yohane 13

tonzovi to iesu 'o t'ango to tesi

1auyusi no meem'esa'o, isi cohivi to iesu 'e hiesi no mongoi ta hpʉhpʉngʉ, ho yuovei to amosi. lasi asonghoza ngohia 'omo tma'usnu ta iachisi ci cou, isi ahoza to ahoisi ac'ʉha to ataveisi ho angongohia.

2ne moso toehungu oyofonʉ 'o iesu ho i'o tesisi, isicu atʉkca to 'akuma 'o 'tohʉngʉ to yuta ci oko to saimong ci coukaleo, poacu ma'sansano no phieni 'o iesu. 3cohivi to iesu ho isicu acʉha faeni to amosi na afu'u tonʉ; isi cohivi 'e iachi mo i'mi to hamo, tena yuovei to isi yoni to hamo. 4mo yʉc'ʉ to isi yusuhngi, yunga 'o isi aoskopa, mayo to 'oyomuya ho futneni to cpʉh'osi, 5ataveia hoyuhi to chumu 'o teohku, ahoza tonzovi 'o t'ango to tesi, isin'a paipeapi to 'oyomuya. 6nemo esmi to tuhcu to saimong petelo, yainca to petelo: <nooe'oca, tekon'asi tonzovi co t'ango'u?>

7yut'inga to iesu: <'e os'o hioa, o'a mocu teko cohivi maitan'e, takola aopoha'va cohivi.>

8yainca to petelo: <o'a te'os'a ahta poa tonzovneni suu 'e t'ango'u!>

yainca to iesu: <honci'u o'te tonzovi si t'angosu, uk'a nacu ci teto yupa natʉ'ca.>

9yainca to saimong petelo: <nooe'oca, hocieno maica, o'a anouc'o 'e t'ango'u, moeza to'upi 'e emucu'u ho i'e fnguu'u!>

10yainca to iesu: <'e mohcu aono ci cou micu aucunu cofkoya 'e feangosi, tecuc'o tonzovi si t'ango#panto piyo ci tposʉ noana'o uk'a ci <tecuc'o tonzovi si t'ango>.. mimu cofkoya, at'inghi o'a mo acʉhʉ cofkoya 'emo macicihi.> ( 11isicu cohivi to iesu zou siya na tena himhohioa ho phieni 'e feangosi, ko'ko isi yainca <o'a mo acʉhʉ cofkoya 'emo macicihi>.)

12cu toepʉngi to iesu 'o t'angohe, paceofa 'o isi aoskopa, cu suovei to isi yusuhngi. isi tuocosi 'o tesi: <'o os'o hioa ne mihnan'a, imu nana ta'sansana? 13lamu einva a'o ho ta'una no lema'cohio, nooe'oca, mio emzo eni, maica ho 'ami'oeno anana'o maica. 14zou nooe'ocamu a'o, lema'cohio muu, os'on'a tonzovi si t'angomu, ntemula maezo yupa toat'ango. 15os'o p'eac'eni ta temu la hu'ofeihni, poa mais'a ta os'o hioaneni muu na temula hioa. 16te'o bumemeala eʉsvʉta muu, o'ate yuepehe no tauke na soskuskunu, 'ola popeoskuna o'ate meoisihe tomo popeosmuhnu ci cou. 17ho isieno ta'sansana 'e hi'hioa eni, honcimu peelʉi peis'ofeihni a'ʉmtʉs'a ʉm'ʉmnʉ!

18<'e e'e'u eni o'a isi paiemʉhi muu ho engha; os'o honga 'o os'o epeiya ci cou. at'inghi 'o isi engha to seiso ho yainca <<'o mimza oepoepohʉ bonʉ ci cou mo boemi to t'angosi ho po'poti a'o>> 'e e'e eni 'ate ahtuo'te esmi. 19ho o'a mocu te esmi 'e hi'hioa eni te'o aueva eʉsvʉta muu, ho tac'u esmi 'e hi'hioa eni akoeva no poa taa'uzveni muu na a'o zou <<invonvo yayo 'auesiesi yayo>>. 20te'o bumemeala eʉsvʉta muu, namo afu'u aʉt'ʉt'ʉcʉ ta os'o popeoskuna, 'aisieno aʉt'ʉt'ʉca a'o; namo aʉt'ʉt'ʉcʉ a'o, 'aisieno aʉt'ʉt'ʉca 'omo popesmuhnu a'o ci ic'o.>

eyoca to iesu ho tena phieni

(matai 26:20-25; maluko 14:17-21; luka 22:21-23)

21eepʉnga to iesu 'e e'e eni, mo na'no nac'o 'o 'tohʉngʉsi, cu pateafa: <te'o bumemeala eʉsvʉta muu, ta taicomu mo cihi ci cou tesi phieni a'o.>

22mo yupa mimi'usnu 'o tesi, o'a ihe cohivi siya na isi pas'usni ho ko'ko yainca. 23ta taico ta tesi panto cihi ci lasi afnasa ʉmnʉa to iesu, mo suchipi to iesu. 24mo buhpe'pi'i 'o saimong petelo, yainca: <tuocosi zou siya co isi pas'usni.>

25'o tesi ic'o cu aha'o smacmu'u to iesu, tuocosi: <nooe'oca, zou siya?>

26yut'inga to iesu: <te'o pahsieveni 'emo coni ci pang ho faeni no siya, 'aeno ic'o.> eepʉnga 'e e'e eni, mo mayo to pang 'o iesu ho pahsieveni, faeni to oko to saimong ci yuta to coukaleo. 27ne isicu tiova to yuta 'o pang, cu cʉnghʉ to feangosi 'o satan. yainca to iesu: <'o teko hioa, aupcieva hioa!> 28'omo yusuhngu ci cou uk'a cimo tma'hongʉ cuma na e'ausnasi ta e'e to iesu. 29maica hola le'aʉt'ʉcʉ peisu 'o yuta, ihe ta'unano isi eutotaveiya to iesu ho poa mhino note tititha ci macucuma hote meesi, hocieno poa mahafo no macucuma ho aangaezneni tomo thi'cia ci cou.

30ne isicu ana to yuta 'o pang, cu osni yuyafo. ne mio mo seolʉa no feʉngna.

faeva ci mashʉyʉ

31ataveisi ne micu yuyafo 'o yuta, yainca to iesu: <maitan'e micu mayo no psoevohngʉ 'e okocou; 'o psoevohngʉ to hamo yaeza husansana ta feango ta okocou. 32ho isicueno ieni ta feango ta okocou ho husansana na psoevohngʉ to hamo, tesi yaeza iachia poa husansaneni na psoevohngʉ ta okocou, a'vinano te osnia poa psoevohngʉa. 33mao'o'oko, o'a namo man'i na hiesi no te'o hia no'upu muu. tenamu i'ima a'o; at'inghi te'o eʉsvʉta muu maitan'e, aʉlʉ maito o'u eʉsvʉta to masoso'ehti to couyutaya: <<i'o te'o usa, o'a temu peelʉi usa.>> 34te'o fii ta mo faeva ci mashʉyʉ: la yupa himngonghi. la'u yainenu na la'u hia ngohia muu, temu la maicac'o ho yupania himngonghi. 35hocimula yupania himngonghi, tehecu cohivi ta yatatiskova ho zou tesi'u na muu.>

eyoca to iesu ho tasi meoo'te honga 'o petelo

(matai 26:31-35; maluko 14:27-31; luka 22:31-34)

36tuocosi to saimong petelo 'o iesu: <nooe'oca, teko uhnenu?>

yut'inga to iesu: <i'o te'o usa, o'a mocu teko meelʉ to'ofeihni a'o maitan'e, at'inghi takola to'ofeihni a'o no ataveisi.>

37yainca to petelo: <nooe'oca, mainci o'temocu meelʉ to'ofeihni suu maitan'e? te'o kaebʉ hoci'u nomio suu ho ciha 'e nsou'u!>

38yainca to iesu: <teko a'ʉmtʉ mici nomzi a'o ho ciha si nsousu? te'o bumemeala eʉsvʉta suu, auyusi no muni 'o teo'ua, tako i'toteuha meoo'te honga a'o.>

Currently Selected:

yohane 13: bsnfe

Highlight

Copy