Ebiholwa 2

Ohwiicha hwa Mwooyo Mwoolerefu

1 # Lef 23:15-21; Amal 16:9-11. Oludaalo lwa Pentekosti nilwoola, abatume bali nibebuusire alala abuundu alala. 2Abweene ao, ekono lyawuliiriha nilitula Muukulu niliwoola koti omuyaka kw'amaani, lyeechula mu nyuumba yoosi yi batume bali nibehaale. 3Mani babona enimi chifwaana koti omuliro nichisalaanire nicheemere hu buli muundu. 4Boosi beechusibwa Mwooyo Mwoolerefu, bachaaka ohulomaloma mu nimi chitaali nasilala, koti lu Mwooyo oyo yabanyalira ohulomaloma.

5Nae mu Yerusalemu mwalimo Abayudaaya, abasaacha baheera Nasaae muno ohutula mu buli mbeka choosi chohu syaalo huno. 6Nibawulira ekono lino, bebuusa alala, bawuka muno, olwohuba buli muundu hu bo yawuliraanga abatume nibalomalomera mu lulimi lwae lweene. 7Besiinduha haandi baawuka muno nibaboola bati, “Abaandu bali ohulomalomaanga bano boosi haba si Bagalilaaya? 8Nae siba sitye mbwe efwe hubawulira, buli muundu mu lulimi lwae lweene? 9Abaperisi neende Abamedia neende Abaelamu neende abamenya mu Mesopotamia, Yudea neende Kapadokia, Ponto neende Asia, 10Firigia neende Pafilia, Misiri neende ebituundu bya Libbya ebiri aambi neende Sireeni, neende abakeni ohutula Rooma, Abayudaaya alala neende Abateende basoma ediini y'Abayudaaya, 11Abakireete neende Abaraabbu, huli ohubawulira nibaboola mu nimi cheefwe ebiindu by'amaani bi Nasaae yahola.” 12Boosi baawuka mani bamala baateng'eng'ala nibaboolanira abeene-na-beene bati, “Sino syeekesa siina?” 13Nae abaandi badyaabuha nibaboola bati, “Abo bameerere efiini njaaha.”

Ohuyaala hwa Petero

14Nae Petero, yeema alala neende ehumi-na-mulala, mani yaasiingisa ekono yachaaka ohulomaloma n'ababoolera ati, “Eng'we abasaacha Bayudaaya basyaange, alala neende eng'we mweesi abamenyere mu Yerusalemu, mutekeerese muwulire bi mbaboolera. 15Abasaacha bano haba sibameerere koti lu mubaasa, olwohuba hu chiri sa esaa chidatu ch'echuli; 16nae sino nisyo si munabbi Yoeli yalomaloma n'aboola ati:

17 # Yoel 2:28-32. ‘Nasaae aboola ati, bino nibyo ebichia ohubaao mu ndaalo chimaliiriha,

njia ohuchuha Mwooyo waange hu baandu boosi,

mani abasyaani neende abahaana beeng'we bachia ohutuumbulaanga ebichia ohubaao,

haandi abasyaani baraaga beeng'we bachia ohuboneherwaanga,

haandi abasaacha bahuluundu beeng'we bachia ohulootaanga ebilooto;

18eee, haandi hu bahalaabani baange basaacha neende abahalaabani baange bahasi mu ndaalo echo,

njia ohubachuhaho Mwooyo waange; mani bachia ohutuumbulaanga ebichia ohubaao.

19Njia ohuhola ebiwuukisa aakulu Muukulu

neende obulolero aasi hu syaalo,

yicha ohubaao amabaanga, omuliro, neende okwoosi kudiiraane;

20elyuuba lichia ohukaluuhana libe esiirima

nae omwoosi nakwo kukaluuhane kube koti amabaanga,

Oludaalo lw'Omwaami nilutoola,

oludaalo luhuluundu haandi olw'oluyaali muno.

21Buli muundu yeesi owalaangeenge eliita ly'Omwaami yahawonisibwe.’

22“Eng'we Abaisiraeli, muwulire emboosi chino: Yesu Omunasareeti, niye omusaacha womiisibwa mu moni weeng'we neende ebiholwa by'amaani neende ebiwukisa neende eby'amayia bi Nasaae yamuholerangamo koti lu eng'we abeene mumanyire. 23#Mat 27:35; Mrk 15:24; Luk 23:33; Yow 19:18. Mu hutekeha hwa Nasaae neende mu humanya hwa Nasaae, Yesu wuno, yeyaanayo mani mwamubaamba, haandi yeetwa neende abaandu bataloondakana neende amalako. 24#Mat 28:5,6; Mrk 16:6; Luk 24:5. Nae Nasaae yamusyuhisa ohutula mu bafu, yamuboolola mubuchuuni bw'ohufwa, olwohuba haba sisyali nisinyalihana ohudoong'a mu maani k'ohufwa. 25#Sab 16:8-11. Olwohuba Daudi alomaloma ebimudiiraho n'aboola ati,

‘Ndabona Omwaami naali naange ebiha byoosi,

nitateenga olwohuba ali hu muhono kwaange muluungi;

26sakira omwooyo kwaange kwasangaala, haandi olulimi lwaange lweehoya;

haandi omubiri kwaange kwosi kuchia ohuba neende esuubi liingi.

27Olwohuba haba soochia ohuleha omwooyo kwaange mu syaalo sy'abafu,

oba ohuleha Omwoolerefu wao ohubola.

28Omalire ohuunjekesa engira y'obulamu;

haandi ohuba aambi naawe, huchia ohunjichusa esangaalo.’

29“Basyaange, hambaboolere ataali ohutya hwoosi ebidiira hu Daudi kuuka yeefwe endi, yafwa baamusiiha, haandi esiriindwa syae sisisiiri naafwe ohwoola buti. 30#Sab 132:11; 2 Sam 7:12,13. Olwohuba koti lu yali omunabbi, haandi n'amanyire ati Nasaae yechuba namwelayirira ati, yahehase hu sisaala syae sy'obutuki mulala hu beechuhulu bae. 31Daudi yali amanyire hale ebichia ohubaao, mani yaalomaloma hu husyuuha hwa Kristo n'aboola ati, haba siyahalehe omubiri kwae mu syaalo sy'abafu oba yaaleha omubiri kwae ohubola. 32Yesu wuno Nasaae yamusyuuhisa haandi efwe fweesi huli Abaloli bahwo. 33Naamalire ohuniinisibwa yaaba hu muhono muluungi kwa Nasaae, haandi n'amalire ohubukaana Mwooyo Mwoolerefu yi Laatang'ene yalaka, achuhire sino si muli ohubona, haandi ohuwulira. 34#Sab 110:1. Olwohuba Daudi haba siyaniinaho Muukulu daawe; nae omweene aboola ati,

‘Omwaami yaboolera Omwaami waange ati, yihala hu muhono kwaange muluungi,

35ohwoola lu ndiriholera abasuku bao ohuba esiteeni syowuluusiraho amakulu kao.’

36Leha enyuumba ya Yisiraeli yoosi yimanyire elalira neende obwomiifu yiti, Nasaae amalire ohuhola Yesu yi mwabaamba wuno, ohuba Omwaami haandi Kristo.”

37Nae bulaanu nibawulira sino, syabachuunira elalira ohwoola hu ndasi, baboolera Petero alala neende Abatume baasye boosi bati, “Baana beefwe, siina syeene si huba huhole?” 38Nae Petero yababoolera ati, “Mweyolobye, mani buli muundu abatiisibwe mu liita lya Yesu Kristo munyale ohuleherwa ebyonoono byeeng'we; mani muchia ohunyoola esiyaanwa sya Mwooyo Mwoolerefu. 39Olwohuba esisuubise sino syeng'we, alala neende abaana beeng'we, alala neende abo boosi abali eyale muno; oyo yeesi yi Nasaae Omwaami weefwe aba n'alaangire ohwiicha yaali.” 40Petero yalomaloma niyehoonyera emboosi nyiingi muno, yabalabula n'aboola ati, “Mwewonie abeene ohutula hu luse ludoondobanu luno.” 41Abo boosi abafukiirira emboosi chae, babatiisibwa. Hu ludaalo olwo, abemeeda hu mukaanda kw'abafukiiriri bali abaandu aambi elifu chidatu (3,000). 42Boomiirira hu njekesa y'Abatume neende ohuholeraanga alala, neende ohuliiraanga omugaati alala neende ohulaamiraanga alala.

Obulamu bw'Abafukiiriri

43Obuti bwadiira buli muundu; abatume baholaanga ebiindu biwukisa alala neende eby'amayia biingi muno. 44#Biho 4:32-35. Abafukiirira baholeraanga alala mani buli siindu syabechaanga esyaabwe boosi; 45bakusaanga emyaandu kyaabwe neende ebiindu byaabwe, bamala baakabiraanga buli muundu koti lu yalichiingi n'adaha. 46Buli ludaalo balaamiraanga alala mu Nyuumba ya Nasaae, haandi baliiraanga omugaati mu madaala kaabwe, haandi balichaanga ebyohulya neende emyooyo misangaafu alala neende emyooyo mikabi. 47Bafumiaanga Nasaae, haandi abaandu boosi babadahaanga. Mani buli ludaalo Omwaami yameedaanga hu buungi bwaabwe abo abalichiingi nibaonisibwa.

Currently Selected:

Ebiholwa 2: SAMDC

Highlight

Copy