Ebiholwa 11

Petero atuumbulira abafukiiriri ba Yerusalemu bi yabona

1Bulaanu, abatume neende abafukiiriri bali mu Yudea bawulira mbwe Abateende bosi banyoolere emboosi ya Nasaae. 2Mani sakira, Petero yaacha Yerusalemu, omukaanda kw'abaandu bahebe kweecha kwaamuyobya muno, 3nikuboola kuti, “Siina syeene esihuyirire eyiri abasaacha bataali abahebe mani haandi waalya nabo?” 4Nae Petero yabeekesa bulai n'aboola ati: 5“Ese ndali ni ndi mu siko sihuluundu sya Yopa ni ndi ohulaamaanga Nasaae; mani nindakwa mu silooto, ndanyoola ohuboneherwa, nimbona esiindu nisiiha aasi, esifwaana koti esuuka hoongo muno, niliiswa ohutula Muukulu nilidiirirwe enyaande chine; mani lyeeha lyeecha yi ndi. 6Nindasuda aambi ohulyewunja, ndabona ebisolo neende amanani kalya ebisolo biindi, neende ebisolo byaafula aasi, neende amayoni kabburuha. 7Haandi ndawulira ekono niliri ohumbooleraanga liti, ‘Petero, siingira; yita mani olye.’ 8Nae ese ndaboola endi, ‘Haba daawe, Omwaami; olwohuba abulao esiindu syoosi esy'omusiro oba esy'omufuto esyanyalaho ohubita mu munwa kwaange.’ 9Nae ekono elyo lyeecha lyakobolamo ehabi lyohubiri nilitula Muukulu liti, ‘Esiindu syoosi si Nasaae yalabya haba sohoyere ohusilanga esy'omusiro.’ 10Esiindu sino syaholehana sityo amahabi kadatu, mani byoosi byeecha byatusibwao haandi byayirwa Muukulu. 11Esiha syeene esyo, abasaacha badatu booleraho hu nyuumba yi ndali niindimo, nibatumiibwe yi ndi ohutula Kaisarea. 12Mwooyo yamboolera ohuchiaana nabo, nitanyala ohuhaya. Abasyaange basaasaba bano bosi bali naange alala, mani hwachia hweengira mu nyuumba y'omusaacha oyo. 13Omusacha oyo yatuboleera koti lu yali n'abweene malaika niyeemere mu nyuumba yae mani n'aboolaanga ati, ‘Tuma Yopa mani wundeetere Simooni olaangwa ati Petero; 14oyo achia ohuhuboolera emboosi eyichia ohuhuwonia, ewe neende abo boosi abali mu daala lyao.’ 15Mani koti lu syesi ndachaaka ohulomaloma sa endi, Mwooyo Mwoolerefu yabakwaaho koti lu fwesi yatukwiichangaho muhuchaaka hweene. 16#Biho 1:5. Mani ndeechulisa emboosi y'Omwaami, koti lu yaboola ati, ‘Yowaana yabatisaanga neende amaachi, nae eng'we muchia ohubatiisibwaanga neende Mwooyo Mwoolerefu.’ 17Mani nikali mbwe Nasaae yakaba esiyaanwa siri nasilala abaandu abo, koti esyo siyatuberesa fwesi, koti lu fwesi hwafukiirira mu Omwaami Yesu Kristo, ese naange ndali wiina mweene, hu nyemeo nyiinganie Nasaae?” 18Mani nibawulira sa sino, banyita chi. Mani bachaaka ohukinia Nasaae nibaboola bati, “Hane mani neende Bateende bosi Nasaae amalire ohubaberesa ohweyolobya huleeta obulamu.”

Abafukiiriri bali bamenya mu Atiokia

19 # Biho 8:1-4. Bulaanu abo boosi abali basalaana ohweema hu husaandisibwa hwabaao ohweema hu Sitefaano, bakeenda bachia eyale ohwoolera elalira Foenisia neende Saipurasi neende Atiokia, nibatalomalomeraanga omuundu yeesi emboosi echo ohutusaho Abayudaaya boong'ene. 20Nae yaliwo abaandi hu abo, abali abasaacha batula mu Saipurasi neende Sireeni, abali nibeechere mu Atiokia, bachaaka ohulomalomaanga neende Abagiriki bosi, naabayaalira Omwaami Yesu. 21Omuhono kw'Omwaami kwaaba nabo, abaandu abaangi muno bafukiirira emboosi eyo, bakaluuhana hu Omwaami. 22Mani amayaaha kadiira hu byeene bino, koola mu matwi k'abafukiiriri abali bamenya mu Yerusalemu, baatuma Bbarinabba achie mu Atiokio. 23Bbarinabba niyeecha yoola mu Atiokia, yabona embabaasi cha Nasaae chali nichiriyo, yasangaala muno; yaabasaba ati boosi badoong'e nibali abeesikwa eyiri Omwaami neende esichiiririrwa syomiifu; 24olwohuba Bbarinabba yali omusaacha omulai muno, owali yeechula Mwooyo Mwoolerefu neende efukiirira. Mani omukaanda muhoongo muno kwemeeda hu Omwaami. 25Hulweesyo Bbarinabba yachia Tarisiisi ohukoonya Saulo; 26mani niyali n'amalire ohumunyoola, yamuleeta mu Atiokia. Mani hulw'embaka y'omwaaka omulaamba babukaananaanga neende abafukiiriri bamenya omwo, mani nibanyala ohweekesanga omukaanda muhoongo muno okw'abaandu; mu Atiokia omwo nimwo mu beeki ehabi litaangira lyeene, balaangwa Abakristo.

27Nae bulaanu, mu ndaalo chino, abanabbi behaanga nibatula Yerusalemu nibeecha mu Atiokia. 28#Biho 21:10. Mani mulala hu abo olaangwa mbwe Agabbo yasiingira yachaaka ohutuumbula obunabii niyehoonyera Mwooyo n'aboola ati, achia ohubaao esiminyu sihoongo muno hu syaalo syoosi; sino syabaao mu ndaalo ch'omutuki Kilaudio. 29Abeeki badimama, buli muundu koti lu anyala, ohuyira obuhoonyi eyiri abafukiiriri basyaabwe abali nibamenya mu Yudea; 30bahola batyo, nibabuyirira abahuluundu nibatuma Bbarinabba neende Saulo.

Currently Selected:

Ebiholwa 11: SAMDC

Highlight

Copy