sitoo 5

'anania ho safuila

1panto mon'a cihi ci cou, zou 'anania 'o ongkosi; mo iepoepohʉ 'o vcongʉsi ci safuila ho ake'i mhino to ezoezoyʉ. 2isi tʉtpʉta 'o mocmo to peisu, faeni to sitoo 'o ang'osʉsi; na eni isi yaeza cohivi to vcongʉsi. 3isi mi'usni to petelo ho yainca: <'anania, mainci poa atʉkceni no satan co 'tohʉngʉsu, poa meknuyu to seilei na suu, tʉtpʉta na mocmo ta peisu ho osko phieni 'o ezoyʉsu? 4ho o'amocu isi phieni 'o ezoyʉ, 'aeno nuusu, ho oskocu phieni, 'aeno maezo nuusu na peisu; mainci miko aac'o bikoyu no peis'usnu maica? o'amikos'a meknuyu ta cou, mamiko meknuyu to hamo!> 5ne isicu talʉi to 'anania 'e e'e eni, cu e'toheʉngcʉ ho mcoi; namo tmac'ʉhʉ ta hi'hioa tan'e ci cou mo acʉhʉ kuici ma'sasmoyo. 6piyo ci yu'fafoinana mo yʉmeʉmʉ, cfua 'o nia feangosi. ngoeyafi cu efo'a.

7cu asonʉ ma'hituyu 'o huomza hie, mo yʉmeʉmʉ 'o vcongʉsi, o'amocu isi cohivi na moso esmi ci hi'hioa. 8isi mi'usni to petelo ho yainca: <eʉsvʉta a'o, na peisu no phieni na ezoyʉmu mio acʉhʉ yontan'e?>

isi yut'inga: <'amio, mo acʉhʉ yontan'e.>

9yainca to petelo: <mainci mimu tohmʉskʉ ho hʉsvʉta 'o piepiya to nooe'oca? aiti. i'omo emuf'o to vcongʉsu ci cou micu yonta phingi, tehe yaeza ngoeyafi suu!> 10mo osni e'puyu to yaa t'ango to petelo hocu mcoi, mo yʉmeʉmʉ 'o yu'fafoinana, aiti ho micu mcoi, cu ngoeyafi, suchipa efo'a to nia vcongʉsi. 11acʉhʉ 'e kiokai ho i'o mo tmac'ʉhʉ ta hi'hioa tan'e ci cou mo acʉhʉ kuici ngoheʉngeʉ.

taunona'vʉ ci po'e

12'o masisitoo mo yonta 'ayumona tamo botngonʉ ho man'i 'o ihe hioa ci po'e ho taunona'vʉ ci hi'hioa; 'o afu'u sinto acʉhʉ tohmʉskʉ 'o 'tohʉngʉhe ho yu'eteuyunu to hocnguha solomong. 13ihe e'vono einva tamo botngonʉ 'o sitoo, at'inghi 'o o'a sinto ci cou o'amo smeecʉ'ho ohcum'u. 14ne mio 'o mo tmaa'uzo to nooe'oca ci cou mo ausuhcu botngonʉ, mo yaa haahocngʉ ho maamespingi. 15maica homo man'i 'o ihe hioa to sitoo ci po'e, panto cou ihe ngoevi 'omo tma'congo ho hafa uhto ceonʉ, panto isi siya to hopo, siya to sospoya, tata'za ho tena sucaefi 'o petelo, tena pe'isihngi to feangohe 'o ongkosi. 16panto mon'a botngonʉ ci cou mo mahafo tomo tma'congo ho i'o isi cʉnghi no h'aokuv'o. mo i'mi to mayoyou to cum'usi ne 'elusalemu ho esmi; 'emo maica tma'congo ci cou mo acʉhʉ ʉmnʉ ci yov'o.

akuzkuzoa 'o sitoo

17'o taisaisi ho i'o lahe eahafa, 'ai'oeno cousatukai to ic'o, ihe kuici so'eububut'ua 'o sitoo, ko'kocu esvʉta no aut'ot'ou. 18ihe tʉtpʉta 'o sitoo, poekotva to poo'usna. 19at'inghi to yofnasi, isi paavi to tensi to nooe'oca 'o phingi to poo'usna, hafa yuyafo 'o sitoo, mi'usni ho yainca: 20<temu emo'usnu maita'e, yac'ʉ to 'ayumona to seiten, mi'usnu to botngonʉ ho epeaska 'emo e'usnu to faeva nsou ci e'e.> 21cu tmalʉ ta e'e tan'e 'o sitoo, ne tec'u mon'i tiskova cu yʉmeʉmʉ to seiten, ahoi mo'ma'cohio to cou.

'o taisaisi ho i'o lahe eahafa ihe eteuyuna to ngikai 'o afu'u coolo to yutaya ho toehungu toʉsvʉsvʉtʉ, atavei smuhnu ho uhto poo'usna tehe e'eafi 'o sitoo. 22at'inghi ne micu sʉc'ʉhʉ 'o kengsacu, aiti o'amo yonto poo'usna 'o sitoo, cu yuovei to ngikai ho eʉsvʉta: 23<ne mimzacu sʉc'ʉhʉ to poo'usna, aiti isi amamahtʉica pomʉti 'o phingi, yonto yafana 'o kengsacu ho noyʉyʉci; at'inghi ne imzacu paavi 'o phingi to poo'usna, aiti uk'a cimo mako cihi cinte no'ayumonʉ!> 24ne ihecu talʉi to taicini to kengsacu ho ito saisicoo 'e e'e eni, mo kuici yamci, o'aihe cohivi cuma na ihe elʉa ci hi'hioa to sitoo. 25ne mio. cihi ci cou mo yʉmeʉmʉ ho eʉsvʉta: <i'o ohmu poekotva to poo'usna ci cou mo seolʉano yac'ʉ to seiten ho mo'ma'cohio to botngonʉ!> 26micu engochʉ to soskuskunu 'o taicini to kengsacu ho usa, hafa 'o sitoo. o'amo ake'i boepapak'i, maica mo smoyo to botngonʉ hocihe tokʉi no fatu.

27ne ihecu hafa sʉc'ʉhʉ 'o sitoo, ihe poa bitaico to ngikai. cu ahoza tuucocosi to taisaisi. 28isi yainca: <omzacu eyʉyʉci potani na muu, 'ote boemi ta ongko tan'e ho mo'ma'cohio to cou, nama imu psoengaboa ta 'elusalemu 'e imu eʉsvʉsvʉta ci ceoceona, a'vinano 'ucia ho'usneni ta feango mia na hmuyu no opcoza ta cou tan'e!>

29ihe yut'inga to petelo ho ito mocmo ci tesi: <temia asansano meo'uzo to hamo, o'a te meo'uzo ta cou. 30i'o imu spica to zuuzika ci iesu, 'o hamo to nia maameoito isicu poa smoevovei. 31isi hoepzeni to hamo. poa yonto iachisi vhona tee tmuoteuyuna. poa leto'usnu. akoeva no poa yaa hiesi no ma'vovei 'e cou'isolaelu. poa peteongasneni na kuisihe. 32'aeno a'mi 'ete 'akasi ta hioa tan'e; i'o isi faeni ci seilei tomo tmaa'uzo to hamo mo maezo i'upu a'mi ho 'akasi.>

33ihe talʉi to ngi'in to ngikai 'e e'e eni, mo kuici ma'sʉsʉ'no, cu ta'sansana te opcoza 'o sitoo. 34at'inghi, pantomo cihi ci coufalisai to 'ayumonahe, zou kamale 'o ongkosi, lahe couno einva to cou ci lema'cohio hoolicu; mo yonto ngikai ho yac'ʉ, isi cucufni ho poa e'eafneni 'o sitoo, 35micu mi'usnu to ngi'in ho aomotʉ'ʉ: <mao'oahngʉ ta 'isolaelu, temu afnaso bumemealʉ na temu ti'a'ausna tamo piyo ci cou tan'e! 36ne auyusi, mosola yʉc'ʉ 'o tuta ho meefʉc'ʉ efnaso, moso asonʉ se'sʉpta 'o moso tmaa'uzo ho to'ofeihni, ohela ataveiya opcoza. i'o moso tmaa'uzo ci cou mo mais'a yuansou ho apeaski, 'onia 'afeo'fu'u mohcu aapayo'ʉ. 37ataveisi moso i'vaho yaa coungalilaya ci yuta ne oho seolʉa no teyai tposʉ to macocono emoo mo yʉc'ʉ, yaeza eepecvaza 'o mo 'enepio ci cou ho poa to'ofeihni; ohe yaeza opcoza, i'o moso mee'ofeihni ohoc'o yaeza popeoemo'a; 38'e a'a'ausna maitan'e, te'o eʉsvʉta muu, teav'a mi'usni ho 'ahʉya cumasa, 'ateeno poa maino tehe hioa! na ihe ta'kokoeva ho ina tehe hioa hoci i'mi no 'tohʉngʉ ta cou, 'atena ahtuo'te aon'oi; 39hoci i'mi to hamo, o'atemus'a ahta atpʉta. i'e imu hioa, sokoeva no mimu mihangʉ to hamo!>

ihe tiova to ngikai 'e 'tohʉngʉ to kamale. 40ihecu poa yʉmeʉmʉ 'o sitoo, eobaka ho yaeza pashʉya ho poa o'tena boemi to ongko to iesu ho eʉsvʉsvʉtʉ, ataveiacu poesih'a. 41mongoi to ngikai 'o sitoo, maica ho mo nomio to ongko to iesu ho noa aokoe'iya, mo na'no kaebʉ 'o 'tohʉngʉhe. 42mioc'o a'cʉ'cʉnʉ huhucmasi yonto seiten ho ito maemoemoo o'te tosvo ho mo'ma'cohio to cou, psoyaska 'omo natʉ'ca 'o iesu kilisto ci fukuin.

Currently Selected:

sitoo 5: bsnfe

Highlight

Copy