Matay 4
4
Niharag na ni Yeso o nimlita jya a Satan
(Make 1:12-13; Locya 4:1-13)
1Makarahan am ipeypalanginan no Seyzi si Yeso a yangay do kabwan no nihakawan no tao a littan ni Satan. 2Makasikapat (40) so araraw si Yeso a jya nikoman am maliliw na o kakcin na. 3Ori o nyangay ni Satan ji Yeso. Maniring jya am, “No ka manoyong a Anak no Tao do to am pancyan pala o aro a vato a kapeyvaliw na a myanpaw.” 4Tovisan ni Yeso am, “O ciring do Seysyo am,
‘Beken a kanehen o ikavyay no tao, ta makdekdeng pa o Ciriciring na ni Ama ta do to a ikavyay no tao.’ ”#4:4 Sen Ming Ci 8:3.
5Makarahan am yangay na pa ni Satan si Yeso do Yelosaleng a kangay na nya do toktok na no rako a panaralayan da. 6Maniring jya am, “No ka manoyong a Anak no Tao do to am okso pala do teyrahem ito. Ta o ciring do Seysyo am,
‘Manovoy o Tao do to so tinsi na a mangay omzat jimo. So tazapyan da jimo no lima da kaji na meyzazan no ai mo do vato.’ ”#4:6 Anwanood 91:11-12.
7Tovisan ni Yeso am, “O ciring do Seysyo am, ‘Ji nyo ngileylamdama o Panirsirngen nyo a Tao do to nyo.’ ”#4:7 Sen Ming Ci 6:16.
8Am ori o nitanggahan na ni Yeso ni Satan do makarang a tokon a kapacita na no peykamahamahatawan na kano aro a masamasaod no karawan. 9Maniring si Satan am, “No si meylilitod ka amraralay nyaken am to ko na mimina o makakaday a itoro jimo.” 10Tovisan ni Yeso am, “Angay rana mo Satan! Ta o ciring do Seysyo am,
‘Iraralay nyo o Panirsirngen a Tao do to nyo. So ika iya na no iraralay nyo. Ta abo o ikararwa na a iraralay nyo an.’ ”#4:10 Sen Ming Ci 6:13.
11Makarahan am karwan na rana si Yeso ni Satan a kai no aro a tinsi ni Ama ta do to a somidong sya.
Papwen ni Yeso o vazay na do Cyadidi
(Make 1:14-15; Locya 4:14-15)
12Mamizing na ni Yeso si Yowani a nipteng da do pamemtengan am meysinaoli do Cyadidi. 13Am ji rana meyvahay si Yeso do Nasale, ta nimangay rana a meyvahay do Cyapaynong. O ili rana ori am amyan ori do Sipolon a kado Navotadi a macisngen do rako a meybebneng a ranom a meyngaran so Cyadidi. 14O icyakman na sang am todey mangononong o ciring no panoyonoywan na so ciring ni Ama ta do to a meyngaran so Isayya. Ta maniring am,
15“O tao do Sipolon a kado Navotadi a macisngen do rako a meybebneng a ranom a kado meyngaran so Yotan a ayo a yanan da no beken a tao do Yotay do Cyadidi am
16o amyan do yakasarisaryan a manyahey no kawakwak da am macita da rana o na cirain ni Ama ta do to a mapatazadang sira.”#4:16 Isayya 9:1-2.
17Nimyapo no kanang o kapeylimwang na rana ni Yeso no nanao na. Maniring am, “Karwan nyo o peyraratenan nyo, ta yarana makeykai o yana katalamozong ninyo ni Ama ta do to.”
Rarahen ni Yeso o papat a mangahangahahap a tao
(Make 1:16-20; Locya 5:1-11)
18Mangonong si Yeso do pasalan no rako a meybebneng a ranom a ngaranan da Cyadidi am macita na o rarwa ka tao a mangahangahahap a ngaranan da si Pite a si Simong a kano kakteh na a meyngaran so Antele a amzoyo no tawaz da. 19Maniring si Yeso jira am, “Macilolo kamo jyaken, ta nanawen ko inyo. So icyakma nyoy mangahahap a tao a mapanop so tao.” 20Mamizing da am to da rana ngaroi o tawaz da a macilolo ji Yeso.
21Alikey pa o nyalaman na am macita na ni Yeso o anak na ni Sipitay a meyngaran so Yake a kano kakteh na si Yowani a kano ama da a si Sipitay a tomonod so nyayoma da tawaz do tatala da. Macita na sira ni Yeso am tawagan na sira. 22Nimakeykai sira komaro do tatala da kano ama da a macilolo rana ji Yeso.
Mangiwakwak so ingingnen a kapangnanao na ni Yeso
(Locya 6:17-19)
23Nilivolivon ni Yeso o peycyeylilyan na do Cyadidi a kapangnanao na so tao do peyneynozyan da do dang a meylimwang no italamozong na ni Ama ta do to a kapangiwakwak na so meykeyngeyngen a tao do dang. 24So nipeyyamyamizngan da na do ngaran na ni Yeso do Sidiya. Am ori o nyangayan da no meykeyngeyngen a tao a kano kovotan no kalamsoyan ni Satan a tao a kano mamezamezay a tao a kano ji makapeygonagonay a tao. Nimimin da o akman sang a tao yangay do tangain na. So niteyteyhesan na sira niwakwakan so kataotao. 25Aro tao a nimapo do Cyadidi a kado Meykasa ngarnan a ili a kado Yelosaleng a kado aro a ili do katovangan no Yotan a ayo a nimacilolo ji Yeso.
Currently Selected:
Matay 4: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan