yohane 9
9
poa yov'o 'omo asonghoi bʉkngʉ
1'o iesu isi teolʉi to ceonʉ 'omo asonghoi bʉkngʉ ci cou. 2ihe tuocosi to tesisi: <sensei, homo asonghoi bʉkngʉ 'e cou eni, mo i'mi no kuisi no siya? nenusi no iachisi kuisi hocieno o'te i'mi no kuisi no maameoisi?>
3yut'inga to iesu: <homo bʉkngʉ o'amo yaa natʉ'ca no kuisisi ho ino kuisi no maameoisi, mate i'mi ta feangosi ho pa'teni na lasi hi'hioa to hamo. 4ieni ho mon'a tiskova, teto ahtao'te hioa na tesi poa hioaneni to mo popeosmuhnu a'o; hocic'u esmi na feʉngna, uk'anaci te meelʉ yaahioa. 5ho mi'on'a yonta hpʉhpʉngʉ, zou tiskova ta hpʉhpʉngʉ a'o.>
6ne isicu e'e eni, mo tmueposʉ ta ceoa, boemi to isi atvoha to ceoa ci ngeoi, sieseni to mcoo to bʉkngʉ, 7a'vinano mi'usni ho yainca: <teko uhto ecuu ne siloya ho tonzovi.> ('o e'ausna ta siloya zou <noa popeoskuna>.) micu uhne'e ho tonzovi, ne micu yuovei, micu bohngʉ.
8ihe yainca to ehuehungusi ho itola lua baito hola noa bonʉ ci cou: <o'as'aeno eni 'ola leyusuhngu tan'e ho noa bonʉ ci cou?>
9pantomo mainca: <mazou taini>; pantomo maezo mainca: <o'as'a taini, mitac'o at'inghi mi'u'usnu.>
mo iachi mainca 'o ic'o: <'aeno a'o 'o ic'o.>
10ihe tuocosi: <mo mainci meelʉ maavo si mcoosu?>
11isi yut'inga: <mo cihi ci iesu 'o ongkosi, isi siesa to lingki 'e mcoo'u, hocu yainca: <<uhto ecuu ne siloya ho tonzovi.>> mi'o uhne'e, ne os'ocu tonzovi mi'ocu bohngʉ.>
12ihe tuocosi: <mo yonenu 'e cou eni?>
isi yut'inga: <o'a os'o cohivi.>
tusansani to coufalisai na hi'hioa ta bʉkngʉ
13ihe hafa 'o mosola asonghoi bʉkngʉ ci cou ho baito to coufalisai. 14'o hiesi ne ohsi siesa to lingki 'o mcoosi moso seolʉano 'ansokunici. 15ihe i'vaha tuucocosi to coufalisai 'o bʉkngʉ mo mainenu na hiasi meelʉ bohngʉ. isi eʉsvʉta to falisai: <isi siesa to lingki co mcoo'u, ne os'ocu tonzovi mi'ocu bohngʉ.>
16pantomo mainca ci coufalisai: <namo himhohioa tan'e o'a mos'a ahtu i'mi to hamo, maica ho o'amo noyʉcʉ ta h'oesvʉta ta 'ansokunici.>
panto h'unasi ci cou ihe yainca: <'e cihi cimo yaa kuisi ci cou teeno ahtu meelʉ peismi tamo maica ci po'e?> micu i'mi tan'e ho yupa 'eehcʉvho.
17ihe i'vaha tuucocosi to coufalisai 'o cou ic'o: <ho isieno paavi si mcoosu, teko yainca mio mainenu ci cou eni?>
isi yut'inga: <'a cihi ci eyongensa na ic'o.>
18o'aihe taa'uzva to masoso'ehti to couyutaya ho mosola bʉkngʉ ne auyusi, hocu bohngʉ maitan'e; totea ne ihecu eyoho'a 'o maameoisi, 19ihe tuocosi: <zou okomu eni? o'aimu eno yainca mosola asonghoi bʉkngʉ? mo maincicu bohngʉ maitan'e?>
20yut'inga to maameoisi: <'azou okomza taini, mohta asonghoi bʉkngʉ, imza cohivi na eni. 21inacu mainenu na hiata bohngʉ maitan'e, siya namo maavo ta mcoo taini, o'a imza cohivi. mitacu sasmoyʉskʉ, 'atemucueno tuocosi taini, poa iachi yut'ingi muu.> 22homo maica 'e e'e ta maameoisi mo smoyo to masoso'ehti to couyutaya; ne mio ohecu esvʉta, hoci panonte ebobohngʉ to iesu zou kilisto, te popeoyafa to kaitoo. 23ko'ko ihe yut'inga to maameoisi: <mitacu sasmoyʉskʉ, 'atemueno tuocosi!>
24ihe i'vaha eoho'a 'o moso asonghoi bʉkngʉ, mi'usni ho yainca: <teko mi'usnu to tuhcu to hamo ho eʉlʉ! imza cohivi 'o iesu mo yaa kuisi ci cou.>
25isi yut'inga: <mio nana yaa kusia, o'aos'o cohivi; at'inghi moc'o conci hioa 'o os'o cohivi: mo'ula bʉkngʉ ne noana'o, mi'ocu bohngʉ maitan'e.>
26ihe tuocosi: <cuma na isi hioaneni suu. isi yainenu na hiasi maavo ta mcoosu?>
27isi yut'inga: <os'ocu eʉsvʉta muu, o'aimu mimha talʉi. mainci i'vaha 'ucia talʉi maitan'e? mimun'asi maezo mici tesi to ic'o?>
28ihe ekvo'i: <'aeno suu na tesisi; na a'mi zou tesi to moose. 29imza cohivi na nia e'e to hamo ho ohsila mi'usni 'o moose; i'ocu 'o cou ic'o, o'aimza okono cohivi mio i'mi nenu!>
30isi yut'inga: <mamo mainenu. isi paavi 'e mcoo'u, nama imu o'te cohivi na isi i'mizi! 31imza cohivi, o'atesi talʉi to hamo na 'inoli nomo yaa kuisi ci cou; lasic'o talʉi 'ola m'ohkuyu ho i'ola peis'ofeihni to 'tohʉngʉsi ci cou. 32ahoi ho ohon'a teyai 'e hpʉhpʉngʉ, o'amocu mosola ahtu tmalʉ hoci panonte meelʉ poa bohngʉa namo asonghoi bʉkngʉ ci cou. 33hoci o'te i'mi to hamo, cumanantesi peelʉi hioa.>
34ihe t'ʉtei 'o ic'o: <'e miko yayo no 'ayumona no kuisi ci cou, namateko pahsʉsʉfti a'mi!> ihecu popeoyafa ta kaitoo.
bʉkngʉ ci piepiya
35isi tac'ʉhi to iesu ho ihe peteoyafa to kaitoo. ataveisi ohsila elʉa to iesu, mi'usni ho yainca: <iko taa'uzva 'o okocou?>
36isi yut'inga: <sensei, tekon'a eʉsvʉta a'o zou siya ico, te'o ko'ko taa'uzva!>
37mi'usni to iesu ho yainca: <'aoskocueno teolʉi, 'aeno 'e osko yupeahngʉneni maitan'e.>
38isi yainca: <nooe'oca, os'o taa'uzva!> micu m'ohkuyu to iesu.
39yainca to iesu: <na atuhcusi ho mi'o cmʉ'ho ta hpʉhpʉngʉ te'o yʉsvʉtʉ, poa bohngʉ 'omo bʉkngʉ, i'omo bohngʉ, te apuyu bʉkngʉ.>
40ihe talʉi tomo yonto ic'o ci coufalisai 'e e'e eni, cu tuocosi 'o iesu: <oskon'asi tamza no bʉkngʉ a'mi?>
41yut'inga to iesu: <hocimu bʉkngʉ, uk'a naci temu kuisi; ho imueno yainca <<mimzan'a teosansano>>, mimuc'on'a yaa kuisia.>
Currently Selected:
yohane 9: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
