luka 23

yonto tuhcu to pilato ho tiou to yʉsvʉta

(matai 27:1-2, 11-14; maluko 15:1-5; yohane 18:28-38)

1coe'o ci cou mo acʉhʉ yʉc'ʉ, e'usna to tuhcu to pilato 'o iesu, 2yonto ic'o ho ehpʉnga 'o iesu ho yainca: <imia honga ita poot'ova 'e 'oahngʉto, ho yu'hanga hoci mofi no tmuhnoa to honte, mitan'a iachi mainca zou kilisto, zou honte.>

3tuocosi to pilato 'o iesu: <zou honte ta couyutaya suu?>

yut'inga to iesu: <zou e'esu eni.>

4cu mi'usnu to saisicoo ho ito botngonʉ ci cou 'o pilato ho yainca: <o'aos'o elʉa hoci yaa kuisi 'e cou eni.>

5at'inghi ihe a'cʉ'cʉna emamahtʉica ho yainca: <lata ieni ho lata epeaski to e'e, ho nongongabo ta yutaya ho poot'ou tamo botngonʉ, ahoi ne ngalilaya, cu sʉc'ʉhʉ tan'e maitan'e.>

yonto tuhcu to helote

6ne isi talʉi to pilato 'e e'e cu tuocosi: <zou coungalilaya 'e cou eni?> 7ne isicu cohivi mo i'mi to hupa to helote, cu hafa uhto helote. (ne mio moso seolʉa no yone 'elusalemu 'o helote.) 8ne isi aiti to helote 'o iesu, mo na'no kaebʉ; maica ohsicula tac'ʉhi na hi'hioa to iesu, noana'va cu 'ucia aiti, totea no aiti 'o iesu hoci peispopo'e. 9ko'koeno, mo man'i ci a'a'ausna 'o isi tuocosi to iesu, at'inghi o'amo matnʉskʉ yut'ingi 'o iesu. 10mo ohcum'u 'o saisicoo ho lema'cohio seiso, 'aanana'veni ehpʉnga 'o iesu. 11'o helote ho i'o heetaisi ihe keematmohi ho aokoe'iya 'o iesu, ihe poa sʉ'eʉsʉ tomo tatposa ci yʉsʉ, ho e'vovei to pilato. 12ahoi ne mio, mohcu nanghia 'o helote ho i'o pilato; to auyusi mosola nahanga 'emo yoso.

yʉsvʉta no opcoza

(matai 27:15-26; maluko 15:6-15; yohane 18:39-19:16)

13isi eteuyuna to pilato 'o saisicoo, masoso'ehti, ho i'o botngonʉ ci cou, 14mi'usni ho yainca: <imu e'usna a'o 'e cou eni, ehpʉngneni no poot'ou ta 'oahngʉ; mi'o yonta tuhcumu ho tuucocosi, ma'i os'o ho'honga nante mais'a to imu ehpʉngneni ci makukuisisi. 15ac'ʉhʉ to helote yaeza o'a isi elʉa hocita yaa kuisia, isi pa'ivoveiya tan'e. 'aisieno humzi ho uk'a ci nama koa mcoi ci peipeis'ausna. 16te'oc'o at'ingha poa ti'usneni ta cou, ta'ucu poesih'a.>#panto piyo ci tposʉ noana'o isi topuhngi ta 17 secu <cono hola meem'esa'o, la aacni cihi 'o lasi poesih'a to pilato ci isi poekotva.>

18namamo tmunsohʉ 'omo botngonʉ ho moozoyʉ: <opcoza si iesu. poesih'a 'o palapa ho faeni a'mi!> ( 19mosola 'afeo'fu'u to hosa 'o palapa ho opcoi to cou, ko'kocu poekotva.)

20isi 'ucia poesih'a to pilato 'o iesu, i'vahan'a eupuputa 'o botngonʉ. 21at'inghi mo asuhcu tmunoi moozoyʉ 'omo botngonʉ: <spica to zuuzika si iesu! spica to zuuzika si iesu!>

22isi i'toteuha mi'usni to pilato ho yainca: <aʉlʉ cuma na ita hioa ci kuisi? o'aos'o elʉa na nteta koa mcoi ci kuisi, te'o poa ti'usneni hocu poesih'a.>

23mo a'cʉ'cʉnʉ tmunoi moozoyʉ 'o botngonʉ, bitotonʉ no spica to zuuzika 'o iesu; cu atavei atpʉtʉ 'o fihngauhe. 24'o pilato micueno maito 'tohʉngʉhe ho yʉsvʉta. 25isi tuyafa to poo'usna ho poesih'a 'o mosola 'afeo'fu'u ho opcoi ci mo pak'i, hocu faeni tomo botngonʉ 'o iesu, poa maino tehe ti'a'ausna.

spica to zuuzika 'o iesu

(matai 27:32-44; maluko 15:21-32; yohane 19:17-27)

26ihecu hafa to heetai 'o iesu, lʉa to ceonʉ 'omo cihi cite akoyu no yʉmeʉmʉ ta hosa ci coukulinai, zou saimong 'o ongkosi. ihe tʉtpʉta, ngov'eni to ei'sisi 'o zuuzika, poa ngoeveni, ho uafeihi to iesu.

27coe'o ci cou 'omo to'ofeihni to iesu, ta 'ayumonahe mo piyo ci maamespingi mo nac'o ho tngisi 'o iesu. 28mo miyovei 'o iesu, mi'usni 'o maamespingi ho yainca: <maamespingi ta 'elusalemu, teav'a tngisi a'o, temu tngisihe si iachimu ho i'o 'o'okomu! 29maica tec'u toc'ʉha na hiesi, te mainca 'e cou: <<a'ʉmtʉs'a ʉm'ʉmnʉ na o'amocu mo yaa oko, o'amocu mo mahmahafo, o'amocu mo paun'u!>> 30ho mio, tena mi'usnu to meoino hcuyu 'o cou ho mainca: <<oefʉ'ʉ ho toh'usnu ta feango mia!>> te mi'usnu to oko no hcuyu ho yainca: <<feʉ'sa a'mi!>> 31maica, hocihe mi'usni 'o mon'a enghova ci evi ho hioa 'emo maica ci hi'hioa, ma tenaeno mainenu hoci mi'usnu to micu oemi'mi ci evi?>

32ihe yaeza hafa 'omo yoso ci oho poekotva, te pot'upa to iesu hote opcoza. 33ne micu sʉc'ʉhʉ to conci hpʉhpʉngʉ, la yainca <cʉehʉana>, yonto ic'o ho spica to zuuzika 'o iesu, ihen'a yaeza a'upa spica 'omo yoso ci oho poekotva, yonto vhona 'omo cihi, yonto veina 'omo cihi. [ 34yainca to iesu: <amo. teko peteongasa hin'i. maica o'aihin'i iachia cohivi cuma 'e ihin'i hioa#panto piyo ci tposʉ noana'o uk'a 'emo no'ayumonʉ ta isi pai'ayumona ta sikotva..>]

ihe yupa yu'siseita ho aangaeza 'o yʉsʉ to iesu. 35mo yac'ʉ 'o botngonʉ ho aiti, ihe cocvi to masoso'ehti to yutayaho yainca: <lata to'usnu to mocmo, hoci zoueno a'ʉmtʉ taini na isi epeiya to hamo ci kilisto, 'a teeno iachia poa to'usneni si iachisi!>

36ihe yaeza cocvi to heetai. ihe ohcum'a ho pema tomo masʉecʉ ci emi, 37yainca: <hoci zou honte ta couyutaya na suu, iachia to'usni si iachi!>

38to skoskopnasi panto ie'iya ci isi topceni. isi tposi ho yainca: <zou honte ta couyutaya eni.>

39'omo yoso ci isi yaeza spica to zuuzika, cihi 'omo ya'ei ho aokoe'iya 'o iesu ho yainca: <o'as'aeno kilisto suu? ma to'usni si iachi ho yaeza to'usni a'mi!>

40isi koica tomo cihi ho yainca: <miko maezo noa spica, o'atekoeno smoyo to hamo? 41ho mito noa spica o'antetos'aeno anana'va elʉa ci patvovei? at'inghi 'e cou eni uk'a cimo coni ci hi'hioa na ita hioa cimo kuzo.> 42cu mi'usnu to iesu ho yainca: <iesu, ho takocu honte ho cmʉ'ho, takosola talʉa a'o!>

43isi mi'usni to iesu ho yainca: <te'o eʉsvʉta suu, maitan'e tekocu to'ofeihni a'o ho uhto kaebʉ ci hpʉhpʉngʉ.>

mcoi 'o iesu

(matai 27:45-56; maluko 15:33-41; yohane 19:28-30)

44-45asonʉ miya'usnu no cohzona, cu aapayo'ʉ 'o tiskova to hie, feʉ'sa to voecʉvcʉ 'e ceoa, ac'ʉhʉ to ma'hi tuyu no huomza hie no ataveisi no cohzona; 'o isi ngov'eni to seiten ci toohesa mo meiatiski meipaevai. 46mo tmunoi moozoyʉ 'o iesu: <amo, te'o toveineni suu 'e iachi'u piepiya!> pateʉpnga 'e e'e eni, cu entʉhʉ to nsou.

47isi huacni to taicini to heetai 'e hi'hioa eni, cu tohmomoengʉ to hamo ho mainca: <'e cou eni zou'so a'ʉmtʉ coumoʉlʉlʉ!>

48'omo i'kukuyungu ho baito to a'a'ausna ci botngonʉ, mo acʉhʉ nac'o ho tututva 'o t'oenga hocu maine'e. 49'omo afu'u bohngʉ to iesu ci cou, ho i'omo i'mi ne ngalilaya ho to'ofeihni ci maamespingi, acʉhʉ yac'ʉ tomo covhi ho aiti 'o a'a'ausna ta hi'hioa tan'e.

soʉlʉlʉa 'o iesu

(matai 27:57-61; maluko 15:42-47; yohane 19:38-42)

50-51mo cihi 'omo i'mi ne mia'usnu ne yutaya zou cou to hosa ne 'alimatai, zou yosefu 'o ongkosi. 'e cou eni la ma'cocacni ho mousʉngcʉ, la coni no mingeou hocic'u cmʉ'ho na hpʉhpʉngʉ to hamo. e'vono zou ngi'in to ngikai, o'ala to'upu tola ta'koeva ta mocmo ci cou ho ito lahe peipeis'ausna. 52mo uhto tuhcu to pilato ho p'enza 'o feango to iesu, 53isicu usa ho epeoha 'o feango, to'silʉlʉa cfua to yʉteʉ, soʉlʉlʉa to isi yufeongvi to yakivayʉ ci heuf'a - 'e heuf'a eni o'amocu ohola ahta titha. 54zou hiesi no ae'ayocʉ ne mio, tec'u esmi 'o 'ansokunici.

55i'o mo i'mi ne ngalilaya ho to'ofeihni to iesu ci maamespingi mo nʉthʉ 'o yosefu, aiti 'o heuf'a, yaeza aiti isi yainenu na hia soʉlʉlʉa to feango to iesu. 56micu maine'e, tehe ayocneni to s'os'o ho konamusngau 'o feangosi.

mo fiho to esvʉta to hoolicu, amzocni homo 'ansokunici.

Currently Selected:

luka 23: bsnfe

Highlight

Copy