Luka 5

Yesu alaanga abeeki bataangira

(Mat 4:18-22; Mrk 1:16-20)

1 # Mat 13:1,2; Mrk 3:9,10; 4:1. Ludaalo luundi, Yesu niyali yeemere hu lwaasi lw'enyaanja ye Genesareeti, abaandu baangi beecha nibasiindihana boole yali bawulire emboosi ya Nasaae. 2Yesu yabona amaato kabiri nikali hu lwaasi; nae abanaabi bali nibakatuliremo, nibali ohwosaanga enjero chaabwe. 3Yesu yeengira mu lyaato lala, elya Simooni, yaamusaba asudyeho elyaato budiidi mu maachi ohutula hu lwaasi. Yesu yachaaka ohweekesa abaandu niyehaale mu lyaato omwo. 4Nae niyali niyakaame ohulomaloma, yaboolera Simooni ati, “Sudya elyaato ebusiba mani wiise enjero chao odiise eng'eeni.” 5#Yow 21:3. Nae Simooni yamukobolamo ati, “Omwaami, hunyahaane esiro syoosi nae haba sihunyolereho esiindu syoosi! Nae olwohuba oboolere, njia ohwiisa enjero.” 6#Yow 21:6. Mani nibamala ohuhola sino, badiisya eng'eeni enyiingi muno; nae koti enjero chaabwe chali nichichaakire ohuhanuha, 7basakula nibalaanga abasyaabwe bali mu lyaato liindi beeche babahoonyereho. Mani nibeechusa amaato kabiri ako ohwoola lukali aambi ohusihama. 8Nae Simooni Petero niyabona sino, yaakwa aasi mu makulu ka Yesu, n'aboola ati, “Eee Omwaami, ndehe, olwohuba ese ndi omuhola-mbi.” 9Olwohuba Simooni, alala neende abo boosi abali nae besiinduha hulw'obuungi bw'eng'eeni chi bali banaabire; 10haandi nasilala batyo nilwo lu Yakobbo neende Yowaana, abasyaani ba Sebbedaayo abali neende Simooni Petero bosi besiinduha. Mani Yesu yaboolera Simooni ati, “Otatya; olwohuba ohuchaaka buti ochia ohuba omunabbi wa abaandu.” 11Mani nibakoba, baleha ao buli siindu syoosi bamuloonda.

Yesu awonia omusaacha

(Mat 8:1-4; Mrk 1:40-45)

12Olwoola, Yesu niyali n'asisiiri mu siko siindi, omusaacha wuundi owali niyeechulaho obulwaae bw'ebigeenge yamala yeecha yali; mani niyabona Yesu, yakwa yahubba aasi obweeni, mani yamwekweeda n'aboola ati, “Omwaami, nooba niweenya, onyala waandabya.” 13Yesu yakolola omuhono kwae, mani n'amudiiraho n'aboola ati, “Nyenya; wona.” Mani abweene-na-bweene ao, ni obulwaae bw'ebigeenge bumwamuhaho. 14#Lef 14:1-32. Yesu yamulagira obutabooleraho omuundu yeesi; nae yamuboolera ati, “cha weyekese eyiri omulaamisi, mani owaane esiyaanwa esy'ohuhulabya, koti lu Musa yalagira, sibe esilolero eyiri abaandu.” 15Nae kata katyo, nilwo lu fuma yidiira hu Yesu yemeeda ohusalaana muno; mani ebidiiyiha by'abaandu bihoongo muno byeecha byamwebuusaho ohutekeeresa enjekesa yae alala neende ohuwonisibwa amadehere kaabwe. 16Nae Yesu ha yekabula yacha mu siparara mani yalaama Nasaae.

Yesu awonia omusaacha wadataala

(Mat 9:1-8; Mrk 2:1-12)

17Ludaalo luundi, Yesu niyali nasomesaanga, baliwo Abafarisaayo neende Abeekesa b'Amalako ka Musa bali nibehaale aambi ao, nibatulire mu buli lukoongo lwa Galilaaya neende Yudea neende Yerusalemu; nae Yesu yali yechuuleho amaani k'Omwaami k'ohuwonia obulwaae. 18Mani bone, abasaacha baandi bali baleetera hu sitaanda omusaacha wali yadataala, beecha bakoonya engeri y'ohumwiingisa bamwaalise mu moni wa Yesu. 19Nae nibatabona engeri yoosi yibanyala bamwiingisiramo, hulw'esidiiyiha sy'abaandu siingi, beecha baniina hu sirama aakulu; mani beekula esidomo mu mategula bamwiisiramo aasi akatikaati w'abaandu naali hu sitaanda syae, bamuta mu moni wa Yesu. 20Mani Yesu niyabona efukiirira yaabwe, yaboola ati, “Wasyaange, oleheerwe ebyonoono byao.” 21Nae Abeekesa b'Amalako ka Musa neende Abafarisaayo beecha bachaaka ohweteeba nibaboola bati, “Wuno niye wiina olomaloma n'afwoola Nasaae? Wiina mweene onyala ohulehera ebyonoono ohutusaho Nasaae yeeng'ene?” 22Nae Yesu niyamanya ohweteebanaho hwaabwe, yabakobolamo ati, “Lwasiina muli ohweteeba mu myooyo kyeeng'we mutyo? 23Siina syeene esihira obwaangu, ohuboola endi, ‘Oleheerwe ebyonoono byao,’ kose ohuboola endi, ‘Siingira okeende’? 24Nae njia ohubeekesa mumanye muti Omwaana w'Omuundu ali neende obunyala hu syaalo obw'ohulehera ebyonoono” mani yaboolera omusaacha wali yadataala oyo ati, “Huboolera endi, siingira, obukule esitaanda syao, mani ochie engo.” 25Abweene ao, yasiingira yeema boosi nibabona, yaakiinga esitaanda si yali akonereho, mani yacha engo, naafumia Nasaae. 26Mani abaandu boosi bawuka muno, bafumia Nasaae nibechuule obuti, nibaboola bati, “Olwaleero hubweene ebiindu bihutabonaangaho.”

Yesu alaanga Leefi

(Mat 9:9-13; Mrk 2:13-17)

27Bino nibyawa, Yesu yatula erwaanyi, mani yabona omutoosa w'omusolo olaangwa Leefi, niyehaale aambi neende enyuumba yitooserwangamo omusolo; mani yamuboolera ati, “Noonde.” 28Leefi yaleha buli siindu syoosi, mani yaasiingira yaamuloonda.

29Leefi yatekehera Yesu esidyaalo sihoongo muno mu nyuumba yae; haandi mu baandu ba yalaanga, mwalimo omukaanda muhoongo muno okw'abatoosa b'emisolo baasye, alala neende abaandu baandi bosi beehala neende Yesu hu meesa ohulya nae. 30#Luk 15:1,2. Nae Abafarisaayo neende Abaandiiki b'Amalako baabwe bekanyiirisira abeeki ba Yesu nibaboola bati, “Lwasiina eng'we mulya haandi mwang'wa neende abatoosa b'omusolo neende abahola-mbi?” 31Nae Yesu yabakobolamo ati, “Abaandu balamu, haba sinibo yabaheera omulesi, nae abalwaae nibo amudaha. 32Ese sindeecha ohulaanga abaluungifu, nae abahola-mbi banyale ohweyolobya.”

Esiteebo sidiira hu husiiba

(Mat 9:14-17; Mrk 2:18-22)

33Haandi beecha baboolera Yesu bati, “Abeeki ba Yowaana basiiba amahabi maangi muno haandi balaama muno, kata nasilala neende abeeki b'Abafarisaayo, nae abao nabo balya haandi bang'wa sa.” 34Nae Yesu yababoolera ati, “Ewe onyala ohuhola abakeni bohu sidyaalo sy'obweya baasiiba omusaacha odehiisye n'asisiiri nabo? 35Endaalo chichia ohwoola, omusaacha odehiisye abatusibweho, mu ndaalo echo nimwo mubacha ohusiibira.” 36Haandi Yesu yabakaadira olukaado luundi n'aboola ati, “Abulao omuundu yeesi otaandulaanga esiraka hu ngubo njaaha, mani yacha yaasinaba hu ngubo ngofu; naahola atyo, aba achia ohutaandula engubo njaaha, haandi esiraka situla hu njaaha, sisiba sichia ohuchiira hu ngubo hale. 37Haandi abulao omuundu yeesi otechaanga efiini njaaha mu bikiingiro by'efiini by'eseero bihale; nae naahola atyo, efiini njaaha eyo yiba yicha ohwata amaseero ako, mani yidiihe aasi, haandi amaseero ako kosi kaba kachia ohunyaasiha. 38Nae efiini njaaha yihoyerwa ohuchuhibwa mu bikiingiro by'efiini by'amaseero biyaaha. 39Nihaandi abulao omuundu omalire ohung'wa efiini hale owekoomba enjaaha; olwohuba aboola ati, ‘Ehale ndai.’ ”

Currently Selected:

Luka 5: SAMIA

Highlight

Copy