Luka 10

Yesu atuma abeeki amahumi kataanu-na-kabiri na babiri

1Oluunyuma lwa bino, Omwaami Yesu yadoola abeeki amahumi kataanu-na-kabiri na babiri #10:1 amahumi kataanu-na-kabiri na babiri: Ebyandiiko bihuluundu bihale biindi bisoma biti, ‘amahumi kataanu-na-kabiri na babiri.’ baandi, mani yabatuma bamutaangiriremo ohuchia, babiri-babiri, mu buli siko neende abuundu, yi omweene yali naachia. 2#Mat 9:37,38. Mani yababoolera ati, “Ekesa nalyo liingi muno, nae abahalaabani nibo abadiidi; mani mulaame eyiri Omwaami wa kesa atume abahalaabani mu kesa lyae. 3#Mat 10:16. Bulaanu, mani muchie; nae bone, mbao mbatuma, koti abaana b'amakoondi mu manani. 4Mutakiinga ebbeeti ch'eseende, kata emifuuko kw'ohusumiramo, kata ebiraato; haandi, mutaheesa omuundu yeesi hu ngira. 5Nabuli nyuumba yoosi yimwiingiramo, mutaangireenge ohuboola muti, ‘Omuleembe kube hu nyuumba yino!’ 6Mani, omuundu yeesi ow'omuleembe naaba mu nyuumba eyo, omuleembe kweeng'we kuchia ohumubaaho; nae nibitaali bityo, omuleembe kuchia ohubakaluhira. 7#1 Kor 9:14; 1 Tim 5:18. Mani mudoong'eenge mu nyuumba yene eyo, nimulya haandi nimung'wa buli siindu syoosi sibabakabula, olwohuba buli muhalaabani ahoyera omuheemba kwae; nae mutatulaanga mu nyuumba eyo nimuchia mu yiindi. 8Nimwiingiraanga mu siko syoosi, mani bababukaanira, mulicheenge esyo syoosi si baba nibabakabuule; 9muwonie abalwaae baba nibalimo, mani mubaboolere muti, ‘Obwaami bwa Nasaae bwiichire aambi naang'we.’ 10#Biho 13:51. Nae buli lumwiingira mu siko syoosi, mani bahaya ohubabukaanira, muchicheenge mu makira kaamwo, mani muboola muti, 11#Mat 10:7-14; Mrk 6:8-11; Luk 9:3-5. ‘Kata olufu lw'esiko syeng'we, olwediirire hu makulu keefwe, huli ohubateng'ulira lubaloonde; nae kata katyo, mumanye sino, muti Obwaami bwa Nasaae bwiichire aambi.’ 12#Huc 19:24-28; Mat 11:24; Mat 10:15. Mbaboolera endi, hu ludaalo olwo, Sodomu syahakwiirwe esisa ohuhiraho esiko esyo.

Ebiko bitafukiirira

(Mat 11:20-24)

13 # Yis 23:1-18; Esek 26:1—28:26; Yoel 3:4-8; Amos 1:9,10; Sak 9:2-4. “Chihwakaanire ewe, Korasiini, chihwakaanire ewe, Bbetasaida! Olwohuba eby'amayia byaholwa mweeng'we biba byaholwa mu Tiire neende Sidoni, abaandu bamwo baba nibeeyolobya hale, nibefwaala ebigunia, haandi nibeehala mu kohe. 14Nae hu ludaalo lw'ohuheengeraho omusaango Tiire neende Sidoni byahakwiirwe esisa, ohuhiraho eng'we. 15#Yis 14:13-15. Nae ewe Kaperanaumu, odaha ohweniinia ohwoola Muukulu? Mani bachia ohwiiswa aasi ohwoola mu syaalo sy'abafu.

16 # Mat 10:40; Mrk 9:37; Luk 9:48; Yow 13:20. “Oyo obawulira, aba awuliire ese, haandi oyo obahaya, aba ahayire ese, haandi oyo owuhaya aba ahayire oyo owaanduma.”

Amakaluha k'abeeki amahumi kataanu-na-kabiri na babiri

17Amahumi kataanu-na-kabiri abo #10:17 Amahumi kataanu-na-kabiri abo: Ebyandiiko bihuluundu biindi bihale bisoma biti, ‘Amahumi kataanu-na-kabiri na babiri abo.’ bakobola nibasangaalire muno, nibaboola bati, “Omwaami, kata emisaambwa chosi chituwulireenge, nihwehoonyera eliita lyao!” 18Nae Yesu yababoolera ati, “Mbweene Sitaani niyaakuha n'atula Muukulu naakwa aasi koti olumesu. 19#Sab 91:13. Nae bone, mbabeerese obunyala bw'ohuseenakira endemo neende eby'obusiba byoosi, haandi neende obunyala bumalao amaani k'omusuku koosi; mani sibulao esiindu sichia ohubanyaala. 20Nae kata katyo, mutasangaala olwohuba ebihyeeno bibaulira; nae musangaale olwohuba ameeta keeng'we kandiikwa Muukulu.”

Yesu yehoya

(Mat 11:25-27; 13:16-17)

21Mani esiha syeene esyo, Yesu yehoyera mu Mwooyo Mwoolerefu mani yaboola ati, “Hweebasa muno Laata, Omwaami w'Ekulu neende esyaalo, olwohuba wakisa ebiindu bino abakesi neende abasoma muno, nae wabibwihulira abaana badoto; Eee, Laata, olwohuba huno hwali ohudaha hwao hw'esisa. #10:21 olwohuba huno hwali ohudaha hwao hw'esisa: Oba olwohuba esyo nisyo esyahusangaasa muno. 22#Yow 3:35; Yow 10:15. Laata yamala ohuumberesa ebiindu byoosi; mani abulao omuundu yeesi omanyire Omwaana ohutusaho Simwaana, haandi omanyire Simwaana, ohutusaho Omwaana neende oyo yeesi yi mwaana aheengao ohubwiihulira.”

23Nae Yesu yakaluuhanira abeeki bae nibali boong'ene mani yababoolera ati, “Chiri neende ehabi emoni chaabo echibona bi muli ohubona! 24Olwohuba mbaboolera endi, banabbi baandi neende abatuki baangi beekoomba ohubona simubona, nae bahaya ohusibona, haandi neende ohuwulira simuwulira, nae bahaya ohusiwulira.”

Olukaado lw'Omusamaria mulai

25 # Mat 22:35-40; Mrk 12:28-34. Nae bone, omweekesa w'amalako wuundi, yaasiingira yeema n'adaha ohuhema Yesu n'aboola ati, “Omweekesa, siina syeene siimba hole, hu nyale ohunyoola obulamu butaakama?” 26Nae Yesu yamuboolera ati, “Ni siina syeene esyandiikwa mu malako? Okasoma otye?” 27#Amal 6:5; Lef 19:18. Nae yakobolamo ati, “Heraanga Nasaae Omwaami wao neende omwooyo kwao kwoosi, neende obulamu bwao bwoosi, neende amaani kao koosi, neende amakesi kao koosi; haandi heeraanga owaasyo, koti lu weheera omweene.” 28#Lef 18:5. Nae Yesu yamuboolera ati, “Okoboolemo bulai; mani hola otyo, mani ochia ohubaao omulamu.”

29Nae omweekesa w'amalako oyo, koti luyali akiiya ohweekesa ati mulai, yeecha yaboolera Yesu ati, “Nae owasyaange niye naanu?” 30Yesu yakobolamo ati, “Olwoola, omusaacha wuundi yali n'akeenda niyeehirira ohutula Yerusalemu, naachia Yeriko, mani yaakwa mu banyaka, baamufwaalulaho engubo, baamuhuya bubi muno, mani bawaao, bamuleha naali eyuhayuha. 31Nae bulaanu olw'ehabi, yaliwo omulaamisi wuundi yali n'abitira hu ngira yene eyo; nae niyamubona, yahededya yabitira endulo yeweerawo. 32Haandi nasilala, Omuleefi wuundi yesi niyeecha yoola abuundu ao yamubona, mani yahededya yabitira endulo. 33#2 Biha 28:15. Nae Omusamaria wuundi, niyali naali hu lukeendo, yoola abuundu yi musaacha oyo yali; nae niyamubona, yamukwiira esisa, 34mani yacha yali, yamuboya ebinyubuluuhe, yabichuhaho, amafuta neende efiini; mani yaamubukula yamuta hu punda yae yene, mani yaamuyira mu nyuumba y'abakeni, yamala yaamulinda bulai bweene. 35Haandi nibwahya echuli, yeecha yabukula edinaari chibiri #10:35 edinaari: Edinaari ndala, yali yaakana neende omusaara kw'omuhalaabani kw'oludaalo lulala. mani yachiberesa omuliindi w'enyuumba y'abakeni eyo, n'aboola ati, ‘Liinda omuundu wuno bulai; haandi nisibaao esiindu syoosi syomeedaho ohumuhoonya, ningaluha njia ohuhutuunga.’ 36Naanu mweene hu baandu badatu bano, y'obaasa oti, yekesa eyiri omusaacha wakwa mu banyaka ati niye owaasye?” 37Nae yaboola ati, “Oyo owamukwiira esisa.” Mani Yesu yamuboolera ati, “Cha mani wesi ohole otyo.”

Yesu akeniya Marita neende Maria

38 # Yow 11:1. Nae Yesu neende abeeki bae, nibali bachiiririra neende olukeendo lwaabwe olwo, Yesu yoola mu lukoongo luundi; mani omuhasi wuundi olaangwa Marita yeecha yamwaakaanira, yeengira mu nyuumba yae. 39Nae yali neende mwaanang'ina olaangwa Maria, oweecha yehala mu makulu w'Omwaami, mani yaatekeeresa enjekesa yae. 40Nae Marita owali asidoyeerwe muno neende emirimo ch'obudeehi; yeecha yacha eyiri Yesu mani yaboola ati, “Omwaami, sodeebaho oti, mwaanaama yandehere ohukabula syeng'ene? Mani muboolere yeeche yahoonyeho.” 41Nae Omwaami yamukobolamo ati, “Marita, ewe Marita, welalihiriire haandi wachuunirwa ebiindu biingi muno; 42nae esiindu silala syoong'ene nisyo esihoyerwa. #10:42 esiindu silala syoong'ene nisyo esihoyerwa: Ebyandiiko bihuluundu bihale biindi bisoma biti, ‘ebiindu biyeraanu nibyo ebihoyerwa,’ oba ‘esiindu silala syoong'ene.’ Maria aloboole omukabo mulai, okutachia ohumutusibwaho.”

Currently Selected:

Luka 10: SAMIA

Highlight

Copy