Malaki 2
2
1Omwaami w'Obunyala aboola ati: “Bulaanu, eng'we abalaamisi, sino nisyo esilagiro si mbaberesa.” 2Omwaami aboola ati: “Nimuhaya ohuwulira, nimuhaya ohuta omwooyo muhuunjisamo oluyaali, ao mani njia ohubaleetaho esibwaabo haandi njia ohuleeta esibwaabo hu buli siindu silai si muhola ohubahoonya.” Olwohuba haba simudeeba hu silagiro syaange daawe. 3Bone, njia ohusaandya abaana beeng'we, mani mbahe obuse mu bweeni bwaabwe, obuse bw'ebisolo bi bayaana, mani mbatuseo alala neende obuse obwo. 4#Hub 3:11-13.Ao mani niwo yimwahamanyire muti Niise owababeresa esilagiro sino, muti endagaano yi ndahola neende Leefi lihae ohufunakwa sa daawe. 5#Hub 25:12.Endagaano yaange neende Leefi, yali ey'obulamu neende omuleembe. Mani ndababeresa hu banyale ohuunjisamo oluyaali. Mu biha ebyo baanjisaangamo oluyaali haandi batya eliita lyaange. 6Beekesaanga ebyadyeeri haandi haba sibalomalomaanga eby'obubacha daawe. Babechaanga alala naange mu muleembe neende mu buluungifu, haandi bakairaanga abaandu baangi ohwonoona. 7Olwohuba ni omulimo kw'omulaamisi ohweekesa abaandu bamanye esihoyera ohuholwaanga. Haandi abaandu bahachireenge yi bali ohweeka bi ndaha bahole. Olwohuba abalaamisi nibo bawamwaanda b'Omwaami w'Obunyala. 8Nae eng'we abalaamisi, mutulire hu ngira yadyeeri. Enjekesa yeeng'we yikerere abaandu baangi baaholaanga ebyonoono. Muhalaake endagaano yi ndahola neende Leefi, Omwaami w'Obunyala nilwo lu aboola. 9Mani sakira mbaholere abaandu b'aasi muno haandi mbalekeeresa muno olwohuba haba simuhola bi mbalagira, nimweekesa abaandu baange eby'ohuhola, haba simudiira buli muundu nasilala.
Obutaali obweesikwa bw'abaandu eyiri Nasaae
10Fweesi haba sihuli neende laata yeefwe mulala? Nasaae watuloonga haba saali mulala? Mani lwasiina hulekeeresa endagaano eyiri abasyeefwe? Lwasiina hulekeeresa endagaano ya bakuuka yeefwe? 11Abaandu bomu Buyudaaya beeholere abebachirisi, mani nibahola esy'omusiro mu Yerusalemu neende mu Yisiraeli mwoosi. Olwohuba abaandu bomu Buyudaaya banyaasire enyuumba yi Omwaami adaha. Badehiisye abahasi beenamira banasaae bateende. 12Buli musaacha owahola esyo, leha Omwaami w'Obunyala amutuse mu Baisiraeli, mani ahaye ohufukiirirwa haandi ohweyambaania alala neende abaandu beefwe abayaanira Omwaami w'Obunyala ebiyaanwa.
13Haandi esiindu siindi si muhola nisyo sino. Alutaari y'Omwaami muyichuuse neende amasika, nimulira haandi nimweekanyiirisa olwohuba Omwaami haba sasisiima haandi yaafukiirira ebiyaanwa bi mumuleetera. 14Nae mweteeba muti, “Lwasiina haba saabifukiirira?” Haba saabifukiirira olwohuba mufunaake endagaano y'ohudeehisania yi mwahola neende abahasi bamwadeehia mu buraaga bweeng'we. Nibo abasyeeng'we bamwahola nabo endagaano mu moni wa Nasaae muti muchia ohubechaanga abeesikwa nabo. 15Nasaae haba siniye owaloonga omuundu naali neende omubiri neende omwooyo kwobulamu? Mani yekoomba siina syeene? Yekoomba ohumwiibulira abaana batya Nasaae. Mani mweliindeenge, abuleo omuundu otaali omweesikwa eyiri omuhasi yi yadeehya mu buraaga bwae. 16Omwaami w'Obunyala haandi Nasaae wa Yisiraeli aboola ati: “Ndasyuula ohulehanira elalira hw'abaandu badeehisania, neende omusaacha ohubechaanga omwaalaba eyiri omuhasi wae. Mani mweliindeenge, yibuleo otaali omweesikwa.”
Oludaalo lw'ohuheengeraho omusaango luli aambi
17Mujoong'iise Omwaami neende emboosi cheeng'we chi mulomaloma. Nae mweteeba muti: “Humujoong'iise hutye?” Mumujoong'iise nimuboola muti: “Buli muundu ohola esyonoono aba omulai mu moni w'Omwaami, haandi Omwaami amusangaalira.” Haandi nimweteeba muti: “Omwaami w'obwadyeeri ali yeena?”
Currently Selected:
Malaki 2: SAMIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
