matai 28

smoevovei 'o iesu

(maluko 16:1-10; luka 24:1-12; yohane 20:1-10)

1sucaefi 'o 'ansokunici, moseo'ohngʉ to maikayo, 'o maliya to motala ho i'omon'a cihi ci maliya mo yuyuso uhto heuf'a ho aiti. 2aemo'au tmanoi motoevi, mo i'mine pepe 'o tensi to nooe'oca ho ohpueho, pehtuezuha 'o fatu, yusuhngu to skoskopnasi. 3mo mais'a moi'hocʉ 'o mi'ausnasi, 'o yʉsʉsi totiski to tofsi'i ci yuho. 4'o lenoʉt'ʉcʉ mo smoecucunu smo'ʉe'ʉyʉ to hiahe yamci, mais'a 'o lac'u mcoi ci cou.

5'o tensi ihe mi'usni 'o maamespingi ho yainca: <'ote ngoheʉngeʉ, os'o cohivi imu i'ima 'o oho spica to zuuzika ci iesu. 6'anamos'a yontan'e, maito nia e'esi, micu smoevovei. 'atemueno uhtan'e, aiti 'e oho soʉlʉlʉi. 7temu aupcio e'ohʉ ho eʉsvʉta to tesisi: <<'amicu smoevovei 'o iesu, te muyohe muu ho uhne ngalilaya; yone'e, temu aiti ne'e 'o iesu.>> temu atatalʉa 'e os'o eʉsvʉta muu ci e'e.>

8micu 'aumeumeusu mongoi to heuf'a 'o maamespingi, mo yamci ho na'no kaebʉ, toemaine'e ho eʉsvʉta to tesisi.

9aemo'au, espayo to ceonʉ 'o iesu, mi'usni 'o maamespingi ho yainca: <temu'sola soanono!> mo ohcum'u 'o maamespingi, sʉ'fʉni 'o t'angosi ho m'ohkuyu to iesu. 10isi mi'usni to iesu ho yainca: <'ote ngoheʉngeʉ, usa 'o nat'ohaesa'u, poa uhne ngalilaya; tehe aiti ne'e a'o.>

hia evaho tomo noʉt'ʉcʉ

11ne mon'a seolʉano toumeumeusu ne ceonʉ 'o maamespingi, 'o moso noʉt'ʉcʉ to heuf'a ci heetai mo yuovei to hosa, eʉsvʉta to saisicoo 'o ihe aiti ci a'a'ausna. 12ataveisi no toʉsvʉsvʉtʉ 'o saisicoo ho i'o coolo, mayo tomo man'i ci peisu ho faeni to heetai, 13mi'usni ho yainca: <temu yainca, i'o tesi to iesu mo esmi ne mo taico feʉngna, ihe ieni ne mimu oengʉtʉ ho peo'eoza 'o feango to iesu. 14hocisi cohivi to sootoku na eni, 'atemzaeno biyafo ho etoto'usni muu, hosoo muu ho uk'a a'a'ausna.>

15ihecu tiova to heetai 'o peisu, maito hiahe eutotavi ho hioa. 'e buusumsu eni ac'ʉhʉ maitan'e ihen'a asngʉcva psoecingcingha ta couyutaya.

toveineni to tesi 'o tehe hioa

(maluko 16:14-18; luka 24:36-49; yohane 20:19-23; sitoo 1:6-8)

16sʉc'ʉhʉ ne ngalilaya 'omo maskʉ ucni ci tesi, uhto ohsi eutotaveineni to iesu ci hcuyu. 17ne ihecu aiti 'o iesu, cu acʉhʉ mi'usnu ho m'ohkuyu; at'inghi panto moc'on'a tmaakoknuyu 'o 'tohʉngʉhe. 18mo emocmu'u to tesi 'o iesu. mi'usni ho yainca: <na afu'u tonʉ ta pepe ho ita yatatiskova isicu acʉha pafeni a'o to hamo. 19ko'koeno, temu e'ohʉ, poa meelʉ acʉhʉ tesi'u 'e yatatiskova ta mauhpʉhpʉngʉ, boemi to ongko to amo, oko, seilei ho toononvi, 20a'vinano po'pa'cohivi ho poa meot'ʉcʉ ta os'o afu'a faeni ci mashʉyʉ. talʉa'sio! te'o asngʉcva no'upi muu, ac'ʉhʉ no hiesi no puesona ta hpʉhpʉngʉ.>

Currently Selected:

matai 28: bsnfe

Highlight

Copy