luka 3

psoyaski to fukuin 'o letoonono yohane

(matai 3:1-12; maluko 1:1-8; yohane 1:19-28)

1ne mohcu tomaska uemo to ca'hʉsi 'o honte tipiliu to looma, moso sootoku to yutaya 'o pangsiu pilato, honte ne ngalilaya 'o helote, 'o ohaesasi ci fuili mo honte to 'itolia ho tolakoni, 'o lisane mo honte ne yapilini, 2'o o'ana ho i'o kaiyafa moso taisaisi. ne mio, ohsi psoecʉ'hi no e'e to hamo 'omo yone maepuepuhu ci yohaneci oko to zakalia. 3moso smaingabo to mia'usnu to c'oeha ne yolutan 'o yohane, psoyaski ho yainca: <temu ma'vovei, tiou ta toonono, tesieno peteongasa to hamo na kuisimu.> 4aʉlʉ mais'a 'o ohsila tposi to tposʉ to 'izaya:

to maepuepuhu panto mo moozoyʉ ho mainca:

ayocneni no tesi ceonʉ 'o nooe'oca,

ptusngʉcvi 'o tesi mia ci ceonʉ.

5na afu'u mayoyo'hunge te acʉha hoponeoi;

te acʉha saovoha 'omo meoisi ho okosi ci mahcuhcuyu ho poa cʉecʉa.

namo kengkengzu ci ceonʉ te ptusngʉcvi;

aususeoma 'omo smaikuzkuzo ci ceonʉ.

6'e yatatiskova te acʉhʉ teolʉ no mengumi no to'usnu to hamo.

7mo yupa pooe'ohʉ 'o botngonʉ, yuyafo te akoyu no tiyou no toonono to yohane. isi mi'usni to yohane ho yainca: <'e mimu mahiz'o ci fkoi! tec'u mon'i esmi na yʉsvʉtʉ to hamo, mimun'asi ma'unano temu meelʉ toekameosʉ totoefʉngʉ? 8temula boemi no peipeis'ausna ho pa'teni na hia mimucu ma'vovei. 'ote ma'unano zou'so maameoimu 'o 'avulahamu ho yainca te meelʉ totoefʉngʉ no yʉsvʉta. te'o eʉsvʉta muu, 'o hamo te meelʉ mayo ta fatu tan'e ho mooyai no tesi mʉntʉ'ca to 'avulahamu! 9isicu topceni ta peongu ta evi 'e peʉcngʉ, inate afu'u o'te beahci ci evi te acʉha teoca, ho to'seni to puzu.>

10ihe tuocosi to botngonʉ: <ma cuma na ntemiaeno hioa?>

11yut'inga to yohane: <namo yuso na yʉsʉ, faeni nomo uk'a yʉsʉ namo coni; namo yaa 'oanʉa, te maezo maicac'o.>

12piyo ci letmuhno te uso ho maezo tiou no toonono; ihe tuocosi 'o yohane: <sensei, cuma na ntemia hioa?>

13isi mi'usni to yohane ho yainca: <'otela mosvocʉ to isi esvʉta ci tmuhnoa.>

14panto heetai mo maezo uso ho tuocosʉ: <naeno a'mi? cuma na ntemia hioa?>

isi mi'usni to yohane ho yainca: <'otela ti'eingi no yupasʉ, 'otela tophuhcu; temu ma'mamso to lahe tohnoneni.>

15micu asuhcu yaa ta'usni 'e yatatiskova, acʉhʉ ma'ngangacʉmʉ 'o 'tohʉngʉhe, yainca asonʉ 'e yohane na kilisto. 16ko'ko isi mi'usni ta yohane ho yainca: <mi'o boemi ta chumu ho toononvi muu; at'inghi, pantote cmʉ'ho cimo cihi mo meoisihe a'o 'o tonʉsi, o'ate mako 'aseolʉ ho ci'u yunga 'o sapieisi. tesi titheni to puzu ho ito seilei ho toononvi muu. 17mo mʉpʉtʉ to siothua 'o emucusi, tesi pusi 'o isi tov'oha, soʉlʉlʉa to tvo'oanʉa 'o heome; i'ocu piesi, te boemi to 'auesiesi o'ate afsi ci puzu ho poa houcʉcʉhʉ.>

18mo mi'usnu to yatatiskova 'o yohane ho psoyaska 'e fukuin, boemi tamo mav'ov'o ci ti'ausna ho eʉsvʉsvʉti 'e yatatiskova. 19at'inghi isi emamacongvi to yohane 'o honte helote, maica ho isi pevaha 'o hilotei vcongʉ to ohaesasi, mion'a peismi tomo man'i ho kuzo ci hi'hioa. 20ataveisi moso peismi tomo asuhcu kuzo ci hioa, 'aeno ho isi poekotva to poo'usna 'o yohane.

tiyou to toonono 'o iesu

(matai 3:13-17; maluko 1:9-11)

21acʉhʉ tiyou to toonono 'o yatatiskova, maezo esmi 'o iesu ho noa toonono. nemo seolʉa no 'inoli, mo maavo 'e engʉca, 22mo yaa mi'ausna 'o seilei mais'a hofoyu ho ohpueho to feangosi. panto fihngau cimo i'mi ta pepe, mainca: <zou songohia ci oko'u suu, la'u ʉm'ʉmnʉa suu.>

ceoceona no emoo to iesu

(matai 1:1-17)

23ne mohcu ahoi psoyaski to fukuin 'o iesu, mohcu asonʉ tomtueha. hoci aiti ta cou, zou oko to yosefu, 'o yosefu zou oko to hili, 24'o hili zou oko to matha, 'o matha zou oko to levi, 'o levi zou oko to mainci, 'o mainci zou oko to yaana, 'o yaana zou oko to yosefu, 25'o yosefu zou oko to matatia, 'o matatia zou oko to 'amosu, 'o 'amosu zou oko to naahong, 'o naahong zou oko to 'isuli, 'o 'isuli zou oko to naakai, 26'o naakai zou oko to maaya, 'o maaya zou oko to matatia, 'o matatia zou oko to siimei, 'o siimei zou oko to yoseko, 'o yoseko zou oko to yoota, 27'o yoota zou oko to yoyana. 'o yoyana zou oko to lisa, 'o lisa zou oko to solopapo, 'o solopapo zou oko to salate, 'o salate zou oko to nili. 28'o nili zou oko to mainci, 'o mainci zou oko to 'ati, 'o 'ati zou oko to kosang, 'o kosang zou oko to 'imotan, 'o 'imotan zou oko to 'elu, 29'o 'elu zou oko to yoosi. 'o yoosi zou oko to 'ili'ise, 'o 'ili'ise zou oko to yolin, 'o yolin zou oko to matha, 'o matha zou oko to levi. 30'o levi zou oko to siimen, 'o siimen zou oko to yuta, 'o yuta zou oko to yosefu, 'o yosefu zou oko to yonan, 'o yonan zou oko to 'iliyacin. 31'o 'iliyacin zou oko to miliya, 'o miliya zou oko to mainan, 'o mainan zou oko to matatha, 'o matatha zou oko to naatan, 'o naatan zou oko to tavite. 32'o tavite zou oko to iesi, 'o iesi zou oko to 'opeto, 'o 'opeto zou oko to po'asu, 'o po'asu zou oko to saamong, 'o saamong zou oko to naasun. 33'o naasun zou oko to 'aminata, 'o 'aminata zou oko to 'amin, 'o 'amin zou oko to 'ani, 'o 'ani zou oko to sisulun, 'o sisulun zou oko to falosu, 'o falosu zou oko to yuta, 34'o yuta zou oko to yakovu, 'o yakovu zou oko to 'isaku, 'o 'isaku zou oko to 'avulahamu, 'o 'avulahamu zou oko to thala, 'o thala zou oko to naaho, 35'o naaho zou oko to siilu, 'o siilu zou oko to laa'u, 'o laa'u zou oko to falo, 'o falo zou oko to sipo, 'o sipo zou oko to saala, 36'o saala zou oko to kainan, 'o kainan zou oko to 'afasa, 'o 'afasa zou oko to saan, 'o saan zou oko to noa, 'o noa zou oko to laamai, 37'o laamai zou oko to matusala, 'o matusala zou oko to 'ino, 'o 'ino zou oko to yaale, 'o yaale zou oko to malole, 'o malole zou oko to kainan, 38'o kainan zou oko to 'inosu, 'o 'inosu zou oko to saitho, 'o saitho zou oko to 'atamu, 'o 'atamu zou oko to hamo.

Currently Selected:

luka 3: bsnfe

Highlight

Copy