Yowani 5

Mangiwakwak si Yeso so meyngen do meybebneng a ranom

1Makanateng so araraw am macinao do pamarmarngan da so kanen no tao do Yotay o yangay na ni Yeso do Yelosaleng. 2Amyan do Yelosaleng so ngaranan da Pazezevngen no kagling. Am amyan do siri na so meybebneng a ranom. O ingaran da jya no Sipolay a tao am Peyseta. O livolivon no meybebneng a ranom am meykalima o tezantehed do dang. 3O tezantehed rana ori am meycyeyreyray sira dang o meykeyngeyngen a tao. Sira rana ori am amyan jira ang so mavota kano ji makakalam a kano ji makapeygonagonay a tao. [Sira rana ori am panalahen da o kapeygonagonay no ranom. 4Ta o tinsi ni Ama ta do to am mangay na gonagonain o ranom ang. Anoyngan da o kato na rana apyan no ingingnen no ney manma a somivoz do ranom ang.]

5Amyan dang so asa ka tao a nimeyngen so wao so ikasikapat (38) so awawan. 6Macita na ori ni Yeso a ji meyvangon am katenngan na o kownay na rana nimeyngen. Maniring jya am, “Kokay. Mo ikakza o kavonas rana no ingingnen mo an?” 7Maniring o meyngen a tao ori am, “Mo kahakay, no kapeygonagonay no ranom am yabo yamarilaw nyaken a yamapangay jyaken do ranom. Yako naknakmen o yako kagonagonay so peyvongvongwan ko a somivoz do ranom am yarana myan so tao a yanimanmanma pa ka nyaken a nisomivoz.” 8Maniring si Yeso jya am, “Tanek rana kahap mo na so atpil mo a omalam.” 9Makarahan am jya nimeyyahahay a mapya o tao ang, kahap na rana so atpil na omalam rana.

No kanang am nimacinao do araraw no ipeywalam no tao. 10Maniring sira o panipanirsirngen no tao do Yotay do nimapya rana tao ori am, “Sicyaraw eya am ipeywalam no tao. So ji mo ngapi so atpil mo.” 11Maniring am, “Yamaniring jyaken o tao a niomiwakwak jyaken am, ‘Ahap rana o atpil mo a kangay mo rana.’ ” 12Maniring sira am, “Sino o yanimanci nimo a yamahap so atpil a mangay rana.” 13Am ji na tenngi no nimapya rana a tao ang o niomiwakwak jya. Ta nikarwan na rana sira o aro a tao do dang ni Yeso. 14Mownay am masinmo ni Yeso o tao a nikeywakwakan rana do rako a panaralayan. Maniring jya am, “Yaka na manoyong a yapya rana. Ji mo na peyneynama o kapeyraraten mo. Ta arakorako pa o alalaw a mangay jimo.” 15Karahan am mangay rana o tao ori a manci nya do tao do Yotay o mina keywakwak na jya ni Yeso. 16Nimacipinda no kano nang o kapacioya da rana ji Yeso do kato na mangiwakwakan do ipeyweywalam no tao. 17Maniring si Yeso jira am, “Yato meyvazay si Ama. So ko to nginarai sya.” 18To da na mamneki no tao do Yotay o kawakwak da si Yeso do kapakamizing da so ciring na. Ta ji na ngahapa o icicirawat da, do kaji meyvazayan do ipeyweywalam no tao. Maciyoman pa o kapakamizing da so ciring na manci no kapeyyama na si Ama ta do to a mapakto so kataotao na ji Ama ta do to.

Oyowyat na ni Yeso a Anak na ni Ama ta do to

19Maniring pa jira si Yeso am, “To ko na macitangayan jinyo am no ko to mangozai o kataotao ko am abo mahap ko a vazay. Am ko na nimacita o vazay ni Ama. Am ori o ko to ngamooni sya peyvazain. O vazay ni Ama na am vazay no Anak na. 20Am yatey rako o aryarilaw na jyaken ni Ama. Yana mamimin o vazay na yana nipacita jyaken, mangay katoro na nya jyaken so arakorako pa vazay a isavasavak nyo. 21O vazay na ni Ama mapeyvangon so nimawakwak a tao am akman ko sang a to mangozay do nakenakem ko a omvyay so tao. 22Beken a si Ama o mapacici a mapeykapyapinpin so tao. Ta na nitoro rana jyaken o oyowyat a mapacici a mapeykapyapinpin so tao do karawan, 23mangay kazwazway da jyaken no tao do karawan. Akman sang si Ama a azwazwain da. Am o to nazibo nyaken a Anak na ni Ama am akman sang si Ama a da to nazibwan. 24To ko na macitangayan jinyo am omamizing so ciring ko a tao a omanoyong do yanitomovoy jyaken am mahap na o to meyyonong a ikavyay no pahad na. So ikanoyong na ji na meydednai no peyoyaoyyan na ni Ama ta do to. Ta nimaliklik na rana o apwa kawakwakan no pahad na.

25“To ko na macitangayan jinyo am oya rana o araraw na. So na rana ikanoyong a yarana nimakaranes no ipakamizing da so ciring ko no kabwan na pa no to meyyonong a ikavyay no pahad da a tao. Am o mahap so ciring ko o makahap so to meyyonong a ikavyay no pahad da. 26Si Ama ta do to o yapwan no to meyyonong a ikavyay no pahad no tao. So icyakman na sang no Anak na. 27Na nitoro jyaken ni Ama ta do to o oyowyat a yamapacici a mapeykapyapinpin so tao. Ta yaken rana am Nipamnekan na ni Ama ta do to a tao. 28Ji nyo ngyakan, ta no marateng rana o araraw am mamimin sira o nibobo a tao a makamizing so ciring ko, 29a kapeyvangon da do heseb da. O apya so mina vazay no kamavyay da pa am mavyay sira a kapacitovong da rana ji Ama ta do to do teyngato. O nimeyraraten no kamavyay da pa am peyvangonen ko sira kapanci ko no raraten da.

30“Abo angangayan ko ya no si to ko mangozai o nakenakem ko. Ko to mangozai o ciring na jyaken ni Ama ta do to a mapacici a mapeykapyapinpin so tao. So na ikanoyong no ko ahahapan sya. Ta ko ji mangozai o nakenakem ko do kataotao ko, do ko kahap so vazay no yanitomovoy jyaken. 31No si ipeylimwang ko o kataotao ko am ji makanet ori a ipanop so tao. 32Am na keyyan no yameylimwang nyaken. So ko pakatenngan do na kanoyong no ciring na yamacyanoyong jyaken. 33Nimanovoy kamo so tao a mangay ji Yowani. So nipakamizngan nyo so ciring na meylimwang no manoyong a ciring na jyaken. 34Ko ji ngakzeba o keyyan no tao a macyanoyong jyaken. O ko pakalavatan so mina vazay ni Yowani am ipakateneng nyo jyaken a kapakahap nyo rana so to meyyonong a ikavyay no pahad nyo. 35Kapalangayan no zampo si Yowani a amlila maniray. Am ji meyyonownay o sarayan nyo no zezak na. 36Am patwawen ko pala o makdekdeng pa vazay ko a kano mina ciring ni Yowani. O vazay rana ori am nitoro na jyaken ni Ama a pakavosen ko. O vazay rana ori am yongkad ko ori a nitovoy ni Ama. 37Na ipeylimwang yaken ni Ama a nitomovoy jyaken. Abo pa jinyo o nimakamizing so ciring na. Abo pa jinyo o nimakacita so moing na. 38O nyo ji mapeyyani so ciriciring na do onowned nyo am nyo ji nganoyngi o yana nitovoy a yasa ka tao. 39O nyo ipeyvilang a Seysyo am nyo naknakmen o nyo kapakahap do dang so to meyyonong a ikavyay no pahad nyo. Am na malavat no Seysyo am yaken. 40Am yatey masalit o onowned nyo a yaji nganoyong jyaken a yamanta ninyo so to meyyonong a ikavyay no pahad nyo.

41“Ko jyakzan o da kazwazway jyaken no tao. 42Ko katenngan o onowned nyo a yajyakza ni Ama ta do to. 43O ko nyai do teyrahem eya am nakenakem na ni Ama. Am nyo ji ngonoci yaken. Am o yamacitarek a tao a yamangozay do ngaran da am nyo onotan. 44Nyo ikeykakza pa o da kazwazway jinyo no kadwan jinyo. Nyo jyakzan o azwazway a yapo ji Ama ta do to. Ori o yanyo ji nganoyngi jyaken. 45Ji nyo mancyan o ka yaken no mapatwaw so raraten nyo do tangain ni Ama ta do to. Ta o iwawalam ni Moyse yanyo pangozayan am ori o yamapatwaw so raraten nyo. 46No si anoyngan nyo si Moyse am akman kamo sang a omanoyong jyaken. Ta o ciriciring na yadomket do Seysyo am yaken na paingan sya. 47No nyo ji nganoyngi o ciriciring na ni Moyse a yadomket do Seysyo am makongo kamo a omanoyong jyaken.”

Currently Selected:

Yowani 5: snt

Highlight

Copy