Ohuchaaka 24

Banyoolera Yisaka omuhasi

1Bulaanu Abburahamu yali akofuule muno, haandi Omwaami yali niyamuba ehabi mu buli siindu si yaholaanga. 2Abburahamu yaboolera omuhalaabani wae muhuluundu, owali naahulira ebiindu byae byoosi ati, “Ta amahono kao mu mataango kaange. 3Ndaha weechube mu liita ly'Omwaami Nasaae owaloonga ekulu neende esyaalo, oti soochia ohudoolera omwaana waange Yisaka omuhasi ohutula mu Bakanani bano bandamenyamo daawe. 4Nae oli ow'ohuchia mu syaalo syaange haandi eyiri abeebulanwa baange beene mani odoolere Yisaka omwaana waange omuhasi.” 5Mani omuhalaabani oyo yateeba Abburahamu ati, “Nae niwiichuhana omuhasi oyo yaahaya ohufukiirira ohwiicha naange mu syaalo sino? Nyala ohukobosayo omwaana wao mu syaalo siwatulamo?” 6Abburahamu yamuboolera ati, “Bona oti, sookobosaho eyo omwaana waange daawe. 7Omwaami Nasaae wo muukulu owaandusa mu nyuumba ya laata yaange haandi neende mu syaalo sindeebulwamo, oyo owamboolera niyechuba ati, ‘Njia ohuberesa abeechuhulu bao esyaalo sino,’ achia ohuhutumira malaika wae, mani ochia ohudoolera omwaana waange omuhasi ohutula eyo. 8Nae omuhasi naatafukiirira ohwiichana naawe, esichubo sino haba sisiba nisichia ohuhudiira daawe. Ohutusaho otakobosaho omwaana waange eyo.” 9Mani omuhalaabani oyo naata amahono kae mu mataango k'Abburahamu omwaami wae, namwechubira ebiindu bino.

10Omuhalaabani oyo, yabukula engamia ch'omwaami wae ehumi, yeweerao. Haandi yaabukula ebiyaanwa by'omwaami wae ebya buli ngeri, mani yaachia Mesopotamia mu siko sya Nahori. 11Yoola hu mwaalo kuli hu siruwa sy'esiko engoloobe, ebiha bi bahasi bachiiraangamo amaachi, mani yaasigamia aasi engamia chae. 12Yasaba ati, “Omwaami, Nasaae w'Abburahamu omwaami waange, husaba enyaanga yino wuhoonye nyale ohuhola si ndeechuba eyiri Abburahamu omwaami waange. 13Bona, mbano nyemere aambi neende esulo y'amaachi, haandi mbao abahaana bomu siko sino bali ohwiicha ohudaya amaachi. 14Leha omuhaana yi njia ohuboolera endi, ‘Mbereseho enjaagi ng'weeremo,’ mani yaboola ati, ‘Ng'weeramo, haandi njia ohung'weesa engamia chao’ leha oyo abe niye yooba n'odoleere omuhalaabani wao Yisaka. Sino nisyeeholehana, ao niwo yi njia ohumanyira endi, woosereese esichubo sy'omwaami waange.”

15Niyali naasilomalomaanga, nae bona, Rebbeka, omuhaana wa Bbesweeri omwaana wa Milika, omuhasi wa Nahori, mwaanang'ina Abburahamu, n'atulayo n'akingiirire enjaagi hu mabeka. 16Rebbeka yali omuhaana oboneha bulai muno, otamanyaho eby'abasaacha. Yehirira hu sulo, mani yaadaya amaachi, niyeechusa enjaagi yae mani yatula mu sulo. 17Mani omuhalaabani oyo yeeruha ohuchia ohumubukaanira yaboola ati, “Hwekweeda wumbereseho amaachi madiidi akomu njaagi yao ng'weeho.” 18Nae n'aboola ati, “Omwaami waange, ng'wa.” Mani niyedwiihula enjaagi bwaangu naamuba ohung'wa. 19Niyamala ohumuba amaachi yaang'wa, yamuboolera ati, “Njia haandi ohudayira amaachi engamia chao chosi ching'we chiikute.” 20Mani Rebbeka yaachuha bwaangu amaachi mu njaagi yi bisolo byang'weeraangamo, niyalaala ohuchia hu sulo ohudaya amaachi kaandi, engamia chae choosi niching'wa nichiikuta. 21Omusaacha wuno yemeeda ohumweehaliirisa abone nikali mbwe Omwaami abereese olukeendo lwae luno ehabi oba haba.

22Mani engamia nichali chimalire ohung'wa, omusaacha oyo yabukula engila y'esaabbu ey'obukusi bw'aakulu muno, neende ebbaangili chohu mahono chibiri, 23mani yateeba ati, “Mboolereho, oli omuhaana wa wiina? Mu nyuumba ya lataao mulimo obweyaango butumala fweesi ohweyalisamo enyaanga yino kose?” 24Nae yamukobolamo ati, “Ndi omuhaana wa Bbesweeri omwaana wa Milika muha Nahori.” 25Yameeda ohuboola ati, “Huli neende obunyaasi bumala alala neende obweyaango bubamala ohweyalisamo.” 26Mani omuhalaabani oyo naasigama aasi haandi niyeenamira Omwaami. 27Mani n'aboola ati, “Omwaami Nasaae wa Abburahamu omwaami waange w'ehabi niye, oyo hane mweesikwa niye olwohuba yoosereese esichubo sy'omwaami waange. Nae hulwaange, Omwaami yanjosere mu nyuumba y'abebulanwa b'omwaami waange.”

28Mani omuhaana oyo, niyeeruha n'aboolera abomu nyuumba ya ng'ina ebiindu bino byoosi. 29Rebbeka yali neende mboochoong'ene olaangwa Labbani, mani Labbani niyeeruha naachia hu sulo eyiri omusaacha oyo. 30Nae niyabona engila neende ebbaangili hu muhono kwa mboochoong'ene, haandi niyawulira emboosi cha Rebbeka mboochoong'ene ati, nilwo lu musaacha amuboleere, yachia eyiri omusaacha oyo. Mani bone, omusaacha oyo yali niyeemere hu sulo aambi neende engamia chae, 31yamuboolera ati, “Muundu w'Omwaami, lwasiina weemere erwaanyi? Yicha huchie engo. Olwohuba malire ohuhutekehera enyuumba neende obweyaango yi ngamia chao chinaabe.” 32Ao mani omusaacha oyo yeengira mu nyuumba. Labbani yadwiihula emigugu hu ngamia, yaachiberesa obunyaasi ohulya. Haandi yaleetera omuhalaabani wa Abburahamu neende abaandu ba yali nabo amaachi beeyosa amakulu. 33Nibaleetera omusaacha oyo ebyohulya, yaboola ati, “Ese haba siinjia hulya esiindu syoosi nisisiiri ohubaboolera esiindeetere.” Labbani yamuboolera ati, “Ewe mani boola esihuleetere.”

34Omusaacha oyo yaboola ati, “Ndi omuhalaabani wa Abburahamu.” 35Omwaami yaberesa omwaami waange ehabi nyiingi muno, mani muyiinda muno. Nasaae yamuberesa amakoondi, ebyaayo, efeesa, esaabbu, abawaambe basaacha neende abawaambe abahasi, engamia alala neende esuhiri. 36Saara omuhasi w'omwaami waange, yamwiibulira omwaana musyaani mu myaaka kyae ky'obukofu. Mani wuno niye yi yaberesa emyaandu kyae kyoosi. 37Omwaami waange yandechubira n'aboola ati: Otadooleraangaho omwaana waange omuhasi ohutula mu Bakanani bandamenyamo bano daawe. 38Nae oli ow'ohuchia mu nyuumba ya laata yaage, haandi neende eyiri abebulanwa baange, hu odoolere Yisaka omwaana waange oyo omuhasi. 39Nae ndateeba omwaami waange endi: Niwiichuhana omuhasi yaahaya ohwiichana naange? 40Nae yaangobolamo ati: Omwaami yi mbulira ebiha byoosi, achia ohutuma malaika wae abe naawe, mani ahwiikulire buli siindu. Ochia ohudoolera omwaana waange Yisaka omuhasi ohutula mu beebulanwa baange beene haandi ohutula mu nyuumba ya laata yaange yeene. 41Mani esichubo syaange sino haba sisiba nisichia ohuhudiiraho daawe niwoola eyiri abeebulanwa baange. Nae naahaya ohwiichana naawe, esichubo sino haba sisiba nisichia ohuhudiiraho daawe.

42“Nyaanga yino, niinjolere hu sulo, ndekongooyere nimboola endi: ‘Omwaami, Nasaae w'omwaami waange Abburahamu, noodaha olukeendo lwaange lube olw'ehabi, 43bona, mbano nyemere aambi neende esulo y'amaachi. Omuhaana oneecha ohudaya amaachi, njia ohumusaba enjaagi yae ng'weeremo amaachi. 44Naafukiirira mani yang'weesa engamia chaange chosi, oyo niye ochia ohuba omuhasi yi Omwaami yadoolera omwaana w'omwaami waange.’

45“Nindali nisiilomalomaanga endyo mu mwooyo kwaange, nae bona, Rebbeka yatulayo n'akiingire enjaagi hu mabeka, mani niyeeha aasi naadaya amaachi. Ndamuboolera endi, ‘Mbeeho amaachi ng'weeho.’ 46Yedwiihula bwaangu enjaagi, yaboola ati, ‘Ewe ng'wa sa, haandi njia ohudayira amaachi engamia chao chosi ching'we chiikute.’ 47Mani niimuteeba endi, ‘Laatao niye wiina?’ Nae yaboola ati, ‘Ndi omwaana wa Milika muha Bbesweeri, omwaana wa Nahori.’ Mani nimutaaho engila hu lwaala neende ebbaangili hu mahono. 48Mani nisigama aasi haandi ninyinamira Omwaami. Ndaafumia Omwaami Nasaae wa Abburahamu, omwaami waange, oyo owaanyemereramo hu lukeendo luno ohwoola mu daala ly'abeeho b'omwaami waange, ninyoolera omwaana wae omuhasi ohutula mu banaluyia bae beene. 49Bulaanu, nimudaha ohwooseresa abweene esichiiririrwa sy'omwaami waange muumboolere, haandi nimutadaha lwosi muumboolere sa nyale ohuheengao esy'ohuhola.”

50Mani Labbani neende Bbesweeri nibakobolamo bati, “Esyo situla eyiri Omwaami, efwe sihunyala ohuheengao esiindu syoosi. 51Bona, Rebbeka nguyo, ali mu mahono kao, mubukule mani muweeo nae, abe omuhasi w'omwaana w'omwaami wao koti lu Omwaami mweene aboolere.”

52Nae omuhalaabani wa Abburahamu niyawulira emboosi chaabwe, yaguunama aasi mani niyeenamira Omwaami. 53Mani omuhalaabani oyo naatusayo efeesa, esaabbu, neende engubo ndai, n'abiberesa Rebbeka. Nae Rebbeka yesi yaaberesa mboochoong'ene neende ng'ina ebbaangili ch'obukusi bw'aakulu muno. 54Omuhalaabani wa Abburahamu alala neende abaandu ba yali nabo, nibachaaka ohulya neende ohung'wa, nibakonayo esiro esyo. Nae nibasimuha echuli, yaboola ati, “Lehe ngoboleyo eyiri omwaami waange.” 55Nae mboochoong'ene Rebbeka neende ng'ina nibaboola bati, “Leha omuhaana ahole nadoong'aho naafwe. Achia ohwiicha endaalo ehumi nichibitireo.” 56Nae naabakobolamo ati, “Mutatuhiindya daawe, olwohuba Omwaami mweene niye obereese olukeendo luno ehabi. Lehe mbweeo mani ngobole eyiri omwaami waange.” 57Nabo nibakobolamo bati, “Leha hulaange omuhaana mweene mani huwulire sy'aboola.” 58Mani nibalaanga Rebbeka nibamuteeba bati, “Odaha ohuwaao neende omusaacha wuno, kose?” Nae yakobolamo ati, “Eee, njia ohuwaao nae.” 59Mani nibaseebula Rebbeka mboocho yaabwe, alala neende omwiihasa wae, neende omuhalaabani wa Abburahamu neende abasaacha ba yali nabo. 60Mani nibaberesa Rebbeka ehabi nibaboola bati, “Mwaana weefwe, chia mani wiibule abaana elifu neende elifu, haandi lehe abeechuhulu bae bayiingire ebiko by'abasuku baabwe byoosi!” 61Mani Rebbeka neende abeehasa bae nibasiingira, nibaniina hu ngamia, nibaloonda hu musaacha oyo. Mani omuhalaabani wa Abburahamu n'abukula Rebbeka nibawaao nae.

62Yisaka yali nawuuyire ohutula Bberilahairoi naamenyere Negebbu. 63Nae Yisaka yachia engoloobe mu mikuunda ohusaba. Yasiingisa emoni n'atingaala, mani bone, yabona engamia nichiicha. 64Nae Rebbeka niyabona Yisaka, yeeha hu ngamia yae 65mani yateeba omuhalaabani wa Abburahamu ati, “Omusaacha ong'alaala sa mu mikuunda niyeecha ohutubukaanira niye wiina?” Omuhalaabani oyo yamukobolamo ati, “Niye omwaami waange.” Mani Rebbeka yabukula esitaambaya yebwiiha mu moni. 66Omuhalaabani wa Abburahamu yaboolera Yisaka buli siindu si yali n'aholere. 67Mani Yisaka yengisa Rebbeka mu yeema li Saara ng'ina yali niyamenyaangamo. Rebbeka naaba omuhasi wae. Yisaka yadaha Rebbeka muno, olwohuba niye owamulemianga omwooyo, koti lu ng'ina yali niyamala ohufwa.

Currently Selected:

Ohuchaaka 24: SAMIA

Highlight

Copy