Ohuchaaka 7
7
Amaachi k'ofwomboole
1Ao Omwaami yaboolera Nowa ati, “Yingira mu lyaato, ewe neende abomu nyuumba yao, olwohuba mbweene endi mu syaalo syoosi, ewe niiwe omuluungifu mu moni waange. 2Bukula ebisolo byalabiswa bibiri-bibiri amahabi kataanu-na-kabiri esisaacha neende esihasi ebya buli ngeri neende ebisolo bibiri-bibiri eby'omusiro, esisaacha neende esihasi, 3haandi bukula amayoni kabburuha kabiri-kabiri amahabi kataanu-na-kabiri kosi, esisaacha neende esihasi, okawonie kabe hu syaalo. 4Olwohuba mu ndaalo chitaanu-na-chibiri ohutula buti, njia ohulehuula efula yikwe hu syaalo endaalo amahumi kane, neende ebiro amahumi kane; mani buli siindu silamu syoosi si ndaloonga njia ohusisihirisa situle hu syaalo.” 5Nowa yahola buli siindu si Omwaami yamulagira.
6Nowa yali neende emyaaka emia chisaasaba eky'obuhuluundu (600) amaachi k'ofwomboole nikakwa hu syaalo. 7#Mat 24:38,39; Luk 17:27.Nae Nowa neende abaana bae neende omuhasi wae, neende abahasi b'abaana bae abali alala nae beengira mu lyaato, ohuwona amaachi k'ofwomboole. 8Mu bisolo byalabiswa, neende mu bisolo eby'omusiro, neende mu mayoni neende mu buli siindu esyambaaka hu loba, 9bibiri-bibiri, esisaacha neende esihasi, byeengira mu lyaato neende Nowa koti lu Nasaae yali alagiire Nowa. 10Mani endaalo chitaanu-na-chibiri nichabitao, amaachi k'ofwomboole kachaaka ohubbwomooha hu syaalo.
11 #
2 Pet 3:6. Nowa niyoosa emyaaka emia chisaasaba (600) eky'obuhuluundu, mu mwoosi kwohubiri, hu ludaalo lwa ehumi na chitaanu-na-chibiri olw'omwoosi, hu ludaalo olwo esulo ch'amaachi choosi cheekuha chahulukusa haandi neende amaachi k'aakulu muukulu kosi keekuha mani nikabbwomooha. 12Efula yakwa hu syaalo ohumala endaalo amahumi kane neende ebiro amahumi kane. 13Ludaalo lweene olwo, Nowa neende abaana bae badatu Seemu, Haamu neende Yafeesi, neende omuhasi wa Nowa neende abahasi badatu b'abaana ba Nowa abali alala nabo beengira mu lyaato. 14Bano neende buli sisolo sy'engeri yoosi, neende ebyaayo by'engeri yoosi, neende buli syambaaka sy'engeri yoosi hu syaalo, neende buli yoni ly'engeri yoosi, neende eyoni lya buli ngeri. 15By'engira mu lyaato alala neende Nowa, bibiri-bibiri bya buli siindu silamu esiri hu syaalo. 16By'engira mu lyaato esisaacha neende esihasi bya buli siindu, by'engira koti lu Nasaae yali alagiire Nowa; Omwaami mani n'amwiikaliramo.
17Amaachi k'ofwomboole kemeeda ohubbwomwooha hu syaalo endaalo amahumi kane, amaachi kemeeda ohwiingiya hu syaalo mani elyaato lyachaaka ohubeenga hu maachi. 18Amaachi kadoong'a nikemeeda ohumira esyaalo; nae elyaato lyabeenga hu maachi. 19Amaachi kadoong'a nikechulana hu syaalo, kaamira kata neende engulu ndeeyi muno echali hu syaalo syoosi. 20Amaachi kemeeda sa ohwiichula ohwoola lu koola aambi w'emiita chitaanu-na-chibiri aakulu w'engulu choosi. 21Buli siindu silamu syali hu syaalo syafwa: Amayoni, ebyaayo, ebisolo byomu siino, buli siindu siloonge esyali hu syaalo, neende buli muundu. 22Buli siindu syohu syaalo esyali esilamu nisiyeera syafwa. 23Nasaae yasihirisa buli siindu silamu esyali hu syaalo syoosi, abaandu neende ebisolo neende ebiindu byambaaka neende amayoni kabburuha; bino byoosi byasihiriswa byaawa hu syaalo. Ohutusaho Nowa yeeng'ene niye owadoong'ao neende abo abali nae mu lyaato. 24Amaachi kadoong'a hu syaalo ohumala embaka y'endaalo emia ndala neende amahumi kataanu (150).
Currently Selected:
Ohuchaaka 7: SAMDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019