Ohuchaaka 40

Yosefu atuumbula amahuluundu k'ebilooto by'ababoye

1Ebiha bidiidi nibyabitao, omukoyi muhuluundu w'efini y'omutuki wa Misiri neende omuubbi w'emigaati wae, banyoolesa omutuki. 2Omutuki wa Misiri yanyoolerera abaandu abo boombi, 3mani yaabata mu jeela yomu nyuumba y'omuliindi muhuluundu. Ejeela yi bali nibeekaliramo Yosefu. 4Omuliindi muhuluundu w'ejela oyo yabata mu mahono ka Yosefu abaliindeenge. Baba mu jeela omwo ohumala ebiha biyeraho. 5Nae esiro siindi ababoye abo boombi nibaloota, omukoyi neende omuubbi w'emigaati b'omutuki wa Misiri, abali nibateerwe mu jeela. Buli otula neende esilooto syae, haandi buli silooto neende amahuluundu kasyo. 6Nae nibwahya, Yosefu yachia yi bali, mani yaabona ati bali nibeyendehereere. 7Yosefu yateeba abahunuufu ba omutuki wa Misiri abali nibaboyerwe alala nae mu jeela yomu nyuumba y'omuhoongo waabwe ati, “Lwasiina mweyendehereere sa mutyo enyaanga yino?” 8Nabo bamuboolera bati, “Hulootere ebilooto, nae abulao omuundu yeesi onyalire ohututuumbulira amahuluundu kabyo.” Yosefu yababoolera ati, “Ohutumbula hwosi-hwoosi hutula eyiri Nasaae. Mbekweeda, mumboolere ebilooto byeeng'we ebyo.”

9Mani omukoyi w'efini muhuluundu yaboolera Yosefu esilooto syae ati, “Mu silooto syaange, mbweene omusabbiibbu, 10nae hu musabbiibbu okwo hubeereho amasaga kadatu; nae emisaala ekio nikibeere kiloha amasaafu kiti, kyachaakaniramo ohumuliha, mani ebyaamo by'emisabbiibbu byeengerao. 11Esikoombe sy'omutuki wa Misiri syali nisiri mu muhono kwaange; mani ndaabukula emisabbiibbu aakidiinyira mu sikoombe sy'omutuki wa Misiri, ndageeng'a esikoombe esyomu muhono kwa omutuki wa Misiri.” 12Yosefu yamuboolera ati, “Kano niko amahuluundu k'esilooto esyo, ‘amasaga kadatu niko endaalo chidatu; 13mu ndaalo chidatu echio, omutuki wa Misiri achia ohuhuhusa ahukobose hu mulimo kwao; haandi ochia ohudisaanga omutuki wa Misiri esikoombe koti lu waholaanga hale n'osisiiri omukoyi wae.’ 14Nae hwekweeda endi ebiindu nibihuchiira bulai, wunjichulisaanga, mani oboolere omutuki wa Misiri ebindiiraho, syesi nyale ohutula mu nyuumba yino. 15Olwohuba baanjiba ohutula mu syaalo sy'Abaibburania; haandi baamboyera mu nyuumba kata ayahaba mbwe sibulao esibi si ndahola daawe.”

16Nae omuubbi w'emigaati muhuluundu niyabona ohutumbula ohwo nihwali ohulai hutyo, yaboolera Yosefu ati, “Syesi inyoolere esilooto siti, ‘mbeere ndedwiihire ebikono bidatu by'emigaati, 17nae mu sikono sy'aakulu syeene, mubeeremo emigaati ky'omutuki wa Misiri ekia buli embya.’ Nae amayoni kabeere nikaliira mu sikono esiri hu mutwe kwaange.” 18Yosefu yakobolamo ati, “Kano niko amahuluundu k'esilooto, ‘ebikono bidatu nicho endaalo chidatu.’ 19Mu ndaalo chidatu omutuki wa Misiri achia ohuhutusaho obuhuluundu. Achia ohuhuboyamo omukoye mani ahwanihe hu musaala ofwe; amayoni kachia ohulya enyama y'omulaambo kwao.”

20Hu ludaalo lwohudatu, oludaalo lu omutuki wa Misiri yaholera abahalaabani bae esidyaalo sy'ohwiichulisiraho ameebulwa kae. Omukoyi w'efini muhuluundu wae neende omuubbi w'emigaati muhuluundu yabasiingisa, abahalaabani bae baababona. 21Yakobosera omukoyi w'efini obuhuluundu bwae, mani yadiisa omutuki wa Misiri esikoombe mu muhono. 22Nae yaboya omuubbi w'emigaati omukoye mu kosi mani yaamwaniha mu musaala, koti sa lu Yosefu yali n'atumbuule ebilooto byaabwe. 23Mani omuhunyi w'efini siyechulisa Yosefu, nae namwiibirira.

Currently Selected:

Ohuchaaka 40: SAMIA

Highlight

Copy