maluko 3

poa yov'o 'omo yu'oemi'mi 'o emucusi ci cou

(matai 12:9-14; luka 6:6-11)

1mo ivaho yʉmeʉmʉ to kaitoo 'o iesu; to ic'o panto cihi ci cou, mo yu'oemi'mi 'omo coni to emucusi. 2pantomo notfʉngʉ buhfafeoyʉ, aiti 'o iesu teenana aotothomʉ no tma'congo homo 'ansokunici, te ko'ko peelʉi ehpʉngneni 'o iesu. 3isi mi'usni to iesu 'omo yu'oemi'mi 'o emucusi ci cou ho yainca: <yac'ʉ ta tuhcu tan'e>, 4isicu tuocosi 'o botngonʉ: <e'usna no 'ansokunici, mio mainenu na hia esvʉtʉ to hoolicuto? peis'ʉ'ʉmnʉ hocieno peiskuzkuzo? to'usnu no nsou hocieno akuzkuzo no nsou?>

mo acʉhʉ o'te ya'ei. 5mo teosʉsʉ'no 'o iesu ho miukukuyungu, 'o 'tohʉngʉsi mo nomio tamo maica ci cou ho nac'o, maica mo tmukʉhtosʉ 'o 'tohʉngʉhe. isicu mi'usni 'omo tma'congo ci cou ho yainca: <hoʉsʉzneni si emucu!> ne isicu hoʉsʉzneni, micu yuovei ʉmnʉ 'o emucusi. 6ne micu yuyafo to kaitoo 'omo piyo ci coufalisai cu osni yu'tasvʉtʉ 'o helotetoo, toʉsvʉsvʉtʉ te yainenu nate hia mi'usni 'o iesu ho opcoza.

noaskiti to etʉpʉ ci botngonʉ

7mo mongoi to ic'o 'o iesu ho i'o tesisi ho uhto aaskiti to etʉpʉ ne ngalilaya, botngonʉ ci cou 'omo to'ofeihni. 'emo botngonʉ ci cou mo i'mi ne ngalilaya, yutaya, 8'elusalemu, 'itomai, apihana ne yolutan ho ine tailo ho i'omo cum'u ne saitong ci mahohosa ho esmi. homo biebimi to iesu 'emo botngonʉ ci cou. mo maica ho ihe tac'ʉhi na ohsi hioa ci acʉcʉhʉ ci hi'hioa to iesu. 9cu angu botngonʉ 'o cou, isi cucufni to iesu 'o tesi ho ayocneni note conci okono 'apangʉ, ci tehes'a skotva'oya tamo botngonʉ ci cou. 10maica ho isi'so poa yov'o 'omo botngonʉ cimo tma'congo, mo acʉhʉ yu'e'usnu 'omo afu'u tma'congo ci cou, te meuaso to iesu. 11ne ihe aiti to isi ti'eopi no h'aokuv'o ci cou, cu m'ocnguyu to tuhcu to iesu, moozoyʉ ho mainca: <zou oko to hamo suu!>

12isi eyʉyʉci to iesu ho eutotaveiya o'te poa eʉsvʉtneni zou siya 'e iachi.

epei to maskʉ ueso ci sitoo 'o iesu

(matai 10:1-4; luka 6:12-16)

13mo bohsifou to conci hcuyu 'o iesu, isi eteuyuna to tuhcusi 'o tasi akoeva no titha ci cou. cu acʉhʉ cmʉ'ho, 14mo maskʉ ueso ci cou 'o isi epeiya to iesu, poa sitoo 'o toh'ausnahe, isi mi'usni ho yainca: <ho os'o epeiya muu, temu asngʉcʉ no'upu a'o, yaeza popeoskuna muu poa yuyafo ho psoyaski ta e'e; 15temu yaa tonʉ no meobango no hicu.>

16'o isi epeiya to iesu ci mo maskʉ ueso ci cou zou: saimong (isi ivaha tos'ongki to iesu ho poa petelo), 17oko to sipitai ci yakovu ho i'o ohaesasi ci yohane (isi ivaha tos'ongki to iesu ho poa panniki, 'o e'ausnasi zou <mais'a moi'hocʉ na yu'ausnasi ci cou>), 18'antole, fuili, patolomai, matai, tomas, oko to 'alofui ci yakovu, taathai, saimong to nesintoo, 19ho i'o moso atavei himhohioa ho phieni 'o iesu ci yuta ci coukaleo.

iesu ho i'o pesipu

(matai 12:22-32; luka 11:14-23; luka 12:10)

20nemo maine'e to emoo 'o iesu; mio ivaho botngonʉ 'omo yu'ec'ʉc'ʉ ci cou, ac'ʉhʉ no o'te makon'a tiv'ov'ohʉ bonʉ 'o iesu ho i'o tesisi. 21ihe cohivi to cono emoo to iesu 'emo maica ci a'a'ausna, yuyafo ho 'ucia potani 'o iesu, maica panto mo mainca: <mitacu eʉngcʉ!>

22piyo cimo i'mi ne 'elusalemu ci lema'cohio seiso ihe yainca: <ma isi ti'eopi no pesipu na taini! mita noe'ocʉ no honte no hicu ho meyobango no hicu!>

23isi e'usna to tuhcusi to iesu 'emo maica ci cou, boemi to epo'usa ho yainca: <teeno peelʉi peobanga no satan na satan? 24'emo cono hpʉhpʉngʉ hoci youbobai, o'ate ahtu biv'ohʉ 'e hpʉhpʉngʉ eni. 25'emo cono emoo hoci youbobai, 'e emoo eni 'ate ahtuo'te auz'oz'o. 26maicac'o ci hia baito, hoci iachi youbobai na hpʉhpʉngʉ no satan, o'anate biv'ohʉ, ahtu o'te aapapayo'ʉ na ataveisi.

27<uk'a ci te meelʉ yʉmeʉmʉ no emoo no maotano, ho ti'eingi no yupasʉsi; tesi ahtao'te auevan'a seo'eisi 'e maotano niantesicu peelʉi tahteop'ʉca na macucuma ta emoosi.

28<te'oeno a'ʉmta eʉsvʉta muu, inala afu'a hioa ci kuisi ta cou ho inala boevovoyo ci e'e teen'a peelʉi peteongasa; 29at'inghi i'ola boevovoyo to seilei ci cou, 'auesiesi o'a te ahta peelʉi peteongasa. maica i'e isi meamzi zou 'auesiesi ci kuisi.> ( 30ho isi e'e to iesu eni mo maica panto mo mainca ci cou: <isi ti'eopi no h'aokuv'o 'e feangosi.>)

ino to iesu ho nat'ohaesasi

(matai 12:46-50; luka 8:19-21)

31ne mio, mo cmʉ'ho 'o ino ho i'o nanat'ot'ohaesa to iesu; mo yac'ʉ to yafana ho psoemi to mocmo ho eʉsvʉta to iesu, yainca ihe 'ucia aiti 'o iesu. 32botngonʉ 'omo suukukuyungu to isi yoni to iesu ci cou; ihe evaha ho yainca: <'oe, mo yac'ʉ ta yafana 'o inosu ho i'o nat'ohaesasu, te biebimi suu!>

33yainca to iesu: <siya na ino'u? siya na nat'ohaesa'u?> 34isi mikuyungvi 'emo noukukuyungu ci cou, yainca: <temu aiti, 'emo maica ci cou 'aeno ino'u, nat'ohaesa'u! 35namo afu'u mee'ofeihni no 'tohʉngʉ to amo'u pepe. 'acueno nat'ohaesa'u, ho ino'u.>

Currently Selected:

maluko 3: bsnfe

Highlight

Copy