yohane 10

epo'usa no poo'usna moatʉ'nʉ

1i'vaha yainca to iesu: <te'o bumemeala eʉsvʉta muu, i'ola o'te emomio to phingi to poo'usna moatʉ'nʉ ho yʉmeʉmʉ, ho ma'iyo yʉh'ʉtʉ yʉmeʉmʉ, zou thokeainʉ, zou yaksai, 2i'omo mito phingi ho yʉmeʉmʉ, 'aeno lepocengi moatʉ'nʉ. 3i'ola lepocengi phingi; lasi paavneni to phingi. lasi ta'hongi to moatʉ'nʉ 'o fihngausi. lasi etotoyangza 'o ongko to iachisi moatʉ'nʉ, engocha hafa emoyafo. 4lasi engocha e'ohʉ 'o iachisi moatʉ'nʉ, la papoevʉ ta moatʉ'nʉsi; la to'ofeihni 'o moatʉ'nʉsi, maica ho lahe ta'hongi 'o fihngausi. 5o'ala to'ofeihni to o'a ihe honga, la apuyu toekameosʉ, maica o'a lahe ta'hongi 'o fihngau to o'aihe honga.>

6isi mi'usni to iesu ho engha 'e epo'usa eni, at'inghi o'aihe ta'hongi cuma na e'ausnasi.

ʉmnʉ ci leaʉt'ʉcʉ moatʉ'nʉ 'o iesu

7isicu ivaha mi'usni to iesu 'emo botngonʉ ho yainca: <te'o bumemeala eʉsvʉta muu, 'aeno a'o 'o phingi to moatʉ'nʉ. 8'o moso afu'u muyohe a'o zou acʉhʉ thokeainʉ; zou yaksai; o'a lasi talʉi to moatʉ'nʉ. 9zou phingi a'o; inala emomio a'o ho yʉmeʉmʉ, o'ate sokoyu, a'vinano te meelʉ yʉmeʉmʉ ho yuyafo, maezo elʉ no tehe 'oanʉ ci kukuzo. 10yʉmeʉmʉ 'o yaksai, 'alac'oeno meo'eoi, opcoi, eon'oi. na te'o atuhca hioa ho mi'o cmʉ'ho te'o poa elʉ no nsou 'e moatʉ'nʉ, a'vinano zou at'otngaso ci nsou.

11<zou ʉmnʉ ci le'aʉt'ʉcʉ a'o; 'o ʉmnʉ ci le'aʉt'ʉcʉ te mimho nomio ta moatʉ'nʉ ho ciha 'o nsousi. 12'o soskuskunu o'as'a le'aʉt'ʉcʉ moatʉ'nʉ, o'a iachisi nuu 'e moatʉ'nʉ. hoci teolʉ no av'uyʉn'ʉ, tasicu teongasi 'e moatʉ'nʉ ho toekameosʉ; tesicu tʉtpʉta to av'uyʉn'ʉ 'o moatʉ'nʉ, popeoemo'a 'omo botngonʉ ci moatʉ'nʉ. 13cu toekameosʉ 'o soskuskunu, 'ac'oeno'so soskuskunu, o'a lasi angongohia 'o moatʉ'nʉ. 14-15zou ʉmnʉ ci le'aʉt'ʉcʉ a'o. aʉlʉ mais'a 'o amo lasi honga a'o, la'u honga 'o amo. totiski, os'o honga 'o moatʉ'nʉ'u; lahe yaeza honga a'o. te'o mimho nomio ta moatʉ'nʉ ho ciha 'e nsou'u. 16panton'a mocmo ci moatʉ'nʉ'u o'a mo no'ayumonʉ ta poo'usna tan'e, te'o ahtao'te yaeza engocha yuyafo; tahe yaeza talʉi 'e fihngau'u. 'emo yusno taucunu tena tmucni, ho totiski tma'usnu tamo cihi ci le'aʉt'ʉcʉ.

17<isi ngohia to amo a'o; maica os'o mimha ciha 'e iachi'u nsou, akoyu no ivaho mayo no nsou. 18uk'a cite meelʉ ti'eingi ta nsou'u, ma os'o iachia mimha ciha; te'o yaa tonʉ no ciha, te'o maezo yaa tonʉ no tasvoveiya. na eni isi pashʉi to amo'u ho poa hioaneni.>

19'o couyutaya mo ivaho nomio ta e'e tan'e ho yupa 'eehcʉvho. 20ta taicohe 'enepio 'o mo mainca: <maisi cʉnghi no hicu taini! mitacu eʉngcʉ! teeno 'ahʉya talʉi?>

21panto h'unasi cimo mainca: <na isi cʉnghi no hicu ci cou tee no meelʉ mateafo ta mo maica ci e'e! tesieno peelʉi paavi no hicu na mcoo nomo bʉkngʉ?>

hopsʉpseni ta couyutaya

22ne 'elusalemu, cu esmi 'e hiesi no meekayo ta seiten; ne mio mo seolʉa no hosoyʉma. 23'o iesu mo coeconʉ to hocnguha solomong to seiten; 24ihe paikuyungvi to couyutaya 'o iesu, mi'usni ho yainca: <teko ac'ʉha ho homna ho poa ma'pepecvai a'mi? pahsansani a'mi, zou kilisto suu?>

25yut'inga to iesu: <'ao'ucueno eʉsvʉta muu, at'inghi o'a imu taa'uiva. i'e os'o ieni to ongko to amo'u ho hioa ci hi'hioa 'aeno eni nate humzi. 26at'inghi, o'as'a moatʉ'nʉ'u muu, ko'ko o'a imu taa'uzva. 27'o moatʉ'nʉ'u lahe talʉi 'e fihngau'u, os'o yaeza honga; la to'ofeihni a'o. 28os'o pafi to 'auesiesi nsou, o'ate ahtu meaapayo'ʉ; 'upena na siya uk'a ci te meelʉ i'mi ta emucu'u ho ti'einga. 29i'o mo himhohioa ho pafeni a'o ci amo'u mo taicinihe ta acʉcʉhʉ#<i'o mo himhohioa ho pafeni a'o ci amo'u mo taicinihe ta acʉcʉhʉ> panto piyo ci h'unasi ci tposʉ noana'o isi yainca <i'o isi pafeni a'o to hamo mo taicinihe ta acʉcʉhʉ>., uk'a ci te meelʉ i'mi to emucu to amo ho ti'einga. 30'o amo ho a'o. mimza anana'o tmucni.>

31ne mio, mio ivaho mayo to fatu 'o couyutaya tehe tokʉi 'o iesu. 32isi mi'usni to iesu ho yainca: <os'o peispa'teni muu 'e isi skueni to amo'u ci mo man'i ho ʉmnʉ ci hi'hioa; ma atuhcu nenu ci hi'hioa na temu koa mayo ta fatu ho tokʉi a'o?>

33ihe yut'inga: <o'as'a i'e osko hioa ci mo peis'ʉ'ʉmnʉ na imza koa tokʉi ta fatu, mamo i'mi ho osko aokoe'iya 'o hamo! mac'o cou na suu, osko iachia tahamoa si iachi!>

34yaica to iesu: <i'o hoolicumu o'aisis'aeno tposi ho ohsila yaica to hamo <<zou hamo na muu>>? 35ito cohivi 'e e'e ta seiso 'auesiesi o'a te aezuhu; mi'usnu tomo tiou to e'e to hamo ci cou, isin'a yainca to hamo zou hamo na muu. 36inacu a'o, isi epeiya to amo'u a'vinano popeoskuna poa uhta hpʉhpʉngʉ. os'o yainca zou oko to hamo a'o, mainci imu aac'o yainca os'o aokoe'iya 'o hamo? 37hoci'u o'te hioa na lasi hi'hioa to amo'u, o'a temu 'ahʉya taa'uzva a'o; 38hoci zou, 'upena hoci o'te taa'uzva a'o, 'antemueno maka taa'uzva 'e hi'hioa'u, temueno ko'ko peelʉi asansana ho mio a'ʉmtʉ no'ayumonʉ ta nsou'u 'o amo, mi'o maezo no'ayumonʉ to nsou to amo.>

39ihecueno ivaha 'ucia tʉtpʉta 'o iesu, at'inghi mo momeesih'i ta emucuhe.

40mio i'vaho yuovei to apihana to c'oeha to yolutan 'o iesu, uhto ohsila yoni toonono to yohane, micu amiocni ne'e. 41panto botngonʉ ci cou ihe i'ima 'o iesu, yainca: <o'a mosola ahtu peispopo'e 'o yohane, at'inghi ohsila pas'osi 'e cou eni ho yainca na isi afu'a pateafa ci e'e mo acʉhʉ mou'ʉmtʉ.> 42yonto ic'o, mo botngonʉ ci cou 'omo tmaa'uzo to iesu.

Currently Selected:

yohane 10: bsnfe

Highlight

Copy