haandi obusiru buhaya. Abaandi mbwe bakalula ebilooto, nabo babakosa sa; ohuguma hu bababeresa hubulamo obuhoonyi. Mani abaandu bayikaana buli abuundu koti amakoondi kakotere. Bali mu madinyu olwohuba babula omweeresi yeesi.
3Omwaami aboola ati, “Ese nyoolereere muno abaandu bateende abo abatuka abaandu baange, mani ohwoola njia ohubasaandya. Ngaandi abaandu ba Yuda ni abaange, haandi ese mweene Omwaami w'Obunyala, njia ohubaliindaanga. Nabo bachia ohubechaanga efaraasi nwaani ch'ebiita ch'amaani chaange. 4Mu beene abo nimwo omuchia ohutulaanga abatuki, abeemirisi, haandi abahoongo bachia ohutukaanga abaandu baange. 5Abaandu ba Yuda bachia ohubechaanga abayiingiri koti sa abanamaye abaseenakira abasuku baabwe mu madosi kohu makira. Bachia ohulwaanaanga batyo hulwohuba Omwaami achia ohubechaanga nabo, mani banyaleenge ohuyiingira kata abasuku balwaanira efaraasi.” 6Ese mweene niise ochia ohuholaanga abaandu ba Yuda babecheenge neende amaani katyo;
Njia ohununula abaandu ba Yisiraeli.
Njia ohubakwiira esisa
mani mbakobose engo boosi alala.
Bachia ohufwaana koti abo ba ndali nitajwaang'aho daawe.
Ese niise Omwaami Nasaae waabwe;
mani njia ohukobolaanga mu hwekweeda hwaabwe.
7Abaandu ba Yisiraeli bachia ohunyoola amaani kali koti ak'abanamaye,
abasangaafu koti abo abamenya nibang'wa efiini.
Abeechuhulu baabwe bosi bahanyale ohwiichulisaanga obuyiingiri buno
mani beehoyereenge ebiindu bi Omwaami aba niyahola.
8“Ese njia ohulaanga abaandu baange mani mbabuuse alala.
Njia ohubawonia mani mbahole beengiyire elalira koti lu balichiingi hale.
9Kata neende nindabasalaania baakotera mu byaalo biindi,
kata neende nibali byaalo by'eyale muno, bachia ohunyala ohunjichulisaanga.
Abo alala neende abaana baabwe bachia ohuwonao
banyale ohukobola engo waabwe alala.
10Ohutula mu Misiri neende mu Asiria ese njia ohubakobosa engo
mbamenyie mu syaalo syaabwe syeene.
Njia ohubamenyia mu Gileadi neende Lebbanoni mwoosi;
esyaalo sino syoosi sichia ohwiichulamo abaandu du.
11Nibahamale ohwaambuha enyaanja y'ebidinyu byaabwe,
ese, Omwaami, omweene njia ohuhuya hu fwiinda echo,
mani olwaalo lw'omwaalo kwa Naili lwoomerere.
Asiria sy'esuunga sichia ohudiirwa esoni,
haandi Misiri esihunuufu muno esyo, sichia ohudeembuha sa.
12Ese njia ohudinyia abaandu baange babeemo amaani;
mani baanyinamire haandi baatye.”
Omwaami niye olomaloome.
Currently Selected:
Sekaria 10: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
