Yowani 6

Nibsoy na ni Yeso o kakaliman na ranaw (5000) a tao

(Matay 14:13-21; Make 6:30-44; Locya 9:10-17)

1Karahan am meypangay si Yeso do katovangan na no rako a meybebneng a ranom a meyngaran so Cyadidi. O ikadwa no ngaran no nang am Tipilyo. 2Macita da no aro a tao si Yeso a nimangiwakwak so tao am onotan da. 3Mangay si Yeso a kano macinanao jya do tokon a mawalawalam do dang. 4No kanang am masngen rana o kapamaring da so kanen no tao do Yotay do Iyeci. 5Macita ni Yeso o aro a tao a mangay jya. Maniring ji Veydipo am, “Do wanjin pakasazangan ta so kanen no aro a tao ang a ipakan ta sira.” 6O peycirngan na sang am ileylamdam na si Veydipo. Ta katenngan ni Yeso rana o ahahapan na sya. 7Maniring si Veydipo am, “Tana meyvazay ko so kasisi no awan am ji pa makanet a ipanazang so ipakan so aro a tao ito.”#6:7 O ciriciring da no Sila am: adwa ranaw a ka dena. O nizpi da do kasaraw no meyvazay a tao am asa ka dena. 8Maniring o asa ka macinanao jya meyngaran so Antele a kakteh ni Simong Pite am, 9“Yamyan jya so asa ka kanakan a yanimeyotwan so yalima ka myanpaw a kano yadwa ka among. Am no si pongden do aro a tao am jyabo kaponged na jira.” 10Maniring jira si Yeso am, “Pancyan kamo sira amlisna.” Am katamtamkan o yanan da. Karahan am mamimin rana sira amlisna. O vilang da no mahakay am kakaliman a ranaw (5000) sira.#6:10 Ji da sira nipavilang o mavakes a kano kanakan. 11Hapen na ni Yeso o myanpaw a kasaray na nya ji Ama ta do to. Karahan am pongden da rana no macinanao jya do meykalyalipenpen a amlisna tao. Akman sang o among a nivonong da, kapakapya da rana koman. 12Mabsoy rana sira am maniring si Yeso do macinanao jya am, “Peykakasa kamo na o atda da. Ta ingbeywan.” 13Karahan am peykakasahen da na o atda da do alima ka myanpaw ang. Peysinsinmowen da o ji da nimimina am nipno da o adwa so ikarwa a yala. 14Macita da o mina vazay ni Yeso a yongkad no kayapo na ji Ama ta do to am maniring sira am, “Oya saon o da ipanci a yamai do teyrahem a panoyonoywan na so ciring ni Ama ta do to.”

15Katenngan na ni Yeso sira toda ji ngamaog sya a panirsirngen da. Am ori o nikaveyvow na nimangay do tokon a tomayo nira.

No kalam na do ranom si Yeso

(Matay 14:22-27; Make 6:45-52)

16Maseyrem rana am mangay sira o macinanao jya do rako a meybebneng a ranom, 17a kasakay da do tataloran a mangay do katovangan na ili a meyngaran so Cyapaynong. Mahep rana no kano nang am ji pa nimakaranes si Yeso jira. 18Makarahan am to na nangsangan. To rana maciralay o paopaong na. 19Amyan sira do karakwan no rako a meybebneng a ranom a mangaod o macinanao jya am macita da si Yeso a omalam do ranom a meypasngen jira. Macita da am manyahey sira. 20Maniring si Yeso jira am, “Ji kamo anyahey, ta yaken.” 21Karahan am masaray sira mapazagpit si Yeso do tataloran da. So ji da nimeyyahahai a makaranes do angayan da hevek.

Kalahen da si Yeso no aro a tao

22Ikadwa na araw am katenngan da no aro a tao si Yeso a jya nimacihza do macinanao jya. Ta nimacita da si Yeso a jya nimacikavang jira do tataloran no kakaod da sya no macinanao jya. Ta asa o tataloran a nimacita da do dang. 23Amyan so nimapo do Tipilyo a tataloran a manbong do masngen do nyahapan na ni Yeso so myanpaw a isaray ji Ama ta do to a nibsoyan na so aro a tao. 24Katenngan da no aro a tao o kabo ni Yeso a kano macinanao jya am mavang sira do tataloran a mangay do Cyapaynong a komala sya.

Akmey yopen a kano kanen si Yeso a yapwan no to meyyonong a ikavyay no pahad no tao

25Makala da si Yeso no aro a tao do katovangan no rako a meybebneng a ranom am maniring sira jya am, “Mo Mangnanao, no kango kai mo do jya.” 26Maniring si Yeso am, “To ko na macitangayan jinyo am o nyo kalan jyaken am beken a nyo kanimakacita so ko nipatwaw a yongkad do kanimapo ko ji Ama ta do to an. Ta nyo kakzeben o nyo kabsoy. 27Taosya o kaziknan nyo no ji mamayok a kanekanen. Ta apyapya pa o kaziknan nyo no kanen a yapwan no to meyyonong a ikavyay no pahad nyo. O kanen rana ori am yaken o yatomoro nya jinyo. Ta yaken a Nipamnekan na ni Ama ta do to a tao o tomoro no akman sang jinyo. Ta yarana amyan jyaken so oyowyat na ni Ama ta do to. Ori rana am yongkad na no yanitomovoy jyaken.”

28Maniring sira am, “Makongo namen a kanoyong namen a mahap so vazay na ni Ama ta do to.” 29Maniring si Yeso am, “O na kakzeben jinyo a vazay nyo ni Ama ta do to am anoyngan nyo yaken a nitovoy na ni Ama ta do to.” 30Maniring sira am, “No komwan am patwaw pala so yongkad mo a nimapo ji Ama ta do to. Ta ori o anoyngan namen jimo. 31Nikoman sira o ineynapo namen so mana do kabwan no nihakawan no tao. Akman so ciring do Seysyo. Ta maniring am, ‘Nimapakas so kanen a apo do teyngato a nyakan da.’ ”#6:31 Soayci Ci 16:4; Anwanood 78:24.

32Maniring si Yeso jira am, “To ko na macitangayan jinyo am jya nimapakas so kanen si Moyse, ta o apo do teyngato a kanen am si Ama ta do to o nitomoro nya. 33O kanen rana yana nipakas ni Ama ta do to a yapo do teyngato am yapwan no to meyyonong a ikavyay no pahad no tao do karawan.” 34Maniring sira am, “Mo kahakay, inaoy si masangib mo a itoro jyamen o akman sang a kanen.”

35Maniring si Yeso jira am, “Yaken rana am akma koy kanen a ikavyay no pahad nyo. O mai jyaken a tao am to meyyonong rana jyakcin. Omanoyong jyaken am to meyyonong a jyawaw. 36Nipanci ko na jinyo. Nimacita nyo na yaken am nyo ji nganoyngi yaken. 37O pasngenen na jyaken ni Ama a tao am anoyngan da yaken a onotan. O mai jyaken a tao am ji ko likoji sira. 38Ta yaken rana am ko apo do teyngato. So ko ji to mangozai do nakenakem ko. Ta ko pangozayan o nakenakem no yanitomovoy jyaken. 39O nakenakem no yanitomovoy jyaken am apzatan ko sira o nipamnekan na ni Ama ta do to a macikaop jyaken. Sira rana ori am avyain ko sira no marateng rana o araraw no kapeykapyapinpin na ni Ama ta do to so tao. 40Ta o nakenakem ni Ama am mahap da o to meyyonong a ikavyay no pahad da no makateneng jyaken a kano omanoyong jyaken a tao, a kapeyvangon ko pa sira no makaranes rana o araraw no kapeykapyapinpin na ni Ama ta do to so tao.”

41Ikazyak da si Yeso no tao do Yotay do kapeyciring na so kakma ney kanen a apo do teyngato. 42Maniring sira am, “Beken a oya o anak ni Yoseyvo asyo? Tamo katenngan o inyapwan na. Am ikongo na pancyan no na kapo do teyngato.” 43Maniring si Yeso am, “Ji nyo a zyakan. 44No beken a si Ama a nitomovoy jyaken o yatomirara so tao am abo tao a mai jyaken. O mai jyaken a tao am avyain ko sira no makaranes rana o araraw no kapeykapyapinpin na ni Ama ta do to so tao. 45O ciring da no panoyonoywan na so ciring ni Ama ta do to am, ‘Mamimin o tao a vavagan ni Ama ta do to.’#6:45 Isayya 54:13. Omamizing so nanao ni Ama a mapeyyan sya do onowned na am mamimin sira ori a mai jyaken. 46Am abo tao a nimakacita si Ama ta do to. O nimapo ji Ama ta do to am ori o nimakacita sya. 47To ko na macitangayan jinyo am omanoyong jyaken a tao am mahap da o to meyyonong a ikavyay no pahad da. 48Yaken am akma koy kanen a yapwan no to meyyonong a ikavyay no pahad nyo. 49Tana nikoman sira o ineynapo nyo so mana do kabwan no nihakawan no tao am nimawakwak sira. 50Am o apo do teyngato a kanen am no kanen no tao am mahap da o to meyyonong a ikavyay no pahad da. 51Yaken rana am akma koy kanen a apo do teyngato a yapwan no to meyyonong a ikavyay no pahad nyo. O koman so kanen eya a tao am mahap da o to meyyonong a ikavyay no pahad da do teyngato. O itoro ko do tao a kanen da am kataotao ko, ta yangay ko inyo no inawan. Ori rana am ipakahap no tao so to meyyonong a ikavyay no pahad da.”

52O ciring ni Yeso am nikazyak da no tao do Yotay. Maniring sira am, “Ikongo a kato na norwan no kataotao na jyaten a kanen ta.” 53Maniring si Yeso jira am, “To ko na macitangayan jinyo am no si ji nyo nganna o kataotao ko a ji ngyop so rala ko a Nipamnekan na ni Ama ta do to a tao am abo jinyo o to meyyonong a ikavyay no pahad nyo. 54O koman so kataotao ko a kano amyop so rala ko am amyan jira rana so to meyyonong a ikavyay no pahad da. No makaranes rana o araraw no kapeykapyapinpin na ni Ama ta do to so tao am peyvangonen ko sira. 55Ta o kataotao ko a kano rala ko am manoyong a kanen nyo am yopen nyo. 56O koman so kataotao ko a kano amyop so rala ko a tao am macikaop sira jyaken. So ikanoyong ko na macirapa do onowned da. 57Yamacikaop jyaken si Ama a yanitomovoy jyaken do teyrahem a yana yapwan no to meyyonong a ikavyay no pahad no tao. So icyakman da sang no koman so kataotao ko a macirapa jyaken so inawan. 58O ko ipanci a kanen a apo do teyngato am ji meyyangay a kano nyakan da no ineynapo nyo a mana. Ta nimawakwak sira a yanikoman so sang. Am o koman so kanen a apo do teyngato am mahap da o to meyyonong a ikavyay no pahad da.”

59O ciring rana ori am ciring ni Yeso no kapangnanao na do peyneynozyan do Cyapaynong.

Ciring na ni Yeso o yanan no to meyyonong a ikavyay no pahad

60Mamizing da ori no macinanao jya am maniring sira am, “Asyo nanao eya a yajyazab. Sino makateneng do dang.” 61Katenngan ni Yeso sira mazyak nya am maniring jira am, “Nyo ikarahet o ciring ang? 62Mangay kapeyzokab nyo nyaken si macita nyo yaken a Nipamnekan na ni Ama ta do to a tao a meysinaoli do teyngato. 63O yamanta no tao so to meyyonong a ikavyay no pahad na am Seyzi. So ikabo no oyowyat no tao a ipakahap sya. O ko ipanci jinyo a ciriciring am apo do Seyzi na ni Ama ta do to. Ori rana am ikavyay ori. 64Am yamyan jinyo so yaji manganoyong a tao.” O peycirngan na sang ni Yeso am nimeycicinda o kapakateneng na do ji manganoyong a tao a kano manazang nya a tao. 65Maniring am, “Ori o ko peycirngan so, ‘No beken a si Ama ta do to o yatomirara sira am abo tao a mai jyaken.’ ”

66Nimacipinda no kano nang o kapeymakaro da jya rana no aro a tao a ji rana nganop sya. 67Maniring do rarwa so ikakarwan a macinanao jya am, “Manngo kamo. Akman kamo sira ori a mangay rana an?” 68Maniring si Simong Pite am, “Mo Panirsirngen, imo saon na yanan no nanao no to meyyonong a ikavyay no pahad namen. Sino pa o pacilolwan namen. 69Namen anoyngan o yamo kanimapo ji Ama ta do to a ji meylimoteng so onowned.” 70Maniring si Yeso am, “Ko inyo nipamnekan a yararwa so ikakarwan am yamyan jinyo so yasa ka tao a yana italamozong ni Satan.” 71O ciring rana ori am pakacirngen na ni Yeso do tao do Isecyadi a anak ni Simong a meyngaran so Yota. Iya rana am ikararwa da so ikakarwan a omanam pa o kapanazang na ni Yeso.

Currently Selected:

Yowani 6: snt

Highlight

Copy