Yowaana EMANYISA
EMANYISA
Emboosi ndai ya Yesu Kristo koti lu yaandiikwa neende Yowaana yekesa koti lu Yesu ali Emboosi eyitaakama ya Nasaae, oyo “oweehola omuundu mani yaamenya mweefwe.” (1:14) Koti lu sitabo syeene siboola siti, Emboosi Ndai yino yaandiikwa hu bulaanu abachia ohuyisoma banyale ohufukiirira bati Yesu niye Omuwonia walakwa, oli Omwaana wa Nasaae, haandi bati ohubitira mu hufukiiriramo banyale ohunyoola obulamu (20:31).
Esituundu sy'esitabo sino, n'omala emanyisa syeekesa Emboosi ya Nasaae yitaakama neende Yesu oli Emboosi ya Nasaae oweehola omuundu. Esituundu sitaangira esy'Emboosi Ndai syeekesa eby'amayia bitaali nasilala ebyeekesa biti Yesu niye Omuwonia walakwa, Omwaana wa Nasaae. Eby'amayia bino bilooswaho neende embaha chikabuhaane echituumbula amahuluundu k'ebiholwa by'amayia ebyo. Esituundu sy'esitabo sino sikaniaaya koti abaandu baandi bafukiirira mu Yesu mani beehola abaloondi bae, nae koti abaandi nabo bamuyiinganianga mani bahayira elalira ohumuloonda. Esuula 13-17 chaandiika mu bulai bweene ebiindu bidiira hu huholera alala muno ohwaliwo akati wa Yesu neende abeeki bae mu siro si yadiirirwamo, haandi neende emboosi chae chiyababoolera echibatekeha haandi echibomiisa hu buhye ohubaambwa hwae hu musalabba hubeeo. Esuula yifuundihira nayo yilomaloma hu hudiirwa hwa Yesu, ohuwoseswa hwae, ohubaambwa, neende ohuyaaswa, alala neende ohubonehera hwae eyiri abeeki bae oluunyuma lw'ohusyuuha.
Emboosi Ndai ya Yowaana yomiisa esiyaanwa esy'obulamu butaakama esibitira mu Kristo, esiyaanwa esyo esichaakanirao bulaanu haandi esyoola hu abo boosi ababa nibachia eyiri Yesu nibafukiirira bati niyeengira, obwadyeeri, haandi obulamu. Ekoondo ly'Emboosi ndai ya Yowaana elihira ohwetuliirisa ohuyikabula ohutula hu chiindi, nihwo ohwehoonyera hw'ebiindu biboneha eby'obulamu bwa buli buhya, ohweekesa obwadyeeri bw'obulamu bwomu mwooyo, ebiindu koti amaachi, omugaati, obulafu, omwaayi neende amakoondi kae, haandi neende omusaala kw'enduli neende ebyaamo byakwo.
Ebiri mu sitabo sino mu bwiimbikiti
1. Enomanoma yichaaka 1:1-18
2. Yowaana Mubatiisi neende abeeki ba Yesu bataangira 1:19-51
3. Omulimo kwa Yesu mu baandu 2:1—12:50
4. Endaalo chimaliirihayo cha Yesu naali erwaanyi alala neende mukati wa Yerusalemu 13:1—19:42
5. Ohusyuuha alala neende ohuboneha hw'Omwaami Yesu 20:1-31
6. Amaseebula: ohuboneha hwa Yesu naali Galilaaya 21:1-25
Currently Selected:
Yowaana EMANYISA: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019