Make 9

1“To ko na macitangayan jinyo am o yameytatanek do jya tao am amyan jira so makapis pa so azwazway na ni Ama ta do to a meygegcin do karawan do ikamavyay da pa.”

Nimablis o keyteytawan na ni Yeso

(Matay 17:1-13; Locya 9:28-36)

2Mavitos o ikanem na araw am palolwen na ni Yeso si Pite a kani Yake a kani Yowani a mangay do makarang a tokon. Makarahan am todablis o keyteytawan na ni Yeso do tangain da. 3So mina to na lavangi a maniray so ayob. Abo tao a makataha so ayob na so kalavalavang. 4O tatlo a macinanao ji Yeso am to da rana cita si Idiya kani Moyse a tao no kakwa pa, a macisirsiring ji Yeso. 5Maniring si Pite ji Yeso am, “Mo Mangnanao, yata tey yapya do jya. Mamaring namen so atlo a ka sarwap an. Asa am imo a asa am si Moyse, asa am si Idiya.” 6Tey manyahey si Pite a kano kararay na. Am ori o ji da rana tenngi a meyzezyak. 7Makarahan am to ngyan so cinalab a macita da a ambengbeng do teyngato da. Meyratateng am to ngyan so ciring a meyzezyak. Maniring am, “Iya rana am ney kaglaw ko a Anak. Amizngen nyo o ciring na.” 8Makarahan am kalahen da do sirisiri da am abo macita da tao. Si Yeso o macita da macikaop jira.

9Omosok rana sira apo do tokon am maniring si Yeso jira am, “Do ji ko pa nimirwai a mavyay a Nipamnekan na tao ni Ama ta do to am ji nyo meycicicyan o yanyo nimacita a vazay do tokon ang.” 10Am ori o mina to da mangozai do ciring ni Yeso. Maniring sira do kadwan jira am, “Ikongo o peypeypangayan no kapirwa na mavyay.”

11Maniring pa sira ji Yeso am, “Ikongo pancyan da nya no mangnanao no iwawalam ni Ama ta do to a tao so kapanmanma na mai ni Idiya.” 12Maniring si Yeso am, “Manoyong kapanmanma ni Idiya a mapeyyalalap so nakem no makaoya tao. Am ji da raralayan no tao. Am ikongo na idket do Seysyo no keyyan no rako a alalaw na no Nipamnekan na ni Ama ta do to a tao a kapeymakaro da jya no tao. 13To ko na macitangayan jinyo am yarana nimai si Idiya. Am da to ngolala, akman so ciring do Seysyo a yana pakacirngen jya.”

Nivozwaw ni Yeso o komovot do kanakan a kalamsoyan ni Satan

(Matay 17:14-21; Locya 9:37-43a)

14Meysinaoli rana sira a macilovot do karwan da macinanao ji Yeso am macita da o aro a tao a omlimot sira. Am no kanang am macinekanekad sira o mangnanao no iwawalam ni Ama ta do to do macinanao ji Yeso. 15Macita da si Yeso no aro a tao am to da ngyakan. Am ori o nipalalayo da a mangay omrapong sya. 16Maniring si Yeso do macinanao jya am, “Ikongo o ciring a yanyo ipacinekad jira.” 17Amyan do aro a tao ang so asa ka tao. Maniring am, “Mo Mangnanao, yako nipalolo o anak ko a yamangay tomita jimo. Ta yana kovotan no kalamsoyan ni Satan. Am ori o yana ji makabnebneki. 18No yana kovotan no kalamsoyan ni Satan am yamalektek do teyrahem a yana kapeyotaotab no ngongoy na yameygazicigit so ngepen a yana kapanigzang no kataotao na. Ko nipanci o macinanao jimo a yamvozwaw sya am yada jyavozwaw.”

19Maniring si Yeso jira am, “Kamo manoyong pa yaji makanet so nakenakem ji Ama ta do to a tao sicyaikwaya. Akman rana so wanjin o kownownay ko a macikaop jinyo. Akman ko rana so wanjin a marilaw ninyo. Ayyan kamo do jya o kanakan.” 20Makarahan am yai da o kanakan. Macita na si Yeso no kalamsoyan ni Satan am mina to na panigzanga o kanakan a kapeykolikolingtad na do teyrahem a kapeyotaotab no ngongoy na. 21Maniring si Yeso do ama na am, “Yana rana mownay ya an?” Maniring o ama na am, “Nimakalapo ya no kalyalikey na. 22Masangib ya civtan so inawan no kalamsoyan ni Satan a payongben do apoy, hemesen do ranom. No si myan so vazay mo am ikarilaw mo pa yamen an. Sidongen mo pa yamen an.” 23Maniring si Yeso am, “No si manoyong kapeyhanhan mo ni Ama ta do to am abo sapan a vazay.” 24Meyratateng am amlololos o ama na. Maniring am, “Ko anoyngan am yapa ji makanet o onowned ko. So sidongan mo pa jyaken.”

25Macita ni Yeso o aro a tao a mangay omlimot sya am maniring do kalamsoyan ni Satan am, “Imo rana a na ikateleh a kalamsoyan ni Satan am yako imo sirsirngen a ji ka na meyyahahay a komaro do kataotao no kanakan. So ji mo na peyneynami so kapeysinaoli mo.” 26Meyratateng am amlololos o kalamsoyan ni Satan a kapanigzang na rana no kanakan do nipakowbot na no kalamsoyan ni Satan. Am ori o icyakma ney nimawakwak no kanakan. Maniring o aro a tao am, “Yarana nimawakwak!” 27Makarahan am pinanan na rana o lima na no kanakan a vangonen. Meyratateng am makatanek rana.

28Somdep si Yeso do vahay am pacicin da si Yeso no macinanao jya. Maniring sira am, “Ikongo namen ji makavozwawi so kalamsoyan ni Satan ang.” 29Maniring si Yeso am, “To nyo peykasa o onowned nyo a meynozi. Ta ori saon o makavozwaw so akman so sang a kalamsoyan ni Satan am.”

Ipirwa na pazimanen ni Yeso o kawakwak na

(Matay 17:22-23; Locya 9:43b-45)

30Karwan da rana do dang am meyhavas sira rana do Cyadidi, ta taywen na do tao o yanan na. 31Ta nanawen na pa sira o macinanao jya. Maniring jira am, “Itoro da o Nipamnekan na ni Ama ta do to a tao do macioya jya tao a kawakwak da sya. Si ikatlo na araw no niwakwak da sya am mirwa mavyay.” 32Am ji da tenngi no macinanao jya o peypeypangayan no ciring na. Am ji dadkeci si Yeso a pacicin.

Sino pakarakehen a tao

(Matay 18:1-5; Locya 9:46-48)

33Makaranes sira do Cyapaynong am somdep sira do asa ka vahay. Maniring si Yeso do macinanao jya am, “Ikongo nyo nikazyak do rarahan ang.” 34Abo jira tomovis jya, ta nikazyak da do rarahan o sino jira o pakarakehen da. 35Meyratateng am amlisna si Yeso karara na so rarwa so ikakarwan a macinanao jya mai do tangain na. Maniring jira am, “O amnakenakem so keyyan na do kakarangan na am masipanownowji ori a omilamnay so aro a tao an.” 36Makarahan am manara so kanakan kapatanek na sya do tangain da sapopowen na. Maniring jira am, 37“O tomaotao so kanakan eya no ngaran ko am yaken o taotawwen da. O tomaotao jyaken am beken a yakehen o taotawwen da, ta taotawwen da pa o yanimapahanhan jyaken a Tao do to.”

Amrahet sya kano somidong nya a tao

(Locya 9:49-50)

38Maniring si Yowani ji Yeso am, “Namen nimakacita mo Mangnanao, so yamamozwaw no ngaran mo so kalamsoyan ni Satan. Am ori o namen nyazan sya, ta iya rana am beken a kararay ta.” 39Maniring si Yeso am, “Ji nyo ngaza, ta abo o tao a mangozay do ngaran ko a mapeyvazay so mapeyzokab a vazay a kaoli na jyaken a avain. 40O ji mapasobna jyaten am macikabong jyaten. 41To ko na macitangayan jinyo am o manta ninyo so ranom a yopen nyo do kanoyong nyo jyaken am tey saray na ori ni Ama ta do to.”

Kalittan a meyraraten

(Matay 18:6-9; Locya 17:1-2)

42Maniring si Yeso am, “No myan so tao a tomirara so pakananaken da a tao a meyraraten a kapeymakaro na rana jyaken am apyapya rana o kapila jya mangay itbong do awa. 43No si lima mo o nipeyraraten mo am to ranangteba. Tana abo rana o asa ka lima a kapakasalap ji Ama ta do to am apyapya pa ori a kano meynanod so lima mangay do kararatan a matemtem no jyahesep a lila no apoy. 44[Do kararatan rana am amyan dang so aowed a jyawakwak a kano jyahesep a lila no apoy.] 45No si ai mo o nipeyraraten mo am to ranangteba. Tana abo o asa ka ai mo a kapakahap mo so to meyyonong a ikavyay no pahad mo am apyapya pa ori a kano meynanod so ai a mangay do kararatan. 46[Do kararatan rana am amyan dang so aowed a jyawakwak a kano jyahesep a lila no apoy.] 47No si asa ka mata mo o nipeyraraten mo am to rana ngoswa. Tana asa mata a kapakasalap do italamozong ni Ama ta do to am apyapya pa ori a kano meynanod so mata mangay do kararatan. 48Do kararatan rana am amyan dang so aowed a jyawakwak a kano jyahesep a lila no apoy.#9:48 Isayya 66:24.

49“O tao a makanakenakem so kapacilovot na do italamozong na ni Ama ta do to am amyan so masazi na alalaw a iskad na jya. 50O asin rana am tey yapya. Am no jyapait rana am ikongo pavowin do dang a kapait na. So inaran nyo so akman so asin a mapeypyapya so nakenakem no icyatatao nyo.”

Currently Selected:

Make 9: snt

Highlight

Copy