sitoo 4

yonto ngikai 'o petelo ho i'o yohane ho noa yʉsvʉta

1ne mon'a seolʉa no mi'usnu to botngonʉ ho aomotʉ'ʉ 'o petelo ho i'o yohane, panto piyo ci saisi#<saisi> panto piyo ci h'unasi ci tposʉ noana'o isi yainca <saisicoo>., kengsacu to seiten, ho i'o cousatukai mo aemo'au esmi. 2maica 'emo yoso ci sitoo mo mo'ma'cohio ta cou ho e'u'usnu to smoevovei ci hi'hioa, epeaska 'o iesu homo i'mi to mcoi ho smoevovei, 'emo piyo ci cou mo kuici sʉsʉ'no, 3ko'kocu tʉtpʉta 'emo yoso, poekotva to poo'usna poc'ʉha no mivahi, maica mohcuso voecʉvcʉ ne mio. 4at'inghi i'o moso tmac'ʉhʉ ta e'e mo botngonʉ 'o mohcu tmaa'uzo, i'oc'o haahocngʉ, mo nia'te posiyoemohʉ.

5cu mivahi, 'o masoso'ehti to couyutaya, coolo, ho i'o lema'cohio seiso mo yu'eteuyunu ne 'elusalemu. 6'o taisaisi ci 'aana, ho i'o kaiyafa, yohane, 'alisanta, ho i'o ma'o'oahngʉ to taisaisi mo acʉhʉ su'upu. 7ihe poa yac'ʉ to tuhcuhe 'o sitoo, tuocosi: <mimu biftongʉ no tonʉ no cuma, boemi no ongko no siya ho hioa eni?>

8isi nongcʉngcʉ no seilei 'o petelo, yut'inga ho yainca: <'e masoso'ehti ho macocoolo, 9ho mimza noa tuucocosi maitan'e. hoci zou i'omo pi'o ci cou mo mainenu na hiasi yov'o. 10na muu ho i'e afu'u cou'isolaelu ntemu acʉhʉ bochio: 'e cou eni mo yac'ʉ ta tuhcumu, cu a'sʉftonʉ yov'o, na eni mo i'mi to ongko to nazalo iesu ho yuyafo ci tonʉ; imu spica to zuuzika, at'inghi 'o hamo isicu poa i'mi to mcoi ho smoevovei. 11e'usna ta iesu, ohsi la yainca to seiso:

i'o ohe ciha to lemooyai emoo ci fatu.

micu sotva'esa ci totnguca.

12moc'o i'mi to ic'o na to'usnu; maica 'e yatatiskova ta hpʉhpʉngʉ, uk'a ci isi faeni to hamo ci mocmo ci ongko, poa noe'ocneni a'to ho elʉ no to'usni.>

13ihe aiti ta ngi'in 'o petelo ho yohane homo maica 'o hia 'ʉteʉ, ihe yaeza cohivi ho o'amoso nama tmopsʉ ci cou, ihe a'sʉftona taunona'vʉ, ihecu ta'hongi 'emo yoso ho mosola to'ofeihni to iesu. 14at'inghi, uk'a ci namahe e'e, maica ho ihe aiti 'o isi poa yov'o ci cou mo bi'upu to petelo ho yohane. 15'o mangingi'in ihecuc'o moeza pashʉya ho poa yuyafo to ngikai 'omo yoso, atavei micu toʉsvʉsvʉtʉ, 16yainca: <mate ti'vo'vona na hin'i? 'emo yonta 'elusalemu ci cou ihe toehunga cohivi ho ihe hioa 'e isi taunona'vʉ ci po'e, o'a teto h'unasa peelʉi peecveni. 17at'inghi, akoeva no poa o'te angu psoecocoyʉ ta yatatiskova na eni, 'ateeno at'ingha engahva, poa o'tena 'aoko boemi to ongko to iesu ho mi'usnu ta cou ho mo'engho no cuma.>

18ihecu eoveiya 'omo yoso, engahva 'emo yoso ho poa o'tena 'aoko boemi to ongko to iesu ho epeaski no e'e hocieno mo'ma'cohio ta cou. 19at'inghi, ihe yut'inga to petelo ho yohane: <hote yonto tuhcu to hamo, hoci tmalʉ muu hocieno tmalʉhe to hamo nenusi nate emzo? 'atemu eno iachia hʉsvʉta! 20i'e imza afu'a aiti ho talʉi, o'atemza peelʉi o'te pateafa.> 21ihe i'vaha i'nʉska kuici engahva, ihecu poesih'a, maica ho o'amo elʉ nontehe koa patvovei. 'emo botngonʉ ci cou mo acʉhʉ i'mi tamo yuyafo ci hi'hioa ho tohmomoengʉ to hamo. 22'e isi poa yov'o ta po'e tan'e ci cou micu tomsʉptʉha ta yae'oca.

toehungu 'inoli 'o sinto

23ne ihecu poesih'a 'e petelo ho yohane, osni yuovei to iachihe 'oahngʉ, mi'usnu tamo botngonʉ ho etotoyangza 'o nia maee'e to saisicoo ho ito coolo. 24ihe toehunga talʉi, cu tohmʉskʉ tmunoi 'inoli to hamo ho mainca: <na moso mooyai ta pepe, ceoa, etʉpʉ ho i'e macucuma ta 'ayumonasi ci nooe'oca! 25ohsula ieni to seilei, titha 'o ngayo to soskuskunusu - 'o nia maameoimza ci tavite ho yainca:

mo mainci moozoyʉ 'e yata yafana?

mo mainci ma'koyu tamo peis'ankʉ ci hi'hioa 'e yatatiskova?

26'e honte ta ceoa mo acʉhʉ sikuhcu ho i'eayo;

'ela le'aʉt'ʉcʉ mo maezo yu'eteuyunu,

te suyumo to nooe'oca ho ito isi tohʉsʉi ci kilisto.

27micueno a'ʉmtʉ maica, 'o helote ho i'o pangsiu pilato mo yonta hosa tan'e ho yu'tukosʉ 'o couyafana ho i'o cou'isolaelu, tehe suyumi 'e socofkoya ci soskuskunusu iesu, 'a i'oeno osko epeiya ho p'eyac'a ci kilisto. 28mo yupania yu'tukosʉ, tehe hioa 'o ohsucula noana'va eyoca to tonʉsu ho ito 'tohʉgʉsu ho poa esmi ci hi'hioa. 29nooe'oca, i'o maosmoyohe, teko'so hʉsvʉta, a'vinano poa yaa 'ʉteʉ a'mi, 'aeno 'e soskuskunusu, ho peelʉi psoyaska 'e e'esu. 30teko'so ho'usneni na emucusu ho aotothoma namo tma'congo, a'vinano poa meelʉ biftongʉ to ongko to socofkoya ci soskuskunusu iesu ho hioa na taunona'vʉ ci po'e.>

31cu aepʉngʉ 'inoli, mo tmaot'ou 'o ihe yoni noteuyunu. isi acʉha nongcʉngci to seilei, ahoicu 'ʉteʉ ho psoyaski to e'e to hamo.

toehunga titha 'o yupasʉ

32'emo noteuyunu ci sinto acʉhʉ conci 'tohʉngʉ, uk'acimo cihi cinte tmaachi no iachi macucuma; 'o afu'u macucuma ihe toehunga titha. 33'o masisitoo mo yaa meoino tonʉ ho 'akasi 'o smoevovei to nooe'oca iesu; 'o hamo isi fii no meoino ʉm'ʉmnʉ 'emo macicihi. 34ta taicohe, uk'a cimo aviovio no cuma. i'omo yaa emoo ho ezoyʉ ihecu acʉha phieni. 35'o peisu no huphina no ezoyʉ ihe acʉha faeni to sitoo, maino te titha tamo macicihi ho aangaezeni.

36panto cihi cimo yayo ne saipulusu ci coulevi, zou yosefu 'o ongkosi, ihe tos'ongki to sitoo ho poa panapa (na e'ausna ta panapa zou lepoucufnu); 37isi phieni 'o iachisi ezoyʉ, yaa 'o peisu ho faeni to sitoo.

Currently Selected:

sitoo 4: bsnfe

Highlight

Copy