Luka 12

Yesu alabula hu hweliinda obwebachirisi

(Mat 10:26-27)

1 # Mat 16:6; Mrk 8:15. Mu biha byeene ebyo, ebidiiyiha by'abaandu baangi muno byali bimalire ohwebuusa alala, abaandu nibachaakire ohwesenanaho, Yesu yeecha yataangira ohuboolera abeeki bae ati, “Mweliinde amamera k'Abafarisaayo ak'obwebachirisi. 2#Mrk 4:22; Luk 8:17. Sibulao esiindu syoosi esyabwihwaho esitachia hubwiihulwa, oba esyakiswa esitachia humanyihana. 3Mani sakira esyo syoosi simwalomaloma mu siirima, sichia ohuwuliirihanira mu bulafu, haandi esyo syoosi simwemoonyera mu nyuumba, sichia ohulaangirirwa hu birama by'enyuumba.

Oyo yi bahoyere ohutya

(Mat 10:28-31)

4“Mbaboolera obwadyeeri eng'we abeecha baange endi, mutatichaanga abo abeeta omubiri, nae nibamala batyo, sibulao esiindu syoosi sibanyala ohuhola. 5Nae njia ohubalabula oyo yimuhoyeera ohutya. Muticheenge oyo, omala ohwiita, haandi oli neende obunyala bwohusukuna mu nyaanja y'omuliro; #12:5 nyaanja y'omuliro: Mu Lugiriki bati, ‘Geyena.’ eee, mbaboolera endi, mutye oyo! 6Obubbiichu butaanu, haba sibukulwaanga obuhela bubiri bwoong'ene? Nae abulao kata halala hw'otwo ahebirirwanga mu moni wa Nasaae. 7Lwasiina, kata efwiiri yohumutwe kwao lyoosi, lyamala ohubalwa. Mutatya daawe; eng'we mulimo obuhala obuungi muno ohuhira obubbiichu buungi.

Ohweyama neende ohwebwaaba Kristo

(Mat 10:32-33; 12:32; 10:19-20)

8“Haandi mbaboolera endi, buli muundu yeesi owufukiirira mu moni w'abaandu, Omwaana w'Omuundu yesi aba achia ohumufukiirira mu moni wa bamalaika ba Nasaae; 9nae oyo owundekaana mu moni w'abaandu, achia ohwekaanibwa mu moni wa bamalaika ba Nasaae. 10#Mat 12:32; Mrk 3:29. Haandi omuundu yeesi, olomaloma emboosi bubi hu Omwaana w'Omuundu achia ohuleherwa; nae oyo yeesi ofwoola Mwooyo Mwoolerefu, haba saachia huleherwamo daawe. 11#Mat 10:19,20; Mrk 13:11; Luk 21:14,15. Nae nibabaletaanga mu moni wa buli sinagoogi neende mu moni w'abeemirisi, kata neende mu moni wa b'obunyala bakabuhaane, mutelalihiriraanga eby'ohukobolamo neende engeri y'ohukobolamo, oba eby'ohulomaloma; 12olwohuba Mwooyo Mwoolerefu aba achia ohubeekesa esiha syeene esyo eby'ohulomaloma.”

Olukaado lw'omuyiinda musiru

13Olwoola, mulala hu baandu bali mu sidiiyiha yaboolera Yesu ati, “Omweekesa, boolera mwaanama akabane naange ebiindu bi hwalaamirwa.” 14Nae Yesu yamuboolera ati, “Wasyaange, wiina owandaao ohuba omukayi weeng'we oba omukabi w'ebiindu byeeng'we?” 15Mani Yesu yababoolera ati, “Mweliinde, haandi mweekaye obwekoombi bwoosi; olwohuba obulamu bw'omuundu sibweema hu buungi bw'obuyiinda bwae.” 16Yesu yabakaadira olukaado n'aboola ati, “Olwoola, endalo y'omusaacha wuundi muyiinda, yama bulai muno; 17mani omusaacha oyo yabaasa mu mwooyo kwae ati, ‘Ndaahole endye, olwohuba mbula abuundu w'ohuteera ebilime byaange?’ 18Mani yaboola ati, ‘Bulaanu sino nisyo siinjia ohuhola: Njia ohukwiisa ebyaaki byaange byoosi, mani male nyombahe ebihoongo bihira hoo; mani omwo nimwo munja ohuteera emere yaange alala neende obuyiinda bwaange bwoosi. 19Mani niimala endyo njia ohuboolera omwooyo kwaange endi, Bulamu ewe, mbao oli neende ebiindu biyera ebihubihiirwe ohumala emyaaka emiingi muno; mani otelalihira, lya, ng'wa, mani osangaale.’ 20Nae Nasaae yamuboolera ati, ‘Omusiru wuno! Esiro syeene sino obulamu bwao, bucha ohuhutusibwaho; mani ebiindu biwabiiha bino byoosi, bichia ohuba ebya wiina?’ 21Mani nilwo lwaali oyo yeesi, owebuungira omweene obuyiinda bwae, nae saali omuyiinda mu moni wa Nasaae.”

Ohweesika Nasaae

(Mat 6:25-34)

22Bulaanu, Yesu yaboolera abeeki bae ati, “Sakira mbaboolera endi, mutelalihiriraanga eby'obulamu bweeng'we, bi munaalye, oba ebidiira hu mibiri kyeeng'we, neende eby'ohwefwaala. 23Olwohuba obulamu buhira ebyohulya, nae omubiri kwosi kuhira eby'ohwefwaala. 24Mubonereho hu mahoofwa. Haba sikawaanya kata sikakesa, sikali neende aohubiiha ebiindu, kata ebyaaki, nae bone Nasaae akaliisa. Nae obuhala bweeng'we sibuhira muno amayoni ako! 25Nae wiina hweeng'we hulw'ohwelalihirira hwae, onyala ohumeeda hu bulamu bwae bwaaba obuleeyi hooho? #12:25 hu bulamu bwae: Oba hu buhoongo bwae. 26Nikali mbwe eng'we simunyala ohuhola esiindu sidiidi sityo, lwasiina mwelalihira hulw'ebiindi bidoong'ereyo? 27#1 Abat 10:4-7; 2 Biha 9:3-6. Mubonereho hu bimuli byomu siino, koti lu bihula; haba sibihola mirimo oba ohunaba engubo ch'ohwefwaala; #12:27 Mubonereho hu bimuli byomu siino, koti lu bihula; haba sibihola mirimo oba ohusona engubo ch'ohwefwaala: 27 Ebyandiiko bihuluundu bihale biindi bisoma biti, ‘Mubonereho hu bimuli byomu siino; haba sibihola engubo ch'ohwefwaala, kata ohuluha engubo.’ nae mbaboolera endi, kata Solomooni, mu luyaali lwae lwoosi, haba siyanyalaho ohwefwaala yeetiha ohwaakana neende silala hu bimuli bino. 28Nae nikali mbwe Nasaae anyala ohufwaasa sa obunyaasi bwomu siino ohubaao enyaanga yino, nae muchuli busukunwa mu muliro ohusaambwa, nae aba yahaake yeena ohubafwaasa, eng'we ab'efukiirira ndiidi! 29Mani sakira mutekoonyereseraanga ebyohulya neende eby'ohung'wa kata ohubechaanga neende ebibaaso by'ohweelalihira. 30Olwohuba ebyaalo byohu syaalo huno byoosi, bikoonyeresa sa ebiindu bino; nae Seeng'we amanyire ati mwesi mubidaha. 31Nae, mu bweyaango bw'ebyo, eng'we mukoonyerese Obwaami bwae, mani ebiindu bino byosi biba bichia ohuba ebyeeng'we.

Obuyiinda bwo Muukulu

(Mat 6:19-21)

32“Mutatya daawe, eng'we baana baange, olwohuba Seeng'we musangaafu ohubaberesa Obwaami. 33Mukuse emyaandu kyeeng'we, mukabe abamanani; mwenyoolere emifuuko chitakofula, neende obuyiinda buli Muukulu obutanyaasiha, yi mwiibi yeesi atanyala ohwoola, haandi bu mbungi chitanyala ohunyaasa. 34Olwohuba yi mwaandu kwao kuba, ao niwo yi mwooyo kwao kwosi kuba.

Abahalaabani bali meeso

35 # Mat 25:1-13. “Mwefwaalire elalira, haandi mulehe amataara keeng'we nikaaduha, 36#Mrk 13:34-36. mani mube koti abahalaabani bali meeso baliindire omwaami waabwe ohukobola ango n'atula hu sidyaalo sy'obweeya, banyale ohumwiikulirao olwiiki bwaangu niyoola sa ati yahong'oonda. 37Bali neende ehabi abahalaabani abo ba mwaami waabwe yeecha yakaana nibali meeso; mbaboolera obwadyeeri endi, aba achia ohweboya bulai, mani ababoole beehale hu meesa ohulya, mani omweene yeeche abakabwe. 38Nikali mbwe yeecha mu saa yohubiri, oba mu yohudatu, mani yabakaana nibali batyo, abahalaabani abo baba bali neende ehabi! 39#Mat 24:43,44. Nae muhoyere ohumanya sino muti, omweene nyuumba aba niyamanya ebiha byeene bi mwiibi yeecheramo, aba #12:39 aba niyamanya ebiha byeene bi mwiibi yeecheramo: Ebyandiiko bihuluundu bihale biindi bimeedaho biti, ‘aba yahaliindire mani yaahaya ohuleha enyuumba yae yaafunakwa yeengirwamo.’ 40Mani eng'we mwesi, muhoyere ohuba meeso; olwohuba Omwaana w'Omuundu achia ohwiicha mu siha syatabasirisirwamo.”

Omuhalaabani mweesikwa neende otaali omweesikwa

(Mat 24:45-51)

41Petero yaboola ati, “Omwaami, olukaado luno, oli ohulukaadira efwe, kose abaandu boosi?” 42Nae Omwaami yaboola ati, “Muliindi siina omweesikwa haandi omukesi, yi mwaami wae yahadiisa edaala lyae, neende ohukabulira abaandu bamwo omukabo kwaabwe mu biha bihoyere? 43Ali neende ehabi omuhalaabani oyo, yi mwaami wae yeecha yamwakaana naahola esyo sy'ahoyere ohuhola. 44Mbaboolera obwadyeeri endi, aba achia ohumudiisa ebiindu byae boosi. 45Nae omuhalaabani oyo niyeecha yeboolera omweene ati, ‘Mbao ngandi omwaami waange anahiinde ohwiicha,’ mani yachaaka ohuhuya abahalaabani baasye basaacha neende abahasi, mani yachaaka ohulya neende ohung'wa nameera, 46omwaami w'omuhalaabani oyo achia ohwiicha hu ludaalo lu muhalaabani oyo atamubaasirisiramo haandi hu siha syatamanyire, mani aba achia ohumusaandya, #12:46 ohumusaandya: Oba ohumudonya-donyamo ebituundu. mani amale amute alala neende abataali abeesikwa. 47Nae omuhalaabani oyo owamanya si mwaami wae adaha, nae yahaya ohwetekeha, kata ohuhola koti lu mwaami wae adaha, achia ohutoochwa muno. 48Nae omuhalaabani oyo owali nataamanyire si mwaami wae adaha, mani yahola esyo esyahakera yahuywa, aba achia ohuhuywa budiidi. Buli muundu yeesi, obereswa ebiindu biingi, achia ohudahibwaho ebiingi; nae oyo yibabihisa ebiindu biingi bihira hoo, bachia ohumubaanja ebiingi bihira hoo.

Yesu oleeta ohukabuhana

(Mat 10:34-36)

49“Ese ndeecha ohwaadusa omuliro hu syaalo; haandi kuba kwamala ohuwaamba! 50#Mrk 10:38. Ndi neende embatiisa yi hoyeere ohubatiisibwamo; haandi sinjuuna muno ohwoola lu syaholereere! 51Mubaasa muti ese ndeecha ohuleeta omuleembe hu syaalo? Haba bbe, mbaboolera endi, ndeecha ohuleeta ohukabuhana; 52mani ohutula bulaanu neende ohwemdeeda mu moni, mu nyuumba ndala y'abaandu bataanu, muchia ohubaamo ohukabuhana, badatu bachia ohukabuha hu babiri, haandi babiri bakabuhe hu badatu; 53#Mik 7:6. abaandu bachia ohukabuhanamo, laatang'ene akabuhane neende omwaana wae, omusyaani akabuhane neende laatang'ene, ng'ina akabuhane neende omuhaana wae, haandi omuhaana akabuhaane neende ng'ina, masaalang'ene akabuhaane neende muhoomwaana wae, muhoomwaana akabuhaane neende masaalang'ene.”

Ohumanya esiha

(Mat 16:2-3)

54Yesu haandi yeecha yaboolera esidiiyiha sy'abaandu esyo ati, “Eng'we nimubona esireesi nisisiingiriire emuumbo, muboolaanga bwaangu-bwaangu muti, ‘Efula mbao yicha’; mani nibiba bityo. 55Nae nimubona omuyaka kutulira emwaalo nikuwuucha, muboolaanga muti, ‘Omubasu kw'amaani kuchia ohufwa’; mani nibiba bityo sa. 56Abebachirisi eng'we! Mumanyire bulai muno ohulakula emboneha y'esyaalo, neende ey'ekulu; nae lwasiina haba simumanyire ohutotola ebiha bya bulaanu buti?

Muwulirisanieenge neende ababayiingania

(Mat 5:25-26)

57“Nae lwasiina abeene simunyala ohweheengerao esiba nisihoyera ohuholwa? 58Nooba nooli ohuchia neende ohuyiingania eyiri omukayi, teemaho koti lu onyala, owuliirisaanie nae nimusiiri hu ngira, ataali ao, achia ohuhuhwehweesa ahwoose eyiri omukayi, mani omukayi oyo amale ahudiise omusikaari muhoongo, nae omusikaari oyo amale ahusukune mu jeela. 59Mbaboolera endi, haba s'ochia ohutulamo n'osisiiri ohutungira elalira ehela yimaliirihayo.”

Currently Selected:

Luka 12: SAMIA

Highlight

Copy