Make 11

Azwazwain da si Yeso a meypangay do Yelosaleng

(Matay 21:1-11; Locya 19:28-40; Yowani 12:12-19)

1Masngen rana sira do Yelosaleng am mangay sira do tokon a meyngaran so Kanlan. O tokon rana am masngen ori do Peyvake a kado Potani a ili. Karahan am manovoy si Yeso so rarwa ka macinanao jya manma mangay. 2Maniring si Yeso jira am, “Angay kamo do ili. Si mangay kamo am amyan dang so asa ka baka ji pa nikaoranan no tao a makedked do dang. Si macita nyo am ovain nyo a kai nyo nya jya. 3No si amyan so tao a manci no, ‘Nyo kongwen ori.’ Si maniring kamo jya am, ‘Yamyan so na patakan nya no Panirsirngen. Cyaha, ta makeykai na paolin jimo.’ ” 4Makaranes sira am macita da do siri no rarahan o makedked a likta baka, kaovay da sya. 5Maniring sira o tao a meytatanek do dang am, “Ikongo nyo ovayan so likta baka ang.” 6Karahan am to da mangozai o ciring ni Yeso a itovis da jira. Am ori o nipyan da sira omovay sya. 7Meyratateng am yangay da ji Yeso o likta baka a kaparasay da so ayob da do baka, a kaoran na rana ni Yeso do baka. 8Aro o tao a tomeytay so ayob da do rarahan. Aro o nimanyangaw so yangaw no kayo a teytain da do rarahan. 9Maniring sira o macihza jya tao am, “Azwazwain ta si Ama ta do to. Inaoy si ipanlanlag ni Ama ta do to o na nitovoy a tao.#11:9 Anwanood 118:25-26. 10Inaoy si ipanlanlag na ni Ama ta do to o yamakaranes a meypanirsirngen a macipalit do ineynapo ta si Tawey. Inaoy si mangay ji Ama ta do to o azwazway na.”

11Makaranes si Yeso do Yelosaleng am mangay do rako a panaralayan a tomita so makakaday a amyan do dang. Ikongo do mahep rana, am ori o nikarwan da rana do dang ni Yeso a kano macinanao jya mangay do Potani.

Nipanircirngan ni Yeso o kayo a meyngaran so ovako

(Matay 21:18-22)

12Ikadwa na araw am karwan da na o Potani a kapeysinaoli da rana do Yelosaleng. Amyan sira do rarahan am makcin si Yeso. 13Macita na do anamen da angayan o meyngaran so ovako a kayo a mapka no voong na. Mangay do kayo a meykala so asi na am voong na o macita na. Ta beken pa vehavehan no ipalasi na. 14Maniring do kayo si Yeso am, “Ko imo sirsirngen am macipinda sicyaraw eya o kabo rana no tao a koman so asi mo.” So nikamimin da no macinanao jya nimakamizing so ciring na.

Nipangzan ni Yeso o rako a panaralayan

(Matay 21:12-17; Locya 19:45-48; Yowani 2:13-22)

15Makaranes sira do Yelosaleng am mangay si Yeso do rako a panaralayan a mapowbot so manazang no makakaday a apzapzatan da a kapasakeb na sya ibokbok so peypalipalitan da so nizpi a kavangan a kano lilisnan da no manazang no hato a tao. 16So ji na nimyai so tao do pantaw no rako a panaralayan a somdep no makakaday a warawara da ipanazang da do reryan no rako a panaralayan. 17Maniring jira si Yeso am, “O domket do Seysyo a ciring na ni Ama ta do to am, ‘O raralayan nyo nyaken a vahay am peyneynozyan ori no aro a tao.’#11:17 Isayya 56:7. Am nyo to peyvaliw a da peyvahayan no manakaw a tao.”#11:17 Yedimi 7:11.

18Mamizing da o ciring na no panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to am naknakmen da o kawakwak da si Yeso. Am ikanyahey da si Yeso, ta tey yaro o tao a omanod do ciring na. 19Maseyrem rana am karwan da o ili ang ni Yeso a kano macinanao jya.

Kapeyhanhan ni Ama ta do to

(Matay 21:20-22)

20Ikadwa na araw do apnezak am mangonong pa si Yeso a kano macinanao jya do rarahan ang. Karahan am macita da o ovako a kayo to rana hayo so voong a maoto. 21So pakanakman na ni Pite so mina vazay na ni Yeso do kayo ang. Maniring ji Yeso am, “Mo Mangnanao, cita pala o kayo a nipanircirngan mo a yarana todaoto.” 22Maniring jira si Yeso am, “To ko na macitangayan jinyo am no manoyong kamo a meyhanhan ni Ama ta do to am 23apya kapanci nyo no tokon a meylis a mangay do awa. No manoyong kamo a ji meykarwa so nakem ji Ama ta do to a omanoyong do ciring na am manoyong keyyan no akman sang a vazay nyo. 24Am ori o ko pancyan nya jinyo. No meynozi kamo a keyyan no amin nyo am anoyngan nyo o kapakahap nyo so sang. So ikabo no ji na norwan jinyo a amin nyo. 25No meytatanek kamo a meynozi am manmanma o kato nyongbowan so oyaoyyan nyo no maoya ninyo a tao. Ta ori o vonasan na ni Ama ta do to so raraten nyo. 26[No ji nyo peykabobwa o oyaoyyan nyo no icyatatao nyo am akman sang si Ama ta do to a ji vonas so raraten nyo.]”

Ikazyak da o nikapwan no oyowyat na ni Yeso

(Matay 21:23-27; Locya 20:1-8)

27Mirwa sira mangay do Yelosaleng. Omalam si Yeso do reryan no rako a panaralayan am mai sira o panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a kano panipanirsirngen da. 28Maniring sira ji Yeso am, “Asyo oyowyat mo a yamapeyvazay so aro a vazay ang. Sino o yanitomoro no oyowyat jimo a yamapeyvazay so aro a vazay ang.” 29Maniring si Yeso am, “Pacicin ko pala inyo no asa ka ciring. No si tovisan nyo yaken am ori o pancyan ko no na nikapwan no oyowyat ko a yamapeyvazay so aro a vazay. 30Pancyan kamo pala jyaken o yana nikapwan no oyowyat ni Yowani a nimanaktak so tao. Yapo ji Ama ta do to oyowyat ori an? No yapo do tao.” 31Karahan am meykalakalavaten rana sira. Maniring sira am, “Kongwen tamo ori a tovisan. No si ipanci ta o kapo na ji Ama ta do to am ji na panenesha yaten ni Yeso a ji nganoyong ji Yowani a. 32No si kwan ta o kapo na do tao am jyabo kaji da oyyan nyaten no aro a tao, do da kanoyong ji Yowani a panoyonoywan na so ciring ni Ama ta do to a.” 33Meyratateng am maniring sira ji Yeso am, “Namen jyatenngi.” Maniring si Yeso jira am, “No komwan am ji ko mancyan jinyo o na nikapwan no oyowyat ko a yamapeyvazay so aro a vazay.”

Currently Selected:

Make 11: snt

Highlight

Copy