yohane 12

yone potaniya ho noa siesa to s'os'o

(matai 26:6-13; maluko 14:3-9)

1minmʉhi to auyusi no meem'esa'o, mo esmi ne potaniya 'o iesu ('ai'o ohsilaeno yoni to iesu ho poa smoevovei 'o lazalu). 2panto mo yone'e ho ayocneni to tesi oyofona to iesu; mo to'usnu aʉt'ʉt'ʉcʉ 'o maata, 'o lazalu ho i'o mocmo cimo cmʉcmʉ'ho mo o'upu to iesu ho bonʉ. 3ne mio, 'o maliya mo mahafo to cono pania cimo sopepea ci konamusngau no naata 'o maliya, hoyuha to t'ango to iesu, isicu yomza to f'ʉsʉsi ho pahisi; mo meingcʉngcʉ to 'ayumona to emoo 'o namusngau. 4'omo cihi to tesi to iesu. 'ai'o tenaeno himhohioa ho phieni 'o iesu ci yuta ci coukaleo, isi yainca: 5<mainci o'te phieni 'e konamusngau ho mayo note se'tueva ci peisu ho aangaeza tomo thi'cia ci cou?> 6'e e'esi eni, o'a isis'a a'ʉmta ta'cingha 'omo thi'cia ci cou, mamo maica homo e'oyu; la le'aʉt'ʉcʉ to peisu, asngʉcʉ yu'siseiti to toehungu peisu.

7at'inghi isi yainca to iesu: <poa maino koyusi! na eni isi songacva ho ayocneni titha ho tena hiesi no soʉlʉlʉa a'o. 8la asngʉcʉ yaa no'upu muu cila thi'cia ci cou, at'inghi o'atemu asngʉcʉ meelʉ no'upu a'o.>

ta'koeva no opcoza 'o lazalu

9botngonʉ ci couyutaya ihe tac'ʉhi homo yone potaniya 'o iesu, micu uhne'e. o'a anou nomio no baito to iesu, ihe yaeza 'ucia aiti 'o ohsi i'mi no mcoi ho poa smoevovei to iesu ci lazalu. 10ko'koeno, 'o masasaisicoo ihe ta'koeva no pot'upa 'o lazalu, 11maica homo botngonʉ ci couyutaya mo nomio to lazalu ho mongoi, ho tmaa'uzo to iesu.

taotofsi'i ho yʉmeʉmʉ ne 'elusalemu

(matai 21:1-11; maluko 11:1-11; luka 19:28-40)

12cu mivahi, botngonʉ cite uhne 'elusalemu ho toa meesi ci cou ihe tac'ʉhi tee yʉmeʉmʉ ta hosa 'o iesu. 13micu mayo to ehʉngʉ no ehufu ho yungeova, moozoyʉ ho mainca: <tohmomoengʉ to hamo! tooyokeoi'sio to hamo 'emo boemi no ongko to nooe'oca ho cmʉ'ho! tooyokeoi'sio to hamo 'e honte ta 'isolaelu!>

14mo elʉ tomo coni ci lova 'o iesu, cu smopayo, aʉlʉ maito isi tposi to seiso:

15mao'o'oko ta hosa ta sii'an.

'ote smoyo,

aiti. si hontemu

mo smopayo ta oko no lova ho esmi!

16to ahoisi, o'a ihe ta'hongi ta tesisi na e'a'ausnasi tan'e, ac'ʉhʉ ne mohcu mayo to psoevohngʉ 'o iesu cu petohʉya talʉa 'o e'e to seiso ho isi pas'usna to iesu, a'vinano micu a'ʉmtʉ maito e'e ho hioa.

17ne ohsi eyoho'a to iesu 'o lazalu, poa i'mi to mcoi ho smoevovei, ho emoyafo to heuf'a, 'o moso no'upu to iesu cimo botngonʉ ci cou ihecu psoyom'a 'e ihe aiti. 18botngonʉ ci cou 'omo nomio no tmac'ʉhʉ no hiasi peispopo'e, mo acʉhʉ yungeou to iesu. 19mo yupa mainca 'o coufalisai: <kaebʉc'o a'ʉmtʉ uk'a ci a'a'ausnato. teko aiti, 'e mauhpʉhpʉngʉ cu acʉhʉ to'ofeihni ta iesu!>

mo m'eya baito to iesu 'o coungilisia

20to taicosi to homeesia, tamo uhta 'elusalemu ho i'upu m'ohkuyu ci cou, mo piyo 'o coungilisia. 21mo esmi ho biebimi to fuili ci couposaita ne ngalilaya, ho yainca: <sensei, mimza mici baito to iesu.>

22mo uhto 'antole 'o fuili ho eʉsvʉta, cu yuyuso ho eʉsvʉta to iesu. 23yainca to iesu: <micu esmi 'e hiesi no mayo no psoevohngʉ 'e okocou. 24te'o bumemeala eʉsvʉta muu, 'emo coni ci teusu no heome hoci o'te su'ta ceoa, ho mcoi, teec'o asngʉcʉ coni ci teusu; hoci mcoi, te omcu tamo man'i ci teusu. 25i'ola anga ngohia 'e iachi nsou, te payo'a na nsou; i'ola yonta hpʉhpʉngʉ ho mimha ciha 'e iachi nsou, namate nongaco na nsou ho no'auesiesi. 26siya nate fifiho a'o, te to'ofeihni a'o; hoci'u yonenu, te maezo yonenu na soskuskunu'u. namo fifiho a'o ci cou, 'atasi ahtao'te angongohi to amo'u.>

engha to iesu na tesi hia mcoi

27<maitan'e mo ma'tipvongʉ co 'tohʉngʉ'u, te'o av'a te ʉmnʉ? nteenana ʉmnʉ hoci'u mi'usnu to amo ho m'eya to'usni ho mongoi ta hie homo maica? at'inghi 'aeno'so 'e hie eni na koa'u uhtan'e, te miya 'emo maica ci 'atutumio. 28amo, teko'so poa psoevohngʉ na ongkosu!>

ne mio, panto fihngau cimo i'mi ne pepe, mainca: <os'ocu poa psoevohngʉ co ongko'u, teen'a i'vaho psoevohngʉ!>

29ihe talʉi tomo yac'ʉ to ic'o ci botngonʉ 'e fihngau eni, yainca: <mo muni co ak'engʉca!>

pantomo mainca: <panto tensi ci isi yupeahngʉneni!>

30at'inghi isi mi'usni to iesu ho yainca: <'e fihngau eni o'a mo mi'usnu a'o, mamo mi'usnu muu ho muni. 31'e hpʉhpʉngʉ maitan'e tee tiou no yʉsvʉta; 'ela aʉt'ʉcʉ ta hpʉhpʉngʉ maitan'e tec'u noa popuya. 32hotena i'mi ta ceoa ho hoepzeni a'o, tena'u tmas'usnu tamo botngonʉ ci yatatiskova ho poa ma'hi'usnu a'o.> ( 33'e e'e eni isi envonva te mainenu na tesi hia mcoi.)

34ihe yut'inga ta mo botngonʉ: <'o hoolicumia isi eʉsvʉta a'mi, 'o kilisto te 'auesiesi yayo; mainci osko yainca te ahtao'te hoepzeni na okocou? zou siya 'e okocou eni?>

35yainca to iesu: <hote yonta taicomu 'e tiskova o'anate nona'o, temu ieni ho mon'a yaa tiskova ho emo'cʉ'cʉnʉ, ci tesis'a teov'oha no voecʉvcʉ na muu, maica inala coeconʉ nomo voecʉvcʉ ci cou o'atesi cohivi na tesi emo'a'ausna. 36ieni ho mon'a yaa tiskova ho tmaa'uzo ta tiskova, ko'ko meelʉ cou ta tiskova na muu.>

o'te tmaa'uzo ci couyutaya

eepʉnga 'e e'e eni, cu mongoi 'o iesu ho nootoefʉngʉ. 37mo e'vono yonta tuhcuhe ho man'i 'o isi hioa ci po'e, o'a ihec'o h'unasa taa'uzva. 38na eni isi miya 'o nia e'e to eyongensa 'izaya:

nooe'oca, siya nate tmaa'uzo ta ito psoyaska ci e'e?

na tonʉ to nooe'oca te pa'teni no siya?

39na 'o'emamzʉ no ko'ko o'amihin'i taa'uzva, ohsi yaeza yainca to 'izaya:

40isicu poa bʉkngʉ to hamo si mcoo hin'i,

poa yatunga na 'tohʉngʉhin'i,

ci tes'a teolʉ si mcoo hin'i,

ma'sansano na 'tohʉngʉhin'i.

ko'ko isi yainca to hamo: o'a tehin'i miezuhu mi'usnu a'o,

poa aotothomneni a'o na hin'i.

41ho isi e'e to 'izaya eni mo maica ho isi teolʉi 'o psoevohngʉ to iesu, isicu pas'usna ho engha.

42e'vono maica, to 'ayumona to masoso'ehti to couyutaya mio maezo 'enepio 'omo tmaa'uzo to iesu, la yumzo to coufalisai, o'ala apa'to eh'ʉtʉ, ci tehes'a popeoyafa ta kaitoo. 43na kaebʉ hola emomoengʉa ta cou la tosa'ohe no emomoengʉa to hamo.

'o e'e to iesu te yʉsvʉta 'e cou

44mo tmunoi moozoyʉ 'o iesu: <namo tmaa'uzo a'o, o'amo anouc'o tmaa'uzo a'o, isi yaeza taa'uzva 'omo popeosmuhnu a'o ci ic'o. 45namo teolʉ a'o, isi yaeza teolʉi 'omo popeosmuhnu a'o. 46te'o tiskova, cmʉ'ho ta hpʉhpʉngʉ, akoeva no o'te poa yono voecʉvcʉ namo afu'u tmaa'uzo a'o. 47inamo tmalʉ ta e'e'u ho o'te noyʉci, o'ate'o yʉsvʉta. na atuhcusi ho mi'o cmʉ'ho o'amo yono yʉsvʉtʉ ta yatatiskova, ma te'o to'usni 'e yatatiskova. 48namo bʉʉpsʉpʉ a'o, o'te tiou ta e'e'u ci cou panto tena yʉsvʉtʉ; no puesona ta hie, 'aeno 'e os'o afu'a engha ci e'e tasila yʉsvʉta! 49maica uk'a ci os'o ahta ieni ta iachi'u ho mo'engho no cuma, ma i'omo popeosmuhnu a'o ci amo isi pashʉi a'o ho mo'engho no cuma, engha na cuma. 50os'o cohivi 'o pashʉyasi te mahafo no 'auesiesi nsou. ko'koeno, i'e os'o engha 'aeno aʉlʉ 'o isi poa engheni to amo'u.>

Currently Selected:

yohane 12: bsnfe

Highlight

Copy