luka 22
22
ta'koeva no opcoza 'o iesu
(matai 26:1-5; maluko 14:1-2; yohane 11:45-53)
1cu mon'i esmi 'o hiesi no meem'esa'o. 2maica homo ngoheʉngeʉ to botngonʉ 'o saisicoo ho lema'cohio seiso, mo ma'totoothomʉ ho 'ucia auc'oc'ova opcoza 'o iesu.
teomneni to yuta ho phieni 'o iesu
(matai 26:14-16; maluko 14:10-11)
3ne mio, 'o satan mo yʉmeʉmʉ to 'tohʉngʉ to coukaleo ci yuta. ('o yuta zou cihi to maskʉ ueso ci tesi to iesu.)
4mo uhto saisicoo ho ito lepocengi seiten ci kengsacu 'o yuta ho toʉsvʉsvʉtʉ, tee yainenu niante peelʉi faeni 'o iesu. 5ihe kaebeni, yaeza teomi fii to peisu. 6cu tiova to yuta, ahoi eya note 'oc'ocic'o ci hie, ieni ho tahe o'te pocenga to botngonʉ ho faeni to saisicoo 'o iesu.
ae'ayocʉ no oyofonʉ no meem'esa'o
(matai 26:17-25; maluko 14:12-21; yohane 13:21-30)
7to 'ayumona no meetoasmoof'o, cu hiesi no cmuhu to oko moatʉ'nʉ no meem'esa'o. 8isi popeoskuna to iesu 'o petelo ho i'o yohane, eutotaveiya ho yainca: <temu ayocneni no teto oyofona no meem'esa'o.>
9ihecu tuocosi: <teko poa uhnenu a'mi ho ae'ayocʉ?>
10yainca to iesu: <temu yʉmeʉmʉ ta hosa, temu lʉa 'omo cihi ci cou, mo mʉpʉtʉ to cono pania ci chumu, temu cu to'ofeihni, uhto tesi yʉmeʉma ci emoo, 11tuocosi to tauke to emoo ho yainca: <<isi tuocosi to sensei, mo yonenu nate yoni oyofonʉ no meem'esa'o?>> 12tasi hafa muu ho poa aitneni 'o isicu tasucza ci mo meoino aemana; 'atemueno yonto ic'o ho ae'ayocʉ.>
13micu e'ohʉ, 'o ihe aiti aʉlʉ totiski to isi engha to iesu, micu ae'ayocʉ tote oyofona no meem'esa'o.
oyofona to nooe'oca
(matai 26:26-30; maluko 14:22-26; kolinto 1 11:23-25)
14tec'u oyofonʉ, yusuhngu 'o iesu; mo suteuyunu 'o sitoo. 15isi mi'usni to iesu ho yainca: <no auyusi no meakvo'ʉ la'u asngʉcva totea hocito meelʉ toehungu oyofonʉ ta meem'esa'o. 16te'o eʉsvʉta muu, mac'o toc'ʉha 'e oyofonʉ eni tee a'ʉmtʉ yaa a'a'ausna hoci yonto hpʉhpʉngʉ to hamo, 'anate'o ahtan'a ovaha eni.>
17isi eepia to iesu 'o sooetohvʉ, mi'usnu to hamo ho to'aveoveoyʉ, yainca: <temu yaa 'e sooetohvʉ, aangaeza ho ima. 18te'o eʉsvʉta muu, ahoi maitan'e, mac'o ci toc'ʉha na hpʉhpʉngʉ to hamo hoci cmʉ'ho, 'anate'o ahtan'a soevaha 'e emi eni.>
19ataveisi isi pʉta 'o pang, mi'usnu to hamo hocu to'aveoveoyʉ, tipcia, aangaeza to sitoo, yainca: <zou feango'u eni, os'o nomzi muu ho ciha. temula maicac'o ci hioa ho talʉa a'o.> 20cu oepʉngʉ, isi yaeza eepza 'o sooetohvʉ, yainca: <'e sooetohvʉ eni zou faeva esvʉtʉ to hamo, boemi tamo nomzo muu ho moheafo ci hmuyu'u ho p'eyac'a#panto piyo ci tposʉ noana'o uk'a ci 19 secu <os'o nomzi muu...ho talʉa a'o> ho i'o e'e ta 20 secu..
21<temu aiti, i'ote himhohioa ho phieni a'o ci cou. mo yontan'e ho mai'upu a'o! 22'e okocou teeno ahtuo'te maino 'tohʉngʉ to hamo ho tiou no mcoi, at'inghi 'omo himhohioa ho phieni a'o tasi meamzi!>
23mo yupa tuucocosʉ: <zou siya nate himhohioa tamo maica?>
yupa 'eehcʉvho no taicini 'o tesi
24panto ihe yupa 'eehcʉvha to tesi, ta taicohe zou siya namo sotaicinia. 25isi mi'usni to iesu ho yainca: <'e honte ta hpʉhpʉngʉ la yaa tonʉ no atʉkca 'e yatatiskova, a'vinano lahe yainca 'o leaʉt'ʉcʉ zou leto'usnu; 26at'inghi o'antemu maica. ta taicomu namo atva'esi meoisi, mante apuyu mais'a mon'a foinana; nate so'ehti. nte mais'a soskuskunu. 27i'ola yusuhngu ho bonʉ ho mimo, ho i'ola aʉt'ʉt'ʉcʉ siya namo meoisihe? ahtuo'te 'omo yusuhngu namo meoisihe. at'inghi, homi'o yonta taicomu ma la'u aʉt'ʉt'ʉcʉ ta cou.
28<ho mi'o notaico ta 'atutumzo, lamu conino no'upu a'o. 29maitan'e te'o yaeza pafeni muu 'o isi pafeni a'o to amo'u ci tonʉsi no honte. 30temu yonto hpʉhpʉngʉ'u ho mai'upu a'o ho eabobonʉ, a'vinano yusuhngu to suoca'ha ho yʉsvʉta 'omo maskʉ ueso ci suezopʉ to 'isolaelu.>
eyoca to iesu 'o petelo tasi meoo'te honga
(matai 26:31-35; maluko 14:27-31; yohane 13:36-38)
31ivaha yainca to iesu: <saimong, saimong! isicu teomneni 'o satan tesi hʉsvʉta muu, te mais'a 'o leyaezoi hola smahahinu to heome ho sahahinva muu. 32at'inghi os'ocu 'inolineni suu, poa o'te payo'neni suu na singkoo. ataveisi ho takocu miovei ho bi'usnu a'o, teko amamahtʉica 'o maanat'ohaesasu.>
33yainca to petelo: <nooe'oca, te'o kaebʉ hoci po'upa suu, tu'upu mcoi!>
34yainca to iesu: <petelo, te'o eʉsvʉta suu: maitan'e auyusi no muni 'o teo'ua, tako i'toteuha yainca o'a osko honga a'o.>
tvopeisua, keʉpʉ, poyave
35isi ivaha mi'usni to iesu 'o tesi ho yainca: <ne auyusi o'u skuna muu ho yuyafo, o'u yainca muu 'ote mahafo no tvopeisua, 'ote mahafo no keʉpʉ ho sapiei, pano mimu o'te am'amso no cuma?>
ihe yut'inga: <uk'a.>
36yainca to iesu: <at'inghi maitan'e namo yaa tvopeisua ho keʉpʉ, te hafa; namo uk'a poyave, te phieni na yʉsʉ ho msucni. 37te'o eʉsvʉta muu, 'o isi engha to seiso <<isi sko'ayumona to mo yaa kuisi>> 'o e'e ic'o te ahtuo'te esmi ta feango'u. a'ʉmtʉsi, 'o isi tposi cimo afu'u natʉ'ca a'o isicu acʉha esmiza.>
38ihe yainca to tesi: <nooe'oca, aiti. a'e mo yuso ci poyave tan'e.>
yainca to iesu: <cu amso!>
yonto hcuyu'olivu 'o iesu ho 'inoli
(matai 26:36-46; maluko 14:32-42)
39yuyafo to hosa 'o iesu, maicac'o emo'usnu ne hcuyu'olivu; mo to'ofeihni to iesu 'o tesi. 40cu sʉc'ʉhʉ to ic'o, mi'usni to iesu 'o tesi ho yainca: <temula 'inoli, te o'te su'ayumonʉ no ma'pepecvai.>
41mo emose'u 'o iesu, mais'a hoci maensohʉ mtokʉ 'o hiasi covhi, pop'up'ungu ho 'inoli, 42mainca: <amo, honciko'so ʉmnʉa, te saezuha 'emo mayʉmʉ ci sooetohvʉ; at'inghi, citeeno ieni no 'tohʉngʉ'u, mate aepʉnga na 'tohʉngʉsu.> [ 43panto cihi ci tensi mo i'mi ne pepe ho aopa'to, topuhngi 'o tonʉ to iesu. 44yonta mo kuici nac'o. mo asuhcu asno'zonʉ 'inoli 'o iesu, 'o haengisi mais'a mo kuici yuhmuyu ho msʉpcʉ ta ceoa#panto piyo ci tposʉ noana'o uk'a ci 43-44 secu..]
45aepʉngʉ 'inoli, mo yʉc'ʉ 'o iesu, yuovei to ihe yoni to tesi, aiti 'o tesi mo i'mi no angu nac'o hocu oengʉtʉ. 46mi'usni to iesu ho yainca: <mainci mimus'a oengʉtʉ? yʉc'ʉ, ho 'inoli. ci temus'a su'ayumonʉ no ma'pepecvai.>
tʉtpʉta 'o iesu
(matai 26:47-56; maluko 14:43-50; yohane 18:3-11)
47ne mon'a seolʉa no aomotʉ'ʉ 'o iesu, mo esmi 'omo botngonʉ ci cou. isi hafa to yuta ci 'oahngʉ to mo maskʉ ueso ci tesi, mo uhto tuhcu to iesu tesi kisua. 48isi mi'usni to iesu ho yainca: <yuta, teko boemi ta kisu ho phieni 'e okocou?>
49'omo no'upu to iesu ci tesi ihe aiti 'emo maica ci a'a'ausna, cu yainca: <nooe'oca, temia meelʉ tipoyave ho tmoecʉ?> 50cihi to 'ayumonahe mo epusku to poyave ho teoca 'o soskuskunu to taisaisi, hic'oha 'o vhona to koyusi.
51yainca to iesu: <'otena yu'hango!> cu pʉta 'o koyu to ic'o ho poa yov'oa.
52isicu mi'usni to iesu 'omo esmi ho tʉtpʉtʉ ci saisicoo, kengsacu to seiten ho i'o coolo ho yainca: <ho mimu mahafo ta poyave soanothʉ ho tʉtpʉta a'o, imun'asi ta'upa no yaksai a'o? 53la'u huhucmasi no'upu muu ho yonta seiten, o'a lamu tʉtpʉta; at'inghi maitan'e zoucu hiesi no yufeo'fu'u na muu, maitan'e cu mayo ta tonʉ 'e voecʉvcʉ.>
peecveni to petelo 'o iesu
(matai 26:57-58, 69-75; maluko 14:53-54, 66-72; yohane 18:12-18, 25-27)
54tuhcusi tan'e, ihe tʉtpʉta 'o iesu, hafa uhto emoo to taisaisi; mo pemcovhi to'ofeihni 'o petelo. 55mo yaa soupuzu to coca, acʉhʉ maikuyungu to puzu ho ngicu, mo aha'o notvohʉ to taicohe 'o petelo. 56panto cihi ci soskuskunu no mamespingi isi aiti 'o petelo homo yusuhngu ho ngicu, isicu teochʉmi, yainca: <'e cou eni ma 'oahngʉ to iesu!>
57mo peeco 'o petelo ho yainca: <na suu mamespingi, os'o eno ahta honga 'o iesu!>
58o'amo aomane, mio ivaho yaa bʉh'ʉ'ʉmtʉ to petelo, yainca: <ma maezo 'oahngʉhe na suu!> yainca to petelo: <na suu, mao'a a'o!> 59asonʉ i'vaho cono ma'hiezuhu na huomzahie, h'unasi cimo cihi isi 'ahʉhʉya yainca: <o'ate ta'pepecvaza, 'e cou eni lahin'i nʉthʉ 'o iesu, maica 'aeno'so maezo coungalilaya na taini!>
60at'inghi mo mainca 'o petelo: <na suu, o'aos'o ta'hongi co e'esu!>
o'amocu isi pateʉpnga 'o e'esi. cu muni 'o teo'ua. 61mo miezuhu 'o nooe'oca, teochʉmi 'o petelo; talʉa to petelo 'o nia e'e to nooe'oca: <auyusi no muni 'o teo'ua maitan'e, teko i'toteuha meoo'te honga a'o.> 62cu emoyafo 'o petelo ho mongsi.
keematmohi ho ti'usna 'o iesu
(matai 26:67-68; maluko 14:65)
63'omo pocengi to iesu ci cou ihe keematmohi 'o iesu ho tutva. 64ihe seomʉta 'o mcoosi ho tuocosi: <eangacʉma. siya namo muutu suu?> 65mion'a mo'engho to man'i cimo aokoe'i ci e'e ho ya'ezneni 'o iesu.
yonto ngikai ho noa yʉsvʉta
(matai 26:59-66; maluko 14:55-64; yohane 18:19-24)
66ne micu tiskova, 'o coolo saisicoo, ho i'o lema'cohio seiso to couyutaya, mo yu'eteuyunu, ivaha hafa 'o iesu ho uhto ngikaihe. 67ihe tuocosi 'o iesu: <eʉsvʉta a'mi, zou a'ʉmtʉ kilisto suu?>
isi yut'inga: <'upena ho ci'ueno eʉsvʉta muu, o'atemus'a h'unasa taa'uzva; 68hoci'u tuocosʉ muu no cuma, yaeza o'atemu peelʉi yut'inga. 69at'inghi no ataveisi maitan'e, te yusuhngu to vhona to sotonʉa ci hamo 'e okocou.>
70ihe toehunga yainca: <maicac'o, 'iamaeno oko no hamo suu?>
isi yut'inga to iesu: <'aimueno yainca zou a'o!>
71ihecueno yainca: <'anateto 'ahʉyʉ 'aoko biebimi note e'omamzi! itocu acʉha talʉi 'o iachi ta e'e!>
Currently Selected:
luka 22: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
