maluko 12

epo'usa no kokuzo ci leyaezoi

(matai 21:33-46; luka 20:9-19)

1mo ivaho boemi to epo'uso 'o iesu ho po'pa'cohivi 'o botngonʉ. isi yainca: <panto mo cihi ci cou mo mo'to'ʉ ho mooyai aamcuyu, mooyai yʉ'pʉ ho ekuyungvi 'o aukukuyungusi, meifeongo to taicosi ho mooyai 'oyona smaspʉcʉ emi, m'eac'ʉ to tataka no maivhongʉ, ataveisi isicu poa yuevahneni to leyaezoi, iachi yuyafo ho covnʉ. 2cu hotov'oha to amcuyu, isi skuna 'o soskuskunu ho uhto leyaezoi ho p'enia na ntesi tanua. 3'o leyaezoi isi tiubcikza 'o soskuskunusi, ti'usna ho poa psasayae maine'e. 4'o tauke to ezoyʉ isi ivaha skuna 'omo cihi ci soskuskunu; ihe etokʉa 'o fnguusi, a'vinano aokoe'iya. 5isi ivaha skuna to tauke 'omo cihi ci soskuskunu, ihecu opcoza. totiski ci ti'a'ausna 'omo 'enepio ci cou, panto ihe tutva, panto ihe opcoza. 6'o tauke i'ocuc'o 'o isi songohza ci oko 'o mon'a nongaco. ataveia skuna ho poa uhto leyaezoi, yainca no koyusi: <<'atehe ahtao'te einva 'e oko'u.>> 7at'inghi 'o leyaezoi micu yu'tasvʉtʉ ho yainca: <<'e cou eni tenala tiuski to tauke, mateto opcoza, 'atatocueno tanua 'e ezoezoyʉsi!>> 8ihecu tʉtpʉta 'o oko hocu opcoza. toyafneni to aamcuyu 'o nia feangosi.>

9isicu tuocosi to iesu: <maicac'o, tena peis'u'uvnu 'e tauke? 'atesi ahtao'te usa ho potpapayo'a 'e leyaezoi, yoezuhneni no mocmo 'e aamcuyusi. 10o'a ohmulaeno ahta engha 'e seiso eni?

'o nia caciha ci fatu tola lemooyai emoo.

isicu teyai atuhcu totnguca.

11zou peipeis'ausna to nooe'oca na eni,

hoteto aiti ta mcooto a'ʉmtas'a taunona'vʉ!>

12maica ihe cohivi to masoso'ehti to yutaya 'e isi engha to iesu ci epo'usa isi mituhci ho koica, ihecu 'ucia tʉtpʉta 'o iesu. at'inghi ihe smoyoa 'o botngonʉ, moezʉcu mongoi to iesu.

e'usnu no faeni to kaisa na tmuhnoa

(matai 22:15-22; luka 20:19-26)

13piyo ci cou falisai ho i'o 'oahngʉ to helotetoo mo noa skuna ho baito to iesu, akoeva no i'mi to e'esi ho tipunkua no akuzkuzoa. 14ihe mi'usni 'o iesu ho yainca: <sensei, imza cohivi lako 'o'emzo ci cou; o'alako yumzi nala ta'to'tohʉngva ta cou, yaeza o'alako buhmi no sapci ta cou, conino meot'ʉcʉ ho po'pa'cohivneni na e'e to hamo. tekon'a eʉsvʉta a'mi, hoci mofi no tmuhnoa to kaisa ci honte ne looma teenana yʉhcʉvho to hoolicuto? tetonana 'ahʉyʉ tuyafo?>

15isi so'eʉh'ʉta to iesu 'o kuicihe koyu, cu yainca: <mainci imu aac'o 'ucia akuzkuzoa a'o? mayo nomo coni ci peisu te'o aiti!>

16ihe fii tomo coni ci peisu, tuocosi to iesu: <zou hu'ongka ho ongko no siya 'emo yonta peisu?> ihe yut'inga: <'a ongko to kaisa.>

17yainca to iesu: <'ateno faeni to kaisa na macucuma to kaisa, faeni to hamo na macucuma to hamo.>

ihe talʉi 'e e'esi, a'ʉmta na'na yamceni.

e'usnu no smoevovei

(matai 22:23-33; luka 20:27-40)

18piyo cimo o'te tmaa'uzo no smoevovei ci cousatukai mo baito to iesu. 19ihe yainca: <sensei, isi p'eac'eni to hoolicu to moose a'to: <<hoci mcoi 'emo cihi, nʉ'vi na vcongʉsi, uk'a oko, 'o ohaesasi tesi ahtao'te pecngiha 'e ahngʉsi ho seotaveineni 'o ohaevasi.>> 20mosola yaa pitu ci nanat'ot'ohaesa: mevcongʉ 'o ohaeva, uk'a ci okosi, cu mcoi; 21pecngiha to ohaesasi, maezo mcoi, uk'a ci okosi; mioc'o totiski 'o ivahosi ohaesa ho pecngiha. 22'omo pitu ci nanat'ot'ohaesa mosola acʉhʉ himhovcongʉ to mamespingi, acʉhʉ uk'a oko, hocu mcoi. atavei cu maezo mcoi 'o mamespingi ic'o. 23maicac'o, no hiesi no smoevovei, tena acʉhʉ i'mi no mcoi ho smoevovei, zou siya na tena himhovcongʉ ta mamespingi tan'e? maica 'emo pitu ci nanat'ot'ohaesa mosola acʉhʉ himhovcongʉ ta mamespingi.>

24isi yut'inga to iesu: <o'a mimu emio, mo mainenu? maica o'a imu asansana 'o seiso, yaeza o'a imu cohivi na tonʉ to hamo. 25ho tena i'mi no mcoi ho smoevovei 'e cou, ho tenac'u smoevovei te totiski to tensi ne pepe, o'anate yupa totovcongʉ. 26e'usna no a'a'ausna no smoevovei na micu mcoi ci cou, o'a ohmula eno ahta engha 'o tposʉ to moose ci isi tposi 'o ehohamva no yunzou ci cʉcʉmʉ? ohsi mi'usni to hamo 'o moose ho yainca: <<na a'o. zou hamo to 'avulahamu, hamo to 'isaku, hamo to yakovu.>> 27na e'ausnasi isi yainca, zou hamo tamo yaansou ci cou 'o hamo, o'as'a hamo no micu mcoi ci cou, mimu asansano ma'peu!>

someoisa ci h'oesvʉta

(matai 22:34-40; luka 10:25-28)

28panto cihi ci lema'cohio seiso isi talʉi 'o hiahe yupa eebkocʉ, isi na'na ta'ʉ'ʉmnʉi 'o iesu ho isi yut'inga 'o cousatukai, cu smacmu'u to iesu ho tuocosʉ tomo conci hioa: <to 'ayumona to h'oesvʉta. zou nenu na so'atva'esisi?>

29yut'inga to iesu: <ahoisi: <<'isolaelu, teko tmalʉ! 'o nooe'oca - 'o hamoto moc'o cihi. 30tekola acʉcʉha na 'tohʉngʉ, yu'ausna, koyu, tonʉ ho himngonghi to nooe'oca - to hamosu.>> 31'emo toueso: <<tekola ngohia na ehuehungusu, mais'a hola ngohza 'e iachi.>> uk'a ci mocmo ci esvʉta cinte meoisihe tan'e.>

32'o lema'cohio seiso isi mi'usni 'o iesu ho yainca: <sensei, mio emzo co e'esu! aʉlʉ maita e'esu, moc'o cihi 'o hamo, tapeoha 'o hamo uk'anaci mocmosi. 33aemʉha na 'tohʉngʉ, koyu, tonʉ ho himngonghi to hamo, yaeza ngohia na ehuehungu, mais'a hola ngohia 'e iachi. na eni mo tosa'ohe tomo yonto 'oyona sʉ'tʉ ci isi hmoi ho faeni to hamo ci sʉ'ta ho ito mocmo ci sʉ'ta.>

34isi honga to iesu homo na'no toutʉs'ʉ 'o hiasi yut'ingi, cu mi'usni ho yainca: <o'ana miko nomcovhi to hpʉhpʉngʉ to hamo.>

ahoi ne mio, uk'ana cila smeecʉ'ho mi'usnu to iesu ho tungongoveo tuocosʉ.

e'usnu no kilisto

(matai 22:41-46; luka 20:41-44)

35nemo yonto seiten 'o iesu ho mo'ma'cohio mo coni 'o isi tuyafa ci e'e: <mainci lahe aac'o yainca to lema'cohio seiso zou mʉntʉ'ca to tavite 'o kilisto? 36'o tavite ho ohsila poot'ova no seilei ohsi yainca:

yainca to nooe'oca 'o nooe'oca'u.

teko yusuhngu ta vhona'u,

totea ho ta'ucu poa peteozu ta t'angosu 'o hangʉ.

37isi iachia yainca to tavite <<nooe'oca>>, maincite aac'o yainca zou mʉntʉ'ca to tavite 'o kilisto?>

la etngoeva 'o lema'cohio seiso

(matai 23:1-36; luka 20:45-47)

lahe toehunga ʉmnʉa talʉi to botngonʉ 'o hia eʉsvʉsvʉtʉ to iesu. 38ne isi seolʉa no po'pa'cohivi, isi yainca: <la etngoeva 'o lema'cohio seiso; la kaebʉ sʉ'eʉsʉ to yʉsʉno tacvoh'i ho eucocoyʉ tocaefi, kaebʉ yonto la toehunga 'oyona ho noa mi'usni ho tuayokeoi ho p'ohkui, 39maezo kaebʉ yusuhngu to mo afnaso ci ca'hʉ to kaitoo. sutmoyaevonʉ tola eho'ʉ eabobonʉ. 40lahe eha'va 'o ezoezoyʉ tomo tuvcongʉ ci mamespingi, tac'u peihtothomʉ ho mo'engho tomo tacvoh'i ci 'inoli. 'e lahe hi'hioa 'atena ahtuo'te tiou no someoisa ci patvovei!>

sʉ'ta to tuvcongʉ ci mamespingi

(luka 21:1-4)

41mo yusuhngu to tuhcu to too'sa peisu to seiten 'o iesu, aiti na lahe hia to'so no peisu to too'sa peisu. 'enepio cimo yuyupasʉ ci cou mo to'so tomo man'i ci peisu; 42atavei esmi 'omo thi'cia cimo tuvcongʉ ci mamespingi, to'seni 'omo yuso ci okono peisu no too, mais'a hoci conci meoino peisu. 43isicu eyoho'a to iesu 'o tesi, mi'usni ho yainca: <te'oeno a'ʉmta eʉsvʉta muu, 'e isi to'seni ta thi'cia ci mamespingi. mo man'ihe ta ihe to'seni to mocmo. 44'e mocmo moc'o eseuseu to ang'osʉ to yupasʉhe ho tuyafa; at'inghi 'e mamespingi eni micu anana'o na'no avzovzo, at'inghi isi acʉha sʉ'teni 'e ntohsin'a titheni no h'oyunsovasi.>

Currently Selected:

maluko 12: bsnfe

Highlight

Copy