Matay 5
5
Meykawao a nanao ni Yeso do tokon
(Locya 6:20-23)
1Macita ni Yeso o aro a tao a mangay jya am tomanang do tokon. Amlisna do dang am mangay sira o macinanao jya, 2kananao na sira. Maniring am,
3“O tao a omanoyong do kataotao da a ji makanet so nakenakem ji Ama ta do to am tey yapya sira. Ta macizanod sira do italamozong ni Ama ta do to.
4“O amlavi so onowned a tao am mangay o kasaray da, ta mangay na panadnaden o nakem da ni Ama ta do to.
5“O mapanalawbo so kataotao da tao am tey yapya sira. Ta mahap da o nipanci na pa ni Ama ta do to a yazaw na sira.
6“O manoyong a komakzeb so kahap da so vazay na ni Ama ta do to am tey yapya sira. Ta mahap da o amin da ji Ama ta do to.
7“O marilaw no icyatatao da am tey yapya sira. Ta akman sang si Ama ta do to a marilaw nira.
8“O ji meylimoteng so onowned a tao am tey yapya sira. Ta mangay kapakacita da si Ama ta do to no makwa.
9“O mapeyyalalap so nakem no meykaoya tao am tey yapya sira. Ta abneken na sira ni Ama ta do to a akma ney anak.
10“O mahap so vazay na ni Ama ta do to a tao a pakakasin da am tey yapya sira. Ta macikaop rana sira do italamozong ni Ama ta do to.
11“No monganay jyaken o ji da ninigan ninyo no tao a pakakasin a tamwaden no marahet a ciring am manoyong katey yapya nyo. 12Somaray kamo an. Ta yamyan do teyngato o makdeng a azaw nyo a ipasaray na jinyo ni Ama ta do to. Nimakalapo no kakwa o kakman da sang no panoyonoywan na so ciring ni Ama ta do to a nipakakasi da no tao.
Asin a kano zezngang
(Make 9:50; Locya 14:34-35)
13“Inyo rana am akma kamoy asin no tao do karawan. Am no si tomavang ori am ikongo pavowin a kapait na. So ikabo rana no angangayan na. So to rana walici nya zazasagan no tao.
14“Inyo rana am akma kamoy zezngang do karawan. Akman so vahay a nipatnek do tokon a abo so ji makacita sya tao. 15Abo o mapowzib so nipaciscisan na zampo. Ta to rana pacimalaga a izezak so tao do sahad no vahay. 16Akman kamo so zezak ang a peycitacittan da no tao. So inaran nyo si Ama ta do to a tey yapya. Ta no si macita da inyo no tao a tey yapiya so ahahapan sya am admadmain da rana si Ama ta do to.
Omagaz do iwawalam ni Moyse
17“Ji nyo mancyan yaken a yambalinas so iwawalam ni Moyse a kano nanao da no panoyonoywan na so ciring ni Ama ta do to. Ta yaken rana am yako patwawen o peypeypangayan na. 18To ko na macitangayan jinyo am tana todangay do kaidan no karawan am abo asa ka ciring ni Ama ta do to a mabalinas. 19No si amyan so tao a to nazibo no asa ka ciring do nivatvatkan a nanao ni Ama ta do to a kacirara na so tao a akman sya to nazibo nya am imaveveh na tao do italamozong na ni Ama ta do to. Am o tao a mahap so ciring na ni Ama ta do to a mapeyvazay sya a kacirara na so tao a mangozay jya am ney meynakem ori do italamozong na ni Ama ta do to. 20Am ori o ko pancyan ninyo a makowyowyat pa kano mangnanao no iwawalam ni Ama ta do to a tao a kano tao a macyagom do Vadisay a mapeyvazay so vazay na ni Ama ta do to. Ta ori saon o ipacikaop nyo do italamozong na ni Ama ta do to am.
Nanao na so meyoyaoya tao
21“Nimamizing nyo na o ciring da no kamanrarakehan no kakwa a manci no kaji mangapan so tao,#5:21 Soayci Ci 20:13. ta o mangap so tao am to rana angayan do pacicicyan o akman sang. 22Am ko ipanci jinyo am o macioya do akma ney kakteh do cinai am raraten na rana ori. Omavay so akma ney kakteh do cinai a abo so angangayan a tao am to rana angayan o akman sang a tao do pacicicyan. O mapasagsagpyan so akma ney kakteh do cinai am mangay do makotokotod a lila no apoy. 23No mapatanang ka so kingking mo ji Ama ta do to a kapakanakem mo so pacioyyan na jimo no akma moy kakteh do cinai am 24to mo pamtadan o kingking mo, ta manmanma pa o kangay mo mapalap so nakem mo a kano yamacioya jimo a kakteh mo a kapiya na rana no nakenakem nyo a kapatanang mo rana so kingking mo. 25No amyan so tao a amrahet so kangangay mo a mangay nimo do pacicicyan am ney yapya na o kato mo rana macisirsirngan jya mapeyyalap so nakem nyo, do ji nyo pa angai do pacicicyan. Ta no si mahahay ka pa am to na rana mancyan imo do mapacici a tao a katoro na nimo do meykalsong a alyowen do pamemtengan. 26To ko na macitangayan jimo am no si katorwan mo na o ahapen da jinyo a nizpi do kalasan mo am ori o ipakagag mo so kataotao mo.
Nanao so somagpyan so kataotao
27“Nimamizing nyo na o ciring da no kamanrarakehan no kakwa a manci no kaji mapasagpyanan so kataotao.#5:27 Soayci Ci 20:14. 28To ko na macitangayan jinyo am no makacita so mavakes a kasala no nakenakem am akmey to mangononong o nakenakem jya. 29No si asa ka mata mo o nipeyraraten mo am to mo rana ngoswa a iwalit. Ta apyapya pa o kabo no asa ka mata mo a mai jyaken a kano kataotao mo a mangay do kararatan. 30No wanan mo do lima mo o nipeyraraten mo am to mo ranangteba a iwalit. Ta apyapya pa o kabo no asa ka lima mo a mai jyaken a kano kataotao mo a mangay do kararatan.
Nanao so mapakaro so kadwan do vahay
(Matay 19:3-12; Make 10:2-12; Locya 16:18)
31“Nimamizing nyo na o ciring da no kamanrarakehan no kakwa a manci no, ‘O mapakaro so kadwan do vahay am meyvatvatek so itoro jya.’#5:31 Sen Ming Ci 24:1. 32Am to ko na macitangayan jinyo am no amyan so ji na nimapanadnaji jimo no mavakes mo am ori o ipakaro mo sya. Am no abo am marahet o kato mapakarwan so kadwan do vahay. Ta no si mirwa a macivahavahay o mavakes am akmey nipya na o mavakes a mapasagpyan so kataotao na. O mapazagpit rana so akman sang a mavakes a tao am raraten na ori.
Nanao so mapanma so ciring
33“Nimamizing nyo na o ciring da no kamanrarakehan no kakwa a manci no, ‘O nipanma ciring am ji ngalalasi. O nipanma ciring do tangain ni Ama ta do to am pangononongan a peyvazain.’ 34Am ko pa ipanci jinyo am ji nyo panmanma o ciring nyo. Taosya o kapacipeyyeyyan nyo so nakem a paingen nyo do teyngato, ta akma ney lilisnan ni Ama ta do to o teyngato. 35Taosya o kapacipeyyeyyan nyo so nakem do tana, ta akma ney zazasagan ni Ama ta do to o teyrahem. Taosya o kapacipeyyeyyan nyo so nakem do Yelosaleng, ta ili ori no maizay a Panirsirngen. 36Jya to macipeyyeyyan so nakem do oo nyo. Ta ji nyo amaog o asa ka avok nyo a mavaheng a kano malavang. 37No meyzezyak kamo am manoyong am manoyong. No malas am todalas. No tey yaro rana o ciring am yapwan na rana no raraten.
Nanao so mapatongtonggal do icyatatao
(Locya 6:29-30)
38“Nimamizing nyo na o ciring da no kamanrarakehan no kakwa a manci no, ‘No osowen da o mata mo am osowen mo o mata da. No podpoden da o ngepen mo am podpoden mo o ngepen da.’#5:38 Soayci Ci 21:24; Diwey Ci 24:20; Sen Ming Ci 19:21. 39Am ko pa ipanci jinyo am taosya o kapatonggal nyo do ji makazid jinyo. No amyan so tao a somiplang so wanan a posngi mo am to mo pa norwan o asa ka posngi mo a siplangen na. 40No myan so mangay nimo do pamemtengan a mahap so ayob mo am to mo na norwan o katapil no ayob mo jya. 41No amyan so tao amgacigat jimo a omapid do rara na ipangonong do maid a rarahan am marairai pa o apidan mo jya. 42No amyan so amin da jimo am to mo na norwan jya. No myan so vooden da jimo am itoro mo jya vooden na.
Nanao so meykavosoyan a tao
(Locya 6:27-28,32-36)
43“Nimamizing nyo na o ciring da no kamanrarakehan no kakwa a manci no, ‘Ikarilaw nyo sira o apapnan nyo#5:43 Diwey Ci 19:18. a kapacioya nyo do kavosoyan nyo.’ 44Am ko pa ipanci jinyo am ikarilaw nyo sira o macioya jinyo a tao a kapeynozi nyo no mapakakasi jinyo a tao. 45Ta ori o ipeyngongyod nyo a akma ney anak ni Ama ta do to. Ta yameyyangay sira o apya so nakenakem a tao a kano marahet so nakenakem a tao a na cirain ni Ama ta do to no araw. So na icyakman sang no cimoy a na itoro do apya so nakenakem a kano marahet so nakenakem a tao. 46No si marilaw ninyo a tao o ikarilaw nyo am ta azawan na jinyo ni Ama ta do to. Kakwakwan da no meyraraten a tao a makateneng do kapangarilaw da so marilaw nira. 47No si apapnan nyo o peyminaminasi nyo am ikongo peytarkan nyo a kano toda ka tao. Ji da tenngi o akman sang a peyvazain no ji manaralay a tao a. 48Inarahen nyo si Ama nyo do to a tey yapya so ahahapan sya.
Currently Selected:
Matay 5: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan