Make 8

Nibsoy na o kakapatan a ranaw (4000) a tao

(Matay 15:32-39)

1Ji meyyonownay am amyan pa so aro a tao a mangay do tangain ni Yeso. Meyratateng am abo rana o kanen da. Maniring si Yeso do macinanao jya am, 2“Ko ikabo no nakem sira o aro a tao. Ta yamakatlo rana araw sira a yanimacilovot jyaken am yabo rana o kanen da sicyaraw eya. 3No si to ko na novoya sira mangay am jyabo kajya lingowngawan jira makcin a. Ta yatatasa jira o yapo do yamarai a ili.”

4Maniring o macinanao jya am, “Do wanjin o mangay ta pangapan so kanen da ibsoy ta sira, do yabo panazangan do jya.” 5Maniring si Yeso jira am, “Yapira myanpaw o yamyan jinyo.” Maniring sira am, “Yapito a ka myanpaw.” 6Makarahan am ipanci na o aro a tao a amlisna kahap na rana so apito a myanpaw a isaray ji Ama ta do to a kakcikcil na rana sya itoro do macinanao jya a kavonong da rana sya do aro a tao. 7Amyan so ji makanateng a lilikta among. Akman sang ta isaray na ji Ama ta do to ni Yeso a kapanci na rana no macinanao jya amvonong sya do aro a tao. 8Abo jya nimabsoy a nikoman do aro a tao ang. O vilang da no nikoman a tao am kakapatan sira ranaw (4000). 9Peykakasahen da no macinanao ji Yeso o atda da am nipno da o apito a ka rako a yala. Makarahan am tovoin na rana sira ni Yeso a mangay rana do vahay da, 10a kapacyavang na rana do macinanao jya meypangay do meyngaran so Tamanota.

Kakzeben da no tao a macyagom do Vadisay o kapanita da so mapeyzokab a vazay

(Matay 12:38-39; 16:1-4; Locya 11:29-32)

11Amyan so tao a macyagom do Vadisay a nimangay ji Yeso a macinekad jya. Naknakmen da o keyleylamdam da sya. Am ori o pasonsonan da sya mapeyvazay so mapeyzokab a vazay. Ta yongkad na no kanoyong na apo ji Ama ta do to. 12Am ori o nikarahet na so aktokto. Maniring jira am, “Ikeykongo kamo a tao sicyaikwaya yakomakzeb so yamapeyzokab a vazay. To ko na macitangayan jinyo am abo o ipacita ko jinyo a mapeyzokab a vazay.” 13Makarahan am karwan na rana sira a kasakay na rana do vazangay a meypangay do katovangan no rako a meybebneng a ranom.

Ji da tenngi no macinanao jya o kapwan no oyowyat ni Yeso

(Matay 16:5-12)

14Nikahamangan da no macinanao ji Yeso o kapalolo da so kanen no kanang. So ikasa na myanpaw amyan do vazangay da. 15Maniring si Yeso jira am, “Azimanen nyo o akmey kosozi no odong a yamyan do tao a macyagom do Vadisay a kani Helote.”#8:15 O peypeypangayan no kosozi no odong am makatotoin a marahet a icicirawat da. 16Makarahan am ikazyak da. Maniring sira do kadwan jira am, “Ala na pakacirngen ori do yata kajya nimapalolwan so kanen eya.” 17To na rana tenngi ni Yeso o amyan do onowned da. Maniring jira am, “Ikongo nyo kazyakan no nyo kajya nimapalolwan so kanen. Manngwa, nyo jyazab? Nyo jyatenngi o na nikapwan no oyowyat ko? Kamo manoyong a yajyapatapatak a tao. 18Manoyong ta yamyan so mata nyo am kamo ji makacita. Yamyan so talinga nyo am kamo ji makamizing. Manngwa, nyo na todahamangi? 19No kakcikcil ko so alima ka myanpaw a nibsoy ko so kakaliman a ranaw (5000) a tao am apira ka yala o nikpeh nyo a atda da.” Maniring sira am, “Adwa o icyarwa na.” 20Maniring pa si Yeso am, “No kakcikcil ko so apito a ka myanpaw a ipakan so kakapatan a ranaw (4000) a tao am apira ka yala o nikpeh nyo a atda da.” Maniring sira am, “Apito a ka yala.” 21Makarahan am maniring si Yeso jira am, “No manoyong ori am manngwa, nyo pa jyatenngi o na nikapwan no oyowyat ko?”

Niwakwakan na o mavota tao do Peysayta ili

22Makaranes sira do Peysayta ili am amyan so tao a omalak so mavota tao a mangay do tangain ni Yeso a komakzeb sya minan jya no lima na. 23Makarahan am kalain na o mavota tao ni Yeso a mangay do siri no ili a kacipa na do mata na a kapaopta na so lima na jya. Maniring si Yeso jya am, “Manngwa, yamyan so mo macita an?” 24Citahen na am maniring am, “Ko makacita rana so tao. Am sira akmey kayo a yaomalam.” 25Makarahan am pinanan na ni Yeso o mata no tao am to rana makacita a kabo na rana no ji na pengpengkad a makakaday. 26Makarahan am tovoin na rana ni Yeso do vahay da kapanci na nya ji rana meysinaoli do ili ang.

Nipanci na ni Pite o ka Misayya ni Yeso

(Matay 16:13-20; Locya 9:18-21)

27Meypangay si Yeso a kano macinanao jya do Kaysadiya Veydipi a ili am pacicin na sira do rarahan o macinanao jya. Maniring jira am, “Sino kwan da yaken no tao.” 28Maniring sira am, “Yamyan so tao a yamanci nimo a nimanaktak a si Yowani. Yamyan so tao a yamanci nimo a Idiya. Yamyan so tao a yamanci nimo a panoyonoywan na so ciring ni Ama ta do to no kakwa pa.” 29Maniring pa si Yeso jira am, “Sino kwan nyo yaken.” Maniring si Pite am, “Misayya ka.” 30Makarahan am ipanci na jira o kaji da meycicicyan nya do tao so ka Misayya na.

Pazimanen na o kawakwak da sya

(Matay 16:21-28; Locya 9:22-27)

31Makarahan am papwen na rana o kananao na so macinanao jya ni Yeso do kakeykai na rana no alalaw na makaranes jya. Maniring jira am, “Mangay o kapakasazi ko so aro a alalaw ko a Nipamnekan na ni Ama ta do to a tao, do kataosya da jyaken no kamanrarakehan a kano panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a kawakwak da rana jyaken. Am no ikatlo na araw am mirwa ko a mavyay.” 32So ji na rana nitomayoi so akman sang a vazay a nipanci jira. Am ori o to na ranay ngalai sya ni Pite a pasyain jira a omza sya. 33Meyvazingowngaw si Yeso a tomita so macinanao jya am maniring ji Pite am, “Kazey mo Satan. O nakenakem mo am beken a nakenakem ni Ama ta do to, ta monganay do tao.”

34Makarahan am lovoten na rana ni Yeso o aro a tao a kano macinanao jya do tangain na. Maniring jira am, “No amyan so tao a omonot jyaken am to na pangawawan o kataotao na a somabway no jyojika na macihza jyaken. 35Ta o amnakenakem so kataotao na am maraherahet, ta mawakwak ori. Am o tao a to ngawaw pa no kataotao na a mahap so vazay ko a meylimwang no Mapasaray a Ciriciring na ni Ama ta do to am mahap na o to meyyonong a ikavyay no pahad na. 36Tana mahap no tao o peymeymasaodan do karawan a kaji na makahapan so to meyyonong a ikavyay no pahad na am ikongo peypeypangayan no nang! 37Ikongo ipalit na pa so to meyyonong a ikavyay no pahad na. 38O tao rana do karawan sicyaikwaya am yatey yaro rana o raraten da. No amyan so tao a macimanig nyaken a kano ciring ko am no meysinaoli ko a Nipamnekan na ni Ama ta do to a tao a macihza do azwazway ni Ama ta do to a kano aro a tinsi am abo nakenakem ko sya.

Currently Selected:

Make 8: snt

Highlight

Copy