Ebiholwa 9

Ohukaluuhanisibwa hwa Saulo

(Biho 22:6-16; 26:12-18)

1Nae Saulo, n'asisiiri neende ohudaha ohutiisa-tiisa neende ohwiita abeeki b'Omwaami, yaacha eyiri omulaamisi muhuluundu 2yamusaba ebbarwa chichia mu Sinagoogi chiri mu Damasiko, hu bulaanu niyakaanayo oyo yeesi omuloondi w'Engira, abasaacha neende abahasi, anyale ohubaboya abaleeta e Yerusalemu. 3Bulaanu niyali n'akeenda n'achia Damasiko, abweene-na-bweene ao, obulafu butula Muukulu bwamyeesuha bwamwebodoohania. 4Saulo yakwa aasi mani n'awulira ekono nilimuboolera liti, “Saulo, Saulo, lwasiina wusaandya?” 5Saulo yaboola ati, “Omwaami, niiwe naanu?” Omwaami yaboola ati, “Niise Yesu, oyo yooli ohusaandya. 6Siingira ochie wiingire mu siko sihuluundu esyo, ochia ohuboolerwa syooba ohoyere ohuhola.” 7Abasaacha bali nibali ohukeenda nae beema nibang'ang'aalire, bawulira ekono elyo, nae sibabonaho omuundu yeesi. 8Saulo yasiingira ohutula aasi; nae emoni chae nichali nichilimbuule, haba siyanyala ohubona esiindu syoosi. Mani sakira yemirirwa neende abaandu baandi nibamudiirire omuhono bamwoosa mu Damasiko. 9Ohumala embaka y'endaalo chidatu, Saulo yali n'atabona daawe, haandi haba siyalyaho kata ohung'waho esiindu syoosi.

10Nae bulaanu, yaliwo omweeki wuundi owali yamenya mu Damasiko olaangwa ati Anania. Omwaami yamuboolera muhuboneherwa ati, “Anania.” Nae yaboola ati, “Omwaami, mbano ndi ano.” 11Omwaami yamuboolera ati, “Siingira ochie hu ngira yilaangwa yiti Tiiri, oteebe mu nyuumba ya Yuda omusaacha otula Tarisiisi olaangwa ati Saulo; bona, ali ohusaba Nasaae, 12abweene omusaacha wuundi olaangwa ati Anania niyeengira mu nyuumba yi yalimo n'amwiisaho amahono kae hwaanyale ohunyoola haandi ohubona hwae.” 13Nae Anania yakobolamo ati, “Omwaami, ndahawulira ohutula hu baandu baangi muno hu muundu wuno, obuungi bw'ebiindu bibi bi yahamala ohuhola hu boolerefu bao mu Yerusalemu; 14haandi nguno ano ali neende obunyala ohutula eyiri omulaamisi muhuluundu ohuboya abo boosi abahwiinamiraanga.” 15Nae Omwaami yamuboolera ati, “Ewe chia, olwohuba oyo niye omuhalaabani waange, omudoole ochia ohuyira eliita lyaange eyiri Abateende, abatuki neende abaana ba Yisiraeli; 16olwohuba njia ohumweekesa koti ohusaanda hwae huchia ohwaaka hulwaange.” 17Anania yasiingira yawaao, mani niyeengira mu nyuumba omwo. Niyali n'amwiisaho amahono kae yaboola ati, “Saulo mwaanama, Omwaami Yesu owahuboneheere hu ngira yi wabeere niwiichiraho, yandumire yooli onyale ohunyala ohubona haandi, haandi onyale ohwichusibwa neende Mwooyo Mwoolerefu.” 18Abweene ao, esiindu sifwaana koti amakaamba syeecha syakwa nisitula hu moni chae mani yeecha yaanyala ohubona haandi. Yasiingira yabatiisibwa, 19yalya, mani n'anyoola amaani.

Saulo ayaalira mu Damasiko

Hulw'endaalo chiyeraho, Saulo yadoong'a naali neende abeeki abo Damasiko. 20Abweene ao, yaacha mu Sinagoogi nyiingi n'ayaala Yesu n'aboola ati, “Yesu niye Omwaana wa Nasaae.” 21Abaandu boosi abamuwuliraanga besiinduhanga muno, nibaboola bati, “Wuno haba siniye omusaacha owasandyaanga muno abaandu beenamira eliita lino mu Yerusalemu? Haandi yabeere yeechere mu siko muno olw'esichiiririrwa syeene sino, ohubayira mu moni w'Abalaamisi bahuluundu nibaboyerwe.” 22Nae Saulo yemeeda ohunyoola amaani, yeekusa Abayudaaya bali nibamenya mu Damasiko niyeekesa mu bwiichufu koti lu Yesu yali niye Kristo.

23 # 2 Kor 11:32,33. Endaalo enyiingi nichabitao, Abayudaaya abo bachaaka ohukiiya ohumwiita, 24nae ohumukiiya hwaabwe ohwo, hweecha hwamanyihana eyiri Saulo. Abeene abo babechaanga nibaliinda hu biruwa byoosi esideete neende esiro, bamubone bamwiite; 25nae abeeki bae bamubukula esiro, mani bamwiisira aasi hu sida, naali mu simweero.

Saulo naali mu Yerusalemu

26Niyali n'amalire ohwiicha mu Yerusalemu, yateemaho ohweyambaania hu beeki ba Yesu Kristo bala; nae bosi bamutya muno, olwohuba haba sibafukiirira bati, yesi yali niyeeholere omweeki wa Yesu Kristo. 27Bbarinabba yamubukula, yamuleeta eyiri abatume ba Yesu Kristo, mani yababoolera bulai koti lu Saulo niyali naali hu ngira yabona Omwaami, owalomaloma nae, haandi neende koti lu yali naali Damasiko yayalaanga nataali neende esoni mu liita lya Yesu. 28Saulo yachaaka ohukeendaanga nabo nibatula haandi nibeengira mu Yerusalemu, 29nibayala ataali ohutya hwoosi mu liita ly'Omwaami. Yachaaka ohulomalomaanga haandi ohuyiinganiaanga Abayudaaya, abali nibalomalomaanga Olugiriki; nae nabo bali nibakiiyaanga ohumwiita. 30Nae abasyaabwe baandi nibeecha basimanya, bamwiihirisa Kaisarea, haandi nibamala nibamutuma aweeo achie Tarisiisi.

31Mani sakira abafukiiriri ba Yesu Kristo abali mu Yudea mwoosi alala neende mu Galilaaya mwoosi, neende mu Samaria mwoosi, banyoola omuleembe mani beeyoombaha bomiira; mani nibali nibamenya mu bulamu bw'ohutya Omwaami, haandi neende mu hulemesebwa omwooyo hwa Mwooyo Mwoolerefu, beengiya muno.

Petero naali mu Lida neende mu Yopa

32Bulaanu koti lu Petero yali n'abakeendamo buli siha, yehirira yaacha emwaalo eyiri aboolerefu abali nibamenya mu Lida. 33Ebweene eyo, Petero yakaanayo omusaacha wuundi olaangwa ati Ainea, owali niyadataalira hu buliri hulwembaka y'emyaaka chitaanu-na-chidatu, niyafwa omubiri kwoosi. 34Petero yaboola ati, “Eneya, Yesu Kristo ali ohuhuwonia; siingira mani waale obuliri bwao.” 35Abaandu boosi abali nibamenya mu Lida neende mu Saroni bamubona, bamala bakaluuhana baloonda Omwaami.

36Nae bulaanu, mu Yopa mwalimo omweeki wuundi owali alaangwa mbwe ati Tabbisa, esyeekesa Dorika, esyeekesa esijusu. Yali omuhasi owechula emirimo milai mihaya neende ebihole by'omuhono mukabi. 37Mu ndaalo cheene omwo, yalwaala mani yaafwa; nibaba nibamalire ohumwooka, bamwaalisa mu siseenge siri aakulu mu goroofa. 38Nae olwohuba mbwe Lida syali nisiri aambi neende Yopa, abeeki nibawulira bati Petero ali mu Lida ebweene eyo, batuma abasaacha babiri yaali, nibamusaba nibaboola bati, “N'okanya, yichaho eno yi huli bwaangu.” 39Mani Petero yaasiingiraniramo yachiaana nabo. Niyaba n'amalire ohwiicha, bamubukula bamuniinia mu siseenge syali aakulu mu goroofa. Abahasi bafwiirwe boosi bali nibeemere aambi nae nibali ohuliraanga, haandi neende nibali ohweekesaanga amaganjuula alala neende engubo chiindi chi Dorika yanabaanga niyali n'asisiiri ninabo. 40Nae Petero yabatusa boosi erwaanyi, mani naamala nasigama aasi n'achaaka ohulaama Nasaae; nae niyakaluuhanira omulaambo yaboola ati, “Tabbisa, siingira.” Tabbisa yalimbula emoni, mani niyabona Petero, yasiingira yeehala. 41Petero yamusiingisa yaamwemesa. Yalaanga aboolerefu alala neende abahasi bafwiirwe boosi nibeechere, Petero mani n'abeekesa Tabbisa naali omulamu abweene. 42Esyo mani nisimanyihana mu Yopa mwoosi, abaandu baangi muno bafukiirira mu Omwaami. 43Petero yadoong'a mu Yopa hulw'endaalo enyiingi n'amenyere neende Simooni wuundi, omubaambi w'amaseero.

Currently Selected:

Ebiholwa 9: SAMDC

Highlight

Copy