Génesis 42

Joséj wawqenkuna Egiptoman rinku

1Canaanpi tiyakushaspa, Jacob yacharqa Egiptopi trigo rantinapaj kasqanta. Chantá churinkunata nerqa: Imata kaypi ruwashankichej uyaykichejta qhawanakuspallari? 2Willawanku Egiptopi trigo rantikunapaj kasqanta. Chayrayku jaqaymanta trigota rantimuychej, ama yarqhaywan wañunanchejpaj, nispa.

3Chantá Joséj chunkantin wawqenkuna Egiptoman rerqanku trigota rantikoj. 4Jacobrí mana munarqachu Josejpa sullk'an Benjamín paykunawan rinanta, imaraykuchus nerqa: Ichá paytapis ima pasashanman, nispa. 5Jinapi Israelpa churinkuna Egiptoman waj rejkunawan khuska rerqanku, imaraykuchus tukuynin Canaán jap'iypipis manallataj mikhuna karqachu.

6Chaypacha José Egiptopi kamachishaspa, tukuynejmanta jamojkunaman trigota venderqa. Wawqenkunataj chayaytawan, Josejpa ñawpaqenpi pampakama k'umuykorqanku.#42.6 Pampakama k'umuykorqanku: Joséj wawqenkuna mana reparaspalla, Joséj mosqokusqanta junt'asqanku. Gn 37.5-11. 7Josetaj paykunata rikuytawan, wawqenkuna kasqankuta rejsikaporqa. Paytajrí manapis rejsinmanchu jina churakorqa. Chantá paykunata phiñarikuspa jina taporqa: Maymanta qankuna jamushankichejri? nispa. Paykunataj kuticherqanku: Canaanmanta trigota rantikoj jamuyku, tatáy, nispa.

8Joseqa wawqenkunata rejsikaporqa, paykunatajrí mana payta rejserqankuchu. 9Chaymantataj José paykunamanta imatachus mosqokusqanta yuyarikorqa. Chantá paykunata nerqa: Qankunaqa wateqaj jamunkichej, kay suyupi maynejchus as saqerpasqalla kashasqanta yachaj, nispa.#42.9 Egipto suyumanta patanej jina mana allin qhawasqachu karqa. Chayrayku chayninta Egipto suyoj awqankukuna yaykumuyta yachaj kasqanku. 10Paykunataj nerqanku: Mana, wiraqochíy, noqaykoqa trigota rantikojlla jamuyku. 11Tukuyniyku uj runaj wawallan kayku. Noqayku mana millayta ruwaspa puriyta yachaykuchu, nitaj wateqaspa puriykuchu, nispa.

12Josetaj nerqa: Chayqa mana jinachu, qankunaqa kay suyupi mana allin qhawasqa cheqakunata qhawaj jamunkichej, nispa.

13Paykunataj kuticherqanku: Noqaykoqa chunka iskayniyoj kayku, uj tatayojlla, jamushaykutaj Canaanmanta. Sullk'a kaj wawqeykoqa tataykuwan qhepakun, ujnintaj chinkapun, nispa.

14Chaywanpis José nillarqapuni: Niykichejña. Qankunaqa wateqaj jamunkichej. 15Cheqatachus nishasqaykichejta kunanpacha yachasunchej. Faraonpa sutinrayku noqa tiluykichej: Sullk'a kaj wawqeykichejta chayachimunaykichejkama, mana kaymanta llojsinkichejchu. 16Payta pusamoj ujnillaykichej rinkichej, wakinniykichejtaj kaypi preso qhepakunkichej. Chaypi yachakonqa cheqatapunichus parlashankichej manachus, chay. Manachus jina chayqa, qankunaqa wateqaspa purishankichej, nispa.

17Jinamanta José tukuyninkuta kinsa p'unchayta carcelman wisq'acherqa. 18Kinsa p'unchaymantataj José paykunata nerqa: Noqaqa Diosta manchachikuni. Sichus kawsayta munankichej chayqa, kayta ruwaychej: 19Sichus qankuna cheqanta parlaj kankichej chayqa, ujnin wawqeykichejta carcelpi saqeychej, wakintaj ripuychej, aylluykichej mikhunanpajtaj trigota apaychej. 20Chantá kutimunawaykichejpaj sullk'aykichejta pusamuwankichej. Chaypi yachasaj cheqantachus parlashankichej manachus, chayta. Manachus wawqeykichejta pusamunkichej chayrí, wañuchisqa kankichej, nispa. Paykunataj kuticherqanku: Ajina kachun, tatáy, nispa.

21Chantá paykunapura ninakorqanku: Wawqenchejta mana allinta ruwasqanchejmanta noqanchej kay jinata ñak'arishanchej. Khuyayta mañakushawajtinchej, may jinata waqashajta rikushaspapis, mana uyarerqanchejchu. Chayraykumin kay jina llakiy qhatirishawanchej, nispa.

22Chantá Rubén paykunata nerqa: Chayrayku noqa nerqaykichej ama imatapis Joseta ruwanachu, nispa. Qankunatajrí mana kasuwarqankichejchu. Kunanqa wañusqanmanta juchachasqa kashanchej, nispa.

23Paykuna mana yacharqankuchu José imatachus parlasqankuta entiendeshasqanta, imaraykuchus José paykunaman parlasqanta waj runa hebreo rimayman tijrarqa. 24Chantá José qayllankumanta ithiriytawan, maytapuni waqarikorqa. Kutirimuspataj, paykuna rikushajtinku, Simeonta jap'ichispa, wataykucherqa.

25Chantá José kamachinkunata nerqa wawqenkunaj costalninkuman trigota junt'arachipunankuta, qolqe pagasqankutataj sapa ujpa costalninkuman churaykuspa, siraykunankuta. Nillarqataj qoqawitapis churapunankuta, ñanpi mikhunankupaj. Kamachinkunataj Joséj nisqanta ruwarqanku. 26Chaymanta Joséj wawqenkunaqa burronkunaman trigota chajnariykukuspa, riporqanku.

27Maynejpichus samarinankuman chayaspa, wawqekunamanta ujninku costalninta urayk'ucherqa burronta mikhuchinanpaj. Chantá costalninta kicharispa, qolqenta tarerqa. 28Chaymantataj wawqenkunata nerqa: Qhawariychej, qolqeyta kutichipuwasqanku, costalniypi kashasqa, nispa. Tukuyninkutaj chayta rikuspa, mayta mancharikorqanku, paykunapurataj ninakorqanku: Imatataj Dios kayta ruwashawanchejri? nispa.

29Canaanman chayaspa, paykuna imaynachus risqanta tatanku Jacobman willarqanku. 30Nerqankutaj: Egiptopi kamachej wiraqocheqa may phiñasqa parlawayku, tumpawaykutaj llajtankuman wateqaj risqaykumanta. 31Noqaykutaj nerqayku allin runa kasqaykuta, nitaj ni jayk'aj wateqaspa purisqaykuta. 32Willallarqaykutaj uj runaj wawallan chunka iskayniyoj wawqekuna kasqaykuta. Chantá willallarqaykutaj uj wawqeyku manaña noqaykuwanchu kasqanta, sullk'aykutaj qanwan Canaanpi qhepakusqanta.

33Jinata nejtiyku, chay llajtata kamachej runa niwarqayku: Cheqanta parlaj kasqaykichejta kay jinamanta yachasaj: Kaypi noqawan ujnin wawqeykichejta saqeychej, qankunataj aylluykichejpaj trigota apaspa llajtaykichejman kutipuychej. 34Chantá ujtawan kutimuspa, sullk'aykichejta pusamuwankichej. Ajinapi sut'ita yachasaj qankuna cheqanta parlaj kasqaykichejta, manataj wateqaspa purejkunachu. Chantá kay wawqeykichejta kacharipusaj, qankunataj kay llajtapi mana pejpa ima nisqan purinkichej, nispa.

35Chantá Jacobpa churinkuna costalninkumanta trigota jich'ashaspa, ch'uspitapi watasqata sapa uj qolqenkuta tarikaporqanku. Chantá paykuna, jinataj tatanku qolqe pagasqankuta pachanta rikuspa, mancharerqanku. 36Chaymanta Jacob paykunata nerqa: Qankunaqa mana wawayojta saqeshawankichej. José manaña noqanchejwanchu, Simeonpis manallataj kaypichu. Kunanqa Benjamintañatajchu pusankichej? Kay tukuy imaqa llakiywan wañunaypaj jina, nispa.

37Chantá Rubén tatanta nerqa: Benjaminmantaqa noqa cuentallikusaj, kawsashajta kutichimpusqayki. Manachus payta kutichimpusqayki chayqa, iskaynin wawaykunata wañuchiyta atinki, nispa.

38Jacobtajrí nerqa: Benjaminneyqa manapuni qankunawan renqachu. Wawqen José wañupun, kunantaj payllaña qhepakun. Sichus ñanta rishajtiykichej imapis pasanman chayqa, qankuna juchayoj kawajchej machu kayniypi llakiywan wañunaymanta, nispa.

Currently Selected:

Génesis 42: DQDC

Highlight

Copy