Génesis 19

Diosqa Sodomata Gomorratawan chinkachin

1Ña chhapuyaykushajtinña, chay iskaynin angelkuna Sodomaman chayarqanku. Lottaj Sodoma llajtaman yaykuna punkupi tiyarikusharqa. Paykunata rikuytawantaj, pay sayarikorqa. Chantá ñawpaqenkupi pampakama k'umuykuspa, nerqa: 2Wiraqochikuna, wasiypi kunan ch'isi qheparikuwajchej ari. Chaypi chakiykichejta mayllakuyta atinkichej, chantá q'aya tutamanta ripullankichej, nispa. Paykunatajrí nerqanku: Mana, kay plazallapi puñukusqayku, nispa.

3Chaywanpis Lot wasinman pusayta munajtinpuni, paykuna rerqanku. Wasinman chayajtinkutaj, Lotqa sumaj mikhunata wayk'uchiporqa, jinallataj mana levadurayoj t'antata ruwaporqa, paykunataj mikhorqanku.#Gn 18.3-8. 4Chaywanpis manaraj puñushajtinku, Sodoma llajtamanta qharikuna, maltun waynakuna, machu runakunantin ima Lotpa wasinta muyuykorqanku. 5Lotta wajyaspataj, nerqanku: Maytaj kunan ch'isi wasiykiman chayamojkunari? Paykunawan puñuykuyta munayku.#19.5 Paykunawan puñuyta munayku: Sodoma llajtayoj qharikuna khuchiriyoman anchatañapuni qokusqanku. Jinataj waj llajtayojkunata wasiman wajyarikunata manaña maypajchu qhawasqanku. Lv 18.22; 20.13; Dt 23.17-18; Ro 1.26-27. Jawaman orqhomuy, nispa.

6Chantá Lot paykunawan parlaj llojsispa, punkuta sumajta wisq'aykorqa. 7Jinataj paykunata nerqa: Wawqeykuna, ama chay jina millayta ruwaychejchu ari. 8Noqajta iskay ususiykuna tiyapuwan, paykunataj manaraj qharita rejsinkurajchu. Paykunata orqhomusqaykichej, qankunataj paykunawan munasqaykichejta ruwaychej. Kay runakunatarí ama imatapis ruwaychejchu, imajtinchus paykuna wajyarikusqay kanku, nispa.#19.7-8 Chaypacha usuman jina, wasiyojkuna, pitachus wasinkuman wajyarikusqankuta manchay respetowan qhawana aswan karqa warmita maypaj qhawanamanta nisqaqa. Jue 19.23-24.

9Sodoma llajtayojkunarí Lotta kuticherqanku: Jatariy chaymanta. Karu llajtayoj kashaspachu noqaykuta kamachiwasqayku? Kunanqa astawan millaytaraj qanta ruwasqayku paykunamanta nisqaqa, nispa. Paykunataj Lotta maqaj phinkiykuspa, punkuta loqhej qayllaykorqanku. 10Lotpa wasinman chayakojkunatajrí Lotta jap'ispa, wasiman aysaykorqanku, punkutataj wisq'aykorqanku. 11Chantá jawapi kashajkunata, waynakunata, machu runakunatawan ima ñawsayarparicherqanku. Chay runakunataj manaña punkuta tariyta aterqankuchu.

12Chantá iskaynin angelkuna Lotta nerqanku: Aylluykimanta kaypi kankurajchu? Tolqaykikunata, churiykikunata, ususiykikunata, kay llajtapi piniykichá tiyapusunki, chaykunata ima kaymanta orqhospa, karuman pusakapuy. 13Noqayku kay llajtata chinkarparichisqayku, imaraykuchus kay llajtayojkunaj contranta runaj may chhika parlasqanta Tata Dios uyarin. Chayrayku pay kay llajtata chinkarparichinaykupaj kachamuwayku, nispa.

14Chantá Lot, pikunachus ususinkunawan casarakunanku karqa, chay waynakunaman willaj rerqa: Usqhayta kaymanta ayqenachej, imajtinchus Tata Dios kay llajtata chinkarparichenqa kasqa, nispa. Tolqankunatajrí Lotpa nisqanta mana kasorqankuchu, paykunawan pujllakushasqanta yuyasqankurayku.

15Ña sut'iyamushajtin, angelkuna Lotta nerqanku: Usqhayta kaymanta llojsiy. Pusakapuy warmiykita, iskaynin ususiykikunatawan, kay llajtata chinkachishajtiyku ama wañunaykichejpaj, nispa.

16Chaywanpis Lot mana usqhayta puririyta atisqanrayku, angelkuna Lotta, warminta, chantá iskaynin ususinkunatawan ima makinkumanta jap'ispa, llajtamanta jawaman orqhorqanku. Ajinata angelkunaqa paykunata orqhorqanku, Tata Dios paykunamanta khuyakusqanrayku.#2 P 2.7. 17Llajtamanta jawapiña kashajtinkutaj, ujnin kaj ángel Lotta nerqa: Ama wañunaykichejpaj usqhayta ayqeychej. Amallataj qhepaykichejta qhawarikamunkichejchu, valleta rishaspapis ama sayankichejchu. Manachus wañuyta munankichej chayqa, orqoman ayqeychej, nispa.

18Lottajrí nerqa: Wiraqochikuna, ama jina kaspa, uyarillawaychej ari. 19Qankuna kunankama anchatapuni khuyarikuwankichej. Noqawan may k'acha kasqaykichejraykutaj, wañunaymanta kacharichiwankichej. Noqarí mana orqoman ayqeyta atiymanchu. Mana allin kajqa ñanllapiraj taripawanman, wañuymantaj. 20Manachayqa kay qayllallapi uj juch'uy llajta kashan, chaypi pakakuyta atiyman. Niwaychej ari chayllaman ayqekunaykuta. Chay llajtaqa juch'uyllamin, chaypitaj mana wañusajchu, nispa.

21Chantá angelkunamanta ujnin kaj nerqa: Imatachus mañakuwasqaykita uyariyki. Nishawanki, chay llajtata mana chinkachisajchu. 22Chayrayku chayman usqhayta ayqey. Jaqayman chayanaykikama mana imatapis ruwasajrajchu, nispa. Chayrayku chay llajtaj sutenqa Soar nisqa, juch'uy llajta kasqanrayku.

23Inti llojsimushajtinña, Lotqa Soar llajtaman chayarqa. 24Chantá Tata Dios Sodomaman, chantá Gomorraman ima azufreta, nina paratawan parachimorqa.#19.24 Nina, azufre para: Ñawpa Testamentopi Tata Dios ashkha kutita runata ajina juiciowan ñak'arichisqa. Dt 29.23; Sal 11.6; Ez 38.21-22. 25Ajinata pay vallenejpi kaj llajtakunata, chantá chay llajtakunapi tiyakojkunatawan chinkarparicherqa. Tukuy q'omer kajtapis rupharparichillarqataj.#Sab 10.6-8; Mt 10.15; 11.23-24; Lc 10.12; 17.29; 2 P 2.6; Jud 7. 26Lotpa warmintajrí ñanta rishaspa, qhepanta qhawarerqa. Kikinpitaj payqa kachimanta lantiman tukorqa.

27Q'ayantin tutamanta Abrahamqa, maypichus Tata Dioswan parlasqa, chayman kutirerqa. 28Chaynejmantataj Sodomata, Gomorrata, chantá tukuynin valleta ima qhawarispa, rikorqa uj hornomanta jina pampamanta manchayta q'oshñishajta. 29Ajinata Diosqa, maypichus Lot tiyakorqa, chay vallepi llajtakunata chinkarparicherqa. Chaywanpis Abrahammanta yuyarikuspa, chinkarparichinan karqa, chay llajtakunamanta Lotta orqhorqa.

Lotwan warmi wawankunawan

30Chay qhepata Lot Soarllapipuni tiyakuyta manchachikorqa. Chayrayku iskaynin ususinkunawan orqonejman tiyakoj riporqa, chaypitaj paykuna qaqa jusk'upi tiyakorqanku. 31Uj kuti Lotpa kuraj kaj ususin sullk'anta nerqa: Tatanchejqa machuña, manataj kay cheqanejpi qhari kanchu ujkuna jina casarakunanchejpaj. 32Ajinaqa, tatanchejta machaykuchispa, paywan puñuykunachej, paynejta wawayoj kananchejpaj, nispa.

33Chantá chay ch'isipacha tatankuta machaykuchejtinku, kuraj kajqa tatanwan puñuykorqa. Tatantajrí ususin paywan puñuykusqanta, nitaj jatarisqantapis repararqachu. 34Q'ayantintaj kuraj kajqa sullk'anta nerqa: Ch'isi tatanchejwan puñuykorqani. Kunan ch'isitawan tatanchejta machaykuchinallataj, chantá qanñataj paywan puñuykunki, ajinamanta iskayninchej wawayoj kananchejpaj, nispa. 35Chay ch'isi tatankuta machaykuchispataj, sullk'a kajñataj tatanwan puñuykorqa. Tatan Lottaj ususin paywan puñusqanta, nitaj jatarisqantapis repararqachu.

36Ajinata Lotpa iskaynin ususinkuna Lot tatankupaj onqoj rikhurerqanku. 37Kuraj kajtaj wawanta paqarichikuspa, payta Moab sutiwan suticharqa, paymanta mirajkunataj moabitakuna nisqa kanku. 38Sullk'a kajpis wawayojllataj karqa, paytataj suticharqa Ben Amí sutiwan. Chantá paymanta mirajkuna amonitakuna nisqa karqanku.

Currently Selected:

Génesis 19: DQDC

Highlight

Copy