Génesis 47
47
Joseqa faraonwan parlan
1Chaymanta Joseqa faraonman willaj rerqa: Wawqeykuna, tatay ima Canaanmanta chayamunku. Paykuna ovejankuwan, wakankuwan, tukuy imankuwan ima Gosenpiña kashanku, nispa. 2Chantá José wawqenkunamanta phishqata ajllaspa, faraonman rejsichinanpaj pusarqa. 3Faraontaj paykunata taporqa: Imatataj ruwayta yachankichejri? nispa. Paykunataj kuticherqanku: Noqaykoqa ñawpa tatayku jina ovejata uywaspa kawsayku. 4Noqayku kayman tiyakoj jamuyku ari, imaraykuchus Canaanpeqa manchay yarqhay kashan, uywaykupaj pastollapis mana kanchu. Chayrayku wiraqochíy, nirikusuyta munayku, ama jina kaspa, Gosenpi tiyarichinawaykuta, nispa.
5Chaymanta faraonqa Joseta nerqa: Tatayki, wawqeykikuna ima qanwan tiyakoj jamuchunku. 6Egipto suyoqa makiykipi kashan. Tatayki, wawqeykikuna tiyakunankupaj aswan sumajnin kaj jallp'ata qoy. Gosenpi tiyakuchunku. Chantá sichus paykuna ukhupi aswan yuyayniyoj kasqankuta qhawanki chayqa, uywayta michinankupaj churanki, nispa.
7Chantá Joseqa tatan Jacobtañataj faraonman rejsichinanpaj pusarqa. Jacobtaj faraonta jatun respetowan napaykorqa. 8Faraontaj payta taporqa: Mashkha watayojñataj kankiri? nispa.
9Jacobtaj faraonta nerqa: Kayman jaqayman purispa kasqayqa ña 130 wataña kashan. Pisilla chaypis, kawsayneyqa llakiylla karqa. Chaywanpis ñawpa tataykuna mashkha unaytachus kawsasqankumanqa niraj chayanirajchu, nispa. 10Chaymanta Jacobqa faraonta saminchaytawan, manchay respetowan ñawpaqenmanta llojsiporqa.
11Chantá José faraonpa nisqanman jina, tatan, chantá wawqenkuna ima tiyakunankupaj Egiptomanta sumajnin kaj jallp'ata qorqa. Ajinamanta tatan Jacob, wawqenkuna ima Ramesés cheqanejpi jallp'ayoj karqanku. 12Jinallataj Joseqa sapa aylluman mikhunankupaj qorqa mashkhachus kasqankuman jina.
13Mikhunamanta pisichikuna anchapuni karqa, ni mayqen suyupi runapaj mikhuna kasqanrayku. Chayrayku Egiptopi, jinataj Canaanpi tiyakojkunaqa yarqhaymanta wañusharqankuña. 14Jinapi Egipto llajtayojkuna, jinataj Canaán llajtayojkuna mikhuyta rantispa, qolqe pagasqankuta José tantarqa. Chantá faraonpa kamachinan wasipi waqaycharqa. 15Chaywanpis Egiptopi jinataj Canaanpipis rantinankupaj qolqe tukukapojtin, runakunaqa Joseman rispa, nerqanku: Mikhunata qowayku. Qolqeyku tukukusqanrayku, yarqhaymanta wañojta qhawakullawasqaykuchu? nispa.
16Josetaj paykunata nerqa: Sichus manaña qolqeykichej kanchu chayqa, uywaykichejta apamuychej ari, noqataj mikhunata qosqaykichej, nispa. 17Jinata nejtintaj, runakuna caballonkuta, ovejankuta, wakankuta, chantá burronkuta ima Joseman apamorqanku. Josetaj uywankumanta chay runakunaman uj wata junt'ata mikhunankupaj qorqa.
18Chay wata tukukojtintajrí, runakuna ujtawan Joseman rispa, nerqanku: Mana qanmanta imatapis pakayta atiykumanchu, wiraqochíy. Manaña qolqeyku tiyapuwaykuchu, uywaykupis qanpataña. Mikhunamanta paganaykupaj manaña imaykupis kanchu. Jallp'aykuwan, noqaykuwan imallaña kashayku. 19Yarqhaywan wañojta ama qhawakullawaykuchu ari. Noqaykuta, jallp'aykutawan rantikapuwayku. Jinamanta faraonpa wata runan kasqayku. Jallp'aykutapis payllapajña llank'apusqayku. Tarpunaykupaj mujullata qowayku, ama wañunaykupaj, jallp'aykutaj ama ch'inman tukunanpaj, nispa.
20Ajinata Joseqa Egipto suyumanta tukuy jallp'ata faraonpaj rantirarqa. Yarqhay ancha kasqanrayku, Egipto llajtayojkuna jallp'ankutapis venderqanku. Ajinamanta jallp'ankoqa faraonpa makinman chayarqa. 21Tukuynin Egiptopi kaj chhika runakunataj wata runanman tukorqanku. 22Joseqa sacerdotekunaj jallp'allankuta mana ranterqachu. Paykuna kawsanankupaj faraón qosqanrayku, mikhunanku kallarqa. Chayrayku paykuna jallp'ankuta mana venderqankuchu.
23Chaymanta José runakunata nerqa: Kunanqa qankuna, jallp'aykichejwan imaqa faraonpata kankichej. Noqaqa paypaj ranterqaykichej. Kayqa muju, tarpumuychej. 24Chajrata oqharispaqa, phishqaman t'aqaspa, ujta faraonman qonkichej. Puchojtaj qankunapaj kanqa tarpunaykichejpaj, mikhunaykichejpaj, wawaykichejkuna mikhunankupaj ima, pikunachá wasiykichejpi tiyakunku, chaykunapis mikhunankupaj, nispa.
25Paykunataj nerqanku: Ama wañunaykupaj qanmin yanapawarqayku. Ama jina kaspa, faraonpa wata runanta jina jap'ikapuwayku, nispa.
26Ajinata Joseqa Egiptopi uj kamachisqata orqhorqa, chajrata oqharisqankumanta phishqamanta ujninta faraonman qonata. Ajina kamachisqa kunankama kashanrajpuni. Sacerdotekunalla mana imatapis faraonman qonankuchu karqa, imaraykuchus paykunaj jallp'anku mana jayk'ajpis faraonpa makinman chayarqachu.
27Israelitakunaqa Egiptopi, Gosén nisqa cheqanejpi tiyakorqanku. Chaypi jallp'ata rantikorqanku, jinataj may chhika wawayoj karqanku. 28Jacobqa Egiptopi chunka qanchisniyoj watata tiyakorqa. Tukuyninpi pay 147 watata kawsarqa.
29Ujpacha Israelqa wañupunan qayllallaña kasqanta reparaspa, Joseta wajyachispa, nerqa: Sichus cheqatapuni munakuwanki chayqa, makiykita khapay chayman churaspa, tiluy imatachus nisusqayta ruwanaykita: Wañupojteyqa, ama ari Egiptopi p'ampawankichu. 30Aswanpis ñawpa tataykunawan tinkukapoj ripojteyqa, qan ayayta Egiptomanta apaspa, ñawpa tataykunaj aya p'ampanankupi p'ampamuwanki, nispa. Josetaj kuticherqa: Ajinata ruwasaj, tatáy, nispa.#Gn 49.29-32; 50.6.
31Chantá Israel ujtawan nerqa: Tiluy, nispa. Josetaj tilorqa. Chaymanta Israel puñunanpi sawnanan chaynejman k'umuykuspa, Dioswan parlarikorqa.
Currently Selected:
Génesis 47: DQPC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
