matai 21

taotofsi'i ho yʉmeʉmʉ ne 'elusalemu

(maluko 11:1-11; luka 19:28-40; yohane 12:12-19)

1ne micu smaicmu'u ne 'elusalemu, esmi to pofaki to mia'usnu to hcuyu'olivu. 'o iesu mo popeosmuhnu tomo yoso ci tesi ho poa muyoa, 2eutotaveiya 'omo yoso: <temu uhta ito emotuhci ci you. tamu osnia aiti 'o isi seo'tʉneni cimo coni ci lova ho i'omo coni ci okono lova; temu yunga ho e'usni tan'e. 3hoci panonte mi'usnu muu ho yaa e'ea, temu yainca: <<tesi titha to nooe'oca#<to nooe'oca> hocieno yainca <to taukehe>..>> tasi osnia poa yaakakneni muu.>

4na 'e hioa eni tesi mia 'o nia e'e to eyongensa. yainca:

5usa ho eʉsvʉta to 'o'oko to hosa ne sii'an:

aiti. micu cmʉ'ho si hontemu!

mo ma'einu ho smopayo ta lova,

smopayo ta f'uhu ta oko no lova.

6'omo yoso ci tesi micu maito e'e to iesu ho hioa. 7ihe yaakaka 'o lova ho i'o oko no lova, spoeni to f'uhu to lova 'o iachihe yʉsʉ, hocu poa smopayo 'o iesu. 8tamo botngonʉ ci cou panto ihe spoeni to ceonʉ 'o yʉsʉhe, panto mo maezo mayo to isi teoca ci ehti to evi ho esponeni to ceonʉ. 9mo yaa muyo yaa uafeihi evasʉzʉ to'ofeihni tmunoi moozoyʉ mainca: <ta'una to oko to tavite na tohmomoengʉ! tooyokeoi'sio to hamo 'emo boemi to ongkosi ho cmʉ'ho! ta'una to sopepea ci hamo na tohmomoengʉ!>

10ne micu yʉmeʉmʉ ne 'elusalemu 'o iesu, mo yuot'ou 'o cono hosa. pantomo tuocosʉ: <asansano siya 'e cou eni?>

11yut'ingi 'o botngonʉ: <na taini zou eyongensa iesu to nazalo ne ngalilayasoo.>

poa cofkoya to iesu 'o seiten

(maluko 11:15-19; luka 19:45-48; yohane 2:13-22)

12mo yʉmeʉmʉ to seiten 'o iesu, isi acʉha popeoyafa 'omo afu'u yonto seiten ho 'amamhimhino ci cou. popuya 'o pangka tomo yupa meʉe to peisu ho i'o ca'hʉ tomo mhino to hofoyu, 13mi'usni ho yainca: <isi tposi to seiso, yainca to hamo: <<'e seiten'u tela 'oyona 'inoli>>, at'inghi imu tiezuha ho teyai sku'u no yaksai!>

14panto bʉkngʉ ho pi'o mo uhto seiten ho biebimi to iesu; isicu aotothoma ho poa yov'oa. 15ihe aiti to saisicoo ho lema'cohio seiso 'o taunona'vʉ ci isi hi'hioa to iesu, yaeza talʉi 'o 'o'oko mo yonto seiten ho moozoyʉ: <no'usnu to oko to tavite na tohmomoengʉ!> cu na'no ma'sʉsʉ'no.

16ihe tuocosi 'o iesu: <osko talʉi cuma na ihe koa moozoyʉ?>

yut'inga to iesu: <os'ocu talʉi. 'o isi engha to seiso: <<osko poa i'mi ta 'o'oko ho ita foinana 'emo a'sʉftonʉ ci tohmomoengʉ.>> 'e e'e eni, o'a ohmulaeno ahta engha?>

17micu mongoi 'o iesu, yuyafo ta hosa ho uhne potaniya, yone'e ho miski.

patkuzoi 'o moezunge

(maluko 11:12-14, 20-24)

18taseonasi ne micu hucma, to ceonʉ no yuovei to hosa, mo sieo 'o iesu. 19isi teolʉi 'omo mehacni ci moezunge to aaskiti to ceonʉ, isicu emo'usna, at'inghi cumanante elʉa, mo ehʉngʉc'o. ko'ko isicu pas'osi 'e evi ho yainca: <na suu 'auesiesi 'anateko ahtu ivaho beahci!> 'o moezunge ic'o micu osni oemi'mi.

20ihe aiti to tesi 'e a'a'ausna eni, mo meoino yamci. ihe tuocosi: <'e evi eni mo mainenu ci osni oemi'mi?>

21yut'inga to iesu: <te'o bumemeala eʉsvʉta muu, hocimu tmaa'uzo ho o'te ma'pepecvai, 'e os'o hioa ta evi no moezunge, temu yaeza peihcʉ'hi. 'ate anouc'o maica, temu ac'ʉhʉ no meelʉ mi'usnu ta hcuyu tan'e ho yainca: <<yʉc'ʉ, noezuhu ne etʉpʉ!>> 'ate ahtuo'te maezo meelʉ maica. 22hoci mako yaa singkooa, 'e imu afu'a siya no 'inoli ho p'enza 'ate ahta o'te p'elʉa.>

tuocosi na tonʉ to iesu

(maluko 11:27-33; luka 20:1-8)

23mo yʉmeʉmʉ to seiten 'o iesu, nemo seolʉa no mo'ma'cohio to cou, mo esmi 'o saisicoo ho coolo to couyutaya, tuocosi 'o iesu: <cuma na osko iftongi ci tonʉ ho osko hioa 'emo maica ci hi'hioa? siya namo mofi ta tonʉsu tan'e?> 24isi yut'inga to iesu: <coni 'e te'o aueva tuocosi muu, hocimu yut'inga, niante'o eʉsvʉta na os'o iftongi ci tonʉ ho os'o hioa 'emo maica ci hi'hioa. 25mo i'minenu na tonʉ to letoonono yohane? nenusi no mo i'mi to hamo hocieno o'te i'mi ta cou?>

micu ahoi yupa eehcʉvho, yainca: <mateto av'a nate hia yut'ingi. hocito yainca: <<mo i'mi to hamo>>, tasi yainca: <<mainci imueno o'te taa'uzva 'o yohane?>> 26hocito yainca <<mo i'mi ta cou>>, mate sokoeva no tehe miteuyuni ta cou na a'to, maica ihe toehunga taa'uzva 'o yohane zou eyongensa.> 27ihecu yut'inga 'o iesu: <o'a imza cohivi.> isi mi'usni to iesu ho yainca: <yaeza o'ate'o eʉsvʉta muu cuma na os'o iftongi ci tonʉ ho os'o hioa 'e hi'hioa eni.>

epo'usa to yoso ci oko

28isi i'vaha yainca to iesu: <panto mon'a coni ci epo'usa, os'o 'ucia cohivi na buh'a'ausnamu. panto cihi ci cou mo yaa yoso ci 'o'oko, isi mi'usni 'omo mameoi to oko ho yainca: <<oko, tekon'a uhto aamcuyu ho yaahioa maitan'e.>> 29mo yut'ingi: <<o'ate'os'a e'ohʉ.>> at'inghi mo atavei ma'susuae hocu e'ohʉ. 30isi yaeza mi'usni to amohe 'o ohaesasi ho totiski 'o e'esi. yut'ingi 'o ohaesasi: <<tee. amo, te'ocu e'ohʉ.>> at'inghi o'amo a'ʉmtʉ e'ohʉ. 31'emo yoso ci oko nenu namo a'ʉmtʉ fiho no e'e to amohe?>

ihe yut'inga: <'ai'o mo mameoihe.>

yainca to iesu: <te'o bumemeala eʉsvʉta muu, 'o letmuhno ho i'o noasisi mate auyuhe muu ho meelʉ 'o'oko to hpʉhpʉngʉ to hamo. 32maica mo cmʉ'ho 'o letoonono ci yohane, isi eʉsvʉta muu nante mia cimo emio ci ceonʉ, o'aimu taa'uzva; at'inghi mo apuyuhe tmaa'uzo 'o letmuhno ho i'o noasisi. imu huceoevi, at'inghi o'amo aezuhu na 'tohʉngʉmu. o'aimu taa'uzva.>

epo'usa no kokuzo ci leyaezoi

(maluko 12:1-12; luka 20:9-19)

33i'vaha yainca to iesu: <temueno i'vaha talʉi 'emo h'unasi ci epo'usa! panto cihi ci tauke mo mo'to'ʉ ho mooyai aamcuyu, mooyai yʉ'pʉ ho ekuyungvi 'o aukukuyungusi, meifeongo to taicosi ho mooyai 'oyona smaspʉcʉ emi, m'eac'ʉ to tataka no maivhongʉ, ataveisi isicu poa yuevahneni to leyaezoi, iachi yuyafo ho covnʉ. 34micu hotacʉmʉa 'o amcuyu, isi skuna 'o soskuskunu ho uhto leyaezoi ho p'enia na ntesi tanua. 35'o leyaezoi isi tiubcikza 'o soskuskunusi, ti'usna 'omo cihi, opcoza 'omo cihi, fo'fo'ei to fatu 'omon'a cihi. 36isi i'vaha skuna to tauke 'o mocmo ci soskuskunu, asuhcuhe botngonʉ to ohsi aueva skuna; 'o leyaezoi ihec'o yaica 'o hiahe mi'usni. 37atavei, isicu skuna to tauke 'o okosi. yainca no koyusi: <<'atehe ahtao'te einva 'e oko'u.>> 38at'inghi 'o leyaezoi ne ihecu aiti 'o oko, mo yupa mainca: <<'e cou eni tenala tiuski to tauke, mateto opcoza, tetocu peelʉi ti'einga 'e ezoezoyʉsi!>> 39ihecu tʉtpʉta, poyafa ta ezoezoyʉ hocu opcoza.

40<homicu maica, ho tac'u yuovei 'o tauke ta aamcuyu, tesieno yainenu na tasi ti'a'ausna ta leyaezoi?>

41ihe yainca: <'atasi ahta o'te 'aanana'veni hocu opcoza 'emo maica kuici cou, yoezuhneni note meelʉ maino esvʉtʉ ho mofi no hnoo no titha 'e aamcuyusi.>

42isi mi'usni to iesu ho yainca: <'o e'e to seiso o'a ohmulaeno ahta engha?

'o nia caciha ci fatu tola lemooyai emoo.

isicu teyai atuhcu totnguca.

zou peipeis'ausna to nooe'oca na eni,

a'ʉmtas'a taunona'vʉ!>

43isi ivaha yainca to iesu: <ko'koeno, te'o eʉsvʉta muu, 'o hamo tesi i'mi ta emucumu ho ti'einga 'o hpʉhpʉngʉsi, faeni tola meelʉ beahci ci cou. ( 44siya nate smolʉ ta fatu tan'e, 'ate ahtuo'te smoz'oz'o; 'e fatu eni hoci su'no feango no siya, 'atesi ahtao'te toz'oz'i na siya.#panto piyo ci tposʉ noana'o uk'a 'e secu eni.) >

45ihe talʉi to saisicoo ho coufalisai 'emo maica ci epo'usa, tma'hongʉ ho isi pas'usna ta iachihe, 46ihecu 'ucia tʉtpʉta 'o iesu. at'inghi ihe smoyoa 'o botngonʉ, maica ho ihe'so taa'uzva 'o iesu zou eyongensa.

Currently Selected:

matai 21: bsnfe

Highlight

Copy