Lucas 24

Jesús kawsarimpun

(Mt 28.1-10; Mc 16.1-8; Jn 20.1-10)

1Semana qallariy p'unchayta chhapu chhapullataraj, chay warmikuna, maypichus Jesús p'ampasqa karqa, chayman rerqanku, sumaj q'apashaj jawinata wakichisqankuta apaspa. 2Chayaspataj, aya p'ampanaj punkunpi wisq'ana jatun rumita tijrasqata tariparqanku. 3Chayman yaykuspataj, mana Tukuyta Kamachej Jesuspa ayanta tarerqankuchu. 4Jinallapi paykuna t'ukushajtinku, qayllankupi iskay qharikuna rikhurerqanku, lliphipishaj p'achayoj.

5Chay warmikuna mancharikuspa, pampakama k'umuykorqanku. Chay qharikunatajrí paykunata nerqanku: Imaraykutaj kawsashaj runata wañusqakuna ukhupi mask'ashankichejri? 6Payqa manaña kaypichu, wañusqamanta kawsarimpunña. Imatachus nisorqachej Galileallapiraj kashaspa, chay nisqanmanta yuyarikuychej. 7Pay nerqa: Runaj Churintaqa juchasapakunaj makinman jaywaykonqanku, payta cruzman chakatanankupaj. Chaywanpis kinsa p'unchaymanta wañusqakunaj chawpinmanta kawsarimponqa, nispa.#Mt 16.21; 17.22-23; 20.18-19; Mc 8.31; 9.31; 10.33-34; Lc 9.22; 18.31-33.

8Chaypacharaj chay warmikuna Jesuspa nisqanmanta yuyarikorqanku. 9Aya p'ampanamanta kutimuspataj, chay tukuyta Jesuspa chunka ujniyoj kuraj kachankunaman, wajkunaman ima willararqanku. 10Jesuspa kuraj kachankunaman willajkuna karqanku María Magdalena, Juana, Santiagoj maman María, waj warmikunawan ima. 11Kuraj kachakunapajrí chay warmikunaj nisqankoqa wampoj thawtisqan jinalla karqa. Chayrayku nisqankuta mana jap'ikorqankuchu.

12Chaywanpis Pedro sayarispa, maypichus Jesús p'ampasqa karqa, chay cheqaman usqhayta rerqa. Chay ukhuta qhawaykuspataj, uj cheqapi mayt'una sabanallata rikorqa. Chantá pay ripullarqa chay tukuy imamanta t'ukuspa.

Emausman rina ñanpi

(Mc 16.12-13)

13Kikin p'unchayllataj Jesuspa yachachisqankunamanta iskay risharqanku Emaús sutiyoj ranchoman. Chayqa Jerusalenmanta iskay leguapi jina. 14Rej jinataj paykunapura parlasharqanku chay tukuy ima kasqanmanta. 15Jinallapi mayta parlaspa rishajtinku, kikin Jesús qayllaykuspa, paykunawan khuska puriyta qallarerqa. 16Chaywanpis paykunaj ñawinku chharpuyasqa jina karqa payta mana rejsinankupaj.

17Chantá Jesús paykunata taporqa: Imamantapunitaj chay jinata parlashankichejri? Imaraykutaj llakisqa kashankichejri? nispa.

18Paykunamanta ujnin kaj, Cleofas sutiyoj kuticherqa: Qanllachá mana yachankichu imachus Jerusalenpi kay p'unchaykunapi kasqanmanta, nispa.

19Jesustaj kuticherqa: Imataj karqari? nispa. Chantá paykuna nerqanku: Parlasharqayku imachus Nazaret llajtayoj Jesusta qhatirisqanmanta. Payqa Diosmanta sut'inchaj kaspa,#Mt 21.11; Lc 7.16; 13.33; Hch 3.22. ruwasqanpi, jinataj nisqanpi ima may atiyniyoj karqa Diospa ñawpaqenpi, jinataj tukuy runaj ñawpaqenpipis. 20Chaywanpis kuraj sacerdotekuna, kurajninchejkuna ima payta presochaspa, wañuchisqa kananpaj juchacharqanku. Chaymantataj payta cruzman chakatacherqanku. 21Noqaykurí yuyasharqayku payqa Israel suyuta kacharichinanta. Kunantaj kinsa p'unchayña pasan chay tukuy ima kasqanmanta.

22Chay tukuywanpis, noqayku ukhumanta wakin warmikuna mancharichiwarqayku. Chhapu chhaputa, maypichus Jesús p'ampasqa karqa, chay cheqaman risqanku. 23Chaywanpis Jesuspa ayanta mana tarispa, chayta willaj kutimorqanku. Willallarqankutaj iskay angelkuna paykunaman rikhurisqankuta, chay angelkunataj nisqanku Jesús wañusqamanta kawsarimusqanta. 24Noqaykumanta wakinkunapis aya p'ampanaman rillarqankutaj, paykunapis ch'usajllata taripasqanku warmikunaj nisqankuman jina. Jesuspa ayantarí mana rikusqankuchu, nispa.

25Chantá Jesús nerqa: Ay, chay jina wampu kanaykichejri? Imaraykutaj Diosmanta sut'inchajkunaj tukuy nisqanta mana jap'ikunkichejchuri? 26Manachu Cristo chay tukuyta ñak'arinanpuni karqa, manaraj jatunchasqa kashaspa? nispa.

27Chay ratopacha Jesús sut'inchayta qallarerqa, Diospa Qhelqachisqanpi paymanta imatachus nisqanta, Moisespa qhelqasqanmanta qallarispa, Diosmanta tukuy sut'inchajkunaj qhelqasqankumantawan.

28Mayqen llajtamanchus chay yachachisqakuna risharqanku, chayman chayaspa, Jesusqa aswan karuman rej tukorqa. 29Paykunatajrí Jesusta jark'arqanku: Noqaykuwan qheparikuy ari. Intipis yaykushanña, ch'isiyamonqañataj, nispa. Jesustaj paykunawan khuska wasinkuman rerqa. 30Chantá Jesusqa paykunawan mikhunanpaj tiyarikuspa, t'antata jap'erqa. Chantá Diosman pachis nerqa, partiytawantaj, paykunaman jaywarqa. 31Chay kikinpachataj yachachisqakunaj ñawinku kicharikunmanpis jina paykuna Jesusta rejsikaporqanku. Paytajrí ñawpaqenkumanta ujllata chinkarerqa.

32Jinapi paykuna ninakorqanku: Manachu sonqonchej k'ajarerqa ñanpi parlashawajtinchej, Diospa Qhelqachisqanpa nisqantataj sut'inchashawajtinchej? nispa. 33Chantá chay ratopacha jatarispa, paykuna Jerusalenman kutirerqanku. Chaypitaj Jesuspa chunka ujniyoj kuraj kachankunata tariparqanku, paykunawan khuska kajkunatawan. 34Chay kuraj kachakunataj nisharqanku: Cheqapuni Tukuyta Kamachej Jesusqa wañusqamanta kawsarimpusqa. Simonmanpis rikhurillasqataj, nispa.

35Chantá chay iskay yachachisqakunapis willallarqankutaj imaynatachus Jesús paykunawan ñanpi kasqanta, imaynatatajchus t'antata partishajtin, payta rejsikapusqankuta ima.

Jesús yachachisqankunaman rikhurin

(Mt 28.16-20; Mc 16.14-18; Jn 20.19-23)

36Paykuna chay imakunamanta parlashanankukama, Jesusqa chawpinkupi rikhurispa, paykunata napaykorqa: Diospa sonqo tiyaykuynin qankunawan kachun, nispa.

37Jinapi paykuna manchariywan musphaspa, yuyarqanku uj almata rikushasqankuta. 38Jesustajrí paykunata nerqa: Imaraykutaj mancharikunkichej, sonqoykichejpitaj iskayrayashankichejri? 39Qhawariychej makiyta, chakiyta ima. Noqa kikiy kani. Llankhawaychej, allintataj qhawawaychej, imaraykuchus almaqa mana aychayojchu, nitaj tulluyojchu, noqajta rikushankichej jina. 40Chayta nispataj, Jesús makinta, chakinta ima paykunaman rikucherqa.

41Paykunarí kusiywan t'ukuspa, manaraj pay kasqanta creerqankuchu. Chantá Jesús paykunata nerqa: Manachu ima mikhunapis kaypi tiyapusunkichej? nispa. 42Paykunataj uj chhikan challwa kankasqata jaywarqanku. 43Chayta jap'ikuspataj, Jesusqa paykunaj ñawpaqenkupi chayta mikhorqa.

44Chaymantataj nerqa: Imachus noqata kunankama qhatiriwarqa, chay tukuy ima kananta willarqaykichejña qankunawan kashaspa. Imaynatachus noqamanta willan Moisespa kamachisqanpi, jinataj Diosmanta sut'inchajkunaj qhelqasqankupi, chantá Salmokunapi qhelqasqa kashan, chay tukuy ima junt'akunan karqa, nispa.

45Chantá Jesús Diospa Qhelqachisqanta sut'incharqa yachachisqankuna allinta entiendenankupaj. 46Pay nillarqataj: Ajinata Diospa Qhelqachisqanpi nin, Cristoqa jinatapuni ñak'arinanta, chantataj wañusqakuna chawpimanta kinsa p'unchayninman kawsarimpunanta. 47Chantá Jerusalenpi qallarispa, payta qhatikojkuna Jesuspa sutinpi tukuy runaman willananku karqa Diosman kutirikunankuta, ajinamanta Dios juchankuta pampachananpaj. 48Qankunataj chay tukuy rikusqaykichejmanta testigo jina willaramunaykichej tiyan.#Hch 1.8. 49Noqataj, Tata Diosniy pitachus kachamusunaykichejta nerqa, chayta kachamusqaykichej. Chaykamarí, Jerusalén llajtapi qhepakuychej, janaj pachamanta atiywan kallpachasqa kanaykichejkama, nispa.

Jesús janaj pachaman ripun

(Mc 16.19-20)

50Chaymanta Jesusqa yachachisqankunata Jerusalén llajtamanta jawaman pusarqa Betaniakama. Chaypitaj makinta oqharispa, paykunata samincharqa. 51Paykunata saminchashaspataj, Jesús paykunamanta karunchakorqa, janaj pachamantaj oqharisqa karqa. 52Paykunataj Jesusta yupaychaspa, may kusisqa Jerusalenman kutiporqanku. 53Chaymantataj sapa p'unchay Temploman rispa, Diosta yupaycharqanku.

Currently Selected:

Lucas 24: DQDC

Highlight

Copy