Génesis 25

Abraham Ceturawan casaran

(1 Cr 1.32-33)

1Abraham ujtawan casarallarqataj, warminpa sutintaj Cetura karqa. 2Abrahampata qhepa warmin Ceturapi churinkuna karqanku: Zimram, Jocsán, Medán, Madián, Isbac, Súaj ima. 3Jocsanpa churinkuna karqanku: Sebawan, Dedanwan ima. Dedanpa miraynintaj karqanku: Asurim, Letusim, Leumimwan ima. 4Madianpa churinkunataj karqanku: Efa, Efer, Janoc, Abidá, Eldá ima. Chay tukuy Ceturaj miraynin karqanku. 5Abrahamqa churin Isaacman tukuy kapuyninta qoporqa. 6Chay ujnin warminkunapi wawankunamanrí ashkhata waqerqa. Jinataj Abraham manaraj wañupushaspa, waj warminkunapi churinkunata Isaacmanta karuncharqa, inti llojsimuynejman kachapuspa.

Abraham wañupun

7Abrahamqa kawsarqa 175 watata. 8Pay unayta kawsaspa allin machuña wañuporqa. Jinataj wañupuspa ñawpa tatankunaman riporqa.#25.8 Ñawpa tatankunaman riporqa: Pi wañupojtin, israelitakuna ajinata niyta yachaj kasqanku. Paykunaqa pininku wañupojtin, ayllunpa covachanpi p'ampayta yachasqanku. Gn 23.4. 9Chantá churinkuna Isaacwan, Ismaelwan ima tatankoj ayanta Macpelapi chhanka jusk'uman p'amparqanku. Chayqa Mamremanta inti llojsimuynejpi kashan, jitita Sojarpa churin Efronpa jallp'anpi. 10Chay jallp'ata jititakunamanta Abraham rantikusqa. Abrahamta warmin Sara p'ampasqa kasharqa, chayllamantaj p'amparqanku. 11Abraham wañupusqanmanta qhepata Diosqa churin Isaacta samincharqa. Isaactaj “Rikuwaj kawsaj Diospa pujyun” nisqaj qayllanpi tiyakorqa.

Ismaelpa miraynin

(1 Cr 1.28-31)

12Kaykuna Ismaelpa churinkuna kanku. Payqa Abrahampata chantá Agarpatawan churin karqa. Agarqa Egipto llajtayoj kaspa Saraj kamachin karqa. 13Ismaelpa churinkuna paqarisqankuman jina, kuraj kajmanta qallarispa, ajina sutiyoj karqanku: Kuraj kajpa sutin Nebayot karqa, chantá Cedar, Adbel, Mibsán, 14Misma, Duma, Massa 15Hadar, Tema, Jetur, Nafís, Quedemá ima. 16Chaykuna Ismaelpa chunka iskayniyoj churinkunajta sutinku karqa. Jap'iyninku, jarakunanku toldonkunapis sutillankuwantaj rejsisqa karqa. Sapa ujninku ayllunkupi kamachejkuna karqanku.

17Ismaelqa 137 watayoj wañupuspa, ñawpa tatankunaman riporqa. 18Mirayninmanta kajkunataj Javilawan Shurwan tinkuypi tiyakorqanku. Chayqa Egiptoj chimpanpi, Asiriaman rina ñanpi kashan. Paykunaqa wawqenkuna mana munashajtinkupis chaypi tiyakorqanku.

Jacobwan Esauwan paqarinku

19Kaymin Abrahampata churin Isaacpa kawsayninmanta willay. 20Isaacqa Rebecawan casararqa, chaypacha tawa chunka watayoj karqa. Rebecaqa Betuelpa ususin karqa, Labanpa panantaj. Paykunaqa Padán Aram nisqa llajtayoj karqanku. 21Rebeca mana wawayoj kayta atisqanrayku, Isaacqa warminrayku Tata Diosmanta mañaporqa. Tata Diostaj mañakusqanta uyarerqa. Jinamanta Rebecaqa onqoj rikhurerqa. 22Chaywanpis wawakunaqa mamankoj wijsallanpiraj kashaspa maqanakoj kanku. Chayrayku Rebeca nerqa: Imajtintaj kay jinari? nispa. Chantá Tata Diosta tapurikoj rerqa. 23Tata Diostaj nerqa:

Wijsaykipi kaj wawakunaqa iskay suyuta jatarichenqanku.

Wijsallaykipiraj iskay ayllu t'aqanasqa kashanku.

Ujnin kajqa ujninmanta aswan atiyniyoj kanqa,

kuraj kajtaj sullk'anpa kamachin kanqa, nispa.

24Rebecaj onqokunan p'unchay chayamojtin, payqa iskayta qhepan qhepanta paqarichikorqa. 25Ñawpajta paqarejqa p'aqo, tukuy ukhuntaj thapulla karqa. Chayrayku “Esaú”,#25.25 Esaú: Kay suti hebreo rimaypi niyta munan: Thapulli. nispa suticharqanku. 26Chaymantataj qhepanpachata sullk'anñataj paqarerqa, Esaujpa chaki talonninta ujnin makinwan jap'irisqa. Chayrayku “Jacob” sutiwan suticharqanku.#25.26 Jacob: Kay suti hebreo rimaypi niyta munan: Janq'otiyay chayrí ch'awkiyay. Isaac sojta chunka watayoj kashajtin, warmin Rebeca paypaj wawayoj karqa.

Esaú imatachus jap'inanta chhalarparin

27Chay iskay wawakuna wiñarqanku. Esauqa campo sonqo runa kaspa, k'ita animalkunata sumajta jap'iyta yacharqa. Jacobtajrí kakullaj kasqanrayku, wasillapi kakuyta munaj karqa. 28Isaacqa Esauta astawan munakorqa, k'ita animalta jap'isqanmanta mikhuchisqanrayku. Rebecatajrí Jacobta munakorqa.

29Uj kuti Jacob chuwimanta uchuta wayk'ushajtin, Esauqa monteta risqanmanta sayk'usqa chayamorqa. 30Chantá Jacobta nerqa: Ama jina kaspa, chuwi uchuta wayk'usqaykimanta uj chhikata qoriway ari. Yarqhaywan wañushaniña, nispa. Chayrayku payta “Edom”, nispa suticharqanku.

31Jacobtaj nerqa: Ñawpajta kuraj kaj jina jap'inayki chayaqetaraj vendepuway, nispa.#25.31 Kuraj kaj jina chayaqeta jap'ina manchay munana karqa, chantapis maypaj qhawasqa karqa. Niyta munarqa, tatan wañupojtin pay ayllunmanta cuentayoj kananta. Niyta munallarqataj chayaqeta uj jinatawan jap'inanta. 32Esautaj nerqa: Yarqhaywan wañushaniña. Wañusaj chayqa, kuraj kaj jina jap'inay, ima allintaj kanqa noqapaj? nispa.

33Jacobtajrí kutin kutinta nerqa: Kunanpacha tiluy qopunawaykita, nispa. Esautaj yarqhaywan mana kayta atispa, kuraj churi kaspa jap'inanta Jacobman vendepunanta tilorqa. 34Chantá Jacobqa t'antata, chuwi uchutawan Esauman jaywarqa. Esautaj mikhuspa, ujyaytawan ima riporqa. Ajinata Esauqa kuraj churi jina imatachus jap'inanta pisipaj qhawarqa.

Currently Selected:

Génesis 25: DQDC

Highlight

Copy