Luka 8

Abahasi abagooba Yesu

1Ebyo nibyawa sa biti, Yesu yakeenda naabitira mu biko bihuluundu neende engoongo n'ayaala haandi n'aleetera abaandu Emboosi Ndai ch'obwaami bwa Nasaae. Yali ali neende abeeki bae ehumi-na-babiri (12), 2#Mat 27:55,56; Mrk 15:40,41; Luk 23:49. alala neende abahasi baandi abali baonisibwa ebihyeeno neende amadehere kataali nasilala. Abahasi bano nibo: Maria, olaangwa Magidalena, yi Yesu yali atusiremo emisaambwa chitaanu-na-chibiri, 3neende Yoana, omuhasi wa Kusa, omubiihi muhuluundu wa Herode, neende Susaana, neende abahasi baangi baandi, abahonyaanga Yesu neende abeeki bae nibatusa hu biindu bi beene bahalaabanaanga ohunyoola.

Olukaado lw'omuwaanyi

(Mat 13:1-9; Mrk 4:1-9)

4Mani esidiiyiha sy'abaandu sihoongo nisyamala ohwebuusa alala, haandi abaandu baandi abatula mu biko bikabuhaane bosi nibeecha yali, Yesu yalomaloma nabo mu lukaado ati, 5“Olwoola, omulimi yacha ohuwaanya emwo yae. Mani niyali ayaanya, emwo yiindi yakwa hu ngira, mani yaasenakirwa mu makulu, mani haandi amayoni keecha kayiboocha yoosi. 6Nae emwo yiindi yakwa hu bikinaakina; mani niyachaaka ohuhula yiti, yooma, olwohuba haba siyali neende omunyiti. 7Nae emwo yiindi yakwa mu mawa; mani amawa kahulira alala nayo, mani kayifwiinyirira. 8Nae emwo yiindi yakwa mu loba lai mani yaahula, mani yaama ebyaamo amahabi emia ndala.” Niyamala ohuboola sa atyo, yeecha yahuumula n'aboola ati, “Oyo oli neende amatwi kawulira, leha awuliire.”

Esichiiririrwa sy'ohweekesera mu ngaado

(Mat 13:10-17; Mrk 4:10-12)

9Abeeki bae nibamuteeba amahuluundu k'olukaado luno, 10#Yis 6:9. Yesu yaboola ati, “Eng'we niing'we ababeresebwa ehabi y'ohumanya eby'engiso by'obwaami bwa Nasaae; nae eyiri abaandu baandi, bino biri mu ngaado sa, mani batingaale bahaye ohubona, haandi batekeerese bahaye ohuwulira.

Yesu atuumbula amahuluundu k'olukaado lw'omuwaanyi

(Mat 13:18-23; Mrk 4:13-20)

11“Bulaanu, amahuluundu k'olukaado lw'omuwaanyi niko kano: Emwo niyo Emboosi ya Nasaae. 12Emwo yakwa hu ngira, nibo abo abawulira; nae Sitaani yeecha yabatusaho emboosi chali mu myooyo kyaabwe, mani bahaye ohusuubira batawonisibwa. 13Nae emwo yiri hu bikinaakina nibo abo, abawulira emboosi, bayakaanira neende esangaalo; nae koti lu bataali neende emisi, basuubiraho hulw'esiha sidiidi, nae ebiha by'ohuteemwa nibyoola, nibabyekaana. 14Nae emwo yakwa mu mawa, nibo abo abawulira emboosi, nae ohwelalihirira neende ohubaasa hu buyiinda bw'esyaalo neende esangaalo ly'obulamu bifwiinyirira emboosi eyo, mani ebyaamo byaabwe sibihula byaangala. 15Nae emwo yakwa mu loba lai, nibo abo abawulira emboosi, bayidiira bulai muno neende obwadyeeri alala neende omwooyo mulai, mani baama ebyaamo mu hweesimiirisa hwaabwe.

Etaara lyafuunihwa mu simweero

(Mrk 4:21-25)

16 # Mat 5:15; Luk 11:33. “Abulao omuundu oba n'amalire ohuwaambia etaara, olifuniha mu simweero, oba yaalita mu lwalo w'esitaanda, nae alita hu siteeni syalyo, hulihosere abeengira mu nyuumba. 17#Mat 10:26; Luk 12:2. Olwohuba sibulao esiindu syoosi esyakiswa, esitahakisulwe, haandi, sibulao esiindu sy'omusyaama esitalimanyihana syatuswa alafu. 18#Mat 25:29; Luk 19:26. Mani mweliinde engeri yimuwuliriramo; olwohuba oyo oli nabyo, niye ochia ohumeedwaho ebiindi, nae oyo otaliho neende esiindu syoosi, kata neende syabaasa ati ali nasyo, bachia ohumumalaho.”

Ng'ina Yesu neende bamwaanang'ina

(Mat 12:46-50; Mrk 3:31-35)

19Olwoola, ng'ina Yesu neende bamwaanang'ina beecha yali, nae haba sibanyala ohumwoolaho olwa esidiiyiha sihoongo. 20Mani beecha baboolera Yesu bati, “Maakoo neende bamwaanamaao beemere erwaanyi, badaha ohuhubona.” 21Nae Yesu yababoolera ati, “Maama neende bamwaanama nibo abo abawulira emboosi ya Nasaae mani bayiholeraho.”

Yesu ayenjeesa enyaanja yiiyire

(Mat 8:23-27; Mrk 4:35-41)

22Ludaalo luundi, Yesu yeengira mu lyaato neende abeeki bae mani yababoolera ati, “Mulehe hwaambuhe huchie engereha w'enyaanja.” Mani bachaaka olukeendo, 23nae nibali nibaambuha, Yesu yakona endoolo. Mani omuyaka kw'amaani kwawuucha nikwiihirira aasi mu nyaanja mani kwasiingisa amafwiinda keehubba hu bwaato, bweechula amaachi bwaaba aambi ohusihama. 24Abeeki bachia bamusimusa nibaboola bati, “Omwaami, Omwaami, huli ohufwa!” Mani Yesu yasimuha, yahabuhira omuyaka alala neende amafwiinda; mani byeecha byayenjeera byanyita chi. 25Yesu yababoolera ati, “Efukiirira yeng'we yiri yeena?” Mani obuti bwabadiira, mani bawuka muno nibaboolanira bati, “Nae wuno niye wiina, onyala ohulagira kata omuyaka neende amaachi, mani byamuwulira?”

Yesu awonia omusaacha oliho emisaambwa

(Mat 8:28-34; Mrk 5:1-20)

26Boola mu syaalo sya Geraseneesi, esitingalaane neende Galilaaya. 27Nae Yesu niyali atula sa mu lyaato ati, abweene ao omusaacha wuundi, otula mu siko sihuluundu esyo oliho emisaambwa yamwoolaho; omusaacha oyo yali yamala embaka hoongo muno n'atefwalaangaho esiindu syoosi, haandi siyamenyaanga mu nyuumba yoosi ohutusaho, yamenyaanga mu biriindwa byoong'ene. 28Omusaacha oyo niyabona Yesu ati, yobba wuwi mani yaakwa mu makulu wae, mani yahuumula mu kono ly'aakulu n'aboola ati, “Yesu, Omwaana wa Nasaae w'Aakulu Muno, on'ahole otye? Hwekweeda endi, otasaandya daawe.” 29Olwohuba Yesu yali amalire ohulagira omusaambwa mubi okwo ohumutulamo. (Olwohuba omusaambwa okwo kwali kwanala ohumuniinaanga amahabi maangi; yali yalindwa buliindwa neende abasikaari, niyaboywa neende eminyororo alala neende epiingo, nae yahalakaanga sa eminyororo echo alala neende epiingo cheene, haandi omusaambwa okwo kwamwiirusaanga nikumuyira mu siparara.) 30Yesu yamuteeba ati, “Eliita lyao nilyo naanu?” Nae yaboola ati, “Legioni”; olwohuba emisaambwa miingi muno chali nichimulimo. 31Mani emisaambwa echo nichekweeda Yesu atachilagira chachia emakoombe ekotero. 32Nae bulaanu, eyiicho ly'embiichi sihoongo lyali niliri ohwayaanga aambi ao hu ndulo w'esigulu; mani emisaambwa echo cheecha chamwekweeda achilehe chichie chiingire mu mbiichi echo. Yesu yachileha chachia. 33Mani emisaambwa echo nichitula mu musaacha oyo, chachia cheengira mu mbiichi echo, eyiicho ly'embiichi elyo lyoosi lyabbabuluha embiro lyehirira egenya, lyaweera mu nyaanja mani embiichi choosi be chasihama chafwa.

34Nae abaayi b'embiichi nibabona ebyo, beeruha, bachia baasalaania emboosi echomu siko sihuluundu syoosi alala neende mu ngoongo. 35Abaandu basiingira bachia ohubona esyali nisiholehaane, boola hu Yesu, babukaana omusaacha yi misaambwa chali chituliremo oyo, niyehaale mu makulu wa Yesu, niyefwaalire engubo, naali mwaaywe; mani nibatya muno. 36Nae abo abali basibweene, baabakaniayira engeri yi musaacha waliho emisaambwa oyo, yawonisirwamo. 37Abaandu boosi abali mu syaalo syebodohaanie Geraseneesi beecha bamusaba abatuleho; olwohuba bali batiire muno; Yesu yeengira mu lyaato mani yeekobolerayo. 38Nae omusaacha yi misaambwa chatulamo oyo, yekweda Yesu ati, amufukiirire adoong'e nae; nae Yesu yamuseebula n'aboola ati, 39“Kaluha engo, mani obaboolere alafu, obulai bu Nasaae ahuholeere yi bwaaka.” Yawaawo, n'ayaala mu siko sihuluundu esyo syoosi ebilai bi Yesu amuholeere koti lu byaaka.

Omuhaana wa Jairo neende omuhasi wadiira hu ngubo ya Yesu

(Mat 9:18-26; Mrk 5:21-43)

40Yesu niyakobola, esidiiyiha sy'abaandu syamwaakaanira, olwohuba boosi bali nibamuliindiriire. 41Abweene-na-bweene ao, omusaacha olaangwa Jairo yesi yoola. Jairo yali omuhuluundu wa Sinagoogi; mani niyoola eyiri Yesu, yamukwa mu makulu yamwekweeda yeeche mu nyuumba yae, 42olwohuba yali ali neende omuhaana wae mulala yeeng'ene, owali aambi w'emyaaka ehumi neende chibiri eky'obuhuluundu, naali aambi ohufwa.

Nae Yesu niyali hwakeenda naachia, abaandu bali bamweyindikanieho muno. 43Nae, omuhasi wali n'amalire emyaaka ehumi neende chibiri n'alwaala obulwaae bw'ohudaachirira #8:43 n'alwaala obulwaae bw'ohudaachirira: Ebyandiiko bihuluundu bihale biindi bimeedaho biti, ‘haandi niyamalira obuyiinda bwae bwoosi hu balesi.’ haandi omuundu yeesi n'atanyalaangaho ohumuwonia, 44yatulira enyuma, yoola hu Yesu, yadiira hu kemo ly'engubo yae; mani abweene-na-bweene ao, ohudaachirira hwae ohwo nihwaakama. 45Nae Yesu yaboola ati, “Naanu oyo owuundiirireho?” Nae abaandu boosi nibekaana, Petero yaboola ati, “Omwaami, mbao esidiiyiha sy'abaandu sihwebodohaanie haandi siri ohuhudiiya!” 46Nae Yesu yaboola ati, “Aliwo omuundu wuundirireho; olwohuba mbulira aliwo amaani kahaandulaho.” 47Mani omuhasi oyo niyabona ati amanyihaane, n'atengereha, mani yaakwa mu makulu wa Yesu n'aboola emberi w'abaandu boosi esikerere n'amudiiraho, haandi koti lwawonere abwene-na-bweme n'amalire ohumudiiraho. 48Nae Yesu yamuboolera ati, “Muhanaang'ene, efukiirira lyao lihuwoniisye; waao neende omuleembe.”

49Yesu niyali n'asilomalomaanga, omusaacha wuundi ohutula mu daala ly'omutuki wula yoola mani yamuboolera ati, “Omuhaana wao amalire ohufwa; mani haandi otanyaahania Omweekesa.” 50Nae Yesu niyawulira sino, yamukobolamo ati, “Otatya; fukiirira sa, mani omuhaana wao achia ohuba omulamu abweene.” 51Mani Yesu niyeecha yoola mu daala, siyafukiirira omuundu yeesi ohwiingira nae mu nyuumba, ohutusaho Petero neende Yowaana neende Yakobbo, neende laatang'ene neende ng'ina mwaana oyo. 52Nae abaandu boosi badoong'a nibalira haandi nibachereenjesa hulw'omuhaana oyo; nae Yesu yaboola ati, “Mutalira; olwohuba haba saafwiire, nae ali ohukona.” 53Nae abaandu bamucheha sa, olwohuba bali bamanyire bulai bweene bati, omuhaana oyo afwiire. 54Mani Yesu yamudiira omuhono, yaamulaanga n'aboola ati, “mwaana ewe, siingira.” 55Mani naakalusa omwooyo, nasiingiraniramo; mani Yesu yabakerakira ati bamubeereseho esiindu syohulya. 56Mani abeebusi bae beecha besiinduha muno; nae Yesu yabalagira ati batabooleraho omuundu yeesi esyali nisiholehaane.

Currently Selected:

Luka 8: SAMIA

Highlight

Copy