maluko 8

poa yoseʉ to iesu 'o mo posisospotʉ ci cou

(matai 15:32-39)

1o'amo noana'o, mo yu'e'pʉ'pʉyʉ 'omo h'unasi cimo botngonʉ. uk'a na ci ihe maka ana; isi eyoho'a to iesu 'o tesi, mi'usni ho yainca: 2<os'o na'na ta'kuv'eni 'emo botngonʉ ci cou; maica micu miteuhi homo no'upu a'o, uk'ana ci ihe maka ana. 3hoci'u poa sieo ho popeomaine'ea, tena e'puyu ne ceonʉ, maica panomo i'mi ne covhi ho uhtan'e.>

4ihe tuocosi to tesisi: <yonta mo maica hia no'caciku ci hpʉhpʉngʉ, ma temza'so uhnenu ho biebimi nontehe omsoa tamo maica ci hia botngonʉ ci cou?>

5isi tuocosi to iesu: <mo piyo na pangmu?>

ihe yut'inga: <mo pitu.>

6isicu cucufni to iesu 'o botngonʉ ho poa yusuhngua to ceoa, cu yaa 'omo pitu ci pang, to'aveoveoyʉ to hamo, tipcia, faeni to tesi, 'o tesi ihecu aangaeza tomo botngonʉ. 7panton'a piyo ci 'o'oko no yoskʉhe; yaa to iesu ho to'aveoveoyʉ, cucufni 'o tesi ho yaeza aangaeza tomo botngonʉ. 8-9mo acʉhʉ bonʉ, a'vinano ooyoseʉ; 'omo bonʉ mo asonʉ posisospotʉ. ihe a'pʉ'pʉya to tesi 'o 'pu'pucu no ong'ongacvʉ, teongcʉngci 'omo pitu ci skayʉ. isicu poa apeaski to iesu 'o botngonʉ, 10micu osni nʉthʉ 'o tesi ho yonto 'apangʉ ho emo'usnu to mia'usnu ne tamanuta.

m'eya baito no po'e 'o coufalisai

(matai 16:1-4)

11piyo ci coufalisai mo esmi ho baito to iesu, yupa toohcʉvho 'o iesu. ihe 'ucia akuzkuzoa 'o iesu, mo m'eya pa'ti no peispopo'e to iesu, soomei 'o isi hioa na hia mio i'mi to hamo. 12mo emsʉ'eonʉ e'ʉyʉ 'o iesu, yainca: <'e cou maitan'e mo mainci mici baito no po'e? te'o a'ʉmta eʉsvʉta muu, 'e cou maitan'e o'amo 'aseolʉ hoci baito no po'e!>

13cu mongoi 'o iesu, i'vaho yonto 'apangʉ ho ohpihi uhto apihana to etʉpʉ.

smoof'o to coufalisai ho ito helote

(matai 16:5-12)

14mo ta'payo'ʉ e'suvco no pang 'o tesi, moc'o coni 'o pang to 'apangʉ, uk'anaci mocmo ci 'oanʉ. 15isi etngoeva to iesu 'o tesi: <la bumemealʉ, la etngoeva 'o smoof'o to coufalisai ho i'o smoof'o to helote.>

16micu yupa euc'oc'ou 'o tesi: <homo maica co e'esi mionana maica ho o'a mito mahafo no pang.>

17isi cohivi to iesu cuma na ihe ta'to'tohʉngva, cu tuocosi 'o tesi: <mainci imu toʉsvʉsvʉtneni na uk'a ci pang? o'amocu imueno ta'hongi, ho cohivi? mion'a maica na hia ma'nonoonhʉngʉ ta fnguumu? 18mimun'asi yaa mcoo ho o'te honga? yaa koyu ho o'te tmalʉ? o'a imueno talʉa 19ne o'u tipcipcia 'omo eimo ci pang ho p'aeni tomo posiyoemohʉ ci cou? 'o ohmu teongcʉngci to oho ongacvi ci 'pu'pucu moso piyo no skayʉ?>

ihe yut'inga: <mo maskʉ ueso no skayʉ.>

20ivaha tuocosi to iesu: <ne o'u tipcipcia 'omo pitu ci pang ho p'aeni tomo posisospotʉ ci cou, 'o ohmu teongcʉngci to oho ongacvi ci 'pu'pucu moso piyo no skayʉ?>

ihe yut'inga: <pitu no skayʉ.>

21isicueno tuocosi to iesu 'o tesi: <o'amocu imueno h'unasa ta'hongi?>

aotothoma 'o bʉkngʉ ne posaita

22nemo esmi ne posaita, panto cou cimo yaakako to cihi ci bʉkngʉ ho uhto iesu, m'eya peuasa to iesu. 23isi eyakaka to iesu 'o bʉkngʉ, e'eafi to yafana to you, aueva teʉpsi 'o mcoosi, isicu hoe'oci 'o feangosi, tuocosi: <miko bohngʉ no macucuma?>

24micu mʉengʉcʉ ho mahtʉ'vosʉ, mainca: <mi'o teolʉ ta cou, mais'a macoconi ci evi ho biyavovei.>

25isi ivaha siya to mcoosi to iesu 'o emucu. mo smo'eʉlʉlʉ 'o bʉkngʉ, cu yuovei bohngʉ, acʉhacu husansana 'e mo macoconi ci macucuma. 26isicu poa maine'e to iesu, isin'a eutotaveiya ho yainca: <'otena i'vaho yʉmeʉmʉ ta you.>

ehohonga to petelo 'o iesu zou kilisto

(matai 16:13-20; luka 9:18-21)

27'o iesu ho i'o tesisi mo emo'usnu to mayoyou to cum'usi ne kaisalia fuilipi. nemo pcaceoni, tuocosi to iesu 'o tesi: <lahe ta'una no siya ta cou a'o?>

28ihe yut'inga: <pantola mainca zou letoonono yohane; panto la mainca zou 'iliya; panto la maezo mainca zou cihi to 'ayumona to eyongensa.>

29isi ivaha tuocosi to iesu: <na muu. lamu yainca siya a'o?>

yut'inga to petelo: <zou kilisto suu.>

30isicu cucufni to iesu 'o tesi. atatalʉa teav'a eʉsvʉta no mocmo ci cou na a'ʉmtʉsi ongko.

eyoca to iesu tena 'atutumzo ho mcoi

(matai 16:21-28; luka 9:22-27)

31isicu ahoza po'pa'cohivi to iesu 'o tesi ho yainca: <'e oko cou te ahtuo'te esmi to man'i ci 'atutumzo, tehe hose'veni to coolo, saisicoo, ho ito lema'cohio seiso, noa opcoza. ataveisi no miteuhi tena smoevovei.> 32isi esansana 'e a'a'ausna eni. isi ese'vi to petelo 'o iesu, tesi potani 'o iesu. 33mo miezuhu 'o iesu, mi'mi'usni 'o tesi, koica 'o petelo ho yainca: <satan, smase'u! 'e osko ta'to'tohʉngva o'as'a 'to'tohʉngʉ to hamo, ma hia ma'to'tohʉngʉ ta cou.>

34isicu eteuyuna to iesu 'o botngonʉ ho i'o tesi, eʉsvʉta: <hoci panonte to'ofeihni a'o ci cou, te ciha 'e iachi, ngoevi na zuuzikasi ho to'ofeihni a'o. 35maica i'ola 'ucia iachia tʉyʉcʉ na nsou, te apuya payo'a na nsou; i'omo nomio a'o ho ita fukuin ho payo'a na nsou, te apuyu elʉ no nsou. 36'emo cihi ci cou 'upenaeno hocisi peelʉi acʉcʉha tanua 'e hpʉhpʉngʉ, ho peʉezeni na iachisi nsou, cuma na koa ʉmnʉsi? ma uk'a! 37te mayo no cuma ho peʉezeni na iachi nsou? 38yonta mo maica hia smoc'ou ho kokuzo ci hpʉhpʉngʉ, hoci pano cou cinte h'oinveni a'o ho i'e la'u hia mo'ma'cohio, 'e okocou ho tenac'u yono psoevohngʉ to amosi. nʉthʉ 'o tensi ho cmʉ'ho, tasi yaeza h'oinveni 'e cou eni.>

Currently Selected:

maluko 8: bsnfe

Highlight

Copy